1. Nama kebuah kekadang nembiak Jehovah berasai sunyi?

KALA nuan berasai sunyi? Ba sekeda orang, asai ati ti sunyi nya enda lama. Ba orang bukai, sida engka terus berasai sunyi ba timpuh ti lama. Kitai engka berasai sunyi taja pan kitai dikelingi orang. Sekeda nya engka tusah deka ngiga bakih ba eklisia ti baru. Sekeda orang bisi kaul ti rapat enggau diri sebilik. Tang lebuh sida jauh ari diri sebilik, sida engka berasai sunyi. Bisi nya mega lelengauka orang ti dikesayauka sida ti udah nadai. Lalu sekeda orang Kristian, kelebih agi sida ke agi baru dalam pemendar, berasai kediri lebuh sida disakal tauka diperinsa diri sebilik enggau bala bakih ti enda arap.

2. Nama tanya ke deka disaut kitai?

² Jehovah nemu semua utai pasal kitai. Iya nemu lebuh kitai berasai sunyi, lalu Iya deka nulung kitai mutarka asai ati nya. Baka ni Jehovah nulung kitai? Nama ulih digaga kitai lebuh kitai berasai sunyi? Lalu baka ni kitai ulih nulung orang bukai ba eklisia ke berasai sunyi? Aram meh kitai nyaut tanya tu.

3. Baka ni Jehovah nunjukka Diri ibuhka Elijah?

³ Jehovah dekaka semua nembiak Iya gaga ati. Iya semak enggau tiap iku kitai, lalu Iya nemu lebuh kitai tusah ati tauka berasai asa. (Mas. 145:18, 19) Peratika baka ni Jehovah ibuhka nabi Elijah. Elijah diau ba maya ti tusah. Bala  penyembah Jehovah balat diperinsa, lalu orang ke bisi kuasa deka munuh Elijah. (1 Raj. 19:1, 2) Pia mega, Elijah ngumbai semina iya aja nabi ti nyembah Jehovah. Nya engka ngasuh iya berasai balat agi asa ati. (1 Raj. 19:10) Petara enggau jampat nulung Elijah. Jehovah nganjung melikat kena madahka Elijah enda kediri. Bisi mayuh orang Israel ke agi nyembah Jehovah enggau tetap ati!—1 Raj. 19:5, 18.

4. Baka ni Mark 10:29, 30 nunjukka Jehovah ibuhka nembiak Iya ke lenyau sukung ari diri sebilik tauka bala bakih?

⁴ Jehovah nemu lebuh kitai milih nyembah Iya, sekeda ari kitai deka ngelengkaka mayuh utai. Tu nyengkaum lenyau sukung ari diri sebilik sereta bala bakih ke enda nyembah Jehovah. Bisi sekali, rasul Peter nanya Jesus: ‘Kami udah ninggalka semua utai lalu nitihka nuan. Nama utai ulih kami?’ (Mat. 19:27) Peter engka nanya tu ketegal iya berasai irau. Jesus madahka sida deka bisi ruang bilik ti besai agi. (Bacha Mark 10:29, 30.) Lalu Jehovah, Apai kitai ti di serega, besemaya deka nulung orang ke nyembah Iya. (Mas. 9:10) Peratika sekeda chara ke ulih digaga nuan kena nerima tulung ari Jehovah ngambika ulih ngelaban asai ati ti sunyi.

5. Nama penguntung enti kitai belematika chara Jehovah udah nulung kitai?

⁵ Belematika pasal chara Jehovah udah nulung nuan. (Mas. 55:22) Lebuh nuan ngereja tu, nya deka nulung nuan nemu nuan enda kediri. Seiku menyadi indu ke benama Carol, * ke seiku aja dalam pemendar madahka: “Lebuh aku belematika baka ni Jehovah udah nulung aku ba maya ti tusah, nya ngasuh aku enda berasai kediri. Nya mega ngasuh aku andal, Jehovah seruran deka nulung aku.”

6. Baka ni 1 Peter 5:9, 10 meransang sida ke berasai sunyi?

⁶ Pikirka baka ni Jehovah nulung bala menyadi Kristian ke berasai sunyi. (Bacha 1 Peter 5:9, 10.) Hiroshi, ke betaun-taun nyembah Jehovah kediri aja madahka:  “Lebuh aku beratika bala menyadi Kristian, aku sedar tiap iku kitai bisi napi penanggul diri empu. Taja pia, sida agi enggau naka ulih nyembah Jehovah. Nya meransang kami ke kediri aja dalam pemendar ngambika ulih betan.”

7. Baka ni sampi nulung nuan?

⁷ Mengkang ngereja pengawa ti ulih negapka pengarap. Tu nyengkaum madahka asai ati nuan ngagai Jehovah. (1 Pet. 5:7) Ambika chunto, lebuh seiku menyadi indu ke benama Maria mutuska deka nyembah Jehovah, iya berasai kediri laban sida sebilik enda nyembah Jehovah. Ku iya madahka: “Siti utai ti pemadu beguna ke nulung aku lebuh aku berasai sunyi, iya nya suah besampi ngagai Jehovah. Iya baka Apai aku, lalu aku suah besampi ngagai Iya ninting hari, sereta madahka asai ati aku ngagai Iya.”

8. Baka ni macha Bup Kudus sereta belemati ulih nulung nuan?

⁸ Suah meh macha Bup Kudus, lalu belematika cherita Bup Kudus ke nunjukka Jehovah rinduka nuan. Bianca, suah ninga jaku ti enda meransang ari diri sebilik. Ku iya madah: “Aku macha sereta belematika cherita ba Bup Kudus. Aku mega macha cherita pengidup nembiak Jehovah ke napi penanggul ti sama baka aku. Tu amat nulung aku.” Sekeda menyadi Kristian ngingatka ayat Bup Kudus ti ulih ngelantangka ati, baka Masmur 27:10 enggau Isaiah 41:10. Ke bukai ningaka audio lebuh sida nyediaka utai ke diguna ba gempuru tauka macha Bup Kudus. Sida madahka nya nulung sida kurang agi berasai sunyi.

9. Baka ni nuan bulih penguntung ari datai begempuru?

⁹ Enggau naka ulih datai begempuru. Utai ke dipelajar nuan ba gempuru ulih meransang nuan, lalu nuan mega ulih ngelala bala menyadi Kristian. (Heb. 10:24, 25) Maria, ke disebut tadi, madahka: “Taja pan aku orang ti pemalu, aku mutuska deka enggau semua gempuru lalu meri saut. Nya nulung aku berasai semak enggau bala menyadi Kristian.”

10. Nama kebuah ngiga bakih ba eklisia amat beguna?

¹⁰ Ngiga bakih ba eklisia. Nuan ulih ngiga bakih ba eklisia ke ulih diteladan nuan, enda ngira orang tuai tauka sida ke biak tauka ke datai ari bemacham bansa. Bup Kudus ngingatka kitai, “orang ke tuai bisi penemu-dalam.” (Jop 12:12, 13) Sida ke tuai ulih mega belajar ari sida ke biak. David biak agi ari Jonatan, tang seduai iya bisi kaul ti amat rapat. (1 Sam. 18:1)  David enggau Jonatan nulung pangan diri nyembah Jehovah taja pan napi penanggul. (1 Sam. 23:16-18) Irina, ti kediri aja ba pemendar madahka: “Bala menyadi Kristian ulih nyadi ruang bilik kitai. Jehovah ulih ngena sida lebuh kitai begunaka tulung.”

11. Nama patut digaga nuan ngambika bisi kaul ti rapat enggau bala menyadi Kristian?

¹¹ Ngiga bakih ti baru enda senang, kelebih agi enti nuan nya orang ke malu. Ratna, seiku menyadi indu ke pemalu belajarka pemendar taja pan disakal. Ku iya madah: “Aku nemu aku begunaka tulung ari bala menyadi Kristian ba eklisia.” Nuan engka tusah deka madahka asai ati nuan ngagai orang, tang enti nuan ngereja nya sida ulih nyadi kaban rapat nuan. Kaban nuan deka meransang sereta nyukung nuan. Tang nuan patut ngasuh sida nemu ni maya nuan begunaka tulung ari sida.

12. Baka ni pengawa nginjil nulung nuan ngiga bakih ti manah?

¹² Siti chara ti pemadu manah ngiga bakih iya nya lebuh begulai nginjil enggau bala menyadi Kristian. Carol, ke disebut sebedau tu madahka: “Aku bisi mayuh kaban ti manah ketegal suah nginjil enggau menyadi Kristian sereta ngereja pengawa teokratik ke bukai. Jehovah udah ngena sida nulung aku.” Nya alai, enggau naka ulih meh ngiga bakih ba eklisia. Jehovah ulih ngena sida nulung nuan lebuh nuan berasai sunyi.—J-lam. 17:17.

13. Nama tanggung pengawa bala menyadi Kristian?

¹³ Semua kitai bisi tanggung pengawa ngambika eklisia bisi pemaik sereta pengerindu. Enggau tu, nadai orang deka berasai kediri tauka sunyi. (Jhn. 13:35) Utai ke digaga enggau utai ke disebut kitai ulih meransang orang! Peratika utai ti dipadah seiku menyadi Kristian indu: “Lebuh aku belajarka pemendar, bala menyadi Kristian nyadi ruang bilik aku. Aku tentu enda ulih nyadi seiku ari Saksi-Saksi Jehovah enti nadai tulung ari sida.” Nama ulih digaga nuan kena nulung menyadi Kristian ke kediri aja dalam pemendar berasai dikerinduka dalam eklisia?

14. Baka ni nuan ulih nyadi bakih sida ke baru datai?

¹⁴ Uji bebakih enggau orang ke baru datai. Enti bisi pemelajar Bup Kudus ke baru datai ngagai gempuru, menyadi Kristian ke baru pindah ngagai eklisia kitai, tauka orang ke baru dibaptisa, kitai deka nyambut sida. (Rom. 15:7) Taja pia, kitai deka ngereja nya lebih agi. Kitai deka ngembuan kaul ti rapat enggau sida. Nya alai, kitai patut manah ati sereta nunjukka pengibuh kitai ngagai sida. Taja pan kitai deka nemu nama penanggul ke ditapi sida, tang kitai patut bejimat lebuh nanya tanya ngambika enda ngemaluka sida. Sekeda engka tusah deka madahka asai ati diri. Nya alai, anang meh mejal sida enti sida enggai bejaku. Tang, kena meh tanya ke ulih mansutka asai ati sida lalu dinga meh enggau sabar lebuh sida nyaut nuan. Ambika chunto, nuan ulih nanya baka ni sida nemu pemendar.

15. Baka ni menyadi Kristian ke tegap ba pengarap ulih nulung menyadi bukai ba eklisia?

¹⁵ Semua bala menyadi ulih mansang tegap ba pengarap, kelebih agi enti tuai gempuru enggau menyadi bukai ke tegap ba pengarap, ibuhka sida. Melissa, ke  dibesaika indai iya dalam pemendar, madahka: “Aku amat beterima kasih ngagai menyadi Kristian lelaki ti baka apai aku. Sida meri awak begulai enggau aku sereta ibuhka aku.” Mauricio, seiku menyadi lelaki berasai kediri lebuh pengajar iya ninggalka pemendar. Ku iya madahka: “Utai ke nulung aku iya nya, lebuh tuai gempuru ibuhka aku. Sida suah berandau enggau aku. Pia mega sida begulai nginjil enggau aku, bekunsika penemu ti berega ari Bup Kudus ke dipelajarka sida enggau aku, lalu indah besukan enggau aku.” Melissa enggau Mauricio diatu gawa penuh jam ke Jehovah.

16-17. Nama ulih digaga kitai kena nulung orang bukai?

¹⁶ Nulung ngena mayuh macham chara. (Gal. 6:10) Leo, gawa nyadi pengerintis seberai tasik ba menua ti jauh ari sida sebilik. Ku iya madah: “Bisi sekali lebuh aku eksiden, aku berasai stres lebuh pulai ke rumah. Tang udah nya, sepasang laki bini mai aku makai begulai. Aku enda ingat utai ke diempa kami, tang aku ingat seduai iya mendingka aku enggau sabar. Pengujung iya, aku berasai nyamai agi!”

¹⁷ Semua kitai rindu begulai enggau bala menyadi Kristian lalu berandau pasal cheramah ke didinga kitai, baka ba gempuru besai enggau konvensyen. Taja pia, Carol, ke disebut ba pun tadi madahka, “Aku berasai sunyi lebuh ba gempuru besai enggau konvensyen.” Nama kebuah Carol berasai baka nya? Ku iya agi, “Taja pan aku dikelingi mayuh bala menyadi Kristian, tang sida iya begulai enggau sida sebilik. Lebuh aku meda nya, aku berasai amat sunyi.” Ke bukai tusah deka datai ngagai konvensyen tauka gempuru besai pengudah kaling pengidup sida udah nadai. Kati nuan nemu menyadi ke napi penanggul baka tu? Enti bisi, ulih nuan mai iya datai begulai enggau kita sebilik lebuh bisi konvensyen enggau gempuru besai?

18. Baka ni kitai nitihka jaku lalau ba 2 Korint 6:11-13 lebuh begulai enggau menyadi Kristian?

¹⁸ Meri awak begulai. Bai meh menyadi Kristian ke enda sama lebuh ngereja sesiti  utai, kelebih agi sida ke berasai sunyi. Kitai deka “nukangka ati” kitai ngagai sida. (Bacha 2 Korint 6:11-13.) “Kami berasai amat gaga ati lebuh bala menyadi Kristian mai kami datai ngagai rumah sida tauka bechuti begulai,” ku Melissa, ke disebut sebedau tu. Kati bisi menyadi ba eklisia nuan ke ulih dibai nuan begulai?

19. Ni maya menyadi Kristian begunaka kitai?

¹⁹ Ni maya menyadi Kristian berasai gaga ati enti kitai meri awak begulai enggau sida? Sekeda berasai kediri lebuh diri sebilik ke ukai Saksi ngintu pengerami. Sekeda agi engka berasai amat tusah ati, lebuh ngingatka hari orang ti dikesayau sida udah nadai. Lebuh kitai meri awak begulai enggau menyadi Kristian ke napi penanggul baka tu, kitai nunjukka diri “balat ibuhka” sida.—Plp. 2:20.

20. Baka ni jaku Jesus ba Matthew 12:48-50 ulih nulung kitai lebuh kitai berasai sunyi?

²⁰ Bisi mayuh kebuah kitai kekadang berasai sunyi. Tang kingatka, Jehovah nemu asai ati kitai. Iya suah ngena bala menyadi Kristian meri utai ke diguna kitai. (Bacha Matthew 12:48-50.) Lalu, kitai nunjukka ngagai Jehovah kitai beterima kasih lebuh kitai enggau naka ulih nulung bala menyadi Kristian. Enda ngira baka ni asai ati kitai, kitai enda kediri laban Jehovah seruran enggau kitai!