ARI kelia menya, orang Israel udah teleba meri duit kena nyukung sembah ti bendar. Tang ba jeman Jesus, orang Judah patut mayar mayuh bansa chukai lalu tu ngasuh pengidup sida amat tusah.

Kena nyukung endur alai nyembah Jehovah, semua lelaki orang Judah ke besai tuai diasuh meri duit pemeri ti mit kena mayar chukai. Ba jeman Jesus, chukai nya diberi kena nyediaka pemeri sereta ngintu Rumah Sembiang ke digaga Herod. Sekeda orang Judah nanya Peter sekalika Jesus bisi mayar chukai, lalu Jesus madahka enda salah mayar chukai. Udah nya, iya madah dini Peter ulih ngiga duit kena mayar chukai.—Mat. 17:24-27.

Nembiak Jehovah kelia menya mega diasuh meri sepuluh peratus ari asil tanah sida tauka ari gaji sida. (Lew. 27:30-32; P-pau. 18:26-28) Tang tuai pengarap madahka orang patut mayar sepuluh peratus tu ba tiap iti sayur, indah ari rempah baka “telasih, adas manis, enggau jintan.” Jesus madah enda salah mayar sepuluh peratus, tang iya madahka chara pengajar adat enggau orang Parisi nitihka adat nya salah.—Mat. 23:23.

Tang ba maya nya mega, orang Judah patut mayar mayuh bansa chukai ngagai orang Rome, ke benung merintah sida. Ambika chunto, orang ke bisi tanah patut mayar chukai ngena duit tauka utai ke ditanam sida. Enti sida ngetau empat iti guni ari utai ke ditanam, sida patut meri siti guni nya nyadika chukai ngagai orang Rome. Pia mega, tiap iku orang Judah diasuh mayar chukai pala. Tu meh chukai ke ditanya orang Parisi ngagai Jesus. Jesus nunjukka runding ti betul bekaul enggau chukai lebuh iya madah: ‘Utai Raja Besai, beri ngagai Raja Besai, utai Petara, beri ngagai Petara.’—Mat. 22:15-22.

Tiap iti barang ke tama tauka dibai pansut ari siti-siti negeri mega dikenaka chukai. Chukai tu dikumpul ba penyangkai kapal, jematan, simpang jalai, penama ngagai kuta, tauka makit.

Endang amat, chukai ke dipinta perintah Rome ngasuh pengidup rayat balat merinsa. Nitihka seiku pakar sejarah Rome ke benama Tacitus, lebuh Jesus ba dunya maya Raja Besai Tiberius merintah, “Siria enggau Judæa minta chukai dikurangka laban pengidup sida amat tusah.”

Kelimpah ari nya, rayat mega berasai tusah ketegal pengumpul chukai. Pengawa ngumpul chukai diberi ngagai orang ke ulih meri rega ti tinggi. Udah nya, iya deka ngasuh orang bukai ngumpul chukai, lalu semua sida tu minta chukai ti tinggi ketegal deka bulih penguntung. Engka Sakius mega bisi ngasuh orang ngumpul chukai ke iya. (Luk. 19:1, 2) Nya alai, rayat begedika orang ke ngumpul chukai ari sida.