1-2. Nitihka Ulang Adat 10:20, nama patut digaga kitai enti kitai deka bisi kaul ti rapat enggau Jehovah?

 BA RUNDING nuan, nama sifat ti penting enti nuan deka ngetanka kaul ti rapat enggau sesiku orang? Nuan engka nyaut, kaban ti manah patut bisi pengerindu sereta nyukung pangan diri. Nuan engka enda ngumbai nangi nya siti sifat ti penting lebuh deka ngembuan kaul ti manah entara kaban. Taja pia, baka dipadah ba ayat tema dalam artikel tu, Jehovah deka kaban iya “nangika” Iya.—Bacha Ulang Adat 10:20.

² Enda ngira ni pengelama kitai udah nyembah Jehovah, semua kitai patut terus ngenalamka basa kitai ngagai Iya. Tang nama reti nangika Petara? Baka ni kitai ulih belajar nangika Jehovah? Lalu nama ulih dipelajarka kitai pasal nangika Petara ari Obadiah, Imam Besai Jehoiada, enggau Raja Joas?

3. Terangka baka ni asai ati ti nangi ulih nyaga kitai.

³ Nangika Petara ulih mai reti nuan takut ngereja utai ti enda dikerinduka Iya. Taja pan leka jaku takut nya enda nyamai didinga, tang tu ulih mai penguntung ke kitai laban asai ati nya deka nulung kitai ngaga pemutus ti manah. Ambika chunto, enti kitai takut labuh, kitai enggai bejalai kelalu semak enggau tisi bukit ti renjan. Enti kitai takut bakal, kitai engka nyeliah ari situasi ti bahaya. Enti kitai takut kaul kitai enggau kaban kitai rusak, kitai tentu nyeliah ari nyebut tauka ngereja utai ti enda manah.

4. Sitan dekaka orang ngembuan asai ati ti nangi ke baka ni ngagai Jehovah?

 ⁴ Sitan dekaka orang takut ngagai Jehovah. Sitan dekaka kitai pechaya Jehovah nya seruran ringat sereta deka ngukum kitai, lalu kitai enda kala ulih ngelantangka ati Iya. (Jop 4:18, 19) Sitan dekaka kitai berasai amat takut ngagai Jehovah nyentukka kitai badu agi nyembah Jehovah, tang kitai enda patut takut ngagai Jehovah. Kitai patut belajar bebasaka Iya sereta enggai ngereja utai ti enda dikerinduka Iya.

5. Nama reti nangika Petara?

⁵ Orang ke amat bebasaka Petara rinduka Iya lalu enggai ngereja sebarang utai ke ulih ngerusak kaul sida enggau Iya. Jesus “nangika Petara.” (Heb. 5:7) Iya enda kala takut ngagai Jehovah. (Isa. 11:2, 3) Tang, iya bisi pengerindu ti dalam ngagai Petara sereta deka ngasika Petara. (Jhn. 14:21, 31) Baka Jesus, kitai amat bebasa sereta berasai kagum ngagai Jehovah laban Iya Petara ti bepengerindu, bepenemu-dalam, adil, sereta bekuasa. Kitai nemu Jehovah amat rinduka kitai lalu Iya ibuhka pasal utai ti dikereja kitai lebuh Iya ngajar kitai. Enti kitai enda ngasika Jehovah, Iya berasai tusah ati, tang enti kitai ngasika Iya, Iya deka gaga ati.—Mas. 78:41; J-lam. 27:11.

6. Nama siti chara kitai ulih belajar nangika Petara? (Masmur 34:11)

⁶ Lebuh kitai ada, kitai enda automatik nemu nangika Jehovah. Kitai patut ngemansangka sifat nya. (Bacha Masmur 34:11.) Siti chara kitai ulih ngereja nya, iya nya enggau belematika utai ti ditempa Petara. Utai ti ditempa Jehovah ngayanka penemu-dalam, kuasa, sereta penalam pengerindu Iya ke kitai. Lebuh kitai sedar pasal utai tu, kitai deka bebasa sereta rindu agi ke Iya. (Rom. 1:20) Siku menyadi indu ke benama Adrienne madahka, “Penemu-dalam Jehovah ke ulih dipeda ari utai ti ditempa Iya, ngasuh aku alit ati. Tu nulung aku sedar Iya nemu utai ti pemadu manah ke aku.” Ketegal Adrienne seruran berundingka utai tu, ku iya madah, “Aku enggai ngereja sebarang utai ke ulih ngachau kaul aku enggau Jehovah. Iya meh ke meri aku pengidup.” Kena meh awak minggu tu berunding pasal siti ari utai ti ditempa Jehovah. Lebuh nuan ngereja nya, nuan deka ngenalamka agi basa sereta pengerindu nuan ke Jehovah.—Mas. 111:2, 3.

7. Baka ni sampi ulih nulung kitai ngemansangka asai ati ti nangika Jehovah?

⁷ Siti agi chara kitai ulih ngemansangka asai ati ti nangika Petara, iya nya enggau seruran besampi. Tiap kali kitai besampi ngagai Jehovah, kitai deka ngelala Iya enggau manah agi. Kitai diingatka pasal pemesai kuasa Jehovah tiap kali kitai minta Iya meri kitai pengering ngambika kitai ulih tan napi penguji. Lebuh kitai beterima kasihka Jehovah ketegal udah meri Anak Iya ke kitai, kitai diingatka pasal penalam pengerindu Jehovah ke kitai. Lalu lebuh kitai minta Jehovah nulung kitai mutarka sesiti penanggul, nya nulung kitai ingat Jehovah amat bepenemu-dalam. Sampi ke baka tu nulung kitai bebasa agi ke Jehovah. Lalu sampi nya mega deka nulung kitai bebendar nyeliahka diri ari ngereja utai ti ulih ngerusak kaul kitai enggau Jehovah.

8. Nama ulih digaga kitai ngambika ulih terus nangika Petara?

⁸ Lebuh kitai belajarka Bup Kudus, tuju kitai iya nya belajar pasal teladan ti manah enggau chunto ti enda manah ke bisi dalam Bup Kudus. Enggau nya, kitai ulih terus nangika Petara. Aram kitai berandauka dua iku nembiak Jehovah ke tetap ati—Obadiah ke ngemataka istana Raja Ahap enggau Imam Besai Jehoiada. Udah nya, kitai deka beratika utai ti ulih  dipelajarka kitai ari Raja Joas menua Judah. Raja Joas terubah iya nyembah Jehovah tang udah nya iya ninggalka Jehovah.

9. Baka ni nangika Jehovah udah nulung Obadiah? (1 Raja 18:3, 12)

⁹ Lebuh Bup Kudus terubah kali nyebut pasal Obadiah, b ku iya: ‘Obadiah nya orang ke angkunka [“nangika,” NWT] Jehovah.’ (Bacha 1 Raja 18:3, 12.) Baka ni asai ati ti nangi tu nulung Obadiah? Ambika chunto, asai ati ti nangi nulung iya nyadi lurus sereta tau dikearapka. Nya alai, raja ngasuh iya nyadi tuai ngemataka istana raja. (Banding Nehemiah 7:2.) Asai ati Obadiah ti nangika Petara mega meri iya pemerani ti amat besai—siti sifat ti amat diguna iya. Iya idup ba jeman Raja Ahap ti jai, ke ‘bedosa ngelaban Jehovah lebih agi ari semua orang ke dulu agi ari iya.’ (1 Raj. 16:30) Pia mega bini Ahap, Jesebel, ke nyembah Baal, amat begedika Jehovah. Iya nguji nagang orang ba perintah sepuluh raban bansa Israel ari nyembah Jehovah. Iya indah munuh mayuh ari nabi Petara. (1 Raj. 18:4) Endang amat, Obadiah nyembah Jehovah ba maya ti tusah.

10. Nama utai ke nunjukka Obadiah amat berani?

¹⁰ Nama utai ke nunjukka Obadiah amat berani? Lebuh Jesebel berengkah ngiga nabi Petara laban deka munuh sida, Obadiah ngelalaika seratus iku ari sida “dalam dua iti raban, lima puluh iku dalam siti-siti raban, lalu meri sida pemakai enggau ai.” (1 Raj. 18:13, 14) Enti Jesebel nemu utai ke digaga Obadiah, iya tentu deka munuh Obadiah. Amat, Obadiah engka takut, lalu iya tentu enggai mati. Tang Obadiah rinduka Jehovah enggau orang ke nyembah Jehovah lebih agi ari iya rinduka nyawa diri.

11. Baka ni nembiak Jehovah kemayaharitu baka Obadiah? (Peda mega gambar.)

¹¹ Kemayaharitu mayuh ari nembiak Jehovah diau ba menua alai pengawa kitai ditagang. Sida terus ngayanka basa ngagai piak bekuasa, tang baka Obadiah, bala menyadi tu enggai ngetu nyembah Jehovah. (Mat. 22:21) Sida ngayanka diri nangika Petara lebuh sida ngasika Petara ukai mensia. (SKR. 5:29) Baka ni sida ngereja tu? Taja pan sida patut belalai lebuh nginjil tauka begempuru tang sida terus ngereja  nya. (Mat. 10:16, 28) Sida nguji nentuka bala menyadi Kristian bisi utai ti diguna ngambika sida ulih mengkang semak ngagai Jehovah. Peratika chunto Henri. Iya diau ba menua Afrika, alai pengawa kitai ditagang ba siti timpuh. Ba timpuh nya, Henri sanggup nulung nganjung litaricha ti bepelasarka Bup Kudus ngagai bala menyadi Kristian iya. Ku iya: “Aku orang ti pemalu. Nya alai aku yakin ketegal aku amat bebasaka Jehovah, nya udah meri aku pemerani ke diguna aku.” Ulih nuan ngambarka diri nyadi berani baka Henri? Nuan ulih ngereja nya enti nuan ngemansangka asai ati ti nangika Petara.

12. Baka ni Imam Besai Jehoiada enggau bini iya nunjukka diri amat setia ngagai Jehovah?

¹² Imam Besai Jehoiada nangika Jehovah. Asai ati nya meransang iya nyadi setia ngagai Jehovah, lalu asai ati nya mega ngasuh Jehoiada meransang orang bukai nyembah Jehovah. Tu ulih dipeda lebuh anak indu Jesebel, Ataliah, merintah nyadi kuin menua Judah taja pan iya nadai hak merintah. Orang ba dia endang bisi kebuah takut ngagai Ataliah. Iya amat kejam sereta amuka kuasa nyentukka iya nguji munuh semua uchu lelaki iya ngambika iya ulih merintah. (2 Ban. 22:10, 11) Siku ari uchu nya, Joas, ulih diselamatka laban bini Jehoiada ke benama Jehoseba nyelamatka iya. Iya enggau laki iya ngelalai sereta ngintu Joas. Enggau chara tu, Jehoiada enggau Jehoseba nentuka siku ari peturun David deka selamat lalu ulih nyadi raja. Jehoiada setia ngagai Jehovah lalu enda nejuka asai ati ti takut ngagai Ataliah nagang iya ari ngereja utai ti betul.—J-lam. 29:25.

13. Baka ni Jehoiada sekali agi ngayanka ulah ti setia lebuh Joas beumur tujuh taun?

¹³ Lebuh Joas beumur tujuh taun, Jehoiada sekali agi ngayanka diri setia ngagai Jehovah. Iya ngaga pelan. Enti pelan nya mujur, Joas ke endang waris David deka nyadi raja. Taja pia, enti pelan nya enda mujur, Jehoiada tentu deka dibunuh. Enggau berekat ari Jehovah, pelan nya mujur. Jehoiada ke disukung bala pemesai enggau orang Lewi, mujur ngeletak Joas nyadi raja lalu Ataliah dibunuh. (2 Ban. 23:1-5, 11, 12, 15; 24:1) Udah nya Jehoiada ngasuh Raja Joas enggau orang mayuh ‘ngaga siti sempekat enggau Jehovah, ngambika sida nyadi nembiak Jehovah.’ (2 Raj. 11:17) Jehoiada mega “ngasuh bala jejaga nyaga ba pintu Rumah Sembiang, kena nagang orang ke enda tuchi tama.”—2 Ban. 23:19.

14. Baka ni Jehoiada dipebasa ketegal iya bebasaka Jehovah?

¹⁴ Sebedau tu Jehovah bisi madahka: “Aku bebasaka orang ke bebasaka Aku.” Endang amat, Jehovah merekatka Jehoiada. (1 Sam. 2:30) Ambika chunto, Jehovah nepuka cherita Jehoiada dalam Bup Kudus ngambika kitai ulih belajar ari nya. (Rom. 15:4) Lalu lebuh Jehoiada mati, iya diberi basa ti spesial, iya dikuburka ‘ba lumbung bala raja di Nengeri David kena sida ngingatka pemanah pengawa ti udah dikereja iya ke orang Israel, ke Petara, enggau ke Rumah Sembiang.’—2 Ban. 24:15, 16.

15. Nama ulih dipelajarka kitai ari cherita nya pasal Jehoiada? (Peda mega gambar.)

¹⁵ Cherita pasal Jehoiada ulih nulung semua kitai ngemansangka asai ati ti nangika Petara. Bala tuai gempuru ulih neladan Jehoiada. Nama chara iya? Sida seruran ngiga chara kena nyaga raban gempuru. (SKR. 20:28) Bala menyadi ke tuai ulih belajar ari Jehoiada. Lebuh sida nangika Jehovah sereta mengkang setia, Iya ulih ngena sida ngereja peneka Iya. Iya enda muai sida. Bala nembiak ulih meda chara Jehovah ngintu Jehoiada lalu neladan Iya. Sida ngayanka basa ngagai bala menyadi Kristian ke tuai agi, kelebih agi ngagai sida ke udah betaun-taun gawa ke Jehovah. (J-lam. 16:31) Pengujung iya, semua kitai ulih  belajar ari bala pemesai enggau orang Lewi ke nyukung Jehoiada. Aram meh kitai enggau setia nyukung “sida ke ngiring” enggau chara ngasika sida.—Heb. 13:17.

16. Nama utai ke nunjukka Raja Joas lemi?

¹⁶ Jehoiada nulung Raja Joas nyadi orang ti manah. (2 Raj. 12:2) Ketegal nya, raja ti biak nya deka ngelantangka ati Jehovah. Tang pengudah Jehoiada mati, Joas mendingka bala tuai ke angkat ngelaban Petara. Nama penyadi iya? Iya enggau bala rayat iya “belabuh nyembah engkeramba, enggau anak patung petara indu Aserah.” (2 Ban. 24:4, 17, 18) Taja pan Jehovah amat pedis ati pasal utai tu, tang Iya “ngasuh bala nabi . . . , ngasuh sida pulai baru ngagai Iya, tang orang mayuh enggai mending.” Sida indah enggai mendingka anak Jehoiada, iya nya Sekariah. c Sekariah ukai aja nabi Jehovah sereta imam tang iya mega petunggal Joas. Raja Joas indah munuh Sekariah taja pan ruang bilik Sekariah udah mayuh nulung iya.—2 Ban. 22:11; 24:19-22.

17. Nama penyadi ngagai Joas?

¹⁷ Joas enda terus nangika Jehovah lalu nya ngujungka mayuh penusah ba pengidup iya. Jehovah madahka: “Aku nyumpah orang ke enda bebasaka Aku.” (1 Sam. 2:30) Udah nya, seraban soldadu Siria ke mit agi ngalahka soldadu Joas “ke mayuh agi” lalu ngasuh Joas “balat amat bakal.” Pengudah soldadu Siria  mupuk ari endur nya, Joas dibunuh bala pemesai iya empu laban iya udah munuh Sekariah. Orang ngumbai raja nya amat jai nyentukka sida enda ngubur iya “ba lumbung bala raja.”—2 Ban. 24:23-25.

18. Nitihka Jeremiah 17:7, 8, baka ni kitai ulih nyeliah ari nyadi baka Joas?

¹⁸ Nama ulih dipelajarka kitai ari chunto Joas? Iya baka siti pun kayu ke nadai urat ti dalam lalu bepanggai ba tiang kena nyukung iya. Pengudah Jehoiada ke nyukung Joas mati, iya berengkah ningaka orang ke angkat ngelaban Petara. Iya nyadi enda tetap ati ngagai Jehovah. Baka nya mega enggau kitai. Ruang bilik kitai tauka orang bukai ba raban gempuru engka udah netapka teladan ke kitai pasal mengkang tetap ati ngagai Jehovah. Tang chunto Joas nya nunjukka kitai enda patut ngasika Petara semina ketegal teladan sida aja. Ngambika ulih mengkang semak ngagai Jehovah, kitai empu mesti negapka agi pengerindu sereta basa kitai ngagai Jehovah. Kitai ulih ngereja tu enggau seruran belajarka Bup Kudus, belematika utai ti dipelajar nya, enggau besampi.—Bacha Jeremiah 17:7, 8; Kol. 2:6, 7.

19. Nama utai ti dipinta Jehovah kereja kitai?

¹⁹ Jehovah nadai minta kitai ngereja mayuh utai. Utai ke dipinta Iya bisi ba Pengajar 12:13 ke madahka: ‘Nangika Petara, lalu ngasika pesan Iya, laban nya endang kebuah kitai mensia digaga.’ Lebuh kitai nangika Petara, kitai ulih mengkang setia ngagai Jehovah enda ngira nama utai ke nyadi jemah ila sama baka Obadiah enggau Jehoiada. Nadai utai ke ulih ngerusak kaul kitai enggau Jehovah.