1. Baka ni kitai ulih neladan Jehovah, Apai kitai ti bepengerindu?

APAI kitai, Jehovah, amat rinduka kitai. (Jhn. 3:16) Kitai deka neladan Iya ti bepengerindu. Nya alai, kitai nguji “siruka pangan diri, rinduka pangan diri, [sereta] nelap enggau pangan diri” kelebih agi ngagai sida ke ‘sama pengarap enggau kitai.’ (1 Pet. 3:8; Gal. 6:10) Lebuh bala menyadi Kristian kitai napi penusah, kitai deka nulung sida.

2. Nama deka diperatika kitai ba artikel tu?

² Semua orang ke deka nyadi sebagi ari ruang bilik Jehovah endang deka napi penusah. (Mrk. 10:29, 30) Kitai deka napi mayuh agi penusah ketegal pengujung dunya tu nyau majak semak. Baka ni kitai ulih nulung pangan diri? Aram kitai beratika utai ke ulih dipelajar ari cherita Bup Kudus pasal Lot, Jop, enggau Naomi. Kitai mega deka beratika sekeda penusah ke ditapi bala menyadi Kristian kitai kemayaharitu, lalu beratika chara kitai ulih nulung sida.

3. Baka ke dipadah ba 2 Peter 2:7, 8, nama pemutus ti enda manah ke digaga Lot? Nama penyadi ngagai sida sebilik?

³ Lot ngaga pemutus ti enda manah lebuh iya milih diau enggau orang ke ngembuan ulah ti balat kamah ba nengeri Sodom. (Bacha 2 Peter 2:7, 8.) Nengeri nya endang ami, tang Lot napi mayuh penusah ketegal pindah kia. (P-kal. 13:8-13; 14:12) Bini iya engka kelalu rinduka nengeri nya tauka rindu begulai enggau sekeda orang ke diau dia. Tu ngujungka iya enda ngasika Jehovah. Ketegal nya, iya mati lebuh Jehovah ngujan nengeri Sodom enggau Gomorah ngena api  merirang. Lalu perundingka pasal dua iku anak indu Lot. Seduai iya betunang enggau lelaki ari nengeri Sodom, tang tunang seduai iya nya mega mati. Lot lenyau rumah enggau reta tengkira. Tang ke balat agi, iya lenyau bini. (P-kal. 19:12-14, 17, 26) Lebuh Lot napi penusah tu, kati Jehovah agi sabar enggau Lot? Au, Iya agi.

4. Baka ni Jehovah ngayanka Diri sabar ngagai Lot? (Peda gambar ba kulit majalah.)

⁴ Taja pan Lot milih diau ba Sodom, Jehovah ngayanka Diri siru ngagai Lot lebuh ngirumka dua iku melikat nyelamatka iya enggau sida sebilik. Melikat nya ngasuh iya ninggalka Sodom enggau lengkas ngambika ulih selamat. Tang, Lot enda beguai ngerarika diri. Melikat nya megai jari Lot lalu nguluka sida sebilik pansut ari nengeri nya. (P-kal. 19:15, 16) Udah nya, melikat ngasuh sida rari ngagai bukit. Tang ari ke ngasika Jehovah, Lot minta rari ngagai nengeri ke semak agi. (P-kal. 19:17-20) Jehovah enggau sabar mending lalu ngemendarka Lot ngagai nengeri nya. Tang udah nya, Lot takut diau dia lalu pindah ngagai endur bebukit ke diasuh Jehovah sebedau nya. (P-kal. 19:30) Jehovah ngayanka Diri balat sabar ngagai Lot! Baka ni kitai ulih neladan Iya?

5-6. Baka ni kitai ulih nitihka jaku lalau ba 1 Tesalonika 5:14 lebuh kitai neladan Petara?

⁵ Baka Lot, engka menyadi Kristian kitai ngaga pemutus ti enda manah lalu ngujungka diri empu napi penanggul. Enti tu nyadi, nama deka digaga kitai? Kitai engka deka madahka penanggul ke ditapi iya nya ketegal pemutus enda manah ke digaga iya. Nya engka amat. (Gal. 6:7) Tang ari ke madah munyi nya, manah agi enti kitai nulung iya baka ke digaga Jehovah ngagai Lot. Baka ni?

⁶ Jehovah ukai semina ngirumka melikat Iya nangkan Lot, tang mega nulung iya ngerarika diri ari pengerusak ke ninggang Sodom. Pia mega, kitai engka patut nangkan menyadi Kristian kitai enti iya ngereja pengawa ke tau ngenusahka iya. Tang kitai mega engka ulih nulung iya. Taja pan iya lubah nitihka iring ari Jehovah ba Bup Kudus, kitai patut sabar. Titihka meh teladan dua iku melikat nya. Kitai patut terus nulung menyadi Kristian kitai, anang nejuka iya pia aja. Kitai patut nulung iya ngena jaku sereta ulah. (1 Jhn. 3:18) Baka melikat nya, kitai engka “megai jari” iya, reti nya, nulung iya nitihka jaku lalau ari Bup Kudus.—Bacha 1 Tesalonika 5:14.

7. Baka ni kitai ulih neladan runding Jehovah pasal Lot?

⁷ Enti Jehovah deka, Iya ulih beratika penyalah Lot. Tang ari ke ngereja nya, Iya ngena roh kudus ngasuh rasul Peter ngumbai Lot nya orang ke lurus. Kitai tentu gaga ati laban Jehovah ngampun penyalah kitai! (Mas. 130:3) Ulih kitai neladan runding Jehovah pasal Lot? Kitai deka sabar agi enggau bala menyadi Kristian kitai enti kitai beratika pemanah ke dikembuan sida. Lalu tu deka ngasuh sida senang agi nerima bantu ari kitai.

8. Penyiru meransang kitai ngereja nama?

⁸ Jop enda baka Lot. Jop ukai merinsa ketegal ngaga pemutus ti enda manah. Taja pia, iya napi mayuh penusah. Iya lenyau reta tengkira, penuduk ba komuniti, sereta pengerai iya. Ke balat agi, semua anak Jop seduai bini iya mati magang. Jop mega dituduh tiga iku bakih iya ti pelesu. Nama kebuah sida tiga enda ngayanka penyiru ngagai Jop? Sida enda nguji meretika utai  ke amat nyadi ba iya. Ketegal nya, sida ngembuan runding ti salah pasal Jop lalu ngakim iya. Baka ni kitai ulih nyeliah ari ngereja penyalah ti sama? Kingatka meh, semina Jehovah aja ke nemu semua pekara pasal tiap iku orang. Pending enggau manah sebana ati orang ke merinsa. Anang semina ninga aja, tang uji asaika pemedis sida. Nya baru nuan ulih ngayanka penyiru ti bendar ngagai bala menyadi Kristian nuan.

9. Enti kitai siru, nama deka diseliahka kitai? Lalu nama kebuah?

⁹ Penyiru nagang kitai ari ngerembaika cherita ti enda manah pasal penusah ke ditapi orang bukai. Orang ke nusui cherita tu enda meransang bala menyadi Kristian, tang iya ngelemika semengat sida. (J-lam. 20:19; Rom. 14:19) Iya nadai penyiru lalu enda nemu berunding. Jaku iya ulih ngemediska orang ke benung merinsa. (J-lam. 12:18; Eps. 4:31, 32) Endang manah agi enti kitai beratika pemanah orang lalu berundingka chara kitai ulih nulung sida mutarka penusah nya!

10. Nama dipelajarka kitai ari Jop 6:2, 3?

¹⁰ Bacha Jop 6:2, 3. Kadang-kadang, Jop nyebut utai ti enda patut. Tang, udah nya iya ngaku sekeda utai ke disebut iya nya salah. (Jop 42:6) Baka Jop, orang ke napi penusah kemayaharitu engka nyebut utai ti enda patut lalu udah nya nesalka jaku diri. Nama patut digaga kitai? Ari ke bisi runding ti enda manah ngagai iya, kitai patut siru ke iya. Kingatka meh, Jehovah enggai kitai ditinggang penusah baka ke ditapi kitai kemayaharitu. Nya alai, anang tekenyit enti sema nembiak Jehovah nyebut utai enggau enda berunding lebuh balat tusah ati. Taja pan  iya nyebut utai ti enda betul pasal Jehovah tauka kitai, kitai anang kelalu jampat pedis ati tauka ngakim iya.—J-lam. 19:11.

11. Baka ni tuai gempuru ulih neladan Elihu lebuh meri jaku lalau?

¹¹ Bisi maya nya, orang ke napi penusah mega begunaka jaku lalau tauka disiplin ke ulih nulung. (Gal. 6:1) Baka ni tuai gempuru ulih ngereja nya? Sida ulih nunda teladan Elihu. Iya mendingka Jop enggau siru. (Jop 33:6, 7) Pengudah meretika runding Jop, Elihu meri jaku lalau ngagai iya. Tuai gempuru ti neladan Elihu deka mending enggau manah lalu nguji deka meretika penusah ke ditapi orang nya. Udah nya, lebuh sida meri jaku lalau, sida ulih nyapai ati orang ke mending nya.

12. Nama penyadi ngagai Naomi pengudah laki enggau dua iku anak lelaki iya mati?

¹² Naomi nya orang ke taluk sereta rinduka Jehovah. Tang, pengudah laki enggau dua iku anak lelaki iya mati, iya deka nukar nama iya ari Naomi ngagai “Marah,” ke mai reti “Pait.” (Rut 1:3, 5, 20, nota kaki, 21) Menantu Naomi ke benama Rut mengkang enggau iya lebuh napi penusah. Rut ukai semina nulung nyediaka utai ke diguna Naomi. Iya mega meri jaku ti ngelantangka ati ngagai Naomi. Rut mandangka pengerindu sereta sukung ngagai iya ngena jaku ti datai ari ati.—Rut 1:16, 17.

13. Nama kebuah orang ke lenyau kaling pengidup begunaka tulung sereta jaku ti ngelantangka ati ari kitai?

¹³ Lebuh kaling pengidup seiku ari menyadi Kristian kitai udah nadai agi, iya begunaka tulung sereta jaku ti ngelantangka ati ari kitai. Orang ke jadi melaki-bini ulih disempamaka baka dua pun kayu ke tumbuh berimbai enggau pangan diri. Pengudah betaun-taun, urat kedua-dua pun kayu nya bebelit. Lebuh sepun ari kayu nya dichabut lalu mati, sepun agi kayu mega bisi nerima empas. Pia mega, lebuh seiku orang lenyau kaling pengidup, iya engka lama balat tusah ati. Ambika chunto, laki Paula * ngenyit mati. Ku iya: “Pengidup aku balat berubah lalu aku ngasaika diri nadai daya. Aku lenyau pangan ti rapat. Aku berandau pasal semua utai enggau laki aku. Iya sama gaga enggau aku sereta ngeringka aku lebuh aku bisi penusah. Iya seruran mendingka aku lebuh aku besebana pasal penusah diri. Aku ngasaika diri baka burung ti udah patah sayap pengudah iya nadai.”

14-15. Baka ni kitai ulih ngelantangka ati orang ke udah lenyau kaling pengidup?

¹⁴ Baka ni kitai ulih ngelantangka ati orang ke udah lenyau kaling pengidup? Utai keterubah ke patut digaga iya nya bejaku enggau iya, taja pan nuan engka berasai enda nyamai tauka malu enggau utai ti deka disebut. Paula ke disebut tadi madahka: “Aku nemu bekenang pasal pemati engka ngasuh orang enda nyamai ati. Sida irau enggaika diri salah jaku. Tang asai ba ati deka tusah agi enti sida nadai nyebut nama-nama.” Orang ke tusah ati engka enda ngarapka kitai nyebut utai ti engkeman. Ku Paula madahka: “Aku beterima kasih lebuh bala bakih nyebut, ‘Sinu aku meda nuan.’”

¹⁵ Bini William udah nadai beberapa taun ti udah. Ku William madahka: “Aku rindu ninga lebuh orang bukai ngenang utai ti manah pasal bini aku. Tu nulung aku nemu, iya dikerindu sereta dipebasa orang. Tulung ke baka tu amat beguna ba aku. Jaku sida balat ngelantangka ati aku laban bini aku  berega ba aku lalu besai reti ba pengidup aku.” Seiku indu balu ke benama Bianca madahka: “Aku bulih pengelantang lebuh orang bukai besampi tauka bekunsika ayat Bup Kudus enggau aku. Aku mega bulih pengelantang lebuh sida ngenang pasal laki aku sereta lebuh sida mendingka aku maya aku ngenang iya.”

16. (a) Nama kebuah kitai patut terus nulung sereta ngelantangka ati sida ke udah lenyau orang ti dikesayau? (b) Nitihka James 1:27, nama tanggung pengawa kitai?

¹⁶ Baka Rut ke mengkang enggau Naomi ti udah balu, kitai patut terus nulung sereta ngelantangka ati sida ke udah lenyau orang ti dikesayau. Paula, ke disebut tadi, madahka: “Pengudah laki aku nadai, mayuh orang datai nulung sereta ngelantangka ati aku. Tang enda lama udah nya, sida nyau kisuk enggau pengidup sida baru. Taja pia, pengidup aku udah berubah abis. Endang manah lebuh orang bukai nemu, orang ke tusah ati begunaka tulung sereta jaku ti ngelantangka ati bebulan-bulan, indah betaun-taun pengudah lenyau orang ke dikesayau.” Endang amat, tiap iku orang enda sebaka. Sekeda orang jampat nelebaka diri enggau ubah ti baru ba pengidup sida. Tang ba sekeda sida, tiap iti pengawa ke kala digaga enggau orang ke dikesayau ngingatka sida pasal orang ke dikesayau. Chara tiap iku orang tusah ati enda sebaka. Kingatka meh, Jehovah meri kitai peluang enggau tanggung pengawa ngambika ibuhka sida ti udah lenyau kaling pengidup.—Bacha James 1:27.

17. Nama kebuah sida ke ditinggalka kaling pengidup begunaka sukung ari kitai?

 ¹⁷ Sekeda kaling pengidup napi asai ati ti pedis sereta tusah ketegal ditinggalka kaling pengidup sida. Laki Joyce ninggalka iya ketegal indu bukai. Ku Joyce madah: “Pemedis ketegal sarak balat agi ari pemedis ketegal mati laki. Enti iya mati ketegal penusah ti besai tauka sakit, nya ukai ketegal pemutus iya empu. Tang ba senentang tu, laki aku milih ninggalka aku. Aku berasai malu sereta dikemaruhka.”

18. Nama ulih digaga kitai kena nulung sida ke nadai agi kaling pengidup?

¹⁸ Lebuh kitai ngereja utai ti manah ke sida ti nadai agi kaling pengidup, kitai nunjukka diri rinduka sida. Ketegal sida diatu nyau kediri, sida begunaka bakih ti manah. (J-lam. 17:17) Baka ni nuan ulih nunjukka diri nyadi bakih sida? Nuan ulih mai sida makai begulai. Nuan engka ulih mai sida sama bemain tauka ba pengawa nginjil. Kadang-kadang, nuan mega ulih mai sida sama enggau kita sebilik belajarka Bup Kudus. Enti nuan ngereja tu, nuan deka ngagaka ati Jehovah laban Iya “semak orang ke tusah ati” sereta “nyaga sida indu ke balu.”—Mas. 34:18; 68:5.

19. Nama utai ti diasuh 1 Peter 3:8 kereja kitai?

¹⁹ Enda lama agi, lebuh Perintah Petara merintah bumi, semua penusah enda agi dikingatka. Semua kitai bebendar nganti maya lebuh “semua utai ti lama, enda agi dikingatka.” (Isa. 65:16, 17) Sebedau maya nya datai, aram meh kitai nyukung pangan diri, lalu nengah jaku enggau ulah nunjukka diri rinduka semua bala menyadi Kristian kitai.—Bacha 1 Peter 3:8.