Paul nulis: ‘Ulih Adat, aku udah mati ke Adat, ngambika aku tau idup ke Petara.’—Gal. 2:19.

Utai ke ditulis Paul bisi kaul enggau batang pekara ke deka dipadah iya ngagai seraban eklisia Galatia di Rome. Sekeda runding orang Kristian bisi dikachau pengajar pelesu. Bala pengajar pelesu ngajar, kena bulih pengelepas, sida patut nitihka Adat Moses, kelebih agi pasal pengawa betutus. Tang Paul nemu Petara enda agi minta nembiak Iya ditutus. Tu chukup kena ngelaban ajar pelesu nya, lalu penerang nya negapka pengarap bala menyadi ba genselan tebus Jesus Kristus.—Gal. 2:4; 5:2.

Bup Kudus enggau terang madahka, enti orang mati, iya enda nemu nama-nama utai. (P-jar. 9:5) Maya Paul madah: “Aku udah mati ke Adat,” tu reti iya Adat Moses enda agi bekuasa atas pengidup iya. Paul andal nengah pengarap iya ke genselan tebus Jesus, iya ‘tau idup ke Petara.’

Pengidup Paul berubah “ulih Adat.” Baka ni nya? Paul baru udah madah: “Orang digaga lurus ukai laban sida ngasika Adat, tang ulih pengarap sida ke Jesus Kristus.” (Gal. 2:16) Endang amat, Adat udah nyapai utai ti beguna bendar. Paul nerangka ngagai bala menyadi di Galatia: “Adat diberi laban kitai bepenyalah [tauka ‘kena mandang ka kereja ti salah,’ Bup Kudus Berita Manah Ka Rebak Diatu]. Tang Adat dikena semina nyentuk ngagai maya penatai siku peturun ti udah disemaya.” (Gal. 3:19) Amat, Adat nunjukka mensia ti enda sempurna endang bedosa, lalu sida enda ulih nitihka Adat nya enggau sempurna. Sida begunaka tebus ti sempurna. Nya alai, Adat mai orang ngagai “siku peturun,” iya nya Kristus. Enti sida arapka Kristus, sida ulih dikumbai Petara lurus. (Gal. 3:24) Paul ulih nyebut munyi nya laban nengah Adat, iya udah nerima enggau arapka Jesus. Nya alai, Paul “udah mati ke Adat” lalu ‘idup ke Petara.’ Adat enda agi bekuasa atas iya, tang Petara ke bekuasa atas pengidup iya.

Paul mega madahka utai ti sama dalam surat iya ke bala menyadi di Rome. Iya madah: “Baka nya mega kita, menyadi. Kita udah mati ke Adat, laban kita diatu udah nyadi raban tubuh Kristus . . . Diatu kitai udah dilepaska ari Adat, mati ari utai ti udah nanchang kitai suba.” (Rom. 7:4, 6) Ba ayat tu enggau ba Galatia 2:19, nunjukka Paul ukai bejaku pasal mati baka orang ke dikumbai bedosa di baruh Adat. Tang, iya bejaku pasal pengelepas ari Adat. Paul enggau orang Kristian ke bukai enda agi ditanchang Adat. Sida udah dilepaska ketegal pengarap ba genselan tebus Jesus.