Haykanush, seiku penginjil ke bedau dibaptisa di menua Armenia, tetemuka siti pasport semak rumah iya. Dalam pasport nya bisi sekeda kad debit sereta mayuh duit. Iya madah ngagai laki iya, ke mega penginjil ke bedau dibaptisa, pasal utai ke udah ditemu iya.

Seduai iya melaki-bini bisi penanggul ti besai ba belanja sereta berutang. Tang seduai iya mutuska runding deka mai duit nya ngagai alamat ke bisi dalam pasport nya. Lelaki ke lenyau pasport nya alit ati, lalu pia mega enggau sida sebilik. Haykanush enggau laki iya nerangka diri lurus ketegal utai ti udah dipelajarka seduai iya ari Bup Kudus. Udah nya, seduai iya ngena peluang nya berandau pasal Saksi-Saksi Jehovah, lalu meri sekeda litaricha ngagai ruang bilik nya.

Ruang bilik nya deka meri Haykanush duit kena nunjukka terima kasih, tang iya enggai nerima duit nya. Hari siti, bini lelaki nya ngelawa Haykanush enggau laki Haykanush ba rumah, lalu kena nunjukka diri amat beterima kasih, iya ngansak Haykanush nerima sebentuk tinchin intan.

Baka ruang bilik nya, mayuh orang deka alit ati enggau pengawa ti lurus ke diayanka Haykanush enggau laki iya. Tang kati Jehovah alit ati enggau utai tu? Nama runding Iya pasal pengawa ti lurus ke dikereja seduai iya? Kati pengawa lurus seduai iya mai penguntung?

Saut ngagai tanya nya enda tusah. Nama kebuah? Laban nembiak Jehovah nemu, neladan kualiti Iya berega agi ba Iya ari intan, emas tauka utai ke bukai. Amat, utai ke dikumbai Jehovah berega bebida ari utai ke dikumbai orang pemadu berega. (Isaiah 55:8, 9) Lalu nembiak Jehovah ngasaika pengawa sida ke neladan kualiti Iya nya amat berega.

Kitai ulih nemu tu ari utai ti dipadah Bup Kudus pasal bepenemu-dalam sereta nemu meretika utai. Jaku-Dalam 3:13-15 madahka: “Beberekat meh orang ke nyadi orang ke bepenemu-dalam, ke nemu meretika utai. Penguntung ari nya besai agi ari penguntung bulih pirak. Utai nya berega agi ari emas. Penemu-dalam berega agi ari batu ti berega. Nadai utai ti dikinginka nuan ulih dibandingka enggau nya.” Endang amat, ba Jehovah, kualiti nya berega agi ari sebarang reta pesaka.

Baka ni enggau pengawa ti lurus?

Jehovah Empu lurus. Iya “enda kala bula.” (Titus 1:2) Lalu Iya ngasuh rasul Paul nulis ngagai orang Kristian Hebrew ba kurun keterubah: “Besampi ke kami, laban kami nemu ati diri beresi, ingin deka ngereja utai ti badas [lurus] berari.”—Hebrew 13:18.

Jesus Kristus netapka teladan ti manah pasal pengawa ti lurus. Ngambika chunto, lebuh Imam Besai Kaiapas madahka: ‘Dalam nama Petara ti idup, aku ngasuh nuan madah ngagai kami enti nuan tu Kristus, Anak Petara.’ Jesus lurus, lalu ngaku diri Messiah. Iya madahka pemendar taja pan iya nemu raban Kunsil deka nuduh iya orang ke bejaku busung, taja pan tu ulih ngujungka iya diukum bunuh.—Matthew 26:63-67.

Baka ni enggau kitai? Kati kitai agi dikumbai lurus, enti kitai enda madah ngagai orang bukai pasal utai ke amat tauka ngubah mimit sekeda utai ke amat, ketegal deka bulih penguntung?

Endang tusah enti deka lurus ba hari ti penudi lebuh mayuh orang “berundingka diri empu aja, angkunka duit.” (2 Timoti 3:2) Lebuh bisi penanggul ba belanja tauka lebuh kereja tusah digiga, mayuh orang ngumbai ngereja pengawa ngenchuri, nipu, tauka ngereja utai bukai ke enda lurus nya enda salah. Runding ke baka tu bisi ba dini-dini endur, nya alai mayuh orang ngumbai ngereja pengawa ke enda lurus nya semina chara ke dikena ngulihka utai ti dikinginka. Indah sekeda orang Kristian udah ngaga pemutus ti enda manah, lalu ketegal “amuka duit” sida udah ngasuh nama diri enda manah ba gempuru.—1 Timoti 3:8; Titus 1:7.

Taja pia, mayuh orang Kristian neladan Jesus. Sida nemu, ngembuan kualiti baka enggi Petara nya beguna agi ari sebarang pengaya tauka penguntung. Nya kebuah orang Kristian ke biak enda nipu ngambika bulih pemutus peresa ti manah ba sekula. (Jaku-Dalam 20:23) Pengawa ti lurus engka enda suah dibalas enggau utai ti manah, baka ke nyadi ba Haykanush. Taja pia, mengkang lurus nya utai ti dikumbai Petara  badas, lalu pengawa ti lurus ngasuh kitai bisi ati ti beresi, utai ke amat berega.

Chunto Gagik nunjukka utai tu amat. Ku iya madahka: “Sebedau nyadi orang Kristian, aku gawa enggau siti kompeni besai. Orang ke bempu kompeni nya nyeliah ari mayar chukai enggau semina ngeriput penguntung kompeni ti mimit aja. Aku ke nyadi manager besai, diasuh ‘besetuju’ enggau juruaudit chukai ngena chara meri suap kena ngelalaika pengawa kompeni nya ke nipu. Ketegal tu, aku dikelala orang enggau pengawa ke enda lurus nya. Lebuh aku belajarka pemendar, aku enggai agi ngereja pengawa ke enda lurus nya, taja pan kereja nya begaji besai. Tang, aku numbuhka pengawa dagang kediri empu. Lalu kenyau ari hari ti keterubah, aku ngerijista kompeni aku lalu mayar semua chukai.’—2 Korint 8:21.

Ku Gagik madahka: “Untung kompeni aku kurang setengah, nya alai aku tusah deka nyediaka belanja ke kami sebilik. Taja pia, aku berasai lantang agi ati diatu. Aku bisi ati ti beresi ba mua Jehovah. Aku nyadi teladan ti manah ngagai dua iku anak lelaki aku, lalu aku bisi peluang megai tanggung pengawa ba gempuru. Diatu aku dikelala nyadi orang ke lurus entara juruaudit chukai sereta orang bukai ke bejalaika pengawa dagang enggau aku.”

Jehovah rinduka orang ti ngenataika puji ngagai Iya enggau neladan kualiti Iya ti manah, nyengkaum lurus. (Titus 2:10) Lalu lebuh kitai ngereja tu, Iya besemaya deka nulung kitai. Iya ngasuh Raja David madahka: ‘Lebuh aku agi biak, enggau lebuh aku nyau tuai, aku nadai kala meda orang ke lurus ditinggalka Jehovah, tauka meda bala anak sida nyanda pemakai.’—Masmur 37:25.

Peneleba Rut nunjukka utai tu amat. Iya enggau tetap ati begulai enggau entua indu iya, Naomi, ari ke ninggalka Naomi ti udah tuai. Rut pindah ngagai menua Israel, alai iya ulih nyembah Petara ti bendar. (Rut 1:16, 17) Iya lurus sereta bagas gawa ngumpul barli, nitihka Adat ti ditetapka ngagai orang ti seranta. Lalu sama baka utai ti ditapi David, Jehovah enda ninggalka Rut enggau Naomi. (Rut 2:2-18) Iya ukai semina nyediaka utai ti diguna Rut, tang Iya mega milih Rut nyadi peturun Raja David sereta Messiah ti disemaya!—Rut 4:13-17; Matthew 1:5, 16.

Sekeda nembiak Jehovah engka tusah deka ngulihka chukup duit ke diguna sida. Tang ari ke ngena jalai muntang, sida bagas sereta bebendar gawa ngulihka duit. Enggau ngereja tu, sida nunjukka kualiti Petara ti manah nyengkaum pengawa ti lurus, berega agi ba sida ari utai bukai.—Jaku-Dalam 12:24; Epesus 4:28.

Baka Rut, orang Kristian di serata dunya udah ngayanka diri arapka kuasa Jehovah ulih nulung sida. Sida arap amat ngagai Petara ke besemaya: “Aku enggai sekali-kali ninggalka kita, tauka ngelengkaka kita.” (Hebrew 13:5) Jehovah udah suah nunjukka Iya ulih sereta deka nulung orang ke deka seruran lurus. Iya seruran ngamatka semaya Iya bekaul enggau nyediaka utai ti diguna nembiak Iya.—Matthew 6:33.

Amat, mensia engka ngumbai intan tauka utai ke bukai nya berega. Tang kitai pechaya, Apai ti di serega ngumbai pengawa kitai ti lurus sereta kualiti manah ke bukai nya berega agi ari batu berega!