Galatia 5:22, 23 madahka semilan iti kualiti Kristian: ‘Buah roh kudus nya pengerindu, pengaga, pemaik, pengeliat ati, penyiru, pemadas, [“pengarap,” NWT], penelap, ulih nagang diri.’ Tang roh kudus mega ulih nulung kitai ngembuan kualiti ke bukai.

Baka ni kitai nemu? Sebedau rasul Paul nyebut pasal buah roh kudus, iya nulis: “Utai ti dikereja mensia . . . bambai, runding ti kamah, kereja ti kamah, besembahka engkeramba, bemanang, bemunsuh, charut enggau pangan diri, kepapas, belaya, bepechah-belah, beripih, ngining orang, pemabuk, berami enda beiga-iga, enggau utai ti baka nya.” (Gal. 5:19-21) Paul ulih nyebut pasal “utai ti dikereja mensia” ke bukai, baka ke ba Kolosi 3:5. Sama mega, pengudah iya nyebut semilan iti kualiti nya, ku iya: “Nadai adat ngelaban utai nya.” Nya alai, Paul enda nulis semua kualiti ke ulih dikemansangka kitai enggau tulung ari roh kudus.

Kitai ulih meretika tu lebuh mandingka buah roh kudus enggau utai ke ditulis Paul ba surat iya ngagai eklisia di Epesus: “Laban buah penampak nya ti mai pemadas, pengelurus enggau pemendar.” (Eps. 5: 8, 9, Berita Manah Ka Rebak Diatu) Amat, “pemadas” sereta pengelurus enggau pemendar sebagi ari “buah penampak.” Tang “pemadas” mega sebagi ari ‘buah roh kudus.’

Pia mega, Paul ngasuh Timoti ngemansangka enam iti kualiti, iya nya ‘pengelurus, ati ti nangika Petara, pengarap, pengerindu, ati ti tan, enggau penelap.’ (1 Tim. 6:11) Taja pan pengarap, pengerindu, enggau penelap nya sebagi ari ‘buah roh kudus,’ tang Timoti mega nemu, iya begunaka roh kudus kena ngemansangka kualiti ke bukai baka pengelurus, nangika Petara, sereta ati ti tan.—Bandingka Kolosi 3:12; 2 Peter 1:5-7.

Nya alai, Galatia 5:22, 23 enda nyebut semua kualiti Kristian ke patut dikemansangka. Roh kudus ulih nulung kitai ngemansangka semilan iti ‘buah roh kudus.’ Tang bisi mayuh kualiti ke bukai ti ulih dikemansangka ngambika kitai ulih nyadi orang Kristian ti tegap ba pengarap sereta ‘nyadi mensia ti baru, ditempa neladan gamal Petara lalu nyadi amat lurus sereta kudus.’—Eps. 4:24.