1-2. Sapa Sadok? (1 Bansa Israel 12:​22, 26-28)

 GAMBARKA 340,000 iku lelaki begelumu. Sida begelumu kena ngelantik David nyadi raja ba serata menua Israel. Pengelama tiga hari, sida diau ba kawasan bebukit semak Hebron. Sida ketawa, berandau, sereta belaguka lagu puji ti ngagaka ati ke Jehovah. (1 Ban. 12:39) Entara orang ba raban nya, bisi siku lelaki ti biak ke benama Sadok. Mayuh orang engka enda sedar Sadok bisi dia. Taja pia, Jehovah bisi beratika iya, lalu Jehovah dekaka kitai nemu Sadok bisi dia. (Bacha 1 Bansa Israel 12:​22, 26-28, ari nota kaki.) a Nyadi, sapa Sadok?

² Sadok siku imam ke gawa enggau Imam Besai Abiatar. Jehovah meri Sadok mayuh penemu-dalam sereta penau kena meretika peneka Iya. (2 Sam. 15:27) Lebuh orang begunaka nasihat, sida deka datai ngiga Sadok. Sadok mega siku lelaki ti berani. Dalam artikel tu, kitai deka belajarka chara Sadok ngayanka pemerani.

 3. (a) Nama kebuah bala penyembah Jehovah begunaka pemerani? (b) Nama deka dikerandauka kitai dalam artikel tu?

³ Ba hari ti penudi tu, Sitan deka majak agi nyerang bala nembiak Petara. (1 Pet. 5:8) Nyadi, kitai begunaka pemerani seraya kitai nganti Jehovah ngerusak Sitan enggau sistem dunya ti jai tu. (Mas. 31:24) Aram kitai beratika tiga chara kitai ulih neladan pemerani Sadok.

NYUKUNG PERINTAH PETARA

 4. Nama kebuah bala nembiak Jehovah begunaka pemerani ngambika ulih nyukung Perintah Petara? (Peda mega gambar.)

⁴ Ketegal kitai nembiak Jehovah, kitai nyukung Perintah Petara enggau pengabis ati. Tang kena ngereja nya, kitai begunaka  pemerani. (Mat. 6:33) Ambika chunto, ba dunya ti jai tu, kitai begunaka pemerani ngambika ulih nitihka standard Jehovah ba pengidup, sereta bekunsika Berita Manah pasal Perintah Petara. (1 Tes. 2:2) Pia mega, dunya tu majak bepechah-belah ketegal isu politik. Nyadi, kitai begunaka pemerani ngambika enda bepiak enggau sapa-sapa ba isu tu. (Jhn. 18:36) Mayuh ari bala nembiak Jehovah napi penanggul ba penatai pemisi, dipalu, tauka dijil ketegal sida enggai enggau politik tauka nyadi soldadu.

 5. Nama kebuah Sadok begunaka pemerani kena nyukung David?

⁵ Sadok ukai aja ngagai Hebron ketegal deka ngerami David ke udah nyadi raja. Iya mai senyata iya lalu sedia deka beperang. (1 Ban. 12:38) Iya sanggup enggau David beperang lalu ngelindung orang Israel ari munsuh sida. Sadok engka nadai mayuh pengalaman nyadi soldadu, tang iya lelaki ti amat berani.

 6. Baka ni pemerani David nulung Sadok nyadi berani mega? (Masmur 138:3)

⁶ Baka ni siku imam baka Sadok, belajar nyadi berani? Iya ngelala mayuh lelaki ti kering sereta berani. Nyadi, iya tentu bisi belajar ari teladan sida. Ambika chunto, David enggau berani “nguluka orang Israel beperang.” Ketegal nya, semua orang Israel keran deka nyukung iya enggau pengabis ati. (1 Ban. 11:​1, 2) David seruran bepanggai ba Jehovah kena nulung iya ngelaban bala munsuh iya. (Mas. 28:7; bacha Masmur 138:3.) Sadok mega belajar ari teladan lelaki ti bukai ke berani, baka Jehoiada enggau anak iya Benaiah, sereta 22 iku tuai suku ke nyukung David. (1 Ban. 11:​22-25; 12:​26-28) Semua lelaki tu keran deka nyukung David nyadi raja sida, lalu sida mega nyaga David.

 7. (a) Kemayaharitu, nama teladan pemerani ke ulih ditunda kitai? (b) Baka ke dipeda ba video, nama ulih dipelajarka nuan ari teladan Menyadi Nsilu?

⁷ Lebuh kitai berundingka bala menyadi ke  enggau berani nyukung Jehovah enggau Perintah Iya, kitai mega diperansang nyadi berani. Lebuh Raja kitai, Jesus Kristus, ba dunya, iya enggai masuk champur enggau sistem politik dunya Sitan. (Mat. 4:​8-11; Jhn. 6:​14, 15) Iya seruran bepanggai ba Jehovah ngambika ulih ngereja utai ti betul. Kemayaharitu, kitai mega bisi mayuh teladan bala menyadi lelaki ti biak ke enggai nyadi soldadu tauka enggai enggau pengawa politik. Nuan engka ulih macha pasal pengalaman sida ba jw.org. b

TULUNG BALA MENYADI KRISTIAN NUAN

 8. Ni maya bala tuai gempuru begunaka pemerani ngambika ulih nulung bala menyadi?

⁸ Bala nembiak Jehovah rindu nulung pangan diri. (2 Kor. 8:4) Taja pia, kekadang tu begunaka pemerani. Ambika chunto, lebuh perang nyadi, bala tuai gempuru tempatan nemu, bala menyadi sida begunaka peransang, sukung, sereta engka utai fizikal, tauka utai rohani. Ketegal bala tuai gempuru rinduka bala menyadi, sida sanggup berambunka nyawa diri kena meri utai ke diguna bala menyadi. (Jhn. 15:​12, 13) Lebuh sida ngereja tu, sida neladan pemerani Sadok.

 9. Baka ke dipadah ba 2 Samuel 15:​27-29, David ngasuh Sadok ngereja nama? (Peda mega gambar.)

⁹ Nyawa David dalam bahaya. Anak iya, Absalom, keran deka munuh David ngambika iya ulih nyadi raja. (2 Sam. 15:​12, 13) David patut ninggalka Jerusalem tekala nya! David madah ngagai bala pegawai iya: “Aram kitai mupuk. Enti enda, nadai siku pan kitai ulih ngelepaska diri ari Absalom.” (2 Sam. 15:14) Lebuh bala pegawai iya belabuh mupuk, David sedar, sekeda ari sida patut mengkang diau ba Jerusalem ngambika ulih madah ngagai iya pasal pelan Absalom. Nyadi, iya ngasuh Sadok enggau bala imam ke bukai pulai ngagai Jerusalem ngambika ulih nyadi  pengintip. (Bacha 2 Samuel 15:​27-29.) Tang sida patut bejimat. Utai ke diasuh David kereja bala imam amat bahaya. Absalom nya orang ti ego, bedendam, sereta siku pengkhianat. Nyadi, gambarka utai ke deka digaga Absalom enti iya nemu Sadok enggau bala imam ke bukai benung nulung David ngintip iya!

10. Baka ni Sadok enggau orang bukai nyaga David?

¹⁰ David ngasuh Sadok enggau Husai, siku agi kaban iya ti setia, nulung iya ngereja siti pelan. (2 Sam. 15:​32-37) Nitihka pelan nya, Husai patut pepura nyukung Absalom lalu meri iya cadangan kena nyerang David. Tu deka meri David awak ngambika iya ulih besedia nyerang sida. Udah nya, Husai madah ngagai Sadok enggau Abiatar pasal pelan nya. (2 Sam. 17:​8-16) Lalu Sadok enggau Abiatar nganjung pesan nya ngagai David. (2 Sam. 17:17) Enggau tulung ari Jehovah, Sadok enggau bala imam ke bukai nulung ngelindung David ari bahaya.—2 Sam. 17:​21, 22.

11. Baka ni kitai ulih neladan pemerani Sadok lebuh nulung bala menyadi kitai?

¹¹ Enti kitai diasuh nulung bala menyadi kitai ba maya ti bahaya, baka ni kitai ulih nunjukka pemerani baka Sadok? (1) Titihka iring. Ba situasi ke baka nya, penting agi enti kitai beserakup. Titihka iring ke diberi pampang opis tempatan. (Heb. 13:17) Bala tuai gempuru patut seruran beratika iring pasal chara nyediaka diri enti bisi penusah nyadi, sereta utai ke patut digaga enti bisi penusah nyadi. (1 Kor. 14:​33, 40) (2) Mengkang berani tang bejimat. (J-lam. 22:3) Berunding sebedau betindak. Enggau naka ulih nyaga keselamatan. (3) Bepanggai ba Jehovah. Kingatka meh, Jehovah dekaka nuan enggau bala menyadi nuan mengkang selamat. Iya ulih nulung nuan meri bantu ngagai bala menyadi enggau selamat.

12-13. Nama ulih dipelajarka nuan ari pengalaman Viktor enggau Vitalii? (Peda mega gambar.)

¹² Peratika utai ke nyadi ngagai dua iku tuai  gempuru ke benama Viktor enggau Vitalii. Seduai iya patut nganjung pemakai enggau ai ngagai bala menyadi ba Ukraine. Ku Viktor madahka: “Kami ngiga pemakai ba semua endur. Kesuah iya, kami ulih ninga orang betimbak semak kami. Siku menyadi lelaki meri pemakai ke disimpan ba bilik setor iya. Ketegal nya, bala menyadi bisi utai ke diguna sida ngambika ulih betan. Lebuh kami benung nyimpan barang dalam lori, siti roket labuh kira-kira 20 meter ari kami. Sepemanjai hari nya, aku bebendar besampi ngagai Jehovah minta pemerani ke diguna aku ngambika ulih terus nulung bala menyadi.”

¹³ Ku Vitalii madahka: “Kami begunaka mayuh pemerani. Pejalai aku ti keterubah iya begunaka 12 jam. Aku besampi ngagai Jehovah sepemanjai pejalai nya.” Vitalii amat berani, tang iya mega amat bejimat. Ku iya agi: “Aku bebendar minta Jehovah meri aku penemu-dalam sereta nulung aku ngambika enda ngambi risiko ti enda patut, lalu mengkang ngasika piak bekuasa. Aku semina deriba ba jalai ti dikemendarka piak bekuasa. Pengarap aku ditegapka lebuh aku meda bala menyadi gawa begulai. Sida ngalihka utai ti mempang jalai, ngumpul sereta nyimpan pemakai, gari, sereta utai bukai ke dalam lori. Sida mega nyediaka aku enggau Viktor pemakai sereta endur berehat.”

MENGKANG SETIA NGAGAI JEHOVAH

14. Nama kesan iya ba kitai enti orang ti dikesayauka kitai ninggalka Jehovah?

¹⁴ Siti ari penguji ti pemadu tusah, iya nya lebuh diri sebilik tauka kaban rapat kitai ninggalka Jehovah. (Mas. 78:40; J-lam. 17:22) Enti kitai amat rinduka orang nya, kitai engka tusah deka tan napi situasi nya. Taja pia, teladan Sadok ti setia ulih negapka kitai.

15. Nama kebuah Sadok begunaka pemerani ngambika ulih mengkang setia ngagai Jehovah? (1 Raja 1:​5-8)

¹⁵ Sadok mengkang setia ngagai Jehovah taja pan kaban rapat iya, Abiatar, milih deka ninggalka Jehovah. Utai tu nyadi ba pengujung pemerintahan David. Lebuh David udah tuai sereta nyauka mati, anak iya, Adonijah, nguji deka ngaga diri nyadi raja, taja pan Jehovah udah milih Solomon nyadi raja. (1 Ban. 22:​9, 10) Abiatar milih deka nyukung Adonijah. (Bacha 1 Raja 1:​5-8.) Enggau nya, Abiatar nunjukka diri enda setia ukai aja ngagai David, tang mega ngagai Jehovah! Sadok tentu amat tusah ati sereta asa ati. Pengelama lebih ari 40 taun, iya enggau Abiatar udah gawa begulai nyadi imam. (2 Sam. 8:17) Seduai iya mega bisi peluang nyaga “peti lampang batu Adat” begulai. (2 Sam. 15:29) Seduai iya mega udah nyukung David nyadi raja sereta ngereja mayuh utai ke Jehovah.—2 Sam. 19:​11-14.

16. Nama utai ke engka udah nulung Sadok mengkang setia?

¹⁶ Sadok mengkang setia ngagai Jehovah taja pan Abiatar enda. David nemu iya ulih seruran arapka Sadok. Lebuh pelan Adonijah ditemu, David ngasuh Sadok, Natan, enggau Benaiah, nulung Solomon nyadi raja. (1 Raj. 1:​32-34) Sadok tentu berasai diperansang enggau teladan bala penyembah Jehovah ke bukai baka Natan, ke mega setia ngagai Jehovah sereta nyukung Raja David. (1 Raj. 1:​38, 39) Lebuh Solomon nyadi raja, iya “ngasuh Sadok nyadi imam, nganti Abiatar.”—1 Raj. 2:35.

17. Baka ni nuan ulih neladan Sadok enti bisi orang ke semak enggau nuan ninggalka Jehovah?

¹⁷ Baka ni nuan ulih neladan Sadok enti orang ke semak enggau nuan ninggalka Jehovah? Tunjukka ngagai Jehovah, nuan deka setia ngagai Iya. (Jos. 24:15) Jehovah deka  meri nuan pengering enggau pemerani ngambika ulih ngereja utai ti betul. Bepanggai meh ba Jehovah nengah sampi, lalu mengkang semak enggau bala menyadi ke tetap setia ngagai Iya. Jehovah amat beterima kasih laban nuan setia ngagai Iya, lalu Iya deka ngupah nuan.—2 Sam. 22:26.

18. Nama utai ke dipelajarka nuan ari pengalaman Marco enggau Sidse?

¹⁸ Peratika pengalaman Marco enggau bini iya, Sidse. Dua iku anak indu seduai iya ninggalka Jehovah. Ku Marco madahka: “Ari maya anak nuan ada, nuan amat sayauka sida. Nuan deka ngereja sebarang utai kena nyaga sida ari utai ti bahaya. Nyadi, lebuh bala anak milih deka ninggalka Jehovah, nya amat ngenusahka ati.” Ku iya agi: “Tang Jehovah seruran nulung kami betan. Iya nentuka kami duai sama bela meransang pangan diri. Lebuh aku berasai lemi, bini aku ulih meransang aku. Lalu lebuh bini aku berasai lemi, aku ulih meransang iya.” Ku Sidse nambah: “Kami tentu enda ulih tan enti Jehovah enda meri kami pengering ke diguna. Lebuh dua iku anak indu kami ninggalka Jehovah, aku balat tusah ati. Aku mega nyalahka diri empu. Nyadi, aku madahka Jehovah pasal asai ati aku. Enda lama udah nya, aku betemu enggau siku menyadi indu. Kami duai udah betaun-taun enda betemu enggau pangan diri. Iya mansang ngagai aku, ngengkahka jari ba bau aku, meda aku, lalu madahka: ‘Ingat meh Sidse, tu ukai salah nuan!’ Enggau tulung ari Jehovah, aku ulih terus nyembah Iya enggau ati ti gaga.”

19. Nama utai ti keran dikereja nuan?

¹⁹ Jehovah dekaka semua penyembah Iya nyadi berani baka Sadok. (2 Tim. 1:7) Taja pia, Iya enggai kitai bepanggai ba pengering diri empu. Jehovah dekaka kitai bepanggai ba Iya. Nyadi, lebuh nuan napi situasi ti begunaka pemerani, bepanggai meh ba Jehovah. Lalu nuan ulih andal, Iya deka nulung nuan nyadi berani baka Sadok!—1 Pet. 5:10.