1-2. Baka ni orang Kristian ulih disemaka baka bengunan ti tinggi? (1 Korint 15:58)

 BA TAUN 1978, siti bengunan ti amat tinggi udah didirika ba Tokyo, Jepun. Mayuh orang berunding, nama kebuah bengunan nya enda tumbang taja pan bisi mayuh gempa bumi nyadi ba nengeri nya. Nama resia iya? Bala injinir ngaga pelan bengunan nya ngambika ulih nyadi chukup tegap. Tang ba maya ti sama, bengunan nya ulih fleksibel ngambika enda tumbang maya gempa bumi nyadi. Orang Kristian ulih disemaka baka bengunan ti amat tinggi nya. Baka ni?

² Orang Kristian mesti seimbang bekaul enggau nyadi tegap sereta nyadi fleksibel. Iya patut mengkang tegap sereta seruran keran deka ngasika adat Jehovah enggau standard Iya. (Bacha 1 Korint 15:58.) Iya “sedia deka ngasi” lalu enda alah laban penguji. Tang ba maya ti sama, iya patut “bisi runding ti masuk akal,” tauka fleksibel, lebuh iya ulih tauka patut ngereja nya. (Jas. 3:17) Orang Kristian ke bisi runding ti seimbang enda kelalu terit tauka kelalu fleksibel nyentukka iya ngereja sebarang utai enggau sepeneka ati. Ba artikel tu, kitai deka beratika chara kitai ulih mengkang tegap sereta enda bekinsit. Kitai mega deka beratika lima iti chara ti dikena Sitan ngelemika pengeran kitai sereta chara kitai ulih ngelaban penguji ari iya.

 3. Nitihka Surat Kereja Rasul 15:28, 29, nama adat ke diberi Jehovah?

³ Jehovah endang bisi hak ti pemadu besai kena ngaga adat,  lalu Iya seruran nentuka adat Iya senang dimereti bala nembiak Iya. (Isa. 33:22) Ambika chunto, raban ti ngiring ba abad ti keterubah madahka tiga iti chara alai orang Kristian patut mengkang tegap: (1) enggau nyeliah ari nyembah engkeramba, lalu semina nyembah Jehovah siku aja, (2) enggau ngasika adat Jehovah ke madahka darah nya kudus, lalu (3) enggau ngasika pesan Bup Kudus ke ngasuh kitai nyeliah ari ulah seks ti kamah. (Bacha Surat Kereja Rasul 15:28, 29.) Baka ni orang Kristian kemayaharitu ngasika Jehovah ba tiga iti pekara tu?

 4. Baka ni kitai nunjukka diri semina nyembah Jehovah siku aja? (Pemandang 4:11)

⁴ Kitai nyeliah ari nyembah engkeramba, lalu semina nyembah Jehovah siku aja. Jehovah ngasuh orang Israel ngambika nyembah Iya siku aja. (U-dat. 5:6-10) Lalu lebuh Sitan nguji Jesus, Jesus enggau terang madahka kitai semina patut nyembah Jehovah siku aja. (Mat. 4:8-10) Nya alai, kitai enda nyembah engkeramba. Kitai mega enda nyembah mensia. Nama reti iya? Ambika chunto, ba dunya tu kitai bisi bala tuai pengarap, orang politik, atlet ti tebilang, pelakun, tauka pemusik. Kitai enggai ngumbai sida tu baka petara kitai. Kitai bepiak ba Jehovah lalu nyembah Iya siku aja laban Iya “udah ngaga semua utai.”—Bacha Pemandang 4:11.

 5. Nama kebuah kitai ngasika adat Jehovah ke madahka nyawa enggau darah nya kudus?

⁵ Kitai ngasika adat Jehovah ke madahka nyawa enggau darah nya kudus. Nama kebuah? Laban Jehovah madahka darah nya ngambarka nyawa, siti pemeri ti berega ari Iya. (Lew. 17:14) Lebuh Jehovah terubah iya ngemendarka mensia makai dagin, Iya nangkan sida ngambika enda makai darah. (P-kal. 9:4) Iya nandu baru pesan tu lebuh Iya meri Adat Moses ngagai orang Israel. (Lew. 17:10) Lalu Iya ngasuh raban ti ngiring ba abad ti keterubah meri iring ngagai semua orang Kristian ngambika “nyeliah . . . ari darah.” (SKR. 15:28, 29) Kitai enggau pengabis ati ngasika pesan tu lebuh ngaga pemutus pasal chara berubat ti deka diterima kitai. b

 6. Nama ulih digaga kitai ngambika ulih ngasika standard moral Jehovah ti tinggi?

⁶ Kitai enggau pengabis ati ngasika standard moral Jehovah ti tinggi. (Heb. 13:4) Rasul Paul ngasuh kitai ‘muai abis pengingin perengka tubuh kitai.’ Reti iya, kitai enggau naka ulih muai semua pengingin ti salah. Kitai nyeliah ari meda tauka ngereja sebarang utai ke ulih ngujungka kitai ngereja ulah seks ti kamah. (Kol. 3:5; Jop 31:1) Lebuh kitai bisi pengingin deka ngereja utai ti salah, kitai enggau lengkas nulak sebarang runding tauka ulah ti ulih ngerusak kaul kitai enggau Petara.

 7. Nama utai ti keran deka digaga kitai, lalu nama kebuah?

⁷ Jehovah ngarapka kitai ngasika Iya “ari ati.” (Rom. 6:17) Utai ti diasuh Iya kereja kitai seruran manah ke kitai, lalu kitai enda ulih ngubah adat ke diberi Iya. (Isa. 48:17, 18; 1 Kor. 6:9, 10) Kitai enggau naka ulih ngelantangka ati Jehovah lalu ngayanka ulah ti sama baka pemasmur ke madahka: “Aku mutuska runding deka ngasika adat Nuan belama iya datai ke ujung.” (Mas. 119:112) Taja pia, Sitan nguji deka ngelemika pengeran kitai. Nama sekeda chara ke dikena Sitan?

 8. Baka ni Sitan ngena perinsa ngelemika pengeran kitai?

⁸ Diperinsa. Kena ngelemika pengeran kitai, Sitan nyerang kitai ari segi fizikal sereta emosi.  Tuju iya deka ngemba kitai, iya nya ngerusakka kaul kitai enggau Jehovah. (1 Pet. 5:8) Orang Kristian ba abad ti keterubah diugut, dipalu, sereta dibunuh ketegal pengeran sida ti deka mengkang tetap ati. (SKR. 5:27, 28, 40; 7:54-60) Kemayaharitu Sitan agi terus merinsaka orang. Kitai ulih meda tu ari chara bala penyakal merinsaka bala menyadi Kristian kitai ba Rusia sereta ba menua bukai. Bala penyakal merinsa bala menyadi Kristian kitai ngena mayuh macham chara.

 9. Nama kebuah kitai patut bejimat enggau penguji ti enda nyengala? Beri siti chunto.

⁹ Penguji ti enda nyengala. Kelimpah ari diperinsa, Sitan ngena “panjuk” nipu kitai. (Eps. 6:11) Peratika utai ti nyadi ba siku menyadi lelaki ke benama Bob, ke patut beputung ba sepital. Iya madah ngagai bala lutur, enda ngira nama utai ke nyadi, iya enggai nerima transfusi darah. Lutur bedah iya bebasaka pemutus iya. Taja pia, ba malam sebedau iya dibedah, siku agi lutur betemu enggau Bob pengudah ruang bilik iya pulai ke rumah. Iya madah ngagai Bob, bala lutur engka enda ngena darah tang sida deka nyediaka darah lalu ngena iya enti bisi kecemasan. Lutur nya engka ngumbai Bob deka ngubah runding iya enti nadai ruang bilik iya ba dia. Tang Bob mengkang enggau pemutus iya. Iya madah iya enggai nerima darah enda ngira nama utai ti nyadi.

10. Nama kebuah runding orang ke enda bebasaka adat Jehovah nya amat bahaya? (1 Korint 3:19, 20)

¹⁰ Runding orang ke enda bebasaka adat Jehovah. Enti kitai berunding baka chara orang ke enda bebasaka adat Jehovah, kitai mega engka berengkah enda bedulika Jehovah enggau adat Iya. (Bacha 1 Korint 3:19, 20.) “Penemu-dalam ba dunya tu” kesuah iya nyungkak orang enda ngasika Petara. Sekeda orang Kristian ba Pergamum enggau Tiatira nunda orang ke ngelingi sida ti ngereja ulah seks ti kamah sereta ke nyembah engkeramba. Jesus meri jaku tangkan ti berat ngagai kedua-dua buah raban gempuru nya laban sida enda nulak ulah seks ti kamah. (Pem. 2:14, 20) Kemayaharitu, orang ke ngelingi kitai nguji ngasuh kitai nerima runding sida ti salah nya. Diri sebilik enggau orang ti dikelala kitai engka madahka kitai kelalu terit, lalu ngasuh kitai enda ibuh seruran nitihka adat Jehovah. Ambika chunto, sida engka madahka nadai salah enti kitai nitihka pengingin diri. Sida mega engka madahka standard moral Bup Kudus enda ulih dikena agi.

11. Seraya kitai bediri tegap sereta bebendar ngasika adat Petara, nama patut diseliahka kitai?

¹¹ Kekadang, kitai engka berunding iring ke diberi Jehovah ngagai kitai nya enda chukup terang. Kitai indah engka bisi pengingin deka “ngereja utai ngelui ari utai ke ditulis.” (1 Kor. 4:6) Bala tuai pengarap maya jeman Jesus udah bedosa laban ngereja utai tu. Sida nambahka adat diri empu ngagai Adat Moses, lalu tu ngasuh orang biasa amat tusah deka nitihka adat nya. (Mat. 23:4) Jehovah meri kitai iring ti terang nengah Bup Kudus sereta nengah gerempung Iya. Kitai nadai kebuah deka nambahka utai ngagai iring ke udah diberi Iya. (J-lam. 3:5-7) Nya alai, kitai enda ngereja utai ngelui ari utai ti ditulis dalam Bup Kudus. Lalu kitai mega enda ngaga atur ke bala menyadi Kristian enti utai nya nadai dipinta dalam Bup Kudus.

12. Baka ni Sitan ngena “jaku ti bula ke nadai reti”?

¹² Jaku ti bula. Sitan ngena “jaku ti bula ke nadai reti” sereta “pekara asas ba dunya” tu kena nipu sereta mechah-belahka orang. (Kol. 2:8) Ba abad ti keterubah, tu nyengkaum falsafah ti bepelasarka penemu mensia, ajar orang Judah ti enda bepelasarka Bup Kudus, sereta ajar ke madahka orang Kristian mesti nitihka Adat Moses. Runding tu nipu orang laban iya ngelimpangka orang ari pun penemu-dalam ti  bendar, iya nya Jehovah. Kemayaharitu, Sitan ngena media sereta laman sosial kena ngerembaika teori ti pelesu sereta berita ti bula ti dipadah bala tuai politik. Bisi mayuh cherita ti bula ke baka nya maya timpuh pandemik COVID-19. c Saksi-Saksi Jehovah ke nitihka iring ti diberi gerempung kitai nyeliah ari pengirau ke ditapi orang ti ningaka berita ti pelesu.—Mat. 24:45.

13. Nama kebuah kitai patut bejimat enggau utai ti ulih ngelimpangka kitai?

¹³ Utai ti ngelimpangka kitai. Kitai patut mengkang betumpu ba “utai ke beguna agi.” (Plp. 1:9, 10) Kitai deka masau mayuh jam enggau pengering enti kitai dilimpangka. Utai ti kesuah iya digaga kitai baka makai, ngirup, rekreasi, enggau kereja sekular, ulih nyadi utai ti ngelimpangka kitai enti kitai ngenuluka utai nya ba pengidup kitai. (Luk. 21:34, 35) Nambahka nya, ninting hari kitai ninga sereta macha pasal protes, enggau isu kelikuh ba politik. Kitai patut nentuka diri enda dilimpangka enggau kelikuh ke baka tu. Enti enda, ati enggau runding kitai engka dikachau, lalu kitai engka berengkah nyukung siti piak. Sitan ngena semua chara tu kena ngelemika pengeran kitai ti deka ngereja utai ti betul. Aram kitai beratika chara kitai ulih ngelaban pengawa Sitan lalu mengkang tegap enggau ngasika Jehovah.

14. Nama siti utai ke ulih nulung kitai mengkang bepiak ba Jehovah?

¹⁴ Perundingka kebuah nuan nyerahka diri ngagai Jehovah sereta dibaptisa. Nuan ngereja tu laban nuan deka bepiak ba Jehovah. Kingatka baru utai ke udah nulung nuan yakin nuan udah tetemuka pemendar. Nuan udah ngelala Jehovah lalu nuan berengkah bebasa sereta rinduka Iya ti nyadi Apai nuan ti di serega. Pengarap nuan majak mansang lalu tu meransang nuan ngaga ubah ba pengidup. Nuan badu agi ngereja utai ti dipegedika Jehovah lalu berengkah ngereja utai ti ngerinduka ati Iya. Nuan berasai lantang lebuh nuan nemu Petara udah ngampunka nuan. (Mas. 32:1, 2) Nuan datai begempuru lalu berengkah  bekunsika utai ti manah ke dipelajarka nuan enggau orang bukai. Lalu ketegal nuan udah nyerahka diri ngagai Jehovah lalu dibaptisa, nuan diatu benung bejalai ba jalai ti nuju ngagai pengidup, lalu nuan deka enggau naka ulih nentuka diri terus bejalai ba jalai nya.—Mat. 7:13, 14.

15. Nama kebuah belajar enggau belemati nya penting?

¹⁵ Belajar sereta belematika Jaku Petara. Siti pun kayu ulih bediri tegap enti iya bisi urat ti dalam. Nyadi enti kitai bisi pengarap ti tegap ba Jehovah, kitai ulih mengkang bediri tegap. Lebuh pun kayu nya majak besai, urat iya deka majak dalam sereta ngerembai enggau jauh agi. Lebuh kitai belajar sereta belemati, kitai deka negapka agi pengarap kitai sereta yakin agi chara Petara nya chara ti pemadu manah. (Kol. 2:6, 7) Perundingka chara Jehovah ngiring, ngelalau, sereta nyaga nembiak Iya kelia. Ambika chunto, ba siti genera, Esekiel beratika siku melikat enggau bejimat nyukat Rumah Sembiang. Genera tu negapka agi pengarap Esekiel, lalu tu ngajar kitai sekeda utai ti praktikal pasal chara kitai ulih ngetanka standard Jehovah bekaul enggau sembah ti tuchi. d (Esk. 40:1-4; 43:10-12) Kitai mega bulih penguntung lebuh kitai ngena awak belajar sereta belematika utai ti dalam agi ba Jaku Petara.

16. Baka ni ati ti tegap nyaga Bob? (Masmur 112:7)

¹⁶ Tegapka ati nuan. Raja David madahka iya deka mengkang rinduka Jehovah. Maya nya iya belagu: ‘Aku nadai irau mimit, O Petara.’ (Mas. 57:7) Kitai mega ulih ngembuan ati ti tegap, lalu arapka Jehovah enggau pengabis ati. (Bacha Masmur 112:7.) Peratika baka ni tu udah nulung Bob, ke dipadah tadi. Lebuh bala lutur madahka iya, darah deka disediaka enti bisi kecemasan nyadi, iya tekala nya nyaut sida, enti sida bisi runding mimit pan pasal deka meri iya darah, iya deka ninggalka sepital tekala nya. Udah nya, Bob madahka, “Aku enda kala kakang ati pasal utai ti deka dikereja aku, lalu aku enda irau pasal utai ke engka nyadi.”

17. Nama ulih dipelajarka kitai ari pengalaman Bob? (Peda mega gambar.)

¹⁷ Bob ulih mengkang tegap laban iya udah  ngaga pemutus deka ngasika Jehovah. Iya udah lama ngaga pemutus tu sebedau iya tama sepital. Nama udah nulung iya? Kesatu, iya keran deka ngagaka ati Jehovah. Kedua, iya enggau bejimat belajarka utai ti dipadah Bup Kudus sereta litaricha kitai ti bepelasarka Bup Kudus pasal kebuah nyawa enggau darah nya kudus. Ketiga, iya yakin Jehovah deka ngupah iya ketegal pemutus iya ti deka ngasika adat Petara. Kitai mega ulih ngembuan ati ti tegap enda ngira nama penguji ke ditapi kitai.

18. Baka ni teladan Barak ngajar kitai ngambika arapka Jehovah? (Peda gambar ba mua majalah.)

¹⁸ Arapka Jehovah. Peratika baka ni Barak ulih mujur ketegal iya arapka iring ari Jehovah. Maya nya, orang Israel bedau besedia deka beperang. Sida indah nadai senyata kena beperang, tang Jehovah ngasuh Barak mansang beperang ngelaban tuai soldadu bansa Kanaan ke benama Sisera enggau bala soldadu iya ti bisi mayuh senyata. (P-ulu. 5:8) Siku nabi indu ke benama Deborah ngasuh Barak nurun ari bukit ngagai tanah ti rata lalu beperang ngelaban Sisera enggau 900 buah kerita perang iya. Enti ba tanah ti rata, orang Israel tentu tusah deka belaban enggau kerita perang ti laju nya. Taja pan Barak nemu pasal utai tu, iya terus ngasika iring nya. Seraya bala soldadu nurun ari Bukit Tabor, Jehovah ngasuh ujan nurun enggau bangat. Semua kerita perang Sisera enda ulih bekinsit ketegal tanah ti luchak, lalu Jehovah ngasuh Barak menang. (P-ulu. 4:1-7, 10, 13-16) Baka nya mega, Jehovah deka ngasuh kitai menang enti kitai arap ngagai Iya sereta iring ti diberi Iya nengah gerempung Iya.—U-dat. 31:6.

19. Nama kebuah nuan deka mengkang tegap sereta ngasika Jehovah?

¹⁹ Seagi-agi kitai idup ba sistem dunya tu, kitai patut bebendar bediri tegap. (1 Tim. 6:11, 12; 2 Pet. 3:17) Anang meh nejuka pengeran enggau pengarap kitai nyadi lemi ketegal diperinsa, napi penguji ti enda nyengala, penemu mensia ti enda bebasaka adat Petara, jaku ti bula, sereta utai bukai ke ulih ngelimpangka kitai. (Eps. 4:14) Tang aram meh kitai mengkang bediri tegap, enda bekinsit, lalu seruran rinduka Jehovah sereta ngasika pesan Iya. Ba maya ti sama, kitai patut seimbang. Ba artikel ke nangkanka tu, kitai deka berandauka baka ni Jehovah enggau Jesus nyadi teladan ti sempurna bekaul enggau runding ti seimbang.