SEMUA kitai nemu, Jehovah ngiring sereta ngeringka pengarap nembiak Iya “ba hari ti penudi” tu. (2 Tim. 3:1) Tang genap iku kitai patut ngasika Jehovah. Kitai ulih mandingka tu enggau orang Israel ke patut nitihka bunyi terumpit lebuh sida ba menua puang.

Jehovah ngasuh Moses ngaga dua iti terumpit ari pirak ti ditempa kena “nesau orang mayuh begempuru, enggau kena nesau sida ngererak kem.” (P-pau. 10:2) Chara bala imam nyepu terumpit deka nentuka utai ke patut digaga orang Israel. (P-pau. 10:3-8) Kemayaharitu, nembiak Petara nerima iring enggau bemacham chara. Ba artikel tu kitai deka berandauka tiga chara kitai nerima iring, (1) lebuh kitai dibai ngagai gempuru ke besai, (2) lebuh tuai gempuru nerima latih sereta (3) lebuh bisi ubah ba iring ke eklisia. Lalu kitai deka mandingka tiga iti chara nya enggau chara terumpit disepu ba jeman Israel kelia.

Lebuh Jehovah deka “semua orang Israel” begempuru ba pintu penama begian timur Langkau Kain, bala imam nyepu dua iti terumpit. (P-pau. 10:3) Dua belas iti raban bansa orang Israel dibagi ngagai empat raban, lalu diau ngelingi Langkau Kain. Enda ngira dini kem sida, sida ulih ninga bunyi terumpit. Orang ke diau semak pintu penama Langkau Kain ulih datai enggau jampat, tang sida ke diau jauh begunaka mayuh awak sereta patut enggau naka ulih datai. Enda ngira sida diau jauh tauka semak, Jehovah deka semua sida ningaka iring ari Iya.

Taja pan kitai kemayaharitu enda begempuru ba Langkau Kain, tang kitai dibai ngagai konvensyen enggau pengawa ti spesial. Maya nya kitai nerima penerang enggau iring ti beguna. Ba serata dunya, nembiak Jehovah nerima program ti sama. Nya alai, lebuh kitai datai ngagai pengawa nya, kitai baka ke sama begulai enggau menyadi ba endur bukai. Sekeda menyadi patut bejalai jauh ngambika ulih enggau ba pengawa nya. Taja pia, semua menyadi gaga ati ngereja nya laban sida nemu deka bulih penguntung.

Kati menyadi ke diau ba endur ti jauh ari eklisia ulih nerima penguntung ari pengawa ti spesial tu? Ulih. Ketegal bisi perengka teknologi ti moden, mayuh menyadi ulih meda program ti sama lalu ngasaika diri sama begulai enggau menyadi ba endur bukai. Ambika chunto, lebuh pengari ari indu opis datai, pampang opis ba menua Benin mandangka program ngagai Arlit, Niger, ba Gurun Sahara. Dua puluh satu iku menyadi Kristian enggau orang ke bisi minat datai meda program nya. Taja pan sida ba endur  ti jauh, tang sida ngasaika bisi sama begulai enggau 44,131 iku menyadi bukai ke datai ngagai program nya. Seiku menyadi lelaki madahka: “Kami amat beterima kasih laban kita mandangka program tu. Kami ulih ngasaika, kita amat sayauka kami.”

Lebuh imam Israel nyepu siti terumpit, tu reti iya “semina tuai peturun aja” datai begempuru ba Langkau Kain. (P-pau. 10:4) Ba dia, sida deka nerima penerang sereta latih ari Moses. Tu deka nulung sida bejalaika tanggung pengawa nyaga raban bansa sida. Enti nuan seiku ari tuai peturun, kati nuan deka enggau naka ulih datai sereta nerima penguntung?

Kemayaharitu, tuai gempuru ukai “tuai peturun,” lalu sida enda ngaga diri nyadi tuan atas nembiak Petara. (1 Pet. 5:1-3) Tang sida enggau naka ulih ngintu bedus Petara. Nya alai, sida sedia nerima latih, baka ba Sekula Bup Kudus ke Menyadi ti Dipilih. Maya nya, tuai gempuru deka belajar chara ulih bejalaika pengawa ba eklisia enggau manah. Asil ari latih nya, tuai gempuru enggau bala menyadi ba eklisia ulih mansang semak ngagai Jehovah. Taja pan nuan enda enggau sekula tu, nuan mega deka bulih penguntung ari sida ke kala enggau sekula nya.

Kekadang terumpit disepu nerachat enggau bunyi ti tinggi enggau baruh. Tu nunjukka Jehovah deka semua bansa Israel mindah kem. (P-pau. 10:5, 6) Lebuh mindah, sida patut ngereja nya enggau teratur. Tu begunaka mayuh pengawa. Sekeda orang Israel engka enggai mindah ngagai endur bukai. Nama kebuah?

Kekadang bisi orang Israel ngumbai sida selalu mindah lalu sida patut mindah enggau ngenyit. “Kadang-kadang mua hari nya semina mengkang dia [ba atas langkau sembiang] ari lemai nyentuk ngagai pagi aja.” Ba maya bukai “nemuka dua hari, sebulan, setaun tauka lama agi.” (P-pau. 9:21, 22) Berapa kali orang Israel udah mindah kem? Nitihka bup Penyampau bagi 33, sida kala muka kem ba kira-kira 40 iti endur.

Kekadang orang Israel muka kem ba endur ti lindap. Endur ti baka tu tentu nyamai endur diau, kelebih agi laban sida ba “menua puang ti besai rampa, menua ti ngenakutka ati.” (U-dat. 1: 19) Nya alai, lebuh sida diasuh mindah, sida engka ngumbai endur baru enda semanah endur sida ke diatu.

Lebuh terumpit disepu nerachat enggau bunyi ti tinggi enggau baruh, semua bansa Israel ulih ninga. Tang ukai semua ulih mindah ba maya ti sama. Nya alai, sekeda raban bansa patut nganti enggau sabar sebedau sida ulih mindah. Bunyi terumpit ti terubah nandaka raban bansa ti nirika kem ba tisi timur, iya nya raban bansa Judah, Isakar enggau Sebulun patut mupuk dulu. (P-pau. 2:3-9; 10:5, 6) Pengudah nya bala imam nyepu terumpit kedua kali, lalu tu nandaka tiga iti raban bansa ti nirika kem ba tisi selatan patut mupuk. Bala imam deka terus ngereja tu nyentukka semua orang Israel mupuk.

Nuan engka tusah deka nerima sekeda ubah ba gerempung. Nama kebuah? Engka nuan ngasaika ubah nya kelalu mayuh lalu enda disadang. Tauka nuan enda teleba enggau atur baru lalu ngarapka atur nya enda diubah. Nuan engka tusah deka nelebaka diri lalu tu ngasuh nuan tusah deka sabar. Tang enti kitai enggau naka ulih nitihka ubah ti baru, nyau kelama kitai nemu ubah nya ke penguntung kitai lalu Jehovah deka lantang ati enggau kitai.

Ba jeman Moses, Jehovah udah ngiring bejuta iku lelaki, indu sereta anak mit bejalai ba menua puang. Enti Jehovah enda nyaga sereta ngiring sida, sida tentu enda ulih selamat! Kemayaharitu, Jehovah mega ngiring kitai ba hari ti penudi. Iya nulung kitai terus semak enggau Iya lalu negapka pengarap kitai. Nya alai, enggau naka ulih meh ngasika Jehovah baka orang Israel ke tetap ati lalu ningaka bunyi terumpit!