1. Nama asai ati Jehovah lebuh nembiak Iya ke udah ninggalka Iya pulai baru?

BA ARTIKEL sebedau tu, Jehovah nyemaka Diri baka pengibun bedus ti manah. Iya ngintu tiap iku bedus Iya sereta ngiga bedus ke lenyau. Ku Jehovah madah ngagai orang Israel ke udah ninggalka Iya: “Pulai baru ngagai Aku, nya baru Aku deka pulai baru ngagai kita.” Kati Iya agi ngembuan runding ti sama kemayaharitu? Au. Jehovah madah: “Aku enda berubah.” (Mal. 3:6, 7) Jesus madahka, indah lebuh seiku ari nembiak Jehovah ke udah ninggalka Iya pulai baru ngagai Iya Jehovah enggau bala melikat deka rami gaga ati.—Luk. 15:10, 32.

2. Nama deka dikerandauka kitai ba artikel tu?

² Diatu kitai deka berandauka tiga iti sempama Jesus ke ngajar kitai chara nulung sida ke enda aktif. Kitai mega deka meda kualiti ti patut dikembuan kitai sereta nama kebuah nya beguna amat nulung sida ke enda aktif pulai baru.

3-4. Nama kebuah indu ke disebut ba Luke 15:8-10 bebendar ngiga duit iya ti lenyau?

³ Kitai patut bebendar ngiga menyadi ke deka pulai baru ngagai Jehovah. Ba bup Injil Luke, Jesus madahka siti sempama pasal seiku indu ke lenyau duit ti berega. Ari sempama tu, kitai ulih meda baka ni indu nya bebendar ngiga duit iya ti lenyau.—Bacha Luke 15:8-10.

⁴ Jesus nerangka baka ni asai ati indu nya lebuh tetemuka duit iya ti lenyau. Maya jeman Jesus, lebuh seiku indu  orang Israel belaki, sekeda indai deka meri anak indu iya sepuluh singkap duit pirak. Nya alai, duit ke lenyau nya amat berega ba indu nya laban nya pemeri ari indai iya. Indu nya ngumbai duit iya lenyau ba rumah. Iya nungkun kelita lalu ngiga duit siling pirak nya. Tang ketegal api kelita iya enda entu terang, iya tusah deka meda. Udah nya iya berengkah nyapu rumah. Gambarka pengaga ati iya lebuh tetemuka duit siling nya ba tugung uras! Iya bekunsika pengaga ati nya ngagai bala pangan sereta orang ke berimbai pendiau enggau iya.

5. Nama kebuah tusah deka ngiga menyadi Kristian ke udah ninggalka eklisia?

⁵ Ari sempama Jesus kitai belajar, enti kitai lenyau siti-siti utai, kitai patut bebendar ngiga iya. Pia mega, kitai patut bebendar ngiga menyadi ke udah lama ninggalka eklisia. Sida engka udah betaun-taun enda begulai enggau kitai. Sida engka pindah ngagai endur bukai alai menyadi Kristian enda ngelala sida. Tang kitai ulih pechaya, sekeda ari menyadi ke enda aktif deka pulai baru ngagai Jehovah. Sida deka sama begulai enggau bala menyadi Kristian nyembah Jehovah baru, tang sida begunaka tulung ari kitai.

6. Baka ni bala menyadi Kristian ba eklisia besaup ngiga menyadi ke enda aktif?

⁶ Semua kitai, enda ngira tuai gempuru, pengerintis, penginjil ba eklisia, sereta diri sebilik menyadi ke enda aktif nya, ulih nulung ngiga sida. Kati nuan bisi bakih tauka kaban belayan ke udah lama ninggalka eklisia? Kati nuan kala betemu enggau sida lebuh ngereja pengawa nginjil? Enti iya deka meri nombor talipaun tauka madahka endur diau ngagai bala tuai gempuru, nuan ulih meri penerang nya ngagai sida.

7. Nama ulih dipelajar kitai ari utai ke dipadah Thomas?

⁷ Tuai gempuru bisi tanggung pengawa ngiga menyadi ke enda aktif ti deka pulai baru ngagai Jehovah. Baka ni sida ngereja nya? Peratika utai ke dipadah Thomas, * seiku tuai gempuru ke diau ba Sepanyol. Iya udah nulung lebih ari 40 iku bala menyadi pulai baru ngagai eklisia. Ku Thomas: “Terubah, aku nanya bala menyadi enti sida nemu dini endur menyadi ke enda aktif diau. Tauka aku nanya enti sida ingat sapa ke udah lama enda datai gempuru. Mayuh bala menyadi gaga ati deka nulung laban sida ngasaika ulih sama ngiga menyadi ke enda aktif. Lebuh aku ngabas menyadi ke enda aktif, aku nanya pasal anak sida tauka kaban belayan sida. Anak sida engka kala datai begempuru sereta nyadi penginjil. Enggau chara nya, sida pan ulih ditulung pulai baru ngagai Jehovah.”

8. Ari sempama ba Luke 15:17-24 pasal anak ke tesat, baka ni apai nerima anak iya ke nesal ati?

⁸ Enti kitai deka nulung menyadi ke enda aktif pulai baru ngagai Jehovah, nama kualiti ke patut dikembuan kitai? Peratika utai ke ulih dipelajar ari sempama Jesus pasal anak ke tesat. (Bacha Luke 15:17-24.) Jesus nerangka anak nya nyau sedarka pemeli diri lalu mutus deka pulai ke rumah. Lebuh apai tepedaka iya, apai iya belabuh belanda lalu merap iya. Tu nulung anak iya nemu, iya agi dikesayauka. Lebuh anak madahka asai besalah lalu enda layak dikumbai anak, apai ningaka sebana iya lalu nguji meretika asai ati anak iya. Kena nunjukka anak iya diterima pulai baru, apai ngaga siti  pengerami sereta nyediaka gari ti pemadu manah. Tu enggau terang nunjukka apai enda ngumbai anak iya ulun, tang anak ti dikesayauka iya.

9. Nama kualiti ke patut dikembuan kitai kena nulung menyadi ke enda aktif pulai baru ngagai Jehovah? (Peda kutak “ Chara Nulung Sida ke Deka Pulai Baru.”)

⁹ Baka apai ke disebut ba sempama tadi, Jehovah rinduka bala menyadi ke enda aktif sereta deka sida pulai baru ngagai Iya. Enti kitai neladan Jehovah, kitai ulih nulung sida pulai baru. Kena ngereja tu, kitai patut ngayanka pengeliat ati, penyinu, sereta pengerindu. Nama kebuah kitai patut ngayanka kualiti tu, lalu baka ni kitai ulih ngereja nya?

10. Nama kebuah kitai patut liat ati lebuh nulung menyadi ke enda aktif pulai baru ngagai Jehovah?

¹⁰ Kitai patut liat ati lebuh nulung menyadi ke enda aktif laban sida begunaka awak kena pulai baru ngagai Jehovah. Mayuh menyadi ke kala nyadi enda aktif madahka, sida berengkah pulai baru ngagai Jehovah pengudah tuai gempuru sereta menyadi bukai bekali-kali ngabas sida. Nancy, seiku menyadi ari Asia nulis: “Seiku menyadi indu ke rapat enggau aku mayuh nulung. Iya sayauka aku baka menyadi iya empu. Iya ngingatka aku utai manah ke kala digaga kami duai. Iya ninga enggau sabar lebuh aku madahka asai ati diri lalu enda takut meri aku jaku lalau. Iya amat pangan ti bendar, lalu sedia nulung ba sebarang maya.”

11. Nama kebuah kitai begunaka penyinu kena nulung menyadi ke pedis ati?

¹¹ Penyinu baka ubat ke ulih ngeraika ati ti pedis. Sekeda menyadi ke udah betaun ninggalka eklisia engka agi pedis ati sereta ringat  ngagai menyadi Kristian. Ketegal nya, sida berasai tusah deka pulai baru ngagai Jehovah. Sekeda engka ngumbai diri napi utai ke enda lurus ba eklisia. Sida begunaka orang ninga sereta meretika asai ati sida. (Jas. 1:19) Maria, ke kala nyadi enda aktif madahka: “Aku begunaka orang ningaka sebana aku, ngelantangka ati aku, meri tulung sereta meri jaku lalau ti manah.”

12. Baka ni pengerindu Jehovah mai menyadi ke enda aktif pulai baru ngagai Iya?

¹² Bup Kudus madahka Jehovah mai kitai semak ngagai Iya ngena pengerindu. Baka ni Iya ngereja nya? Gambarka nuan labuh ngagai siti lubang. Lubang nya kelalu dalam lalu nuan tusah deka pansut. Siti chara nuan ulih pansut lebuh bisi orang ngulurka tali lalu narit nuan. Jehovah madah pasal orang Israel ti udah ninggalka Iya: ‘Aku mai sida ngagai Aku ngena penyinu enggau pengerindu.’ (Hos. 11:4, Berita Manah Ka Rebak Diatu) Kemayaharitu, Jehovah ngembuan asai ati ti sama pasal nembiak Iya ke udah ngetu nyembah Iya. Sida ditinggang kelalu mayuh penanggul sereta pengirau nyentukka sida ngasaika diri baka ba lubang ti dalam. Tang Jehovah deka sida nemu, Iya sayauka sida sereta deka mai sida pulai baru ngagai Iya. Lalu Jehovah ulih ngena nuan madahka asai ati Iya ngagai sida.

13. Padahka baka ni pengerindu udah nulung Pablo pulai baru ngagai Jehovah.

¹³ Endang beguna bendar kitai nulung menyadi ke enda aktif nemu Jehovah sayauka sida lalu kitai mega patut ngayanka pengerindu ke sida. Pablo, ke disebut ba artikel  sebedau tu, nyadi enda aktif lebih ari 30 taun. Ku iya: “Pagi nya, lebuh aku ka pansut ari rumah, seiku menyadi indu ke tuai betemu enggau aku lalu bejaku enggau nelap. Aku belabuh nyabak. Aku madahka iya: ‘Jehovah udah nganjung nuan ngagai aku.’ Nya meh maya aku ngaga pemutus deka pulai baru ngagai Jehovah.”

14. Nitihka sempama ba Luke 15:4, 5, nama digaga pengibun bedus pengudah iya tetemuka bedus ti lenyau?

¹⁴ Taja pan kitai udah tetemuka menyadi ke enda aktif, kitai patut terus nulung sereta meransang sida. Baka anak ti tesat ba sempama Jesus, sida engka napi pemedis ba emosi lalu begunaka awak kena gerai. Lalu ketegal napi penanggul ba dunya Sitan, kaul sida enggau Jehovah nyadi lemi. Kitai patut nulung sida ngeringka pengarap ba Jehovah. Ba sempama pasal bedus ti lenyau, Jesus nerangka baka ni pengibun bedus nulung bedus iya pulai. Taja pan iya udah ngena mayuh awak sereta pengering ngiga bedus nya, tang iya nemu bedus nya udah lemi lalu begunaka bantu. Ketegal nya, iya ngesan bedus nya pulai ngagai raban bedus.—Bacha Luke 15:4, 5.

15. Baka ni kitai ulih nulung menyadi ke deka pulai baru ngagai Jehovah? (Peda kutak “ Perengka ti Amat Berega.”)

¹⁵ Kitai begunaka mayuh jam sereta pengering kena nulung menyadi ke enda aktif mutarka penanggul ti nagang sida pulai baru ngagai Jehovah. Tang nengah roh kudus Jehovah, Bup Kudus, sereta litaricha ti disediaka gerempung, kitai ulih nulung sida ngeringka kaul enggau Jehovah. (Rom. 15:1) Baka ni kitai ulih ngereja nya? Seiku  tuai gempuru madahka: “Enti menyadi ke enda aktif mutus deka nyembah Jehovah baru, sida patut belajarka Bup Kudus. * Lalu menyadi ke diasuh belajar enggau iya patut orang ke ulih dikearapka iya sereta senang enggau berandau.” Nya alai, enti nuan diberi pengawa belajar enggau menyadi ke enda aktif, terima meh pengawa nya enggau gaga ati.

16. Baka ni kitai nemu bala melikat deka nulung kitai?

¹⁶ Mayuh peneleba ti nunjukka bala melikat benung nulung kitai ngiga menyadi ke enda aktif, ti keran deka pulai baru ngagai Jehovah. (Pem. 14:6) Ambika chunto Silvio, seiku menyadi lelaki ke enda aktif ari Ecuador. Iya bebendar besampi ngagai Jehovah minta nganjung menyadi ke ulih nulung iya pulai baru ngagai eklisia. Lebuh iya benung besampi, luching pintu rumah iya bebunyi. Dua iku tuai gempuru datai ngabas iya. Seduai iya gaga ati ulih meri bantu ngagai iya.

17. Nama asai ati kitai lebuh nulung menyadi ke enda aktif?

¹⁷ Lebuh kitai nulung menyadi ke enda aktif pulai baru ngagai Jehovah, kitai berasai amat gaga ati. Salvador, pengerintis ke bebendar nulung menyadi ke enda aktif madahka: “Kekadang, lebuh ngenang pasal menyadi ke udah pulai baru, aku enda ulih nagang ai mata ari labuh. Aku amat gaga ati ulih besaup enggau Jehovah nyelamatka bedus Iya ari dunya Sitan, lalu mai sida pulai baru ngagai eklisia.”—SKR. 20:35.

18. Enti nuan udah nyadi enda aktif, nama ulih dipechayaka nuan?

¹⁸ Enti nuan udah ngetu begulai enggau bala menyadi, pechaya meh Jehovah agi sayauka nuan. Iya deka nuan pulai baru ngagai Iya. Tang nuan patut ngereja sekeda utai ngambika ulih pulai baru. Baka apai ke disebut ba sempama Jesus, Jehovah nganti nuan pulai baru, lalu enggau gaga ati deka nerima nuan pulai.