1. Nama utai ke udah digaga Jehovah ke tiap iku kitai?

JEHOVAH mai semua kitai datai semak ngagai Iya. (Jhn. 6:44) Perundingka, lebuh Jehovah meresa bebiliun iku orang di dunya tu, Iya meda utai ti manah ba nuan, iya nya ati ti ulih rinduka Iya. (1 Ban. 28:9) Jehovah nemu semua utai pasal nuan, lalu Iya rinduka nuan. Endaka tu ngelantangka ati nuan?

2. Baka ni Jesus nulung kitai mereti pengibuh Jehovah ke tiap iku kitai?

² Jehovah amat ibuhka nuan. Iya mega amat ibuhka bala menyadi Kristian nuan. Kena nulung kitai meretika utai tu, Jesus nyemaka Jehovah baka pengibun bedus. Enti seiku pengibun bedus bisi 100 iku bedus, lalu seiku bedus lenyau, nama deka digaga iya? Iya deka “ninggalka sida ke semilan puluh semilan iku ba bukit, lalu bejalai ngiga siku ti lenyau nya.” Lebuh pengibun bedus nya tetemuka bedus iya, iya enda nganu bedus nya tang iya deka gaga ati. Nama ulih dipelajarka kitai ari sempama tu? Tiap iku bedus amat berega ba Jehovah. Jesus madahka: “Baka nya meh Apai kita ti di serega enggai nejuka indah siku ari sida ke mit tu lenyau.”—Mat. 18:12-14.

3. Nama deka dikerandauka kitai dalam artikel tu?

³ Kitai tentu enggai ngasuh bala menyadi kitai berasai asa ati. Dalam artikel tu, kitai deka nyaut dua tanya tu: Baka ni kitai ulih nyeliahka diri ari ngemediska ati orang bukai? Nama patut digaga kitai enti orang ngemediska ati kitai? Sebedau kitai nyaut tanya tu, kitai deka ngelala sapa “sida ke mit tu” ke dipadah ba Matthew bagi 18.

4. Sapa “sida ke mit tu”?

⁴ “Sida ke mit tu” murid Jesus. Enda ngira umur sida, sida “baka anak mit” laban sida deka diajar Jesus. (Mat. 18:3) Taja pan sida datai ari bemacham menua, bansa enggau pendiau, semua sida arapka Jesus lalu Jesus amat rinduka sida.—Mat. 18:6; Jhn. 1:12.

5. Nama asai ati Jehovah lebuh meda orang bukai ngemediska nembiak Iya?

⁵ Semua “sida ke mit tu” amat berega ba Jehovah. Kena meretika asai ati Jehovah, pikirka asai ati kitai ngagai anak mit. Kitai amat ibuhka anak mit lalu deka nyaga sida laban sida enda kering, nadai peneleba, sereta nadai penemu-dalam baka orang ke besai tuai. Kitai tentu enda rindu meda orang bukai dikemediska, kelebih agi enti orang ngemediska anak mit. Tu deka ngasuh kitai balat pedis ati sereta ringat! Sama mega, Jehovah deka nyaga kitai. Iya tentu pedis ati sereta ringat enti orang ngemediska nembiak Iya!—Isa. 63:9; Mrk. 9:42.

6. Nitihka 1 Korint 1:26-29, nama runding orang ba dunya ngagai murid Jesus?

⁶ Nama kebuah bukai murid Jesus dikumbai “sida ke mit”? Orang ba dunya ngeninggika orang ke kaya, tebilang, enggau bekuasa. Tang, ukai semua murid Jesus ngembuan utai nya. Nya alai, orang ba dunya ngumbai sida “mit.” (Bacha 1 Korint 1:26-29.) Tang Jehovah enda ngumbai sida baka nya.

7. Jehovah deka kitai ngembuan asai ati baka ni ngagai bala menyadi?

⁷ Jehovah rinduka semua nembiak Iya, enda ngira sida ke baru tauka sida ke udah lama ba dalam pemendar. Semua bala menyadi berega ba mata Jehovah. Nya kebuah sida mega patut berega ba mata kitai. Laban kitai “seraban enggau pangan diri,” kitai patut rinduka semua bala menyadi, ukai sekeda aja. (Rom. 12:5) Kitai enggau naka ulih ibuhka sida enggau nyaga sida. Enti kitai bisi ngemediska ati menyadi Kristian, kitai anang ngaga diri empu enda nemu lalu ngumbai menyadi nya patut ngampunka kitai. Nama ke ngasuh sekeda menyadi Kristian pedis ati? Sekeda menyadi berasai baruh agi ari orang bukai ketegal chara sida dibesaika. Sekeda sida engka baru ba pemendar. Nya alai, sida enda nemu mutarka penanggul enggau bala menyadi. Enda ngira sapa ke pedis ati, kitai deka bebaik enggau sida. Nambahka nya mega, enti kitai suah jampat pedis ati, kitai patut ngaga ubah ba diri empu. Enti kitai ngaga ubah tu, kitai bulih pengaga ati sereta kaul ti manah enggau bala menyadi.

8. Nama runding ti dikembuan murid Jesus?

⁸ Nama kebuah Jesus bejaku pasal “sida ke mit tu”? Bala murid iya bisi nanya Jesus: “Sapa orang ke pemadu besai dalam Perintah serega?” (Mat. 18:1) Maya jeman Jesus, orang Judah ngemeratka penuduk sida. Seiku orang ke mansik madah: “Ba maya nya, mayuh orang deka ngulihka basa sereta nyadi tebilang. Nya utai ti pemadu beguna ba pengidup sida.”

9. Nama patut digaga murid Jesus?

⁹ Jesus nemu mayuh orang Judah rindu bepekit tauka ngumbai diri manah agi ari orang bukai. Nya alai, bala murid Jesus patut bebendar ngubah runding sida empu. Ku Jesus madah ngagai bala murid iya: “Orang ke pemadu besai dalam bala kita enda tau enda nyadi baka orang ke pemadu biak, lalu orang ke nyadi kepala enda tau enda nyadi  orang ke mela.” (Luk. 22:26) Enti kitai baka orang ke “pemadu biak,” kitai deka ‘ngumbai orang bukai pama agi ari kitai.’ (Plp. 2:3) Majak kitai ngenuluka orang bukai, majak agi kitai enggai ngasuh orang pedis ati.

10. Nama jaku lalau ke diberi Paul ke patut dititihka kitai?

¹⁰ Semua menyadi Kristian kitai bisi pengelandik ti enda dikembuan kitai. Tu ulih dimeretika enti kitai beratika kualiti manah sida. Kitai patut beratika jaku lalau ke diberi Paul ngagai orang Kristian ba Korint. Ku iya madah: “Sapa ngumbai kita lain agi ari orang bukai? Nama utai ti dikemisi kita, ti ukai diberi ngagai kita? Nya alai, enti utai nya udah diberi ngagai kita, nama kebuah kita temegahka utai nya, baka ke ngumbai utai nya ukai pemeri ti diberi ngagai kita?” (1 Kor. 4:7) Kitai patut bejimat ngambika kitai enda inginka orang ngeninggika kitai tauka ngumbai diri manah agi ari orang bukai. Ambika chunto, menyadi lelaki ke landik meri cheramah tauka menyadi indu ke landik ngepunka pengawa belajarka Bup Kudus patut ingat pengelandik sida nya datai ari Jehovah, lalu Jehovah ke patut nerima puji.

11. Nama ulih dipelajarka kitai ari sempama Jesus pasal raja enggau orang gaji iya?

¹¹ Pengudah Jesus nangkan bala murid iya ngambika enda ngasuh orang pedis ati, iya meri sempama pasal raja enggau orang gaji iya. Bisi seiku orang gaji ke berutang mayuh enggau raja. Ketegal orang gaji nya enda tebayarka utang diri, raja sanggup muai utang nya. Pengudah nya, orang gaji ke sama nya enggai muai utang ulun ti sama baka iya, ke berutang semina mimit aja ba iya. Ketegal nya, raja ngasuh orang gaji ke jai nya ditutup dalam rumah jil. Nama ulih dipelajarka kitai? Jesus madahka: ‘Baka nya meh Apai aku ti di serega deka ngereja ngagai genap iku kita, enti kita enda ngampun menyadi kita enggau pengabis ati kita.’—Mat. 18:21-35.

12. Nama empas iya enti kitai enggai ngampunka orang?

¹² Ulah orang gaji nya ukai semina ngemediska diri empu tang mega orang bukai. Terubah, iya jai sereta enda ngayanka pengasih iya ngagai ulun ke baka iya empu. Iya “nutup orang nya dalam rumah jil, datai ke orang nya udah mayar utang iya.” Kedua, iya ngasuh orang gaji ke bukai enda nyamai ati enggau utai ke digaga iya. “Lebuh orang gaji ti bukai meda nya, sida tusah amat ati.” Pia mega, ulah kitai bisi empas ngagai orang bukai. Enti seseiku orang ngereja penyalah ngagai kitai lalu kitai enggai ngampunka iya, nama deka nyadi? Terubah, kitai ngasuh iya tusah ati ketegal kitai enggai ngampunka iya. Lalu kitai engka enda ngayanka diri ibuh sereta rinduka iya. Kedua, kitai ngasuh bala menyadi Kristian berasai enda nyamai lebuh sida beratika kitai enda bebaik enggau seseiku orang.

13. Nama ulih dipelajarka kitai ari peneleba seiku pengerintis?

¹³ Lebuh kitai ngampunka bala menyadi Kristian, kitai enggau orang bukai berasai nyamai agi. Tu meh utai ke nyadi ba seiku pengerintis ke benama Crystal. * Iya pedis ati enggau seiku menyadi indu ba eklisia. Ku Crystal: “Kekadang iya ngena jaku ti kasar lalu ati aku asai diachuk ngena lungga. Aku indah enggai begulai nginjil enggau iya! Aku berengkah lenyau pengeransing sereta pengaga ati.” Crystal ngasaika nadai salah iya ringat enggau menyadi nya. Tang iya  enda terus pedis ati tauka ngemeratka asai ati iya empu. Iya enggau baruh ati nitihka jaku lalau ke bisi ba artikel “Ampunilah dengan Segenap Hati Saudara” ba Menara Jaga kena 15 Oktober 1999. * Iya ngampunka menyadi indu nya. Ku iya: “Aku diatu sedar semua kitai benung bebendar ngaga ubah, lalu Jehovah sedia deka ngampunka kitai ninting hari. Pengudah nya aku berasai lantang agi. Aku bulih pengaga ati baru.”

14. (a) Nitihka Matthew 18:21, 22, nama penanggul ke ditapi rasul Peter? (b) Nama ulih nulung kitai enti kitai napi penanggul ti sama?

¹⁴ Kitai nemu kitai patut ngampun. Tang kitai engka tusah deka ngereja nya. Rasul Peter mega kekadang tusah deka ngampun. (Bacha Matthew 18:21, 22.) Nama ulih nulung nuan? Keterubah, belematika baka ni Jehovah udah ngampunka nuan. (Mat. 18:32, 33) Taja pan kitai enda layak nerima pengampun ari Jehovah, tang Iya Empu ka ngampunka kitai. (Mas. 103:8-10) “Kitai mega patut rinduka pangan diri.” Nya alai, kitai enda ulih milih sekalika deka ngampun bala menyadi tauka enda. (1 Jhn. 4:11) Kedua, belematika penguntung enti kitai ngampun. Kitai engka nulung orang ke udah ngereja penyalah ngagai kitai berasai gaga ati. Kitai mega ulih beserakup enggau bala menyadi, nyaga kaul kitai enggau Jehovah, sereta berasai lantang agi ati. (2 Kor. 2:7; Kol. 3:14) Ketiga, besampi ngagai Jehovah. Anang ngelakka Sitan ngachau kaul nuan enggau bala menyadi Kristian. (Eps. 4:26, 27) Kitai begunaka tulung Jehovah ngambika bisi pemaik dalam eklisia.

15. Nitihka Kolosi 3:13, nama ulih digaga kitai enti kitai enda nyamai ati enggau ulah bala menyadi Kristian?

¹⁵ Baka ni enti kitai enda nyamai ati enggau ulah bala menyadi Kristian? Nama patut  digaga nuan? Uji meh enggau naka ulih bebaik enggau iya. Padahka ngagai Jehovah nama asai ati nuan. Minta Iya merekatka orang ti ngemediska ati nuan. Lalu minta Iya nulung nuan meda kualiti manah ba menyadi nya, kualiti ti dikerinduka Jehovah ba iya. (Luk. 6:28) Enti nuan agi ngenang utai ke udah digaga menyadi nya, pikirka chara ti pemadu manah ulih berandau enggau iya. Manah agi enti kitai ngumbai menyadi nya enda sengaja ngemediska ati kitai. (Mat. 5:23, 24; 1 Kor. 13:7) Lebuh nuan berandau enggau iya, seruran meh ngumbai iya bisi tuju ti manah. Kati enti iya enggai bebaik enggau nuan? Terus meh “sabar” enggau iya. (Bacha Kolosi 3:13.) Kelebih agi, anang majak pedis ati enggau iya, laban nya ulih ngachau kaul nuan enggau Jehovah. Anang ngelakka sebarang utai ngelemika pengarap nuan. Enggau ngereja tu, nuan nunjukka diri rinduka Jehovah lebih agi ari utai bukai.—Mas. 119:165.

16. Nama tanggung pengawa tiap iku kitai?

¹⁶ Kitai amat beterima kasih ulih nyembah Jehovah nyadi “siti raban” di baruh “siku aja pengibun”! (Jhn. 10:16) Bup Diorganisasikan untuk Melakukan Kehendak Yehuwa, * lambar 165, madahka: “Kitai udah ngasaika penyerakup dalam gerempung Jehovah. Nya alai, kitai bisi tanggung pengawa ngetanka nya.” Nyadi, kitai patut “belajar meda bala menyadi baka Jehovah meda sida.” Ba mata Jehovah, semua kitai “sida ke mit” ti amat berega. Kati nuan mega ngumbai bala menyadi Kristian berega? Enti nuan enggau naka ulih deka nulung sereta nyaga sida, Jehovah meda sereta beterima kasihka pengawa nuan.—Mat. 10:42.

17. Nama juluk ati kitai?

¹⁷ Kitai rinduka bala menyadi Kristian. Nya alai, kitai “enggai sekali-kali ngereja utai ti tau ngasuh orang bukai tesangkut tauka bedosa.” (Rom. 14:13) Kitai ngumbai bala menyadi manah agi ari kitai, lalu kitai deka ngampun sida ari ati. Anang ngelakka ulah orang bukai ngelemika pengarap kitai. Tang, aram meh kitai “ngereja utai ti mai pemaik, enggau utai ti tau ngeringka pangan diri.”—Rom. 14:19.