1-2. Baka Lot, nama penanggul ke ditapi orang Kristian kemayaharitu?

 LEBUH kitai meda standard moral ti enda manah ke dikembuan orang kemayaharitu, kitai ngasaika utai ti sama baka ke diasaika Lot. Iya “balat tusah ati ketegal orang ke ngelanggar adat enda malu ngereja utai ti jai,” laban iya nemu Apai kitai ti di serega begedika ulah ti jai. (2 Pet. 2:7, 8) Ketegal Lot amat bebasa sereta rinduka Petara, iya begedika ulah ti enda bemoral ke dikembuan orang ke ngelingi iya. Kitai mega dikelingi orang ke kurang basa tauka nadai basa ke standard moral Jehovah. Taja pia, kitai ulih mengkang beresi ari segi moral enti kitai terus rinduka Petara sereta ngemansangka asai ati ti nangika Iya.—J-lam. 14:2.

² Nya kebuah Jehovah nyediaka jaku peransang ti bepengerindu nengah bup Jaku Dalam. Semua orang Kristian, lelaki tauka indu, tuai tauka biak, tau bulih penguntung ari beratika jaku lalau ti bepenemu-dalam ke bisi dia.

 3. Nitihka Jaku Dalam 21:2, nama siti kebuah kitai patut nyaga ati kitai? (Peda mega gambar.)

³ Siti kebuah ti penting kitai nyaga ati kitai, iya nya Jehovah meresa ati kitai. Tu reti iya, Jehovah meda mayuh agi ari utai ke ulih dipeda orang bukai lalu nemu sapa kitai ti bendar. (Bacha Jaku Dalam 21:2.) Iya deka rinduka kitai enti kitai terus berunding pasal jaku ajar Iya ke ulih nulung kitai idup belama iya. (Jhn. 4:14) Enti kitai ngereja nya, kitai enda ulih dipanjuk enggau ulah ti enda bemoral sereta pemula ti dikerembaika Sitan  enggau orang ti jai ba dunya tu. (1 Jhn. 5:18, 19) Lebuh kitai majak semak ngagai Jehovah, pengerindu enggau basa kitai ke Iya deka majak dalam. Ketegal kitai enggai ngenusahka ati Apai kitai, kitai indah deka begedika runding ke ulih ngasuh kitai bedosa. Lebuh kitai bisi pengingin deka ngereja utai ti salah, kitai deka nanya diri empu, ‘Baka ni aku tau sanggup ngemediska ati Petara ke udah ngayanka pengerindu ti dalam ngagai aku?’—1 Jhn. 4:9, 10.

 4. Baka ni nangika Jehovah udah ngelindung siku menyadi indu ari ngereja utai ti salah?

⁴ Marta, siku menyadi indu ba Croatia bisi pengingin deka ngereja ulah seks ti kamah. Ku iya madahka: “Aku berasai tusah deka berunding enggau manah sereta ngelaban pengingin ti deka ngereja utai ti salah. Tang nangika Jehovah udah nyaga aku.” b Baka ni asai ati ti nangika Petara ulih ngelindung iya? Marta madahka iya belematika utai ti enda manah ke ulih nyadi enti iya ngereja ulah ti enda bemoral. Kitai mega ulih belematika utai ti sama baka ke digaga Marta. Empas ti pemadu besai nya kitai deka ngenusahka ati Jehovah, lalu kitai enda ulih nyembah Iya belama iya.—P-kal. 6:5, 6.

 5. Nama ulih dipelajarka nuan ari pengalaman Leo?

⁵ Lebuh kitai nangika Jehovah, kitai bejimat enggaika bekaban enggau orang ke ngereja utai ti jai. Tu meh utai ke udah diasaika Leo ke diau ba Congo. Empat taun pengudah iya dibaptisa, iya bekaban enggau orang ke ngereja utai ti jai. Iya ngumbai utai nya enda salah seagi-agi iya empu ke enda ngereja utai ti jai. Taja pia, enda lama udah nya, bala kaban iya mai iya balat ngirup ai bisa sereta ngereja ulah ti kamah. Tang udah nya iya berengkah ngenang baru pasal utai ti udah diajar apai indai iya ke nyadi  Saksi, sereta pengaga ati ke kala diasaika iya lebuh iya nyembah Jehovah. Nama asil iya? Iya berengkah ngereja utai ti betul baru. Enggau tulung ari bala tuai gempuru, iya pulai baru ngagai Jehovah. Diatu, iya siku tuai gempuru enggau pengerintis spesial lalu gawa enggau gaga ati ke Jehovah.

 6. Nama chunto dua iku indu ke deka dikerandauka kitai diatu?

⁶ Aram kitai beratika Jaku Dalam bagi 9 pasal dua iku indu, siku ari sida ngambarka penemu-dalam lalu siku agi ngambarka pemeli. (Banding Rome 5:14; Galatia 4:24.) Seraya kitai ngereja nya, kingatka meh dunya Sitan balat gila enggau ulah seks ti kamah sereta pornografi. (Eps. 4:19) Nya alai, kitai patut terus ngemansangka asai ati ti nangika Petara sereta rari ari utai ti jai. (J-lam. 16:6) Asil iya, semua kitai enda ngira lelaki tauka indu, tau bulih penguntung ari utai ti dipadah ba bagi 9 tu. Kedua-dua iku indu nya digambarka benung ngangauka orang ke enda bepeneleba—iya nya “sida ke beli.” Kedua-dua iku indu nya baka ke madah, ‘Tama meh ke rumah aku lalu makai.’ (J-lam. 9:1, 5, 6, 13, 16, 17) Tang, utai ke nyadi ngagai sida ke nerima tiap iti kangau nya amat bebida.

 7. Nitihka Jaku Dalam 9:13-18, nama nyadi ngagai sida ke nerima kangau ari indu ti beli nya? (Peda mega gambar.)

⁷ Peratika kangau ari siku indu ke beli. (Bacha Jaku Dalam 9:13-18.) Iya enda malu ngangau orang ke enda bepeneleba tama ngagai rumah iya lalu makai enggau iya. Nama nyadi ngagai sida ke nerima kangau nya? “Orang ke ditipu iya enda nemu diri mati lebuh sida tama ngagai rumah iya.” Nuan engka agi ingat jaku sempama ti sebaka ba pun bup Jaku Dalam. Kitai udah ditangkan pasal “indu ke kamah ulah.” Kitai mega dipadah: “Enti nuan mansang ngagai rumah indu nya, nuan niti jalai ti nuju ngagai pemati.” (J-lam. 2:11-19) Jaku Dalam 5:3-10 ngundan jaku tangkan pasal siku agi indu ke kamah ulah ti deka mai orang nuju ngagai pemati.

 8. Nama pemutus ke patut digaga kitai?

⁸ Sida ke ninga kangau indu ti beli patut ngaga pemutus sekalika sida deka nerima tauka nulak kangau iya. Kitai mega engka patut ngaga pemutus ke baka nya. Nama deka digaga kitai enti sesiku orang nguji ngasuh kitai ngereja ulah seks ti kamah tauka enti kitai tepedaka gambar pornografi ba Internet?

9-10. Nama sekeda kebuah kitai patut nyeliahka diri ari ngereja ulah seks ti kamah?

⁹ Bisi kebuah ti amat manah kitai patut nyeliahka diri ari ngereja ulah seks ti kamah. Indu ti beli nya nyebut: “Ai ti dichuri berasai manis agi.” Nama reti “ai ti dichuri”? Bup Kudus  mandingka seks entara laki enggau bini baka ai ti ngasuh berasai nyamai. (J-lam. 5:15-18) Siku lelaki enggau indu ke udah kawin enggau sah dikemendarka bisi hubungan seks enggau pangan diri. Tang, utai nya amat bebida enggau “ai ti dichuri,” ke engka dituju ngagai ulah seks ti kamah, ti ditagang. Orang ke ngereja ulah seks ti kamah kesuah iya nguji ngelalaika nya ari orang bukai, baka siku penchuri ke belalai ngenchuri utai. “Ai ti dichuri” engka berasai manis enti sida ngumbai nadai orang deka nemu utai ke udah dikereja sida. Sida nipu diri empu! Laban Jehovah meda semua utai. Enti Jehovah enda nerima kitai, nya utai ti pemadu pait ke diasaika kitai, lalu tu tentu ukai utai ti “manis.” (1 Kor. 6:9, 10) Tang bisi mayuh agi kebuah iya.

¹⁰ Ulah seks ti kamah ulih ngasuh nuan berasai malu, enda berega, ngandung ngampang, sereta bisi ruang bilik ti bepechah-belah. Nya kebuah kitai ngayanka penemu-dalam lebuh kitai nulak kangau ari indu ti beli nya. Kelimpah ari lenyau kaul enggau Jehovah, mayuh orang ke ngereja ulah ti kamah mega bulih penyakit ke ulih ngujungka sida mati. (J-lam. 7:23, 26) Jaku Dalam bagi 9 ayat 18 madahka: “Orang ke udah tama ngagai rumah nya, diatu diau dalam dunya pemati [“Kubur,” NWT].” Enti pia, nama kebuah mayuh orang nerima kangau iya ti nuju ngagai penusah?—J-lam. 9:13-18.

11. Nama kebuah meda pornografi nya amat bahaya?

¹¹ Siti ari panjuk ke patut diseliahka kitai iya nya meda pornografi. Sekeda orang ngumbai meda pornografi nya enda bahaya. Tang pornografi ulih ngachau orang, ngasuh sida enda bebasaka diri empu enggau orang bukai, sereta amat tusah deka ngetuka tebiat nya. Enti sida meda gambar ti enda bemoral, sida tusah deka muai gambar nya ari runding sida. Pornografi mega enda nulung orang muai pengingin ti salah, tang iya ngasuh pengingin nya majak balat agi. (Kol. 3:5; Jas. 1:14, 15) Amat, mayuh orang ke meda pornografi ngujungka sida ngereja ulah seks ti kamah.

12. Baka ni kitai ulih nyeliahka diri ari meda gambar ke ngasuh kitai bisi runding ti kamah?

¹² Nama patut digaga kitai ke nyadi orang Kristian enti gambar pornografi ayan ba perengka elektronik kitai? Kitai patut enggau jejampat malik ke bukai. Kitai deka senang agi ngereja nya enti kitai ngenang baru utai ti pemadu berega ba kitai, iya nya kaul kitai enggau Jehovah. Indah sekeda gambar ke ukai pornografi ulih ngasuh kitai bisi runding ti kamah. Nama kebuah kitai patut nyeliahka nya? Laban kitai enggai bisi nama-nama runding ke ngujungka ulah seks ti kamah. (Mat. 5:28, 29) Siku tuai gempuru ba Thailand ke benama David madahka: “Aku nanya diri empu: ‘Taja pan gambar nya engka ukai pornografi, tang kati Jehovah deka gaga ati enti aku terus meda gambar nya?’ Runding ke baka tu nulung aku ngaga pemutus ti manah.”

13. Nama ulih nulung kitai ngaga pemutus ti manah?

¹³ Enti kitai takut ngereja sebarang utai ke deka ngasuh Jehovah enda gaga ati, nya deka nulung kitai ngaga pemutus ti manah. Nangika Jehovah nya “pun penemu-dalam.” (J-lam. 9:10) Kitai meda tu ba pun ayat Jaku Dalam bagi 9, ba dia “penemu-dalam” ti bendar disemaka baka siku agi indu.

14. Nama bida kangau ke dibacha kitai ba Jaku Dalam 9:1-6?

¹⁴ Bacha Jaku Dalam 9:1-6. Ba ayat tu, kitai macha pasal siti kangau ke datai ari Jehovah, iya nya Penempa kitai sereta Pun semua penemu-dalam. (J-lam. 2:6; Rom. 16:27) Bekaul enggau tu, kitai macha pasal sebuah rumah ti besai ke bisi tujuh batang tiang ti besai.  Sempama tu nunjukka Jehovah nya gerah jari sereta nerima semua orang ke deka belajar ari Iya ngambika sida ulih nyadi bepenemu-dalam.

15. Petara mai kitai ngereja nama?

¹⁵ Jehovah nya Petara ti gerah jari. Ari chunto indu ke ngambarka “penemu-dalam” ti bendar ke disebut ba Jaku Dalam bagi 9, kitai belajar Jehovah nya gerah jari sereta meri kitai mayuh utai ti manah. Ayat tu madahka, indu nya bisi mai temuai tama ngagai rumah iya lalu makai pemakai ti nyamai. Iya mega bisi nyediaka dagin enggau wain ke sida. (J-lam. 9:2) Udah nya, nitihka ayat 4 enggau 5: “Ngagai sida ke beli, iya [penemu-dalam ti bendar] nyebut, ‘Datai kitu, empa pemakai aku.’” Nama kebuah kitai patut nerima kangau ari indu tu? Jehovah dekaka bala anak Iya nyadi bepenemu-dalam sereta selamat. Iya enggai kitai ngaga penyalah ti deka ngemediska kitai. Nya kebuah “Iya meri penemu-dalam ngagai orang ke lurus.” (J-lam. 2:7, NWT) Enti kitai bisi asai ati ti nangika Jehovah, kitai tentu deka ngagaka ati Iya. Kitai ningaka jaku ajar Iya ti bepenemu-dalam, lalu kitai gaga ati nitihka nya.—Jas. 1:25.

16. Baka ni nangika Petara udah nulung Alain ngaga pemutus ti manah, lalu nama asil iya?

¹⁶ Peratika baka ni nangika Petara udah nulung Alain ngaga pemutus ti manah. Alain nya siku tuai gempuru sereta pengajar ba sekula, ku iya madahka, “Mayuh pengajar ngumbai cherita wayang pornografi nya siti chara dikena belajar pasal seks.” Tang Alain nemu nya enda betul. Ku iya, “Ketegal aku rindu sereta bebasaka Jehovah, aku enggai meda cherita wayang nya. Aku mega nerangka kebuah iya ngagai bala pengajar ke bukai.” Iya nitihka jaku lalau ari “penemu-dalam” ti bendar ke ngasuh iya ‘niti jalai penemu.’ (J-lam. 9:6) Sekeda ari bala pengajar ke bukai amat alit ati nyentukka sida diatu belajarka Bup Kudus sereta datai begempuru.

17-18. Nama utai ti manah ke diasaika orang ke nerima kangau ari “penemu-dalam” ti bendar, lalu nama utai ti keran dianti sida? (Peda mega gambar.)

¹⁷ Jehovah ngena chunto pasal dua iku indu kena ngayanka kitai chara ngulihka pengidup ti ngagaka ati jemah ila. Orang ke nerima kangau ari indu ti beli nya nguji ngiga pengelantang ba ulah seks ti kamah, tang sida enda sedar utai ti digaga sida deka mai empas ngagai sida jemah ila. Pengawa ke dikereja sida deka ngujungka sida mati.—J-lam. 9:13, 17, 18.

¹⁸ Sida ke nerima kangau ari indu ke ngambarka “penemu-dalam” ti bendar deka ngembuan pengidup jemah ila ti amat bebida! Lalu sida deka gaga ati laban sida bisi semua utai ke diguna sida kena nulung sida mengkang semak ngagai Jehovah. (Isa. 65:13) Nengah nabi  Isaiah, Jehovah madahka: “Pendingka Aku, lalu kereja utai ti diasuh Aku, nya baru kita deka makai pemakai ti pemadu manah.” (Isa. 55:1, 2) Kitai belajar rinduka utai ti dikerinduka Jehovah sereta begedika utai ti dipegedika Iya. (Mas. 97:10) Lalu, kitai gaga ati laban kitai ulih mai orang bukai belajar ari “penemu-dalam” ti bendar tu. Kitai baka ulun ke “ngangau ari endur ti pemadu tinggi dalam nengeri nya: ‘Tama meh kita ke nadai nemu utai!’” Semua kitai nyengkaum sida ke ninga deka ngasaika penguntung ari penemu-dalam ti bendar tu. Lalu penguntung nya ukai ke diatu aja, laban penemu-dalam nya ngasuh kitai bulih ‘pengidup’ belama iya, seraya kitai ‘niti jalai penemu’ nya.—J-lam. 9:3, 4, 6.

19. Sejalai enggau Pengajar 12:13, 14, nama utai ti keran deka dikereja kitai? (Peda mega kutak “ Nangika Petara Deka Nulung Kitai.”)

¹⁹ Bacha Pengajar 12:13, 14. Ngembuan basa ti dalam ngagai Jehovah deka nyaga kitai sereta nulung kitai mengkang beresi ari segi moral, lalu nulung kitai majak semak ngagai Iya seraya kitai idup ba hari ti penudi ke jai tu. Kitai deka terus mai mayuh orang ngiga “penemu-dalam” ti bendar tu sereta belajar ari nya, laban kitai rindu sereta bebasaka Jehovah enggau pengabis ati kitai.