ARTIKEL DIPELAJAR 30
LAGU 36 Jaga meh Ati Kitai
Utai ke Ulih Dipelajar ari Bala Raja Israel
‘Bala nembiak Aku deka, sekali agi, meda bida entara orang ke lurus enggau orang ke jai, entara orang ke betuaika Petara enggau orang ke enda betuaika Iya.’—MAL. 3:18.
TUJU ARTIKEL TU
Lebuh kitai belajar pasal bala raja orang Israel, tu deka nulung kitai nemu nama utai ke patut digaga ngambika ulih ngelantangka ati Jehovah.
1-2. Nama utai ke dipadah Bup Kudus pasal sekeda raja Israel?
BUP KUDUS madahka kitai pasal lebih ari 40 iku lelaki ke merintah nyadi raja Israel. a Bup Kudus enggau terus terang madahka sekeda utai ke digaga sida. Ambika chunto, indah sekeda raja ti manah ngereja utai ti jai. Peratika chunto Raja David. Jehovah madahka: “Nembiak Aku David, ke taluk ngagai Aku enggau pengabis ati iya, . . . lalu semina ngereja utai ti dikemendarka Aku.” (1 Raj. 14:8) Tang David butang enggau bini orang, lalu iya mega ngaga pelan ngambika laki indu nya dibunuh ba perang.—2 Sam. 11:4, 14, 15.
2 Taja pia, Bup Kudus mega bisi madah pasal sekeda utai ti manah ke dikereja bala raja ti enda mengkang tetap ati ngagai Jehovah. Peratika chunto Rehoboam. Ba mata Jehovah, “Rehoboam ngereja utai ti jai.” (2 Ban. 12:14) Tang Rehoboam ngasika Jehovah lebuh Jehovah ngasuh iya enda belaban enggau sepuluh raban bansa Israel, lalu nejuka sida milih raja sida empu. Iya mega negapka mayuh kuta ba perintah iya ngambika nyaga bala nembiak Jehovah ari munsuh sida.—1 Raj. 12:21-24; 2 Ban. 11:5-12.
3. Nama tanya ti penting ke patut diperundingka kitai, lalu nama deka dikerandauka kitai dalam artikel tu?
3 Bisi siti tanya ti penting ke patut diperundingka kitai: Enti bala raja Israel ngereja utai ti manah enggau utai ti jai, baka ni Jehovah nentuka raja nya tetap ati tauka enda? Saut ngagai tanya nya deka nulung kitai nemu utai ke patut dikereja kitai ngambika ulih ngelantangka ati Jehovah. Kitai deka berandauka tiga iti pekara ke diperundingka Jehovah kena nentuka sekalika raja nya tetap ati tauka enda. (1) Kati iya rinduka Jehovah enggau pengabis ati? (2) Lebuh iya ngereja penyalah, kati iya nesal ati? Lalu (3) kati iya mengkang nyembah Jehovah enggau chara ti dikedekaka Jehovah?
RINDUKA JEHOVAH ENGGAU PENGABIS ATI
4. Nama siti bida entara raja ti tetap ati enggau raja ti enda tetap ati?
4 Bala raja ti ngelantangka ati Jehovah nyembah Iya enggau pengabis ati. b Raja Jehosapat ‘udah enggau naka ulih betuaika Jehovah.’ (2 Ban. 22:9) Bup Kudus madahka tu pasal Josiah: ‘Nadai raja ti dulu menya bisi udah kala betuaika Jehovah enggau pengabis ati, baka Raja Josiah.’ (2 Raj. 23:25) Baka ni enggau Raja Solomon, ke ba pengujung pengidup iya ngereja utai ti jai? Bup Kudus madahka: ‘Iya enda tetap ati ngagai Jehovah Petara iya.’ (1 Raj. 11:4) Siku agi raja ke enda tetap ati nya Abijah. Bup Kudus madahka: ‘Iya enda tentu taluk ngagai Jehovah Petara iya.’—1 Raj. 15:3.
5. Nama reti nyembah Jehovah enggau pengabis ati? Terangka.
5 Nyadi, nama reti nyembah Jehovah enggau pengabis ati? Orang ke nyembah Jehovah enggau pengabis ati ukai semina nyembah Petara ketegal iya nemu iya patut ngereja nya. Tang iya nyembah Jehovah ketegal iya amat rindu sereta bebasaka Jehovah. Lalu iya deka terus rindu sereta bebasaka Jehovah sepemanjai pengidup iya.
6. Baka ni kitai ulih mengkang rinduka Jehovah enggau pengabis ati? (Jaku-Dalam 4:23; Matthew 5:29, 30)
6 Baka ni kitai ulih neladan bala raja ke tetap ati, ke mengkang rinduka Jehovah enggau pengabis ati? Kitai mesti nyeliahka sebarang utai ti ulih ngasuh kitai enda mengkang tetap ati ngagai Jehovah. Ambika chunto, kitai patut bejimat enggau pemerindang ke dipilih kitai. Kitai mega patut bejimat lebuh milih bala kaban. Enti kaban ke dipilih kitai rinduka duit, runding ke baka nya ulih ngachau kitai. Enti kitai sedar bisi utai ke ngasuh pengerindu kitai ke Jehovah majak kurang, kitai patut enggau jampat ngubah runding enggau ulah kitai.—Bacha Jaku-Dalam 4:23 ari nota kaki c; Matthew 5:29, 30.
7. Nama kebuah kitai mesti nyeliahka sebarang utai ti ulih ngelemika pengerindu kitai ngagai Jehovah?
7 Kitai enda patut nejuka ati kitai bebagi. Enti kitai enda bejimat, kitai ulih nipu diri empu. Kitai engka berunding, enti kitai mengkang kisuk ngereja pengawa ke Jehovah, kitai enda senang dipengaruhi enggau utai ti jai. Gambarka tu, nuan benung ba luar rumah, lalu cuaca amat angat. Lebuh nuan tama ke rumah, nuan masang aircond. Kati nuan deka nejuka pintu rumah nuan tebuka? Tentu enda, laban nuan enggai udara angat nya tama. Kitai ulih nyemaka tu enggau kaul kitai enggau Jehovah. Ngereja utai ti manah aja enda chukup kena mengkang semak enggau Jehovah. Baka kitai ke enggai nejuka udara angat tama ngagai rumah, kitai mesti nulak sebarang utai ari dunya tu ke ulih ngelemika pengerindu kitai ngagai Jehovah.—Eps. 2:2.
NESAL ATI KE DOSA KITAI
8-9. Nama reaksi Raja David enggau Raja Hesekiah lebuh seduai iya diberi jaku lalau? (Peda mega gambar.)
8 Baka ke disebut ba genteran 1, Raja David bisi ngereja penyalah ti besai. Tang, lebuh Nabi Natan madah ngagai David asai ati Jehovah pasal penyalah iya, David enggau baruh ati nesal ati. (2 Sam. 12:13) Ari utai ke ditulis David ba Masmur 51, kitai nemu David amat nesal ati enggau utai ke udah digaga iya. David enda pepura nesal ati kena nipu Natan tauka kena nyeliahka diri ari diukum.—Mas. 51:3, 4, 17, peda nota kaki ke tajuk Masmur 51.
9 Raja Hesekiah mega bedosa ngagai Jehovah. Bup Kudus madahka: “Hesekiah kelalu sumbung. . . . Ketegal nya menua Judah enggau nengeri Jerusalem kena ukum.” (2 Ban. 32:25) Nama kebuah Hesekiah nyadi sumbung? Engka iya ngumbai diri manah agi ketegal pengaya iya, laban iya udah ngalahka orang Asiria, tauka ketegal iya udah digeraika ari penyakit ti ulih ngujungka iya mati. Engka penyumbung iya ke udah ngasuh iya ngeso pengaya iya ngagai orang Babilon. Ketegal nya, Nabi Isaiah madahka Jehovah ringat enggau iya. (2 Raj. 20:12-18) Baka David, Hesekiah mega enggau baruh ati nesal ati. (2 Ban. 32:26) Asil iya, nama runding Jehovah pasal Hesekiah? Jehovah ngumbai iya raja ti tetap ati, ke ‘ngereja utai ti ngerinduka ati Jehovah.’—2 Raj. 18:3.
Raja David enggau Raja Hesekiah enggau baruh ati nesal ati pengudah seduai iya diberi jaku lalau pasal dosa seduai iya (Peda genteran 8-9)
10. Nama reaksi Raja Amasiah lebuh diberi jaku lalau?
10 Enda baka David enggau Hesekiah, Raja Amasiah ari Judah ngereja utai ti betul, “tang enggau ati ti lembau.” (2 Ban. 25:2) Nama utai ti salah ke digaga iya? Pengudah Jehovah nulung iya ngalahka orang Edom, Amasiah besugang nyembah petara pelesu sida. d Lebuh siku nabi ke dianjung Jehovah ngelalau iya, Amasiah enggai ninga lalu muru iya.—2 Ban. 25:14-16.
11. Nitihka 2 Korint 7:9, 11, nama patut digaga kitai ngambika Jehovah ngampun kitai? (Peda mega gambar.)
11 Nama ulih dipelajarka kitai ari semua chunto tu? Kitai patut nesal ati ke dosa kitai, sereta bebendar nyeliah ari ngereja dosa nya baru. Nama reaksi ke patut dikembuan kitai enti sema kitai nerima jaku lalau ari bala tuai gempuru, indah ba pekara ke dikumbai kitai mit? Kitai enda patut ngumbai Jehovah enda rinduka kitai tauka bala tuai gempuru sengaja ngiga penyalah kitai. Indah bala raja Israel ti manah pan begunaka jaku lalau enggau disiplin. (Heb. 12:6) Nyadi, lebuh kitai nerima jaku lalau, kitai patut (1) ngayanka pemaruh ati lalu nerima jaku lalau nya, (2) ngaga ubah ti patut, lalu (3) terus nyembah Jehovah enggau pengabis ati. Enti kitai nesal ati ke dosa kitai, Jehovah tentu ngampun kitai.—Bacha 2 Korint 7:9, 11.
Lebuh kitai nerima jaku lalau, kitai patut (1) ngayanka pemaruh ati lalu nerima jaku lalau nya, (2) ngaga ubah ti patut, lalu (3) terus nyembah Jehovah enggau pengabis ati (Peda genteran 11) g
NYEMBAH JEHOVAH ENGGAU CHARA TI DIKEDEKAKA IYA
12. Nama utai ti ngasuh bala raja ti tetap ati bebida?
12 Bala raja ke dikumbai Jehovah tetap ati nya nyembah Iya enggau chara ti dikedekaka Iya. Lalu sida mega meransang bala rayat sida ngereja utai ti sama. Endang amat, baka ke udah dipelajarka kitai, sida bisi ngereja penyalah. Tang sida semina nyembah Jehovah siku aja, lalu sida bebendar muai patung petara pelesu ari menua sida. e
13. Nama kebuah Jehovah madah Raja Ahap enda tetap ati?
13 Baka ni enggau bala raja ke dikumbai Jehovah enda tetap ati? Kati semua utai ke digaga sida jai magang? Enda. Ambika chunto, lebuh Raja Ahap ti jai ninga Nabot dibunuh ketegal iya, nama utai ke digaga iya? Iya bisi ngayanka pemaruh ati sereta berasai tusah ati. (1 Raj. 21:27-29) Iya mega udah nirika mayuh kuta lalu nulung orang Israel menang ba perang. (1 Raj. 20:21, 29; 22:39) Tang bisi utai ti amat jai ke digaga Ahap. Ketegal iya mendingka bini iya, iya meransang bala rayat nyembah petara pelesu. Lalu iya enda kala nesal ati ke pengawa tu.—1 Raj. 21:25, 26.
14. (a) Nama kebuah Jehovah ngumbai Raja Rehoboam enda tetap ati? (b) Nama utai ti sama entara bala raja ti enda tetap ati?
14 Peratika siku agi raja ke enda tetap ati, iya nya Raja Rehoboam. Baka ke udah disebut ba genteran 2, iya ngereja mayuh utai ti manah lebuh iya nyadi raja. Tang pengudah iya nyadi raja ti kering, iya badu ngasika Adat Jehovah lalu belabuh nyembah petara pelesu. (2 Ban. 12:1) Pengudah nya, kekadang iya nyembah Jehovah, lalu kekadang iya nyembah petara pelesu. (1 Raj. 14:21-24) Ukai semina Raja Rehoboam enggau Raja Ahap aja ke ngetu nyembah Jehovah enggau chara ti dikedekaka Iya. Kebendar iya, mayuh bala raja Israel ke enda tetap ati nyembah petara pelesu lalu meransang orang bukai ngereja utai ti sama. Endang amat, ba mata Jehovah, utai ti nentuka sekalika raja nya manah tauka enda, iya nya sida nyembah Iya enggau chara ti dikedekaka Iya.
15. Nama kebuah Jehovah deka kitai nyembah Iya enggau chara ti dikedekaka Iya?
15 Nama kebuah pengawa sembah amat penting ba Jehovah? Siti ari kebuah iya nya, bala raja bisi tanggungjawap nulung bala rayat sida nyembah Jehovah enggau chara ti betul. Pia mega, lebuh sida nyembah petara pelesu, nya ngujungka sida ngereja dosa ke bukai, lalu ngintu orang bukai enggau enda adil. (Hos. 4:1, 2) Nambahka nya, bala raja Israel enggau bala rayat sida nembiak ke udah diserahka ngagai Jehovah. Nyadi, lebuh sida enda tetap ati ngagai Jehovah lalu nyembah petara pelesu, Bup Kudus nyemaka nya baka pengawa butang. (Jer. 3:8, 9) Lebuh sesiku orang ngereja pengawa butang, iya balat ngemediska ati kaling pengidup iya. Baka nya mega, enti siku ari nembiak Jehovah ke udah nyerahka diri ngagai Iya enda tetap ati, nya balat ngemediska ati Jehovah. f—U-dat. 4:23, 24.
16. Ba mata Jehovah, nama utai ti ngasuh orang ke lurus bebida ari orang ke jai?
16 Nyadi, nama utai ke ulih dipelajarka kitai? Endang amat, kitai mesti nyeliahka sebarang utai ti bisi kaul enggau pengarap ti pelesu. Tang kitai mesti seruran nyembah Jehovah nitihka chara ti dikedekaka Iya sereta mengkang kisuk gawa ke Iya. Nabi Malaki enggau terang madahka utai ti ngasuh orang ke manah bebida ari orang ke jai. Iya nulis: ‘Bala nembiak Aku deka, sekali agi, meda bida entara orang ke lurus enggau orang ke jai, entara orang ke betuaika Petara enggau orang ke enda betuaika Iya.’ (Mal. 3:18) Amat, kitai deka Jehovah ngumbai kitai orang ke lurus. Nyadi, kitai patut bejimat ngambika enda neju nama-nama utai, nyengkaum penyalah tauka pengelemi kitai ngasuh kitai badu nyembah Jehovah. Enti kitai badu nyembah Jehovah, nya pan siti dosa ti besai!
17. Nama kebuah kitai patut bejimat lebuh milih kaling pengidup?
17 Enti nuan agi bujang dara, lalu bisi runding deka kawin, jaku Malaki ulih nulung nuan milih kaling pengidup ti sesuai. Perundingka tu: Taja pan sesiku orang bisi sifat ti manah, tang enti iya enda nyembah Petara ti bendar, kati Jehovah deka ngumbai iya lurus? (2 Kor. 6:14) Enti nuan kawin enggau orang tu, kati iya deka nulung nuan mengkang tetap ati ngagai Jehovah? Ambika chunto, bala bini Raja Solomon engka bisi sekeda sifat ti manah. Tang sida enda nyembah Jehovah. Lalu ketegal sida, Solomon belubah-lubah nyembah petara pelesu.—1 Raj. 11:1, 4.
18. Nama utai ke patut diajar apai indai ngagai bala anak sida?
18 Apai indai, kena meh cherita pasal bala raja dalam Bup Kudus nulung bala anak nuan bisi pengingin nyembah Jehovah. Tulung bala anak nuan faham, raja ti diterima Jehovah nya, raja ke nyembah Iya sereta meransang bala rayat nyembah Iya mega. Ari jaku enggau ulah nuan, tunjukka meh ngagai bala anak nuan, pengawa rohani baka belajarka Bup Kudus, datai begempuru, sereta nginjil nya utai ti pemadu penting ba pengidup. (Mat. 6:33) Tulung meh bala anak nuan ngembuan kaul sida empu enggau Jehovah lalu nyembah Jehovah ketegal sida empu ke deka, ukai ketegal nitihka nuan. Enti enda, sida engka ngumbai nyembah Jehovah nya enda penting, tauka indah ngetu nyembah Iya.
19. Nama peluang ke agi bisi ngagai sida ke udah ngetu nyembah Jehovah? ( Peda mega kutak “Nuan Ulih Pulai Baru ngagai Jehovah!”)
19 Enti sesiku orang udah ngetu nyembah Jehovah, kati tu reti iya, iya nadai agi peluang nyadi kaban Jehovah? Enda, laban iya ulih nesal ati lalu nyembah Jehovah baru. Tang kena ngereja tu, iya patut baruh ati lalu nerima tulung ari bala tuai gempuru. (Jas. 5:14) Taja pan tu begunaka mayuh usaha, tang semua usaha nya deka berbaloi enti nya ulih nulung iya nyadi kaban Jehovah baru!
20. Nama runding Jehovah pasal kitai enti kitai neladan bala raja ti tetap ati?
20 Nama utai ke udah dipelajarka kitai pasal bala raja Israel? Kitai ulih nyadi baka bala raja ti tetap ati enti kitai mengkang nyembah Jehovah enggau pengabis ati. Belajar meh ari penyalah kitai, nesal ati, sereta ngaga ubah ti patut. Kingatka meh, kitai patut nyembah Jehovah siku aja, enggau chara ti dikedekaka Iya. Tu amat penting! Enti nuan mengkang setia ngagai Jehovah, Iya deka ngumbai nuan orang ti lurus.
LAGU 45 Peragam Atiku
a Dalam artikel tu, rambai jaku “bala raja Israel” merujuk ngagai semua raja ke merintah nembiak Jehovah, enda ngira sekalika sida merintah perintah dua raban bansa Judah, perintah sepuluh raban bansa Israel, tauka 12 iti raban nya.
b PENERANG LEKA JAKU: Leka jaku “ati” dalam Bup Kudus kesuah iya merujuk ngagai utai ba dalam runding sereta ati orang nya. Tu nyengkaum chara iya berunding, utai ti dikinginka iya, ulah iya, motif iya ngereja sesiti utai, sereta juluk ati ke deka dijapai iya.
c Jaku-Dalam 4:23, NWT: “Ari semua utai ti patut dijaga, jaga meh ati nuan, laban ari nya penatai pengidup nuan.”
d Ba jeman kelia, bala raja ari bansa bukai suah nyembah petara menua ke dialahka sida.
e Raja Asa ngereja mayuh penyalah ti besai. (2 Ban. 16:7, 10) Taja pia, Bup Kudus madahka, Asa ngereja utai ti betul ba mata Jehovah. Taja pan keterubah iya Asa nulak jaku lalau ke diberi nabi ke dianjung Jehovah, tang iya engka bisi nesal ati pengudah nya. Jehovah meda mayuh agi pemanah Asa ari ke meda penyalah ke udah digaga Asa. Tang utai ti penting nya, Asa nyembah Jehovah siku aja, lalu enggau bebendar muai patung petara pelesu ari perintah iya.—1 Raj. 15:11-13; 2 Ban. 14:2-5.
f Kitai nemu pengawa sembah nya penting ba Jehovah laban dua iti pesan ti keterubah ba Adat Moses nagang orang Israel ari nyembah sapa-sapa tauka sebarang utai, kelimpah ari Jehovah.—P-sut. 20:1-6.
g PENERANG PASAL GAMBAR: Siku tuai gempuru ti biak madahka diri irau lebuh iya nemu pasal tebiat ngirup menyadi lelaki ti tuai nya. Menyadi lelaki ti tuai nya nerima jaku lalau enggau baruh ati, ngaga ubah, sereta terus nyembah Jehovah enggau tetap ati.
