1. Nitihka 1 Peter 5:2, nama pengawa ti penting ke patut dikereja bala tuai gempuru?

 BALA tuai gempuru Kristian mesti nyaga bala bedus Jehovah ti berega. Sida amat beterima kasih laban Jehovah arapka sida kena ngintu bala menyadi Kristian, lalu bala tuai gempuru bebendar ngibun sereta “ngintu sida.” (Jer. 23:4; bacha 1 Peter 5:2.) Kitai amat beterima kasih laban kitai bisi bala lelaki ke baka nya dalam raban gempuru kitai!

2. Nama penanggul ke engka ditapi sekeda bala tuai gempuru?

² Bala tuai gempuru mega napi mayuh macham penanggul lebuh sida bejalaika tanggung pengawa sida. Siti ari kebuah nya, bala tuai gempuru patut bebendar nyaga raban gempuru. Tony, siku tuai gempuru ba Amerika Serikat, patut belajar nemu tatak diri lebuh ngaga pemutus pasal ni penyampau pengawa ke ulih diterima iya. Ku iya nerangka: “Lebuh pandemik COVID-19 berengkah, aku nguji ngereja mayuh utai ngambika ulih ngatur gempuru sereta pengawa nginjil. Tang enda ngira ni penyampau pengawa ke udah digaga aku, selalu iya tentu bisi mayuh agi utai bukai ke patut digaga. Aku nyadi amat kisuk nyentukka aku enda netapka chukup awak kena macha Bup Kudus, belajarka Bup Kudus kediri empu, sereta besampi.” Ilir, siku tuai gempuru ba Kosovo, napi penanggul ke bukai. Maya iya ba endur perang nyadi, iya ngasaika tusah deka nitihka iring ari gerempung. Ku iya madahka: “Pemerani aku diuji lebuh pampang opis ngasuh aku nulung bala menyadi ba siti endur ti bahaya. Aku berasai takut, lalu iring nya baka ke enda masuk akal.” Tim, siku pengerintis seberai tasik ba Asia ngasaika tusah deka ngereja utai ke patut dikereja iya ninting hari. Ku iya: “Kekadang aku berasai amat lelak ari segi mental enggau emosi.” Nama ulih nulung bala tuai gempuru ke napi penanggul ti sama?

3. Baka ni semua kitai bulih penguntung lebuh beratika teladan Pengulu Gideon?

 ³ Bala tuai gempuru ulih belajar ari teladan Pengulu Gideon. (Heb. 6:12; 11:32) Iya nyaga sereta ngelindung bala nembiak Petara. (P-ulu. 2:16; 1 Ban. 17:6) Baka Gideon, bala tuai gempuru udah dipilih kena ngintu bala nembiak Petara ba maya ti amat tusah tu. (SKR. 20:28; 2 Tim. 3:1) Kitai ulih belajar ari teladan Gideon ke nemu tatak diri, baruh ati, sereta ulah iya ti ngasi. Pengeliat ati iya diuji seraya iya bejalaika tanggung pengawa iya. Enda ngira kitai nya tuai gempuru tauka enda, semua kitai ulih belajar ngayanka asai ati terima kasih ti besai agi ngagai bala tuai gempuru kitai. Kitai ulih nyukung bala tuai gempuru ti bagas ke nyaga kitai ba raban gempuru.—Heb. 13:17.

4. Baka ni Gideon ngayanka pemaruh ati sereta nemu tatak diri?

⁴ Gideon nya siku lelaki ti baruh ati sereta nemu tatak diri. b Lebuh melikat Jehovah madah ngagai Gideon pasal iya ke udah dipilih kena nyelamatka orang Israel ari orang Midian ti bekuasa, lelaki ti baruh ati nya nyaut: “Suku raban bansa aku pemadu lemi dalam raban bansa Manasi, lalu aku tu orang ke pemadu enda diguna orang dalam ruang bilik aku.” (P-ulu. 6:15) Gideon ngasaika diri enda layak ngereja tanggungjawap nya, tang Jehovah nemu iya ulih ngereja nya. Enggau tulung ari Jehovah, Gideon mujur nembuka pengawa nya.

5. Kemaya siku tuai gempuru engka tusah deka ngayanka pemaruh ati sereta nemu tatak diri?

⁵ Bala tuai gempuru bebendar deka ngayanka ulah ti nemu tatak diri sereta pemaruh ati dalam semua utai. (Mik. 6:8; SKR. 20:18, 19) Sida enda bejaku begah pasal utai ke ulih dikereja tauka utai ke udah digaga sida, lalu sida enda ngumbai diri nadai guna laban bisi ngereja sekeda penyalah. Tang, kekadang siku tuai gempuru engka tusah deka ngayanka pemaruh ati sereta nemu tatak diri. Ambika chunto, iya engka nerima mayuh tanggung pengawa lalu udah nya tusah deka ngereja semua tanggung pengawa nya. Tauka bisi maya iya orang ngutuk chara iya ngereja sesiti pengawa, lalu bisi maya iya mega orang muji chara iya ngereja pengawa ke bukai. Ba maya ke baka nya, iya mega engka tusah deka ngayanka pemaruh ati sereta nemu tatak diri.  Nama ulih dipelajarka bala tuai gempuru ari Gideon ke deka nulung sida ba situasi ke baka nya?

6. Nama ulih dipelajarka bala tuai gempuru ari ulah Gideon ti nemu tatak diri? (Peda mega gambar.)

⁶ Minta tulung. Orang ke nemu tatak diri nemu bisi utai ke enda ulih dikereja iya. Gideon ngayanka diri nemu tatak diri laban iya minta tulung ari orang bukai. (P-ulu. 6:27, 35; 7:24) Bala tuai gempuru ti bepenemu-dalam mega ngereja utai ti sama. Tony ke dipadah ba pun tadi nerangka: “Ari chara aku dibesaika, aku udah biasa nerima mayuh pengawa ari ke ulih dikereja aku. Nyadi lebuh belajarka Bup Kudus ba diri sebilik, kami berandau pasal ulah nemu tatak diri lalu aku nanya runding bini aku pasal aku. Aku mega meda video Matih, Pechaya, enggau Meransang Orang Bukai, Baka ke Udah Dikereja Jesus” ba jw.org. Tony berengkah minta tulung ari orang bukai ngereja pengawa iya. Nama asil iya? Tony madahka: “Pengawa ba raban gempuru ulih terus diatur, lalu aku bisi mayuh agi awak kena negapka kaul aku enggau Jehovah.”

7. Enti dikutuk, baka ni bala tuai gempuru ulih neladan Gideon? (James 3:13)

⁷ Anang ringat enti sesiku orang ngutuk nuan. Siti agi penguji ke ditapi bala tuai gempuru iya nya enti sida dikutuk. Sekali agi, teladan Gideon ulih nulung. Gideon nemu iya enda sempurna. Nyadi iya mengkang tenang lebuh orang Epraim ngutuk iya. (P-ulu. 8:1-3) Gideon enda nyaut sida enggau ati ti ringat. Gideon ngayanka diri baruh ati lebuh iya ningaka kompelin sida, lalu udah nya iya nelap lebuh bejaku enggau sida. Tu ngasuh situasi nya tenang. Bala tuai gempuru ti bepenemu-dalam neladan Gideon lebuh sida ninga enggau manah sereta nyaut enggau nelap enti dikutuk. (Bacha James 3:13.) Enggau nya bala tuai gempuru ulih nentuka penyerakup ba raban gempuru ulih mengkang dijaga.

8. Nama reaksi ke patut diayan bala tuai gempuru lebuh sida dipuji? Beri siti chunto.

⁸ Beri semua puji ngagai Jehovah. Lebuh orang bukai muji Gideon ketegal pemenang iya atas orang Midian, Gideon meri puji nya ngagai Jehovah. (P-ulu. 8:22, 23) Baka ni bala tuai gempuru ulih neladan Gideon? Sida patut meri puji ngagai Jehovah ketegal semua utai ke udah dijapai sida. (1 Kor. 4:6, 7) Ambika chunto, enti siku tuai gempuru dipuji ketegal pengelandik iya ngajar, iya ulih madahka pesan nya datai ari Jaku Petara, lalu semua kitai belajar ari gerempung Jehovah. Bala tuai gempuru ulih berunding sekalika chara sida ngajar mai mulia ngagai Jehovah tauka mai mulia ngagai diri empu. Peratika pengalaman siku tuai gempuru ke benama Timoti. Lebuh iya baru dipilih nyadi tuai gempuru, Timoti rindu meri cheramah Bup Kudus. Ku iya: “Aku deka ngena jaku pemuka enggau sempama ti panjai sereta tusah. Orang suah muji aku ketegal nya. Tang nya ngasuh sida betumpu ba aku, ukai ba Bup Kudus tauka ba Jehovah.” Nyau kelama, Timoti nyau sedar iya patut ngubah chara iya ngajar ngambika orang enda kelalu betumpu ba iya. (J-lam. 27:21) Nama asil iya? Ku iya madahka: “Diatu bala menyadi Kristian madah ngagai aku, cheramah aku nulung sida mutarka penanggul, tan napi penguji, tauka datai semak ngagai Jehovah. Utai ti dipadah sida ngasuh aku gaga agi ati diatu ari ke jaku puji ti diterima aku suba.”

9. Nama utai ke ngasuh Gideon tusah deka ngasika Jehovah sereta ngayanka pemerani? (Peda gambar ba mua majalah.)

⁹ Pengudah Gideon diberi tanggung pengawa ngulu orang Israel, iya patut berani sereta ngayanka ulah ti ngasi. Iya diberi tanggung pengawa ti bahaya, iya nya ngerusak alta ke dikena apai iya nyembah Baal. (P-ulu. 6:25, 26) Udah  nya, pengudah iya ngelumuka seraban soldadu, Jehovah dua kali ngasuh iya ngurangka penyampau bala soldadu iya. (P-ulu. 7:2-7) Lalu ke pengujung iya, Gideon diasuh nyerang bala munsuh iya maya tengah malam.—P-ulu. 7:9-11.

10. Nama utai ke engka ngasuh siku tuai gempuru tusah deka ngasi?

¹⁰ Bala tuai gempuru patut “sedia deka ngasi.” (Jas. 3:17) Tuai gempuru ti ngasi besedia deka nitihka utai ti dipadah Bup Kudus sereta ngasika iring ari gerempung Petara. Enggau tu, tuai gempuru nya ulih netapka teladan ti manah ke orang bukai. Tang engka bisi maya iya, iya tusah deka ngasi. Ambika chunto, iya engka nerima kelalu mayuh iring tauka iring nya jampat berubah. Nya engka ngasuh iya tusah deka nitihka iring nya. Ba sekeda pekara, iya engka berunding sekalika iring nya amat ulih dikena tauka enda. Tauka iya engka diasuh megai sesiti tanggung pengawa ke ulih ngujungka iya ditangkap. Baka ni bala tuai gempuru ulih neladan ulah Gideon ti ngasi ba situasi ke baka tu?

11. Nama ulih nulung bala tuai gempuru ngasi?

¹¹ Pendingka iring enggau manah lalu titihka iya. Petara madah ngagai Gideon pasal chara kena ngerusak alta apai iya, dini alta baru ke Jehovah patut digaga, sereta ni bagi jelu ke patut nyadi pemeri. Gideon nadai mayuh tanya pasal iring nya, iya ngereja aja utai ke diasuh Jehovah. Kemayaharitu, bala tuai gempuru nerima iring ari gerempung Jehovah nengah surat, jaku gerah, sereta iring bukai ke nulung kitai mengkang likun sereta semak ngagai Jehovah. Kitai rinduka bala tuai gempuru laban sida enggau tetap ati nitihka iring ari gerempung Jehovah. Ketegal nya, semua bala menyadi deka bulih penguntung.—Mas. 119:112.

12. Baka ni bala tuai gempuru ulih nitihka Hebrew 13:17 enti gerempung Jehovah ngasuh sida ngubah chara sida ngereja utai?

¹² Sanggup ngaga ubah. Kingatka, Jehovah ngasuh Gideon nganjung pulai nyauka semua bala soldadu iya. (P-ulu. 7:8) Iya engka bisi berunding, ‘Kati ubah tu patut? Kati tu ulih mujur?’ Taja pia, Gideon ngasi. Kemayaharitu bala tuai gempuru neladan Gideon lebuh sida ngasika iring ari gerempung ke ngasuh sida ngubah chara sekeda utai digaga. (Bacha Hebrew 13:17.) Ambika chunto, ba taun 2014, Raban ti Ngiring ngubah chara kena mayar ungkus nirika Palan Gempuru sereta Palan Gempuru Besai. (2 Kor. 8:12-14) Raban gempuru enda ibuh berutang agi. Suba, gerempung deka nyali duit ngagai raban gempuru kena nirika projek nya, lalu udah nya raban gempuru deka mayar baru ngagai gerempung. Tang diatu, gerempung ngena duit pemeri ari semua raban gempuru ba serata dunya kena nirika Palan Gempuru sereta Palan Gempuru Besai ba sebarang endur ke begunaka nya, taja pan enti raban gempuru ba endur nya semina ulih meri mimit aja duit pemeri. Lebuh José nemu pasal ubah nya, iya kakang ati sekalika atur nya ulih mujur, iya berunding: ‘Nadai siti pan Palan Gempuru ulih didirika. Nya ukai chara utai dikereja ba alai kami ditu.’ Nama nulung José nyukung iring nya? Ku iya  madahka: “Utai ke dipadah ba Jaku Dalam 3:5, 6 ngingatka aku ngambika arapka Jehovah. Lalu asil iya amat manah! Kitai ukai aja ulih nirika mayuh agi Palan Gempuru, tang kitai mega ulih meri duit pemeri ngambika ulih nulung bala menyadi bukai ke nadai mayuh utai.”

13. (a) Nama utai ke diandalka Gideon? (b) Baka ni bala tuai gempuru ulih neladan Gideon? (Peda mega gambar.)

¹³ Enggau berani ngereja peneka Jehovah. Gideon ngasika Jehovah taja pan iya berasai takut tauka patut ngereja tanggung pengawa ti bahaya. (P-ulu. 9:17) Pengudah Jehovah madahka Diri deka nyukung Gideon, Gideon berasai amat yakin Petara deka nulung iya ngelindung bala nembiak Petara. Bala tuai gempuru ke diau ba alai pengawa kitai ditagang, neladan Gideon. Sida enggau berani ngulu ba gempuru sereta pengawa nginjil taja pan sida engka ditangkap, ditasat, lenyau kereja, tauka napi utai ti jai ke bukai. c Maya Penusah ti Besai, bala tuai gempuru begunaka pemerani kena ngasika sebarang iring ke diterima sida taja pan iring nya engka bahaya. Ambika chunto, kitai engka diberi iring pasal chara madahka pesan pasal Petara ke deka ngakim, sereta utai ti patut dikereja kitai ngambika ulih selamat ari serang Gok ari menua Magok.—Esk. 38:18; Pem. 16:21.

14. Nama kebuah Gideon tusah deka ngayanka pengeliat ati?

¹⁴ Gideon patut ngereja mayuh pengawa ti berat lebuh iya nyadi siku pengulu. Lebuh orang Midian rari ari perang maya malam hari, Gideon ngagai sida ari Lebak Jesril nyentuk ngagai Sungai Jordan, ke engka dikelingi mayuh pun kayu. (P-ulu. 7:22) Kati Gideon ngetu ba Sungai Jordan? Enda! Taja pan sida lelak, Gideon enggau 300 iku bala soldadu iya meraka sungai nya, lalu terus begagaika orang Midian. Pengujung iya, sida ulih nangkap sereta ngalahka orang Midian.—P-ulu. 8:4-12.

15. Nama kebuah bala tuai gempuru kekadang tusah deka ngayanka pengeliat ati?

¹⁵ Siku tuai gempuru engka kekadang berasai amat lelak, laban patut ngintu raban gempuru sereta ruang bilik iya. Ba situasi ke baka  nya, baka ni bala tuai gempuru ulih neladan Gideon?

16-17. Nama utai ke nulung Gideon ngayanka pengeliat ati, lalu nama ulih diandalka bala tuai gempuru? (Isaiah 40:28-31) (Peda mega gambar.)

¹⁶ Andal meh Jehovah deka ngeringka nuan. Gideon andal Jehovah deka meri iya pengering lalu Jehovah amat bisi ngereja nya. (P-ulu. 6:14, 34) Bisi sekali, Gideon enggau bala soldadu iya belanda ngagai dua iku raja orang Midian tang dua iku raja nya engka rari ngena unta. (P-ulu. 8:12, 21) Taja pia, Petara nulung orang Israel nangkap sida lalu menang ba perang nya. Baka nya mega, bala tuai gempuru ulih bepanggai ba Jehovah ti “enda nemu lembut tulang tauka lelak.” Iya deka meri sida pengering lebuh sida begunaka nya.—Bacha Isaiah 40:28-31.

¹⁷ Peratika pengalaman menyadi Matthew, siku ari Komiti Besilih Penemu Sepital. Nama udah nulung iya ngayanka pengeliat ati? Ku Matthew madahka: “Aku udah ngasaika pengamat jaku ba Pilipi 4:13. Mayuh kali lebuh aku berasai amat lelak nyentukka aku ngumbai diri enda ulih neruska agi, aku bebendar besampi lalu minta Petara meri aku pengering ba tubuh sereta mental ngambika aku ulih terus nyukung bala menyadi. Ba maya ke baka nya, aku udah ngasaika kuasa kudus Jehovah ngeringka aku lalu nulung aku ngayanka pengeliat ati.” Baka Gideon, bala tuai gempuru kitai bebendar gawa kena ngintu nembiak Jehovah taja pan nya enda seruran senang. Endang amat, sida patut nemu tatak diri sereta sedar sida enda ulih seruran ngereja semua utai ke dikedekaka sida. Tang sida ulih andal, Jehovah deka ningaka sida lebuh sida minta tulung lalu Iya deka ngeringka sida ngambika sida ulih ngayanka pengeliat ati.—Mas. 116:1; Plp. 2:13.

18. Kena ulang kaji, baka ni bala tuai gempuru ulih neladan Gideon?

¹⁸ Bala tuai gempuru ulih belajarka mayuh utai ari teladan Gideon. Bala tuai gempuru patut ngayanka pemaruh ati sereta nemu tatak diri pasal penyampau utai ke ulih digaga sida sereta lebuh orang bukai ngutuk tauka muji sida. Sida patut ngasi sereta ngayanka pemerani, kelebih agi lebuh pengujung sistem dunya tu nyau majak semak. Lalu sida patut pechaya, enda ngira nama penanggul ke ditapi sida, Petara ulih ngeringka sida. Endang amat, kitai beterima kasihka bala tuai gempuru ti bagas tu lalu ngayanka basa kitai ngagai orang ke baka nya.—Plp. 2:29.