Sida ngambarka bala melikat ti di serega ke enggau ngerusak Jerusalem sereta mega deka enggau ngerusak dunya Sitan ti jai maya Armagedon. Tu penemu ti diaduka baru. Nama kebuah tu patut?

Sebedau 607 S.M., Jehovah meri Esekiel siti genera pasal utai ke deka nyadi ba Jerusalem sebedau iya dirusak. Dalam genera nya, Esekiel meda mayuh penyai nyadi ba Jerusalem. Udah nya, iya meda enam iku orang ke “mai senyata siti siku.” Sama datai enggau sida bisi seiku orang “ke ngena kain linin, mai utai dikena nulis.” (Esekiel 8:6-12; 9:2, 3) Orang nya diasuh bejalai nengah serata nengeri Jerusalem ‘lalu ngelekatka tanda ba kening semua orang ke tusah ketegal semua utai ti jai ti benung dikereja dalam nengeri [nya].’ Udah nya, enam iku orang ke mai senyata diasuh munuh semua orang ke nadai tanda ba nengeri nya. (Esekiel 9:4-7) Nama ulih dipelajarka kitai ari genera tu, lalu sapa orang ke mai utai dikena nulis?

Esekiel nerima genera tu kena 612 S.M. Jaku nya keterubah iya dikeamatka lima taun udah nya, lebuh Jehovah ngemendar soldadu Babilon ngerusak Jerusalem. Enggau tu, Jehovah ngena orang Babilon ngukum nembiak Iya ke enda ngasi. (Jeremiah 25:9, 15-18) Tang baka ni enggau orang Judah ke lurus ti enggai ngereja semua utai ke jai ti nyadi ba nengeri nya? Jehovah nentuka sida deka diselamatka.

 Dalam genera nya, Esekiel ukai amat nanda semua orang tauka sama enggau ngerusak nengeri nya. Tang, bala melikat ke diasuh ngerusak Jerusalem. Nya alai, jaku nya meri kitai peluang kena nemu utai ke nyadi di serega. Jehovah ngasuh bala melikat Iya ngatur pengawa ngerusak orang jai sereta nentuka orang ti lurus deka selamat. a

Jaku nya mega deka dikeamatka jemah ila. Suba kitai ngumbai orang ke mai utai dikena nulis nya ngambarka orang ke diiri ngena roh kudus ke agi idup di dunya. Kitai mega madahka, orang ditanda lebuh sida ninga sereta nerima berita manah ke ditusui kitai. Taja pia, baru-baru tu kitai nemu, kitai patut ngubah chara kitai nerangka jaku nya. Kitai udah belajar ari Matthew 25:31-33, Jesus nya ke ngakim orang. Iya deka ngereja tu maya penusah ti besai jemah ila. Maya nya, orang ke diakim nyadi bedus deka selamat, lalu orang ke diakim nyadi kambing deka dipunaska.

Nya alai, nama dipelajarka kitai ari genera Esekiel? Bisi lima iti utai:

1. Sebedau Jerusalem dirusak, Esekiel, nyengkaum Jeremiah sereta Isaiah, nangkan orang pasal utai ke deka nyadi ba nengeri nya. Sida nyadi jejaga. Kemaya hari tu, Jehovah ngena raban ti mit ari orang ke diiri ngena roh kudus ngajar nembiak Iya sereta nangkan orang bukai sebedau penusah ti besai berengkah. Iya ke amat, semua nembiak Petara, iya nya, semua ulun Kristus ti bukai, sama enggau pengawa meri tangkan ngagai orang.—Matthew 24:45-47.

2. Esekiel nadai nanda orang ke deka selamat. Baka nya mega enggau nembiak Petara kemaya hari tu. Sida semina nginjil ngagai orang bukai, lalu nangkan sida pasal utai ke deka nyadi jemah ila. Pengawa nginjil di serata dunya tu digaga enggau tulung ari bala melikat.—Pemandang 14:6.

3. Orang ke selamat maya jeman Esekiel, ukai amat bisi tanda ba kening sida. Kemaya hari tu, orang ke deka selamat mega ukai amat bisi tanda. Nama patut digaga orang ngambika selamat maya penusah ti besai? Lebuh sida ningaka tangkan nya, sida patut belajar neladan Kristus, nyerahka diri ngagai Petara, sereta nyukung bala menyadi Kristus ngena chara nusui berita manah. (Matthew 25:35-40) Maya penusah ti besai, orang nya deka diberi tanda, iya nya, sida deka dipilih ngambika selamat.

4. Orang ke mai utai dikena nulis ngambarka Jesus. Maya penusah ti besai, Jesus deka nanda mayuh amat orang lebuh iya ngakim sida nyadi bedus. Udah nya, sida deka bisi peluang idup belama iya ba dunya.—Matthew 25:34, 46. b

5. Kemaya hari tu, enam iku orang ke mai senyata siti seiku ngambarka bala soldadu serega ke diuluka Jesus. Enda lama da agi, sida deka ngerusak semua raban bansa sereta muai semua penyai.—Esekiel 10:2, 6, 7; Pemandang 19:11-21.

Utai ti dipelajarka kitai ari genera tu nulung kitai pechaya, Jehovah enda ngerusak orang ti lurus sama enggau orang ti jai. (2 Peter 2:9; 3:9) Utai ti dipelajarka mega ngingatka kitai, pengawa nginjil kitai kemaya hari tu beguna bendar. Tiap iku orang patut ningaka tangkan nya sebedau pengujung datai!—Matthew 24:14.