1. Nama kebuah kitai ngumbai Sitan baka orang ke ngasu?

ORANG KE NGASU bisi siti juluk ati, iya nya nangkap tauka munuh jelu ke ditangkap iya. Iya engka ngena bemacham bansa panjuk. (Jop 18:8-10) Baka ni orang ke ngasu manjuk jelu ngagai panjuk iya? Iya belajar pasal jelu nya. Kini ke penunga iya? Nama utai ti dikerinduka jelu nya? Lalu nama panjuk ti pemadu manah kena manjuk jelu nya? Sitan baka orang ke ngasu. Iya belajar pasal kitai. Iya beratika kini penunga kitai lalu utai ti dikerinduka kitai. Udah nya, iya ngaga panjuk ke ulih nangkap kitai enggau enda disadang. Tang, Bup Kudus madahka enti kitai ditangkap, kitai ulih ngelepaska diri ari panjuk nya. Bup Kudus mega ngajar kitai chara ulih nyeliahka diri ari panjuk nya.

2. Nama dua iti panjuk ti dikena Sitan enggau mujur?

² Dua iti panjuk ti mujur dikena Sitan, iya nya penyumbung enggau pengamu. * Sitan udah mujur ngena panjuk tu pengelama beribu taun. Iya baka orang ke nangkap burung ngena panjuk tauka pukat. (Jer. 5:26) Tang kitai ulih ngelepaska diri ari Sitan! Nama kebuah? Laban Jehovah udah madahka kitai chara ke dikena Sitan manjuk kitai.—2 Kor. 2:11.

3. Nama kebuah Jehovah nentuka teladan pasal orang ke sumbung sereta amu ditulis ba Bup Kudus?

³ Siti chara Jehovah nangkan kitai pasal penyumbung enggau pengamu iya nya madahka pasal utai ti udah nyadi ngagai sekeda ari nembiak Iya. Peratika, Sitan mega udah manjuk  sekeda ari orang ke udah lama nyembah Jehovah. Kati tu reti iya kitai enda ulih nyeliahka diri ari penyumbung enggau pengamu? Enda. Jehovah nentuka teladan tu ditulis ba Bup Kudus “kena ngajar kitai.” (1 Kor. 10:11) Iya nemu kitai ulih belajar ari teladan ti enda manah tu, lalu nyeliahka diri tauka ngelepaska diri ari panjuk Sitan.

4. Nama ulih nyadi enti kitai sumbung?

⁴ Sitan deka kitai nyadi sumbung. Iya nemu enti kitai bisi penyumbung, kitai ulih nyadi baka iya lalu lenyau pengidup belama-lama iya. (J-lam. 16:18) Nya alai rasul Paul bisi nangkan, seseiku orang ulih “ngerigangka diri laban sumbung, lalu diukum baka Sitan.” (1 Tim. 3:6, 7) Tu ulih nyadi ngagai sapa-sapa aja, enda ngira kitai baru ba pemendar tauka udah lama nyembah Jehovah.

5. Nitihka Pengajar 7:16, 20, baka ni seseiku orang nunjukka diri sumbung?

⁵ Orang ke sumbung berundingka diri empu. Sitan deka kitai berundingka diri empu ari berundingka Jehovah, kelebih agi lebuh kitai napi penanggul. Ambika chunto, kala nuan dituduh tauka orang enda lurus enggau nuan? Sitan deka nuan ringat enggau Jehovah tauka bala menyadi Kristian. Iya deka nuan ngumbai, manah agi mutarka penanggul nya ngena chara diri empu, lalu enda ibuh nitihka iring Jehovah ke diberi nengah Bup Kudus.—Bacha Pengajar 7:16, 20.

6. Nama ulih dipelajarka nuan ari peneleba seiku menyadi indu ari Netherlands?

⁶ Peratika peneleba seiku menyadi indu ari Netherlands. Iya pedis ati enggau pengelemi menyadi bukai. Iya mutuska enggai agi begulai enggau sida. Ku iya madah, “Aku berasai amat sunyi lalu enda ulih ngampunka sida. Aku madah ngagai laki aku, kami duai patut pindah ngagai eklisia bukai.” Udah nya, iya meda program Berita JW kena Mac 2016. Program nya meri sekeda chara ngambika ulih nerima pengelemi orang  bukai. Menyadi indu tu madah: “Aku nyau sedar aku patut baruh ati lalu berundingka penyalah diri empu, ari ke deka ngubah bala menyadi ba eklisia. Program tu nulung aku beberat agi ke Jehovah enggau hak Iya merintah.” Nama ulih dipelajarka nuan? Lebuh nuan napi penanggul, terus meh ngembuan runding Jehovah. Pinta tulung ari Iya ngambika nuan ulih meda bala menyadi baka Iya meda sida. Apai nuan di serega meda penyalah nembiak Iya. Taja pia, Iya sedia ngampun sida. Jehovah mega deka nuan ngereja utai ti sama.—1 Jhn. 4:20.

7. Nama nyadi ngagai Raja Usiah?

⁷ Ketegal Raja Usiah ari menua Judah nyadi sumbung, iya enda mendingka jaku lalau ari orang bukai. Iya ngereja utai ke enda patut digaga iya. Usiah ulih ngereja mayuh utai enggau manah. Iya mujur ba perang, nirika nengeri, lalu bisi mayuh kebun. Ku Bup Kudus, ‘Petara merekatka iya.’ (2 Ban. 26:3-7, 10) “Tang lebuh Usiah nyau udah kering, iya sumbung. Penyumbung iya ngujungka iya dibuai.” Jehovah udah meri atur semina bala imam ke ulih nunu menyan ba Rumah Sembiang. Tang Raja Usiah ngereja utai ke enda patut dikereja iya. Iya tama ngagai Rumah Sembiang lalu nunu menyan. Jehovah enda rindu enggau ulah nya lalu ngukum iya ngena penyakit lan. Ketegal nya, Usiah bisi penyakit lan nyentuk ngagai pemati iya.—2 Ban. 26:16-21.

8. Nitihka 1 Korint 4:6, 7, baka ni kitai ulih nyeliahka diri ari nyadi sumbung?

⁸ Nama ulih dipelajarka kitai ari cherita Raja Usiah? Peratika teladan José. Iya orang bisnis ti mujur sereta tuai gempuru ti dipebasa. Iya meri cheramah ba gempuru besai sereta konvensyen. Indah tuai ti ngabas nanya penemu ari iya. Ku José, “Aku bepanggai ba penau enggau peneleba diri empu. Aku enda bepanggai ba Jehovah. Aku ngumbai diri kering. Nya alai, aku enda ningaka jaku lalau enggau jaku tangkan ari Jehovah.” José ngereja penyalah ti besai lalu dibuai ari gerempung. Tang diatu, iya udah diterima pulai baru. Ku iya madah: “Jehovah udah ngajar aku, utai ti pemadu beguna nya ukai ngembuan penuduk, tang ngereja utai ke dipinta Iya.” Nya alai kingatka,  sebarang pengelandik tauka tanggung pengawa ke dikembuan kitai datai ari Jehovah. (Bacha 1 Korint 4:6, 7.) Enti kitai sumbung, Jehovah badu agi ngena kitai.

9. Nama digaga Sitan enggau Awa ketegal seduai iya bisi pengamu?

⁹ Lebuh kitai berundingka pasal pengamu, kitai tentu ingatka Sitan. Sitan seiku ari melikat Jehovah. Nya alai, iya tentu bisi mayuh tanggung pengawa ti spesial. Taja pia, iya enda puas ati. Iya inginka sembah ke enggi Jehovah aja. Sitan deka kitai nyadi baka iya. Nya alai, iya deka kitai enda puas enggau utai ti dikemisika kitai. Keterubah kali iya ngereja nya lebuh iya bejaku enggau Awa. Jehovah udah nyediaka mayuh pemakai ke Awa enggau laki iya. Seduai iya ulih makai buah “ari semua kayu dalam kebun” kelimpah ari siti pun aja. (P-kal. 2:16) Taja pia, Sitan deka Awa ngumbai iya patut makai buah ari pun kayu ke ditagang nya. Awa enda puas ati enggau utai ke dikemisi iya. Utai ke nyadi pengudah nya ngasuh iya bedosa lalu ngujungka pemati.—P-kal. 3:6, 19.

10. Baka ni pengamu manjuk Raja David?

¹⁰ Jehovah meri David mayuh berekat, nyengkaum pengaya, penuduk raja sereta menang ba perang. David berasai beterima kasih lalu madahka pemeri Petara nya “kelalu mayuh” deka dikenang. (Mas. 40:5) Taja pia, David kala enda puas ati enggau utai ke diberi Jehovah ngagai iya. Taja pan David bisi beberapa iku bini, iya inginka bini orang bukai. Indu nya benama Batseba lalu laki iya Uriah orang Iti. David beleman enggau Batseba lalu Batseba betubuh-bisi. Utai ti digaga David endang jai, tang utai ke digaga iya pengudah nya balat agi! Iya ngatur ngambika Uriah dibunuh. (2 Sam. 11:2-15) Kati David ngumbai Jehovah enda ulih meda penyalah iya? Taja pan David udah lama nyembah Jehovah, iya nyadi amu lalu tu ngasuh iya balat merinsa. Udah nya, David ngaku penyalah diri lalu nesal ati. Iya tentu beterima kasih laban Jehovah deka ngampunka iya!—2 Sam. 12:7-13.

11. Nitihka Epesus 5:3, 4, nama ulih nulung kitai ngelaban pengamu?

¹¹ Nama ulih dipelajarka kitai ari teladan  David? Kitai ulih ngelaban pengamu enti kitai mengkang beterima kasih ke utai ti udah diberi Jehovah ngagai kitai. (Bacha Epesus 5:3, 4.) Kitai enda tau enda puas ati enggau utai ti dikemisi kitai. Lebuh kitai berengkah belajar Bup Kudus enggau orang, kitai ulih ngajar sida belematika berekat ke udah diberi Jehovah ngagai sida. Udah nya, kitai ulih meransang sida meri terima kasih ngagai Jehovah. Enti sida ngereja nya ninting hari pengelama seminggu, tu reti iya sida udah besampika tujuh iti pekara ti bebida. (1 Tes. 5:18) Kati nuan ulih ngereja utai ti sama? Enti nuan belematika utai ke udah digaga Jehovah ke nuan, tu deka nulung nuan beterima kasih ngagai Iya. Lebuh nuan berasai beterima kasih, nuan deka puas ati lalu tu nulung nuan enda inginka utai ti enda dikemisika nuan.

12. Nama digaga Judas Iskariot lebuh iya nyadi amu?

¹² Ketegal Judas Iskariot nyadi amu, iya ngereja utai ti jai lalu nyual Jesus. Tang sebedau tu, iya ukai orang ti jai. (Luk. 6:13, 16) Jesus milih iya nyadi seiku ari rasul iya. Judas tentu bisi pengelandik lalu tau dikearapka, laban iya diasuh ngemataka sarang duit. Jesus enggau bala rasul ke bukai ngena duit nya ba pengawa nginjil. Duit tu tau disemaka baka duit pemeri ke pengawa serata dunya kemayaharitu. Tang, nyau kelama Judas berengkah ngenchuri taja pan iya suah ninga jaku tangkan Jesus bekaul enggau pengamu. (Mrk. 7:22, 23; Luk. 11:39; 12:15) Judas enda mendingka jaku tangkan nya.

13. Ni maya pengamu Judas terang dipeda?

¹³ Ni maya pengamu Judas terang dipeda? Bisi sekali, enda lama sebedau Jesus dibunuh, Jesus enggau bala murid iya, nyengkaum Maria sereta Marta, dibai ngagai rumah Simon ke udah sakit lan. Maya sida benung makai, Maria angkat lalu nuang minyak wangi ti mar ba pala Jesus. Judas enggau bala murid ke bukai berasai pedis ati. Bala murid ke bukai ngumbai duit nya tau dikena ba pengawa nginjil. Tang Judas pedis ati ketegal kebuah bukai. “Iya penchuri” lalu deka ngenchuri duit ari sarang duit. Lalu ketegal Judas nyadi majak amu, iya nyual Jesus sama rega enggau seiku ulun.—Jhn. 12:2-6; Mat. 26:6-16; Luk. 22:3-6.

14. Baka ni sepasang laki-bini nitihka jaku lalau ba Luke 16:13?

¹⁴ Jesus ngingatka bala murid iya pemendar tu: ‘Kita enda ulih betuaika Petara enggau duit.’ (Bacha Luke 16:13.) Pemendar tu agi beguna kemayaharitu. Peratika baka ni sepasang laki-bini di Romania nitihka jaku lalau Jesus. Seduai iya dibai kereja ngagai menua ke kaya agi. Ku seduai iya: “Kami duai bisi utang ti besai enggau bank. Nya alai, terubah iya kami ngumbai kereja tu berekat ari Jehovah.” Tang kereja tu deka ngasuh seduai iya kurang agi awak nyembah Jehovah. Pengudah macha artikel “Pertahankan Loyalitas dengan Kebulatan Hati” ba Menara Jaga 15 Ogos 2008, * seduai iya ngaga pemutus. Ku seduai iya agi: “Enti tuju kami duai deka gawa ba menua bukai ketegal deka ngulihka mayuh agi duit, tu reti iya kami enda ngenuluka kaul kami enggau Jehovah. Tu tentu ulih ngasuh pengarap kami duai nyadi lemi.” Nya alai, seduai iya nulak kereja nya. Nama nyadi pengudah nya? Laki iya tetemuka kereja ba menua diri lalu gaji nya chukup ke belanja seduai iya. Ku bini  nya madah: “Jehovah seruran nulung nembiak Iya.” Laki-bini tu gaga ati laban seduai iya betuaika Jehovah ukai betuaika duit.

15. Nama kebuah kitai andal kitai ulih ngelepaska diri ari panjuk Sitan?

¹⁵ Nama patut digaga kitai enti kitai ngasaika diri udah nyadi sumbung tauka amu? Kitai ulih ngaga ubah! Paul madahka, sida ke ditangkap Sitan ulih ngelepaska diri ari panjuk iya. (2 Tim. 2:26) Tu meh utai ke nyadi ba David. Iya mendingka jaku lalau Natan, nesal ati lalu ngemanahka baru kaul iya enggau Jehovah. Kingatka, Jehovah kering agi ari Sitan. Nya alai, enti kitai nerima tulung Jehovah, kitai ulih ngelepaska diri ari sebarang panjuk ke dikena Sitan.

16. Nama ulih nulung kitai nyeliahka diri ari dipanjuk Sitan?

¹⁶ Endang amat, manah agi enti kitai enda nyadi sumbung tauka amu. Kitai semina ulih ngereja nya enggau tulung ari Petara. Taja pia, kitai anang ngumbai diri kering nyentukka kitai enda sekali-kali nyadi sumbung tauka amu! Indah nembiak Jehovah ke udah lama nyembah Iya pan ulih nyadi sumbung tauka amu. Nya alai, besampi meh ngagai Jehovah ninting hari ngambika Iya ulih nulung nuan meresa runding enggau ulah nuan, sekalika nuan bisi penyumbung tauka pengamu. (Mas. 139:23, 24) Enggau bebendar meh kitai nyeliahka diri ari penyumbung enggau pengamu!

17. Nama deka nyadi ngagai munsuh kitai Sitan enda lama agi?

¹⁷ Sitan udah nyadi baka orang ke ngasu pengelama beribu taun. Taja pia, enda lama agi iya deka ditanchang lalu dipunaska. (Pem. 20:1-3, 10) Kitai keran nganti maya nya. Sebedau hari nya datai, kitai patut bejimat enggau panjuk ke dikena Sitan. Enggau naka ulih nyeliahka diri ari penyumbung tauka pengamu. “Laban meh Sitan, lalu iya deka rari ari kita.”—Jas. 4:7.