1-2. (a) Nama jaku tangkan ke diberi Jesus ngagai bala murid iya? (b) Nama kebuah bala murid ninggalka Jesus? (Peda mega gambar.)

 “ATI amat ransing, tang tubuh lemi.” a (Mat. 26:41b) Lebuh Jesus nyebut jaku nya, iya nunjukka diri faham kitai enda sempurna sereta tentu deka ngaga penyalah. Tang jaku iya mega siti jaku tangkan ke kitai: Anang kelalu yakin enggau diri empu. Beberapa jam sebedau Jesus nyebut jaku nya, bala murid iya besemaya sida enda sekali-kali deka ninggalka iya. (Mat. 26:35) Sida bisi motif ti manah. Tang sida enda sedar, maya napi situasi ti tusah, pengeran sida deka ngereja utai ti betul ulih lenyau enggau jampat. Lalu tu ulih ngujungka sida ngereja utai ti salah. Nya alai, Jesus nangkan sida: “Anang ngetu bejaga sereta seruran besampi, ngambika kita enda alah laban penguji.”—Mat. 26:41a.

² Sayau amat, bala murid Jesus enda mengkang bejaga. Lebuh Jesus ditangkap, nama digaga sida? Kati sida mengkang enggau Jesus, tauka kati sida nyadi takut lalu ngerarika diri? Ketegal sida enda mengkang bejaga, sida ngereja utai ke enda disadang sida empu, iya nya sida rari ninggalka Jesus.—Mat. 26:56.

3. (a) Ngambika ulih mengkang setia ngagai Jehovah, nama kebuah kitai patut nyeliah ari nyadi kelalu yakin enggau diri empu? (b) Nama deka dikerandauka kitai dalam artikel tu?

³ Kitai patut nyeliah ari nyadi kelalu yakin enggau diri empu. Endang amat, kitai tentu enggai ngereja utai ke deka ngemediska ati Jehovah. Tang kitai mega enda sempurna, lalu senang diuji  ngereja utai ti salah. (Rom. 5:12; 7:​21-23) Kitai engka diuji ngereja utai ti salah ba maya ti enda dijangka kitai. Nyadi, ngambika ulih mengkang setia ngagai Jehovah enggau Anak Iya, kitai patut nitihka jaku tangkan Jesus, iya nya mengkang bejaga ngambika kitai enda alah laban penguji. Artikel tu ulih nulung kitai ngereja nya. Kesatu, kitai deka berandauka nama situasi ke mesti diseliahka kitai. Kedua, kitai deka berandauka baka ni kitai ulih nyaga diri empu ari penguji. Lalu, ketiga, kitai deka berandauka baka ni kitai ulih mengkang bejaga.

BEJAGA MEH ENGGAU PENGELEMI NUAN

4-5. Nama kebuah kitai patut bejimat ngambika enda ngereja indah penyalah ti mit?

⁴ Indah penyalah ti mit ulih ngelemika kaul kitai enggau Jehovah. Penyalah ti mit nya mega ulih ngujungka kitai ngereja dosa ti besai.

⁵ Semua kitai enda ulih rari ari penguji. Semua kitai bisi pengelemi diri empu, lalu sekeda ari pengelemi nya amat ulih nguji kitai ngambika ngereja utai ti salah. Ambika chunto, sekeda orang engka benung belaban enggau penguji deka ngereja ulah seks ti kamah. Ke bukai engka belaban enggau penguji deka ngereja utai ti kamah, baka ngeluchu tauka meda pornografi. Bisi mega ke belaban enggau pengelemi diri, baka jampat ringat, sumbung, tauka takutka mensia. Baka ke dipadah James, “tiap iku orang diuji lebuh pengingin iya empu ngumpan iya sereta narit ati iya.”—Jas. 1:14.

6. Nama kebuah kitai patut jujur enggau diri empu?

⁶ Kati nuan nemu nama pengelemi nuan ke engka ulih ngasuh nuan alah laban penguji? Enti kitai ngumbai diri nadai pengelemi, tauka ngumbai diri amat kering sereta ulih ngelaban sebarang penguji, runding nya amat bahaya. (1 Jhn. 1:8) Kingatka, Paul madah, indah sida “ke diiring kuasa kudus,” engka alah laban penguji enti sida enda mengkang bejaga. (Gal. 6:1) Nya alai, kitai patut jujur enggau diri empu, lalu ngaku pengelemi diri.—2 Kor. 13:5.

7. Kitai patut meri perhatian ti lebih agi ngagai nama? Padahka siti chunto.

⁷ Pengudah kitai nemu pengelemi kitai, nama patut dikereja kitai? Bebendar agi berusaha ngambika ulih ngelaban penguji nya. Peratika chunto tu. Maya jeman Bup Kudus, begian ti pemadu lemi ba dinding kuta, iya nya pintu iya. Nya kebuah mayuh jejaga diengkah ba pintu kena nyaga pengelikun kuta nya. Baka nya mega, kitai patut meri perhatian ti lebih agi ngagai pengelemi kitai ngambika ulih ngelaban penguji.—1 Kor. 9:27.

 BAKA NI KITAI ULIH NYAGA DIRI EMPU ARI PENGUJI?

8-9. Nama patut digaga lelaki ti biak ke dipadah ba Jaku-Dalam bagi 7 ngambika ulih nyeliah ari ngereja dosa ti besai? (Jaku-Dalam 7:​8, 9, 13, 14, 21)

⁸ Baka ni kitai ulih nyaga diri empu ari penguji? Peratika utai ke ulih dipelajarka kitai ari lelaki ti biak, ke disebut ba Jaku-Dalam bagi 7. Iya ngereja ulah seks ti kamah enggau siku indu ti enda bemoral. Ayat 22 madahka, lelaki nya nitihka indu nya “tekala nya.” Tang kebendar iya, ba ayat ke sebedau nya, lelaki nya udah ngaga sekeda pemutus ti enda manah ke belubah-lubah ngujungka iya ngereja dosa.

⁹ Nama utai ke digaga lelaki nya sebedau iya ngereja dosa ti besai? Kesatu, maya lemai hari, iya “bejalai ba jalai raya semak sukut ti alai [indu ti enda bemoral nya] diau.” Kedua, iya bejalai mansa rumah indu nya. (Bacha Jaku-Dalam 7:​8, 9.) Ketiga, lebuh iya meda indu nya, iya enda rari. Iya nejuka indu nya nyium iya, lalu iya ninga lebuh indu nya madahka diri baru udah nyerahka pemeri. Engka indu nya dekaka lelaki nya ngumbai iya orang ti manah. (Bacha Jaku-Dalam 7:​13, 14, 21.) Enti sema lelaki nya enda ngereja semua utai tu, iya tentu ulih nyaga diri ari penguji nya sereta enda bedosa.

10. Baka ni sesiku orang kemayaharitu engka ulih ngaga penyalah ti sama baka lelaki ti biak nya?

¹⁰ Cherita ke ditulis Solomon nunjukka, utai tu ulih nyadi ngagai sapa-sapa ke nyembah Jehovah. Sesiku orang engka ngereja dosa ti besai, lalu ngumbai utai nya nyadi “tekala nya.” Tauka, iya engka madah: “Aku enda nyangka utai nya ulih nyadi.” Taja pia, lebuh iya berunding baru pasal utai ke udah nyadi, iya engka sedar iya udah ngaga sekeda pemutus ti enda manah, ke ngujungka iya ngereja dosa ti besai nya. Engka iya milih begulai enggau orang ke enda rinduka Jehovah. Engka sekeda pemerindang ke dipilih iya, laman web ke dilawa iya, tauka endur ke digagai iya, enda manah ke orang Kristian. Pia mega, iya engka udah ngetu besampi, macha Bup Kudus, datai begempuru, tauka nginjil. Baka lelaki ti biak ke dipadah ba Jaku-Dalam nya, iya enda ngereja dosa “tekala nya,” tang iya ngereja dosa pengudah ngaga mayuh pemutus ti salah.

11. Nama patut digaga kitai ngambika enda ngereja dosa?

¹¹ Nama ulih dipelajarka kitai? Kitai ukai semina deka nyeliahka dosa nya aja, tang kitai mega deka nyeliahka semua utai ke ulih ngujungka kitai ngereja dosa nya. Tu meh utai ke diterangka Solomon pengudah iya madahka utai ke nyadi ngagai lelaki ti biak enggau indu ti enda bemoral nya. Solomon meri jaku lalau tu: “Anang segau-segau begigaka [indu ti enda bemoral nya].” (J-lam. 7:25) Iya mega madahka: “Kejangka diri jauh ari indu ke baka nya! Datai semak ngagai mua pintu iya deh kita enda tau!” (J-lam. 5:​3, 8) Nyadi, ngambika kitai enda ngereja dosa, kitai patut nyeliahka sebarang utai tauka situasi ke ulih ngujungka kitai ngereja penyalah. b Tu engka nyengkaum nyeliahka sekeda situasi tauka aktiviti ke enda salah ke orang Kristian tang ulih ngujungka kitai diuji lalu ngaga penyalah.—Mat. 5:​29, 30.

12. Nama pemutus ke digaga Jop, lalu baka ni nya nulung iya bejaga? (Jop 31:1)

¹² Ngambika kitai ulih nyeliahka situasi ke ulih ngujungka kitai bedosa, kitai patut ngaga siti pemutus. Kitai keran deka nitihka pemutus nya ngambika ulih mengkang bejaga. Tu meh utai ke digaga Jop. Iya “besumpah madahka  diri enggai merening” ngagai indu bukai kelimpah ari bini iya enggau ati ti kamah. (Bacha Jop 31:1.) Ketegal iya keran deka nitihka pemutus iya, tu nulung iya nyeliahka diri ari ngereja pengawa butang. Kitai mega keran deka nyeliahka nama-nama utai ke ulih ngujungka kitai diuji.

13. Nama kebuah kitai patut bejimat enggau utai ke diperundingka kitai? (Peda mega gambar.)

¹³ Kitai mega patut nyaga runding diri. (P-sut. 20:17) Sekeda orang ngumbai enda salah enti kitai ngambarka diri ngereja utai ti salah, seagi-agi kitai enda ngereja penyalah nya. Tang runding ke baka nya salah! Enti kitai majak berunding pasal utai ti salah nya, tu ulih ngasuh pengingin deka ngereja penyalah nya majak besai. Enti kitai ngereja tu, kitai ke ngasuh diri empu tusah deka ngelaban penguji nya. Endang amat, kekadang kitai engka bisi runding ti salah. Tang lebuh utai nya nyadi, kitai patut enggau jejampat muai runding nya, lalu nganti iya enggau runding ti manah. Lebuh kitai ngereja nya, kitai ulih nyaga diri empu ari ngereja dosa ti besai. Tu ketegal kitai enda nejuka runding ti salah nyadi siti pengingin ti tusah diseliahka.—Plp. 4:8; Kol. 3:2; Jas. 1:​13-15.

14. Nama agi ulih nulung kitai mengkang bejaga?

¹⁴ Nama agi utai ke ulih digaga kitai kena mengkang bejaga? Kitai patut yakin enggau pengabis ati, lebuh kitai ngasika Jehovah, nya seruran deka mai penguntung ke kitai. Kekadang, kitai engka tusah deka ngasuh runding enggau pengingin kitai sejalai enggau utai ti dikedekaka Petara. Taja pia, enti kitai bebendar ngereja utai ti dikedekaka Petara, pengidup kitai deka gaga agi.

15. Baka ni ngemansangka pengingin deka ngereja utai ti betul deka nulung kitai mengkang bejaga?

¹⁵ Kitai patut ngemansangka pengingin deka ngereja utai ti betul. Enti kitai belajar “begedika utai ti jai” sereta “rinduka utai ti ngena,” kitai deka keran agi ngereja utai ti betul lalu nyeliahka situasi ke ulih ngujungka kitai bedosa. (Amo. 5:15) Enti kitai bisi pengingin deka ngereja utai ti betul, kitai deka besedia agi ngelaban penguji lebuh kitai napi situasi ke enda disadang tauka enda ulih diseliahka kitai.

16. Baka ni pengawa rohani ulih nulung kitai mengkang bejaga? (Peda mega gambar.)

 ¹⁶ Baka ni kitai ulih ngemansangka pengingin ti betul? Kitai ulih ngereja nya lebuh kitai mengkang kisuk ngereja utai ke deka negapka pengerindu kitai ke Jehovah. Lebuh kitai datai begempuru sereta enggau pengawa nginjil, kitai negapka pengingin kitai ke deka ngelantangka ati Jehovah. Lalu kitai mega enda diuji ngereja utai ti salah. (Mat. 28:​19, 20; Heb. 10:​24, 25) Lebuh kitai macha sereta belajarka Bup Kudus enggau belematika iya, kitai negapka pengerindu kitai ke utai ti manah sereta begedika utai ti jai. (Jos. 1:8; Mas. 1:​2, 3; 119:​97, 101) Kingatka mega, Jesus madah ngagai bala murid iya: “Anang ngetu bejaga sereta seruran besampi, ngambika kita enda alah laban penguji.” (Mat. 26:41) Lebuh kitai besampi ngagai Apai kitai ti ba serega, kitai meri Iya peluang nulung kitai. Lalu, kitai mega negapka pengeran kitai ti deka ngelantangka ati Iya.—Jas. 4:8.

MENGKANG BEJAGA

17. Nama pengelemi ke tusah deka dibuai Peter?

¹⁷ Kitai engka ulih muai abis sekeda ari pengelemi kitai. Tang kitai engka patut terus belaban enggau sekeda pengelemi ke bukai. Peratika chunto Rasul Peter. Ketegal iya takutka mensia, iya tiga kali madahka diri enda ngelala Jesus. (Mat. 26:​69-75) Peter baka ke udah mujur mutarka pengelemi nya, laban udah nya, iya enggau berani nginjil pasal Jesus ba mua Raban Kunsil Orang Judah. (SKR. 5:​27-29) Tang beberapa taun pengudah nya, iya badu makai enggau orang Kristian ke bebansa bukai laban iya takutka runding orang Kristian ke bebansa Judah. (Gal. 2:​11, 12) Pengelemi Peter datai baru. Tu engka nunjukka, kebendar iya Peter enda ulih mutarka abis pengelemi tu.

18. Nama ulih nyadi taja pan kitai udah bebendar mutarka sekeda pengelemi kitai?

¹⁸ Baka Peter, kekadang kitai engka patut belaban enggau pengelemi ke dikumbai kitai udah mujur diputarka. Ambika chunto, siku menyadi lelaki ngaku: “Aku udah badu meda pornografi pengelama 10 taun. Aku yakin aku udah mutarka pengelemi nya. Tang kebendar iya, pengelemi aku baka siku jelu ti liar ke benung belalai lalu nganti maya ti chun kena nyerang mansa iya.” Tang manah amat, menyadi lelaki nya enda putus asa. Iya sedar iya patut  berusaha belaban enggau pengelemi nya ninting hari, lalu iya engka patut terus ngereja nya seagi-agi iya idup ba dunya ti jai tu. Enggau tulung ari bini iya enggau bala tuai gempuru, iya ulih bebendar agi nyeliahka diri ari pornografi.

19. Nama ulih digaga kitai enti kitai agi bisi pengelemi ke tusah deka diputarka?

¹⁹ Nama ulih digaga kitai enti kitai agi bisi pengelemi ke tusah deka diputarka? Ngambika pengelemi nya enda ngujungka kitai bedosa, kitai mesti nitihka jaku lalau Jesus, iya nya: “Anang ngetu bejaga.” Enti kitai enda ngetu bejaga, tu deka nulung kitai nyaga diri ari penguji. Indah ba maya kitai ngasaika diri kering, kitai patut terus nyeliahka situasi ke ulih ngujungka kitai diuji. (1 Kor. 10:12) Terus ngereja utai ke udah nulung nuan ngelaban pengelemi nya. “Uji meh enggau bebendar” ngambika nuan ulih mengkang bejaga.—2 Pet. 3:14.

PENGUNTUNG KE DIULIH LEBUH KITAI MENGKANG BEJAGA

20-21. (a) Nama penguntung ke diulih kitai enti kitai mengkang bejaga? (b) Enti kitai bebendar ngelaban penguji, nama deka digaga Jehovah ke kitai? (2 Korint 4:7)

²⁰ Kitai ulih andal, enti kitai mengkang bejaga, nya ulih mai penguntung ke kitai. Enti kitai bedosa, kitai engka semina ngelantangka diri enda lama aja. Tang enti kitai idup nitihka chara ti dikedekaka Jehovah, kitai deka gaga agi ati. (Heb. 11:25; Mas. 19:8) Tu ketegal kitai digaga ngambika idup nitihka chara Jehovah. (P-kal. 1:27) Lebuh kitai idup nitihka chara ti ngelantangka ati Jehovah, kitai deka ngembuan ati ti beresi sereta bisi peluang idup belama iya jemah ila.—1 Tim. 6:12; 2 Tim. 1:3; Jud. 20, 21.

²¹ Endang amat, “tubuh lemi.” Tang tu ukai reti iya, kitai enda ulih ngereja nama-nama kena mutarka pengelemi kitai. Jehovah seruran besedia deka meri kitai pengering ke diguna. (Bacha 2 Korint 4:7.) Peratika, Petara meri kuasa ke ngelui ari pengering mensia. Tang sebedau nya, kitai mesti ngena pengering diri empu kena ngelaban penguji. Enti kitai ngereja ungkup kitai, kitai ulih yakin Jehovah deka nyaut sampi kitai lalu meri kitai pengering ti lebih agi ba maya kitai begunaka nya. (1 Kor. 10:13) Au, enggau tulung ari Jehovah, kitai ulih mengkang bejaga ngambika enda alah laban penguji.