1, 2. (a) Nama kebuah jaku ba Ulang Adat 6:4 tebilang? (b) Nama kebuah Moses nyebut jaku nya?

BERATUS-RATUS taun, orang bansa Judah udah ngena leka jaku ba Ulang Adat 6:4 nyadi sebagi ari sampi sida. Sampi tu dikumbai Shema, laban nya leka jaku ti keterubah ba ayat nya dalam jaku Hebrew. Mayuh orang Judah nyebut sampi tu ninting hari, maya pagi enggau maya lemai, kena nunjukka sida semina nyembah Petara aja.

² Jaku nya bisi dikena Moses lebuh iya meri cheramah ti penudi ngagai bansa Israel. Kena taun 1473 sebedau Kristus ada, bansa Israel benung ba menua Moap, sedia deka meraka Sungai Jordan, lalu ngambi Menua ti Udah Disemaya. (U-dat. 6:1) Moses udah ngiring orang Israel pengelama 40 taun, lalu iya deka sida berani ngambika ulih napi penusah ti deka datai. Sida patut arapka Petara sida, Jehovah, sereta tetap ati ngagai Iya. Nya alai, jaku Moses ti penudi meransang sida ngereja nya. Pengudah iya madah pasal Sepuluh Pesan  sereta adat bukai ari Jehovah, Moses meri orang Israel jaku tangkan ti berat ke dibacha kitai ba Ulang Adat 6:4, 5. (Bacha.)

3. Nama tanya ti deka dikerandauka kitai ba artikel tu?

³ Orang Israel nemu, Jehovah Petara sida endang “siku aja.” Orang Israel ke tetap ati nyembah seiku Petara, Petara aki ini sida. Tang, nama kebuah Moses nangkan sida pasal Jehovah Petara endang “siku aja”? Nama kaul entara pemendar enggau rinduka Petara kitai enggau pengabis ati, pengabis semengat sereta pengabis pengering kitai? Lalu baka ni jaku ba Ulang Adat 6:4, 5 mega dituju ngagai kitai kemaya hari tu?

4, 5. (a) Nama reti rambai jaku “siku aja”? (b) Baka ni Jehovah nya enda sebaka enggau petara orang bansa bukai?

⁴ Seiku aja. Rambai jaku “siku aja” reti iya nadai orang ke sebaka enggau Jehovah. Nama kebuah Moses ngena rambai jaku tu? Lebuh Moses nyebut rambai jaku nya, iya ukai berandau pasal ajar Triniti ke enda sejalai enggau ajar Bup Kudus. Tang iya deka ngingatka orang Israel, Jehovah nya Penempa serega enggau bumi sereta Pemerintah dunya raya. Semina Iya aja Petara ti bendar, lalu nadai petara bukai ke baka Iya. (2 Sam. 7:22) Nya alai jaku Moses ngingatka orang Israel, sida patut nyembah Jehovah aja. Sida enda patut nunda orang ke idup ngelingi sida, ke nyembah mayuh petara sereta petara indu ti pelesu. Orang nya pechaya, petara sida ulih bekuasa atas sekeda alam.

⁵ Ngambika chunto, orang Ejip nyembah petara mata panas Ra, petara indu langit Nut, petara bumi Geb, petara Sungai Nil Hapi, nyengkaum mayuh jelu. Jehovah nunjukka Iya besai agi ari petara pelesu nya lebuh Iya ngenataika Sepuluh Tulah. Baal nya petara ari semua petara orang Kanaan, ke dikumbai sida ngepunka pengidup. Iya mega dikumbai petara langit, ujan sereta kabut. Ba mayuh endur, orang bepanggai ba Baal ngambika ngibun sida. (P-pau. 25:3) Orang Israel nemu Petara sida, Petara ti bendar endang “siku aja.”—U-dat. 4:35, 39.

6, 7. Nama agi reti bukai “siku,” lalu baka ni Jehovah nunjukka Iya “siku”?

⁶ Enda Berubah sereta Taluk. Leka jaku “siku” dalam rambai jaku “siku aja” mega reti iya, Jehovah seruran tau dikearapka lalu Iya ngamatka utai ti disemaya Iya. Petara Jehovah enda berubah tauka enda tusah dijangka. Iya seruran tetap ati, enda berubah, taluk sereta bendar. Ngambika chunto, Iya besemaya ngagai Abraham, peturun iya deka idup ba Menua ti Udah Disemaya. Lalu Jehovah ngaga mayuh kereja ajih kena ngamatka semaya nya. Empat ratus tiga puluh taun  pengudah ngaga semaya nya, tuju Jehovah mengkang enda berubah.—P-kal. 12:1, 2, 7; P-sut. 12:40, 41.

⁷ Beratus-ratus taun udah nya, Jehovah ngumbai orang Israel nya saksi Iya lalu madah ngagai sida: ‘Aku endang Petara ti siku aja. Kita nadai petara bukai tang semina Aku aja, nemuka menya tauka jemah ila.’ Jehovah mega enggau terang madahka tuju Iya enda berubah lebuh Iya nyebut: ‘Aku endang Petara belama iya.’ (Isa. 43:10, 13; 44:6; 48:12) Orang Israel endang bisi peluang ti besai ulih nyembah Petara ti enda berubah sereta seruran taluk! Kitai bisi peluang ti sama kemaya hari tu.—Mal. 3:6; Jas. 1:17.

8, 9. (a) Nama utai ti dikedekaka Jehovah ari penyembah Iya? (b) Baka ni Jesus nunjukka jaku Moses nya berat?

⁸ Amat, Moses ngingatka orang Israel, pengerindu sereta pengibuh Jehovah ke sida enda berubah. Nya alai, Jehovah ngarapka sida nyembah Iya seiku aja sereta rinduka Iya enggau pengabis ati, semengat, sereta pengering. Apai indai patut ngajar bala anak sida pasal Jehovah ba sebarang maya ngambika anak sida deka nyembah Jehovah aja.—U-dat. 6:6-9.

⁹ Jehovah enda kala ngubah tuju Iya, nya alai Iya endang enda ngubah utai ti dikedekaka Iya ari bala penyembah Iya ti bendar. Enti kitai deka Jehovah lantang ati enggau sembah kitai, kitai enda tau enda nyembah Iya aja sereta rinduka Iya enggau pengabis ati, semengat, sereta pengering. Jesus madahka tu pesan ti pemadu besai. (Bacha Mark 12:28-31.) Aram kitai berandauka chara kitai ulih nunjukka diri pechayaka Jehovah Petara kitai “endang siku aja” ngena pengawa kitai.

10, 11. (a) Nama reti nyembah Jehovah seiku aja? (b) Baka ni nembiak Hebrew ba menua Babilon nunjukka diri nyembah Jehovah aja?

¹⁰ Jehovah nya Petara kitai ti seiku aja. Nya alai, kitai semina nyembah Iya aja. Kitai enda tau nyembah petara bukai tauka ngena sebarang ajar tauka jalai pengarap ti pelesu dalam sembah kitai ngagai Iya. Iya tinggi agi ari petara bukai tauka bekuasa agi ari petara bukai. Iya aja Petara ti bendar. Nya alai, kitai patut nyembah Iya aja.—Bacha Pemandang 4:11.

¹¹ Dalam bup Daniel, kitai macha pasal tiga iku nembiak lelaki Hebrew, Daniel, Hananiah, Misael, enggau Asariah. Sida nunjukka diri nyembah Jehovah aja lebuh sida enggai makai pemakai ke dikumbai penyembah Jehovah enda tuchi. Lalu tiga iku kawan Daniel enggai meremi ngagai engkeramba emas ke digaga Nebukadnesar. Ba sida, Jehovah patut dikenuluka. Sida amat taluk ngagai Iya.—Dan. 2:1–3:30.

12. Nama utai ti enda tau enda diseliahka kitai enti deka nyembah Jehovah seiku aja?

¹² Jehovah enda tau enda dikenuluka kitai ba pengidup. Enti kitai deka  nyembah Iya seiku aja, kitai enda tau enda bejimat ngambika utai bukai enda nganti Iya ba pengidup kitai. Nama utai bukai nya? Dalam Sepuluh Pesan, Jehovah madahka, nembiak Iya enda tau nyembah petara bukai. Sida enda tau nyembah sebarang utai ke bekaul enggau engkeramba. (U-dat. 5:6-10) Kemaya hari tu bisi mayuh bengkah engkeramba, lalu sekeda ari engkeramba tu engka tusah dikelala. Tang Jehovah enda kala ngubah utai ti dikedekaka Iya. Iya agi “siku aja.” Aram kitai beratika chara kitai ulih nyeliahka pengawa nyembah engkeramba kemaya hari tu.

13. Nama utai ke ulih ngerusak kaul kitai enggau Jehovah?

¹³ Ba Kolosi 3:5 (bacha), kitai macha pasal utai ke ulih ngerusak kaul kitai enggau Jehovah. Kitai nemu, pengamu nya bekaul enggau nyembah engkeramba. Baka ni? Lebuh kitai bisi pengingin ti balat ke siti-siti utai, baka inginka mayuh duit tauka pengaya, iya deka merintah pengidup kitai baka petara ti bekuasa. Semua dosa ke dipadah ba Kolosi 3:5 bekaul enggau pengamu, sebengkah ari pengawa nyembah engkeramba. Nya alai enti kitai bisi pengingin ti balat ke utai tu, kitai berengkah rinduka utai tu lebih agi ari kitai rinduka Petara. Udah nya, ukai Jehovah “siku aja” ke disembah kitai. Kitai enda patut ngelakka utai tu nyadi.

14. Nama tangkan ke diberi rasul John bekaul enggau pengerindu kitai ngagai Petara?

¹⁴ Rasul John mega nyebut utai ti sama. Iya nangkan, enti orang angkunka utai di dunya, iya nya, “utai ti dikinginka tubuh, utai ti dikinginka mata, temegahka pengaya,” udah nya orang “enda angkunka Apai.” (1 Jhn. 2:15, 16) Nya alai, kitai patut seruran meresa diri empu sekalika kitai angkunka dunya. Kitai engka ngasaika diri berengkah rinduka pemerindang, orang, stail gari sereta chara begari ba dunya tu. Tauka kitai engka minta diri “dikemesaika” enggau ngulihka pelajar ti tinggi agi. (Jer. 45:4, 5) Dunya baru nyau semak amat. Nya alai kitai patut ingatka jaku Moses! Enti kitai nemu sereta pechaya bendar Jehovah Petara kitai “endang siku aja,” kitai deka nyembah Iya aja sereta nyembah Iya ngena chara ti dikedekaka Iya.—Heb. 12:28, 29.

15. Nama kebuah Paul ngingatka orang Kristian Petara endang “siku aja”?

¹⁵ Rambai jaku “siku aja” nulung kitai nemu, Jehovah dekaka nembiak Iya beserakup sereta bisi tuju ti sama ba pengidup. Gempuru Kristian ti keterubah nyengkaum orang Judah, Gerika, Rome sereta orang ari menua bukai. Gaya pengidup, adat sereta utai ti dikerinduka sida bebida. Ketegal nya, sekeda ari sida tusah deka nerima chara sembah ti baru tauka ninggalka jalai pengarap ti lama. Nya alai Paul patut ngingatka sida, orang Kristian semina bisi seiku aja Petara, Jehovah.—Bacha 1 Korint 8:5, 6.

16, 17. (a) Nama utai ti benung dikeamatka diatu, lalu nama asil iya? (b) Nama ulih ngachau penyerakup kitai?

 ¹⁶ Baka ni enggau gempuru Kristian kemaya hari tu? Nabi Isaiah madahka “jemah ila,” orang ari semua bansa deka sama begulai nyembah Jehovah. Sida deka nyebut: “Iya ngajar kitai pasal utai ti deka dikereja kitai. Kitai deka bejalai nengah jalai ti udah dipilih Iya.” (Isa. 2:2, 3) Kitai gaga ati meda utai tu benung dikeamatka diatu! Bala menyadi Kristian kitai datai ari endur ke bebida, ngena jaku ti bebida sereta bisi chara pengidup ti bebida. Tang kitai beserakup dalam sembah kitai ngagai Jehovah. Taja pia, ketegal kitai bebida, kekadang kitai bisi penanggul enggau pangan diri.

¹⁷ Ngambika chunto, nama runding nuan pasal bala menyadi Kristian ke bisi chara pengidup ti bebida? Bansa jaku, gari, ulah sereta pemakai sida engka enda sama enggau enggi nuan. Kati nuan nyeliahka sida, lalu semina begulai enggau orang ke ngembuan chara pengidup ti sama enggau nuan? Nama runding nuan pasal bala tuai gempuru ke biak agi ari nuan tauka ke bebida bansa ari nuan  tauka ke enda sama chara pengidup enggau nuan ba gempuru? Enti kitai enda bejimat, kitai ulih ngasuh utai ke enda sama tu ngachau kitai sereta ngerusak penyerakup kitai.

18, 19. (a) Nama jaku lalau ke dipadah ba Epesus 4:1-3? (b) Nama ulih digaga kitai ngambika gempuru mengkang beserakup?

¹⁸ Baka ni kitai ulih nyeliahka penanggul ke baka nya? Paul meri jaku ajar ke ulih dikena ngagai orang Kristian ke idup ba Epesus, nengeri ti penuh enggau orang ke ngembuan gaya pengidup ti bebida. (Bacha Epesus 4:1-3.) Paul nyebut pasal kualiti baka baruh ati, nelap, liat ati, sabar, sereta pengerindu. Kualiti tu baka tiang ti tegap ke ulih negapka rumah. Tang ngambika rumah mengkang manah, iya mega begunaka mayuh pengawa. Paul dekaka orang Kristian ba Epesus enggau naka ulih ‘nyaga penyerakup dalam roh.’

¹⁹ Semua kitai enda tau enda enggau naka ulih nyaga penyerakup ba gempuru. Baka ni kitai ulih ngereja tu? Keterubah, kitai patut ngemansangka sereta ngayanka kualiti ke disebut Paul: baruh ati, nelap, liat ati, sabar, sereta pengerindu. Kedua, kitai patut enggau naka ulih ngemansangka “pemaik ti nanggam kita semua.” Penanggul entara bala menyadi Kristian nya baka rekah ti mit dalam penyerakup kitai. Nya alai, kitai patut enggau naka ulih mutarka penanggul tu ngambika kitai nyaga pemaik sereta penyerakup entara kitai.

20. Baka ni kitai ulih nunjukka diri nemu Jehovah Petara kitai “endang siku aja”?

²⁰ Jehovah Petara kitai “endang siku aja.” Tu jaku ti patut dikemeratka! Jaku tangkan tu ngeringka orang Israel ngambika ulih tan napi penanggul lebuh sida tama sereta ngambi Menua ti Udah Disemaya. Jaku nya mega ulih ngeringka kitai ngambika kitai ulih napi penusah ti besai sereta ngemansangka pemaik enggau penyerakup ba Paradais ti deka datai. Aram meh kitai terus nyembah Jehovah aja. Kitai patut rinduka sereta nyembah Iya enggau pengabis ati, semengat, sereta pengering kitai, lalu kitai patut enggau naka ulih nyaga pemaik sereta penyerakup enggau bala menyadi Kristian kitai. Enti kitai terus ngereja utai tu, Jesus deka ngakim kitai nyadi bedus, lalu kitai deka meda jaku iya dikeamatka: ‘Datai kitu, kita ke udah diberekatka Apai aku, awakka kita bempu Perintah ti udah disedia ke kita kenyau ari penumbuh dunya.’—Mat. 25:34.