ARTIKEL DIPELAJAR 24
‘Ajar Aku Betuaika Nuan enggau Pengabis Ati Aku’
‘Ajar aku betuaika Nuan enggau pengabis ati aku. Aku deka muji Nuan enggau pengabis ati aku, O Jehovah Petara aku.’—MAS. 86:11, 12.
LAGU 7 Jehovah Pengering Aku
DALAM ARTIKEL TU *
1. Nama reti nangika Petara, lalu nama kebuah tu beguna?
ORANG Kristian rinduka Petara lalu nangika Iya. Sekeda orang engka ngumbai tu enda sejalai. Taja pia, leka jaku nangi ukai mai reti takut. Tang orang ke nangika Petara nya bebasaka Iya. Sida enggai ngemediska ati Petara laban sida deka ngembuan kaul ti manah enggau Iya.—Mas. 111:10; J-lam. 8:13.
2. Nitihka jaku Raja David ba Masmur 86:11, nama dua iti pekara ke deka dikerandauka kitai?
2 Bacha Masmur 86:11. Lebuh berundingka ayat tu, kitai nemu Raja David amat bebasaka Jehovah. Diatu kitai deka berandau baka ni kitai ulih ngena utai ke disebut David ba sampi iya. Kesatu, kitai deka meresa kebuah kitai patut bebasaka nama Petara. Kedua, kitai deka bejuraika chara nunjukka basa ngagai nama Petara ba pengidup kitai besehari-sehari.
NAMA KEBUAH BEBASAKA NAMA JEHOVAH?
3. Nama utai ke nyadi ba Moses ke nulung iya mengkang bebasaka nama Petara?
3 Uji gambarka asai ati Moses lebuh iya meda mulia Jehovah mansa. Tu tentu utai ti ngalitka ati iya! Nengah seiku melikat, Jehovah madah ngagai Moses: ‘Aku tu Jehovah Petara ti kasih sereta siru, lubah ringat, sereta mandangka penetap ati enggau pengerindu ti besai. Aku deka tetap rinduka beribu-ribu serak lalu ngampun penyai enggau dosa.’ (P-sut. 33:17-23; 34:5-7) Ninting kali Moses ngena nama Jehovah, iya engka ngenang baru utai ke udah nyadi nya. Nya alai, Moses kala nangkan bansa Israel ‘nangika pemesai mulia nama Jehovah.’—U-dat. 28:58.
4. Nama ulih nulung kitai bebasa agi ke Jehovah?
4 Lebuh kitai berundingka nama Jehovah, kitai mega patut berundingka pemanah Iya. Ambika chunto, kuasa, penemu-dalam, pengelurus, sereta pengerindu Iya. Enti kitai belematika empat iti kualiti tu enggau ke bukai, nya deka meransang kitai bebasa agi ke Jehovah.—Mas. 77:11-15.
5-6. (a) Nama reti nama Petara? (b) Nitihka Pemansut 3:13, 14 enggau Isaiah 64:8, baka ni Jehovah ngamatka tuju Iya?
5 Nama ditemu kitai pasal reti nama Petara? Mayuh pakar besetuju reti nama Jehovah nya “Iya ti Ngasuh Nyadi.” Tu ngingatka kitai, nadai utai ulih nagang peneka Jehovah ari nyadi sereta Iya ulih ngereja sebarang utai ti dikedekaka Iya. Baka ni tu ulih nyadi?
6 Kesatu, Jehovah ulih nyadi nama-nama aja kena nyapai tuju Iya. Lalu litaricha kitai suah meransang kitai belematika tu. (Bacha Pemansut 3:13, 14.) * Kedua, Jehovah mega ulih ngena nembiak Iya nyadi nama-nama aja ngambika ulih nyembah Iya sereta nyapai tuju Iya. (Bacha Isaiah 64:8.) Nengah dua iti chara tu, nadai utai ulih nagang Jehovah ari ngamatka tuju Iya.—Isa. 46:10, 11.
7. Baka ni kitai ulih bebasa agi ke Jehovah?
7 Baka ni kitai ulih bebasa agi ke Jehovah? Siti chara nya, kitai belematika utai ke udah digaga Iya. Ambika chunto, lebuh kitai meda pemanah semua utai ke udah digaga Iya, kitai amat alit ati. (Mas. 8:3, 4) Lalu siti agi chara nya, lebuh kitai belematika baka ni Iya udah nulung kitai ulih ngereja peneka Iya. Tu tentu meransang kitai bebasa agi ke Iya. Nama Jehovah endang ngalitka ati! Reti nama Iya ngambarka semua kualiti Iya, utai ke udah digaga Iya, sereta utai ke deka digaga Iya.—Mas. 89:7, 8.
‘AKU DEKA MUJI NAMA JEHOVAH’
Utai ke diajar Moses mai pengelantang laban ajar nya bekaul enggau nama Jehovah sereta sapa Iya kebendar (Peda genteran 8) *
8. Baka ni Ulang Adat 32:2, 3 nulung kitai nemu runding Jehovah pasal nama Iya?
8 Sebedau bansa Israel tama ngagai Menua ti Udah Disemaya, Jehovah ngajar Moses siti lagu. (U-dat. 31:19) Lalu Moses mega diasuh ngajar lagu nya ngagai bansa Israel. (Bacha Ulang Adat 32:2, 3.) Lebuh belematika ayat 2 enggau 3, endang terang Jehovah deka nama Iya ditemu sereta dikena semua orang! Bansa Israel bisi peluang ningaka ajar Moses pasal Jehovah sereta nama Iya. Utai ke diajar Moses ngeringka pengarap sereta meransang sida, baka ujan ke nulung utai tumbuh. Baka ni kitai ulih ngajar ngena chara tu?
9. Baka ni kitai ulih nulung nguduska nama Jehovah?
9 Lebuh kitai ngereja pengawa nginjil, kitai ulih ngena Bup Kudus nunjukka nama Jehovah. Kitai ulih meri litaricha, ngayanka video, sereta mandangka utai ba laman web kitai ti meri basa ngagai Jehovah. Ba endur gawa, ba sekula tauka lebuh kitai bejalai, kitai ulih ngiga peluang bejaku pasal Petara sereta pemanah Iya. Kitai ulih madah ngagai orang pasal tuju Petara ke mensia enggau dunya. Lebuh sida ninga pasal tu, sida engka berengkah nemu Jehovah amat sayauka semua mensia. Mayuh orang udah nerima ajar ti bula pasal Petara. Seraya kitai madahka pasal Jehovah, kitai nulung sida nemu sapa Iya kebendar iya. Lalu tu nulung kitai nguduska nama Petara. Utai ti diajar kitai ari Bup Kudus ulih meri sida pengelantang sereta pengaga ati.—Isa. 65:13, 14.
10. Lebuh kitai ngajar pemelajar Bup Kudus, nama kebuah enda chukup enti semina ngajar pasal standard sereta adat Petara?
10 Lebuh kitai ngajar Bup Kudus, kitai deka nulung pemelajar ngelala Jehovah enggau dalam agi sereta ngena nama Iya. Ulih kitai nyapai tuju tu enti kitai semina ngajar pasal standard sereta adat Petara? Pemelajar ti manah engka rinduka adat Petara, tang kati iya ngasika Jehovah ketegal iya rinduka Jehovah? Kingatka, Awa nemu pasal utai ke enda diasuh Petara, tang iya enda ngasi laban iya enda rinduka Jehovah. Pia mega enggau Adam. (P-kal. 3:1-6) Nya alai, enda chukup enti kitai semina ngajar pasal standard sereta adat Petara.
11. Lebuh kitai ngajar pemelajar pasal standard sereta adat Petara, baka ni kitai ulih nulung sida rinduka Petara ti meri adat?
11 Standard sereta adat Jehovah seruran manah ke kitai. (Mas. 119:97, 111, 112) Iya meri adat nya ketegal rinduka kitai. Tang pemelajar Bup Kudus engka enda ngembuan runding ti sama enti sida enda meretika kebuah Jehovah meri adat. Nya alai kitai ulih nanya sida: “Ba runding nuan, nama kebuah Petara ngasuh nembiak Iya ngereja pengawa nya tauka nagang ari ngereja nya? Nama ulih dipelajarka kitai pasal Jehovah?” Enti kitai nulung pemelajar berunding pasal Jehovah lalu rinduka nama Iya, tu ulih nulung kitai nyapai ati sida. Enggau nya, pemelajar Bup Kudus ukai semina rinduka adat, tang mega rinduka Petara ti meri adat. (Mas. 119:68) Sida deka mansang agi ba pengarap sereta ulih betan napi penguji ti mar ke deka datai.—1 Kor. 3:12-15.
‘KITAI DEKA NYEMBAH SERETA NGASIKA JEHOVAH’
David kala nejuka ati iya bebagi (Peda genteran 12)
12. Nama kebuah ati David bebagi, lalu nama nyadi ba iya?
12 Ba Masmur 86:11, Raja David nyebut siti rambai jaku ti beguna iya nya ‘ajar aku betuaika Nuan enggau pengabis ati aku.’ Sepemanjai pengidup iya, David nemu ati kitai mudah bebagi. Bisi sekali lebuh iya ba perabung istana, iya tepedaka seiku indu mandi. Indu nya, ke benama Batseba, udah bisi laki. David nemu pesan Jehovah ke madah: ‘Anang inginka bini orang.’ (P-sut. 20:17) Tang iya terus merening ngagai indu nya. Ati iya bebagi entara pengingin iya ke Batseba, sereta pengingin iya ke deka ngelantangka ati Jehovah. Taja pan David rindu sereta bebasaka Jehovah, tang iya milih nitihka pengingin diri empu. Pengujung iya, David ngereja penyalah lalu ngenyaika nama Jehovah. Ketegal ulah iya, mayuh orang ke enda besalah ditinggang penusah, nyengkaum diri sebilik iya.—2 Sam. 11:1-5, 14-17; 12:7-12.
13. Baka ni kitai nemu ati David enda agi bebagi?
13 Jehovah meri David disiplin lalu nya nulung ngemanahka kaul David enggau Jehovah. (2 Sam. 12:13; Mas. 51:2-4, 17) David ingat penusah sereta pemerinsa ke nyadi ketegal iya nejuka ati iya bebagi. Jaku iya ba Masmur 86:11 ulih mega disalin: “Beri aku ati ti enda bebagi.” Kati Jehovah bisi nulung David ngembuan ati ti enda bebagi? Bisi! Pengudah nya, Bup Kudus madahka David seiku lelaki ke “tetap ati” ngagai Jehovah, Petara iya.—1 Raj. 11:4; 15:3.
14. Nama tanya ke patut ditanya kitai, lalu nama kebuah?
14 Utai ke nyadi ba David ulih meransang sereta ngajar kitai. Penyalah David nyadika tangkan ke bala nembiak Petara kemayaharitu. Enda ngira kitai baru tauka udah lama nyembah Jehovah, kitai patut nanya diri empu, ‘Kati aku nulak penguji ari Sitan ke ulih ngasuh ati aku bebagi?’
Sitan bebendar deka ngasuh ati nuan bebagi. Anang alah laban iya! (Peda genteran 15-16) *
15. Baka ni nangika Petara ulih nyaga kitai lebuh tepedaka gambar ti meransang pengingin ti kamah?
15 Nama deka digaga nuan enti nuan tepedaka gambar ti meransang pengingin ti kamah ba TV tauka ba internet? Kati nuan deka berunding, ‘Enda ngawa. Tu ukai pornografi.’ Utai ke dipeda nuan ulih disemaka baka kapak ke dikena orang melah kayu. Majak kapak dientak ke dalam kayu nya, majak senang kayu nya dibelah. Baka nya mega, gambar ti enda menuku baka ke enda nganu, tang nyau kelama ulih ngasuh ati kitai bebagi lalu ngujungka kitai bedosa ngagai Jehovah. Nya alai, anang ngelakka diri ditipu Sitan! (2 Kor. 2:11) Kitai enggai nejuka pengingin ti kamah tumbuh ba ati! Kitai semina ulih nangika Jehovah enti ati kitai enda bebagi!
16. Lebuh kitai diuji, nama tanya ke patut diperundingka kitai?
16 Kelimpah ari ngena gambar ti enda menuku, Sitan ngena chara bukai nguji kitai. Nama patut digaga kitai? Kitai engka ngumbai utai nya enda salah lalu berunding: ‘Enda ngawa nya. Enti aku ngereja nya, penyalah nya enda kelalu balat nyentukka aku dibuai ari gerempung.’ Runding ke baka nya endang salah. Nya alai manah agi enti kitai belematika tanya tu: ‘Kati Sitan ngena penguji tu ngasuh ati aku bebagi? Enti aku alah laban penguji tu, nama empas iya ba nama Jehovah? Kati pengawa ti salah nya ngasuh aku semak enggau Jehovah tauka ngenyauhka aku ari Iya?’ Besampi meh minta penemu-dalam ngambika nuan ulih nyaut tu enggau ati ti beresi. (Jas. 1:5) Tu ulih nulung kitai nulak sebarang penguji baka ke digaga Jesus lebuh iya madah: “Rari nuan Sitan!”—Mat. 4:10.
17. Nama kebuah enda manah enti ati kitai bebagi? Beri chunto.
17 Nama kebuah enda manah enti ati kitai bebagi? Uji gambarka siti tim sukan ti enda beserakup. Sekeda deka tebilang agi ari ke bukai, sekeda enda main nitihka atur ti ditetapka, lalu ke bukai enda bebasaka jurulatih. Ba runding nuan kati tim tu ulih menang? Tentu enda. Tang tim ke beserakup bisi peluang ulih menang. Ati nuan ulih disemaka baka tim ti beserakup. Ngambika nuan ulih mujur nyembah Jehovah, runding, pengingin, sereta asai ati nuan patut beserakup. Tang kingatka, Sitan deka ati nuan bebagi. Iya deka runding, pengingin, sereta asai ati nuan bebagi lalu belaban enggau standard Jehovah. Taja pia, anang ngelakka nya nyadi! Nuan ulih nyembah Jehovah enggau pengabis ati.—Mat. 22:36-38.
18. Nitihka Mikah 4:5, nama juluk ati nuan?
18 Baka David, kitai ulih besampi ngagai Jehovah: ‘Ajar aku betuaika Nuan enggau pengabis ati aku.’ Enggau naka ulih nitihka sampi tu ba pengidup nuan. Enda ngira nama pemutus ke patut digaga nuan, tunjukka nuan bebasaka nama Jehovah ninting hari. Lebuh ngereja nya, kitai nunjukka diri layak nyandang nama Saksi-Saksi Jehovah. (J-lam. 27:11) Lalu semua kitai ulih nyebut baka ke dipadah nabi Mikah: ‘Kitai deka nyembah sereta ngasika Jehovah Petara kitai belama-lama iya.’—Mik. 4:5.
LAGU 41 Dingaka Sampi Aku
^ per. 5 Ba artikel tu, kitai deka berandauka utai ke disebut David dalam sampi iya ngagai Jehovah ba Masmur 86:11, 12. Nama reti nangika nama Jehovah? Nama kebuah kitai patut bebasaka nama Iya? Lalu baka ni nangika Petara ulih nyaga kitai ngambika enda alah laban penguji?
^ per. 6 Rambai jaku “AKU TU MEH AKU” ba Pemansut 3:14, ulih disalin ngagai “Aku Deka Nyadi Sebarang Utai Aku Deka.”
