Apai aku siku tuai pengarap dalam United Church ba endur kami diau di Kanada. Nyadi ninting pagi hari minggu, iya nganjung aku enggau menyadi indu aku ngagai kelas ke diatur gerija ke bala anak. Udah nya, maya pukul 11:00 pagi, kami duai nitihka apai enggau program sembiang gerija. Maya lemai hari, kami duai nitihka indai ngagai Palan Gempuru. Kami ulih enggau senang beratika bida entara dua iti pengarap nya.

Indai aku bekunsika utai ti udah dipelajarka iya ari Bup Kudus ngagai dua iku kaban rapat iya, iya nya Bob enggau Marion Hutcheson. Lalu seduai iya mega nyadi Saksi-Saksi Jehovah. Ba taun 1958, Menyadi Bob enggau Menyadi Marion mai aku enggau tiga iku anak lelaki seduai iya ngagai Gempuru Besai Entarabansa Divine Will ba New York. Gempuru besai nya dipejalaika pengelama lapan hari. Diatu, aku sedar pengawa nya enda senang ke sida, tang gempuru besai nya siti ari pengingat ti pemadu manah dalam pengidup aku.

Maya aku agi nembiak, kami nupi sapi, babi, bedus, enggau manuk. Aku rindu ngintu bala jelu. Aku berunding deka nyadi lutur jelu. Indai aku madahka tu ngagai siku tuai gempuru. Iya enggau nelap ngingatka aku pasal kami ke benung idup ba “hari ti penudi,” lalu iya nanya: Nama kesan iya ngagai kaul nuan enggau Jehovah enti nuan ngagai universiti  pengelama beberapa taun? (2 Tim. 3:1) Ketegal nya, aku ngaga pemutus enda ngagai universiti.

Aku agi berunding pasal utai ke deka digaga aku pengudah abis sekula menengah. Taja pan aku bisi enggau pengawa nginjil ninting ujung minggu, tang aku enda rindu nginjil. Lalu aku ngasaika diri enda ulih nyadi siku pengerintis. Apai enggau aya aku ke ukai Saksi, ngasuh aku gawa penuh jam ba siti kompeni insuran ti besai di Toronto. Aya aku bisi pangkat ti tinggi dia, nyadi aku nerima pengawa nya.

Ba Toronto, aku ngena mayuh awak kereja sereta begulai enggau orang ke ukai Saksi. Lalu tu udah nagang aku ari seruran datai gempuru sereta nginjil. Terubah iya aku diau enggau aki aku ke ukai Saksi, tang pengudah iya nadai, aku patut ngiga endur diau ke bukai.

Bob enggau Marion udah mai aku ngagai konvensyen kena taun 1958. Seduai iya baka apai indai ke aku. Seduai iya mai aku diau begulai enggau sida sebilik, lalu nulung aku negapka kaul aku enggau Jehovah. Ba taun 1960, aku enggau anak lelaki seduai iya ke benama John dibaptisa. John berengkah ngerintis, lalu tu meransang aku nginjil enggau mayuh agi. Bala menyadi lelaki ba raban gempuru beratika pemansang aku ba pengarap, lalu nyau kelama aku dipilih nyadi tuai Sekula Kereja Teokratik. a

Ba taun 1966, aku jadi enggau Randi Berge, siku pengerintis ti ransing ke keran deka nginjil ba endur ke begunaka mayuh agi penginjil. Tuai ti ngabas amat ibuhka kami duai, iya meransang kami nulung raban gempuru ba Orillia, Ontario. Nya alai kami terus pindah kin.

Sepengudah kami datai ba Orillia, aku nyadi pengerintis biasa baka Randi. Aku pan nyadi ransing baka iya! Pengudah aku bebendar gawa nyadi siku pengerintis ti ransing, aku berengkah ngasaika pengaga ati lebuh ngena Bup Kudus sereta meda orang tetemuka pemendar. Endang ngagaka ati ulih nulung sepasang laki bini ba Orillia ngaga ubah ba pengidup seduai iya sereta nyadi nembiak Jehovah.

Maya aku ngelawa Toronto, aku betemu enggau Arnold MacNamara, iya siku ari bala menyadi lelaki ke ngiring ba Betel. Iya nanya enti kami deka nyadi pengerintis spesial. Aku tekala nya nyaut: “Au, ka! Asal ga ukai ba Quebec!” Maya nya orang ke ngena jaku English ba menua Kanada ngembuan runding ti enda manah ngagai sida ke ngena jaku Perancis ti diau ba nengeri Quebec. Ati aku mega udah dikachau enggau runding ti negatif tu. Maya nya, orang benung angkat ngelaban perintah, lalu dekaka nengeri Quebec pansut ari menua Kanada.

Arnold madah: “Ke diatu pampang opis semina nganjung pengerintis spesial ke Quebec aja.” Aku tekala nya setuju deka mupuk kin. Aku nemu Randi endang bisi minat deka gawa din. Nyau kelama aku sedar, tu meh siti ari pemutus ti pemadu manah dalam pengidup kami duai!

Pengudah enggau kelas Perancis pengelama lima minggu, kami duai Randi enggau sepasang agi laki bini ngagai Rimouski, kira-kira 540 kilometer tunga ke timur laut ari Montreal. Kami agi bisi mayuh utai ke patut dipelajar. Tu ulih dipeda lebuh aku macha sekeda jaku gerah ba gempuru. Ba siti ari jaku gerah nya, aku nyebut pasal konvensyen ti deka datai. Ari ke nyebut kami deka nerima “mayuh bala menyadi ari Austria,” aku nyebut kami deka nerima “mayuh bala menyadi burung unta.” Dalam jaku Perancis, chara nyebut leka jaku “Austria” nyauka sama baka chara nyebut leka jaku “burung unta.”

Bisi empat iku menyadi indu ti bedau kawin, enggau laki bini Huberdeaus, sereta dua iku anak indu seduai iya, datai lalu enggau kami berempat ba Rimouski. Laki bini Huberdeaus nyua siti rumah ti besai lalu semua pengerintis ke diau dia sama nulung mayar sua. Kami ngangau rumah nya ‘Rumah Putih’ laban mua rumah sereta tiang rumah nya burak magang. Kesuah iya, bisi entara 12 iku ngagai 14 iku orang diau dia. Ketegal kami pengerintis spesial, aku enggau Randi suah pansut nginjil apus hari. Nyadi kami amat beterima kasih laban seruran bisi orang ke ulih enggau kami duai ba pengawa nginjil, indah maya lemai hari lebuh musin chelap.

Kami majak rapat enggau bala pengerintis ti tetap ati nya, lalu sida nyadi baka diri sebilik kami. Kekadang kami duduk begulai ngelingi unggun api tauka bisi siti hari alai kami deka manduk begulai. Siku ari menyadi lelaki nya pemusik, nya alai ba malam Hari Enam kami suah belagu sereta betanda.

Mayuh orang ba Rimouski bisi minat belajarka Bup Kudus! Dalam kandang lima taun, kami bisi peluang meda beberapa iku pemelajar Bup Kudus mansang nyentukka dibaptisa. Raban gempuru nya mega majak mansang, lalu bala menyadi ba dia nambah ngagai kira-kira 35 iku penginjil.

Ba Quebec, kami nerima latih ti manah ke nulung kami nyadi penginjil ti manah agi. Kami meda chara Jehovah nulung kami ba pengawa nginjil sereta nyediaka utai ke diguna kami ba pengidup. Nambahka nya, kami belajar rinduka orang ke ngena jaku Perancis, bansa jaku sida, sereta adat sida. Tu nulung kami rinduka adat orang bukai mega.—2 Kor. 6:13.

Tang, kami enda nyangka pampang opis ngasuh kami pindah ngagai Tracadie, endur pesisir timur New Brunswick. Tu siti cabaran laban kami baru aja udah nyain siti kontrak nyua siti apartmen, lalu aku bisi kontrak ngajar part-time ba siti sekula. Nambahka nya, sekeda ari pemelajar Bup Kudus kami baru aja nyadi penginjil, lalu kami mega benung nirika Palan Gempuru.

Kami besampi sepemanjai ujung minggu pasal  pekara nya lalu ngabas Tracadie. Endur nya amat bebida enggau Rimouski. Tang kami ngaga pemutus enti Jehovah deka kami kia, kami deka kia. Kami andalka Jehovah enggau pengabis ati, lalu meda Iya mutarka tiap iti penanggul kami. (Mal. 3:10) Ketegal Randi bisi kaul ti tegap enggau Jehovah, enda berundingka diri empu, sereta nemu betundi, kami senang agi pindah kin.

Raban gempuru ti baru nya semina bisi siku aja tuai gempuru, iya nya Robert Ross. Iya ngerintis dia enggau bini iya, Linda. Lalu seduai iya ngaga pemutus deka terus diau dia pengudah anak seduai iya ti keterubah ada. Taja pan seduai iya patut ngintu anak lelaki seduai iya ke baru ada, seduai iya amat meransang kami laban seduai iya rindu ngelaluka temuai, sereta ransing ba pengawa nginjil.

Pengudah kami duai ngerintis ba Tracadie pengelama dua taun, kami sekali agi nerima tanggung pengawa ti enda dijangka. Kami diasuh ngereja pengawa ngabas raban gempuru. Kami gawa ba pelilih jaku English pengelama tujuh taun. Pengudah nya, kami diasuh gawa ba pelilih jaku Perancis ba Quebec. Léonce Crépeault, iya nya tuai ti ngemataka pengawa ba pelilih kami di Quebec, muji cheramah aku. Tang pengudah nya iya seruran nanya: “Baka ni nuan ulih ngasuh cheramah nuan praktikal agi?” b Komen iya nulung aku betumpu ba chara aku ngajar ngambika nyemetak agi sereta senang dimereti.

Ba taun 1978, aku enggau Konvensyen Entarabansa “Victorious Faith” ba Montreal. Aku seruran deka ingatka tanggung pengawa ke diterima aku ba dia. Aku gawa ba begian nyediaka pemakai. Kami berunding engka bisi 80,000 iku orang ke datai, lalu chara kami nyediaka pemakai ke sida bebida ari suba. Semua utai baru magang: perengka dapur, menu, enggau chara nyediaka pemakai. Kami bisi kira-kira 20 iti peti ais ti besai ti kekadang rusak. Sebedau hari konvensyen ti keterubah berengkah, bisi orang main sukan ba stadium nya. Nya kebuah kami enda ulih tama ngagai stadium nya kena nyediaka semua utai nyentuk ngagai tengah malam. Lalu kami patut ngidupka oven sebedau rerak tawas kena nyediaka makai pagi. Kami amat lelak, tang aku udah belajarka mayuh utai ari pengawa sida ti bebendar, sifat sida ti manah, sereta ulah sida ti nemu betundi. Kami agi bekaban nyentukka diatu. Endang ngagaka ati ulih enggau konvensyen ti penting tu ba Quebec, alai pengawa perinsa ti balat nyadi entara taun 1940 enggau 1960!

Aku belajarka mayuh utai ari bala tuai ti ngemata  ke sama enggau aku maya konvensyen ti besai ba Montreal. Pengelama setaun, David Splane, ke diatu gawa nyadi siku ari Raban ti Ngiring nyadi tuai ti nyaga konvensyen. Ba konvensyen ke nangkanka nya, lebuh aku diasuh nyadi tuai ti nyaga konvensyen, Menyadi David nyukung atur nya.

Ba taun 2011, pengudah aku enggau Randi gawa pengelama 36 taun ngabas raban gempuru, aku diasuh nyadi pengajar ba Sekula ke Tuai Gempuru. Dalam kandang dua taun, kami udah tinduk ba 75 iti endur ti bebida, tang pengorbanan kami enda lebu ngapa. Ba ujung tiap minggu, bala tuai gempuru amat gaga ati laban sida ulih ngasaika Raban ti Ngiring ibuhka kaul sida enggau Jehovah.

Udah nya, aku ngajar ba Sekula Penginjil Perintah Petara. Bala pemelajar kesuah iya berasai irau sereta lelak enggau jadual sida ti kisuk: sida patut enggau kelas pengelama tujuh jam dalam sehari. Udah nya sida patut ngaga kereja rumah pengelama tiga jam ninting lemai. Kelimpah ari nya, sida mega patut ngaga empat tauka lima iti tugasan ninting minggu. Aku enggau pengajar ke bukai nerangka, sida enda ulih ngereja nya enti nadai tulung ari Jehovah. Aku deka seruran ingatka reaksi bala pemelajar nya. Sida amat tekenyit lebuh sida bepanggai ba Jehovah, sida ulih ngereja mayuh agi ari ke dijangka sida.

Pengibuh indai aku ke orang bukai nulung bala pemelajar Bup Kudus iya ngaga pemansang. Lalu tu mega nulung apai aku ngubah runding iya bekaul enggau pemendar. Tiga hari pengudah indai aku nadai, kami tekenyit lebuh meda apai aku datai ngagai Palan Gempuru ngambika ulih ninga cheramah, lalu iya terus datai ngagai gempuru pengelama 26 taun. Taja pan apai aku enda kala dibaptisa, tang bala tuai gempuru madahka, iya seruran orang ti keterubah ke datai ngagai gempuru ninting minggu.

Indai aku teladan ti manah ke aku sereta ke bala menyadi indu aku. Semua tiga iku menyadi indu aku enggau laki sida nyembah Jehovah enggau tetap ati. Dua iku menyadi indu aku gawa ba pampang opis, siku ba Portugal lalu siku agi ba Haiti.

Diatu aku enggau Randi nyadi pengerintis spesial ba Hamilton, Ontario. Lebuh kami ngereja pengawa ngabas raban gempuru, kami gaga ati enggau bala menyadi dia ngaga datai ngabas, sereta ngajar Bup Kudus. Diatu kami gaga ati ulih meda bala pemelajar Bup Kudus kami empu ngaga pemansang. Seraya kami bekaban enggau bala menyadi Kristian ba raban gempuru kami ti baru, kami berasai diperansang lebuh meda chara Jehovah nyukung sida ba maya ti senang enggau tusah.

Lebuh kami ngenang baru, kami berasai amat beterima kasih laban mayuh bala menyadi ngayanka pengibuh ngagai kami duai. Ketegal nya, kami nguji ngayanka diri “amat ibuhka” orang bukai, lalu meransang sida nyembah Jehovah enggau naka ulih sida. (2 Kor. 7:6, 7) Ambika chunto, ba siti ruang bilik, indai, anak lelaki, enggau anak indu udah gawa penuh jam ke Jehovah. Aku nanya apai sida sekalika iya kala berunding deka nyadi pengerintis. Iya madah, iya udah nyukung tiga iku pengerintis, iya nya bini enggau dua iku anak iya. Nyadi aku nanya: “Ba runding nuan, sapa ulih nyukung sida enggau manah agi, nuan tauka Jehovah?” Aku meransang iya ngasaika pengaga ati ti diasaika ruang bilik iya. Enam bulan udah nya, iya nyadi pengerintis.

Aku enggau Randi deka terus ‘madahka pasal kuasa enggau pengering Jehovah ngagai semua turun-menurun jemah ila,’ lalu kami ngarapka sida deka gaga ati gawa ke Jehovah baka ke udah diasaika kami.—Mas. 71:17, 18.