Apai indai aku ninggalka Estonia maya Perang Dunya II lalu mupuk ngagai Jerman alai aku ada. Pengudah aku ada, sida besedia deka pindah ngagai Kanada. Rumah kami ti keterubah nya, semak Ottawa, Kanada. Kami diau ba bengunan ti mit. Ba bengunan nya bisi rumah manuk mega. Kami amat miskin, tang kami bisi telu manuk ke diempa maya makai pagi.

Bisi sekali, Saksi-Saksi Jehovah macha Pemandang 21:3, 4 ngagai indai aku. Utai ti dipelajarka iya ari ayat nya ngasuh iya berasai amat gaga ati nyentukka iya berengkah nyabak. Apai enggau indai aku terus belajarka Bup Kudus, lalu ba timpuh ti pandak seduai iya sedia deka dibaptisa.

Taja pan apai indai aku enda entu nemu bejaku Inggeris, tang sida amat ransing gawa ke Jehovah. Nyauka tiap Hari Enam, apai aku mai aku enggau Sylvia, menyadi indu aku ke biak, enggau pengawa nginjil, taja pan ba hari sebedau nya iya gawa bebendar sepemanjai malam ba kilang ngelebur besi di Sudbury, Ontario. Lalu tiap minggu kami sebilik deka belajarka Menara Jaga. Aba enggau Mak aku ngajar aku ngambika aku rinduka Petara. Nya alai aku ngaga pemutus deka nyerahka pengidup diri ngagai Jehovah ba taun 1956, maya aku beumur sepuluh taun. Tiap kali aku berunding pasal penalam pengerindu sida ke Jehovah, nya meransang aku terus nyembah Jehovah.

Pengudah aku abis sekula, aku kurang agi gawa ke Jehovah. Aku ngumbai enti aku nyadi pengerintis, aku enda ulih nyapai juluk ati aku ke deka ngena bilun raun ngagai mayuh endur, laban aku enda kala chukup duit kena ngereja nya. Aku tetemuka pengawa nyadi DJ ba stesen radio ba endur alai aku diau. Aku rinduka pengawa tu. Tang aku gawa maya lemai hari. Nya alai, aku suah enda datai begempuru. Aku mega bekaban enggau orang ke enda rinduka Petara. Pengujung iya, ati aku ke dilatih ngena Bup Kudus meransang aku ngaga ubah.

Aku pindah ngagai Oshawa, Ontario. Dia aku betemu enggau Ray Norman, menyadi indu iya, Lesli, enggau pengerintis ke bukai. Semua sida gaga ati nerima penatai aku. Lebuh aku meda pengaga ati sida, nya nulung aku berunding pasal utai ti deka digaga aku ba pengidup aku. Sida meransang aku berengkah ngerintis, lalu aku pan berengkah ngerintis kena September 1966. Aku gaga ati enggau pengidup aku. Taja pia, sekeda utai ke deka ngubah pengidup aku deka nyadi enggau enda dijangka.

Lebuh aku agi ba sekula menengah, aku ngisi pom deka gawa ba Betel di Toronto, Kanada. Udah  nya lebuh aku ngerintis, aku dikangau gawa ba Betel pengelama empat taun. Tang aku bisi ati ngagai Lesli, lalu aku takut enti aku nerima kangau tu, aku enda ulih meda iya agi. Pengudah bebendar besampi, aku mutuska diri deka gawa ba Betel tang aku berasai tusah ati deka ninggalka Lesli.

Aku gawa ba begian nuchi baju di Betel lalu udah nya aku gawa nyadi sekretari. Maya nya Lesli nyadi pengerintis spesial ba Gatineau, Quebec. Aku suah berunding pasal nama utai ti digaga iya sereta berunding sekalika pemutus ke digaga aku nya betul tauka enda. Udah nya bisi utai ti amat ngagaka ati ti enda dijangka udah nyadi ba pengidup aku. Ray, menyadi lelaki Lesli, dikangau gawa ba Betel. Iya diau sebilik enggau aku! Ketegal nya aku bisi peluang bekelala baru enggau Lesli. Kami jadi kena 27 Februari, 1971, nya hari ti penudi aku gawa ba Betel.

Aku enggau Lesli diasuh gawa ba raban gempuru ke ngena bansa jaku Perancis di Quebec. Pengudah beberapa taun, lebuh aku beumur 28 taun, aku tekenyit lebuh dikangau gawa nyadi tuai ti ngabas. Aku ngasaika diri kelalu biak sereta enda chukup bepeneleba kena nyadi siku tuai ti ngabas, tang jaku ba Jeremiah 1:7, 8 meransang aku. Taja pia, Lesli udah beberapa kali eksiden kerita lalu iya mega bisi penanggul deka tinduk. Nyadi kami ngumbai utai tu ngasuh kami tusah bejalaika pengawa pelilih. Taja pia, ku Lesli madahka, “Enti Jehovah mai kitai ngereja sesiti utai, kitai patut nguji ngereja utai nya.” Kami nerima tanggung pengawa nya lalu gaga ati ngereja pengawa pelilih pengelama 17 taun.

Aku amat kisuk lebuh aku nyadi tuai ti ngabas, lalu aku seruran enda chukup awak ke Lesli. Aku patut belajarka siti agi utai. Bisi sekali tumu pagi Hari Satu, bisi orang nekan luching pintu rumah aku tang nadai orang ba dia. Semina bisi siti bakul ke bisi tikai, buah, cheese, roti, sebutul wain, gelas enggau siti nota ke nadai nama. Nota nya madahka, “Bai bini nuan picnic.” Maya nya mua hari amat manah. Tang aku madah ngagai Lesli, “Tua enda ulih picnic. Aku bisi cheramah ke patut ditembuka.” Taja pan iya faham, tang iya berasai mimit asa ati. Lebuh aku deka ngereja pengawa aku, ati aku berengkah ngachau aku. Aku berundingka Epesus 5:25, 28. Ba runding aku, kati Jehovah ngena ayat tu ngingatka aku ngambika nyaga emosi bini aku? Pengudah besampi, aku madah ngagai Lesli, “Aram mupuk,” tu ngagaka ati Lesli. Kami ngagai endur ti manah, semak sungai. Kami nganchauka tikai, lalu nya meh siti ari hari ti amat ngagaka ati kami duai. Lalu cheramah aku mega ulih ditembuka.

Taja pan bisi mayuh pengawa ba pelilih kami, tang kami gaga ati. Kami ngabas raban gempuru ba British Colombia nyentuk ngagai Newfoundland. Nyadi diatu aku ulih raun baka ti dikinginka aku maya aku agi biak. Aku bisi berunding deka enggau Sekula Gilead tang aku enggai dianjung ngagai menua bukai. Pengawa nyadi pengerintis seberai tasik nya amat spesial, tang aku ngasaika diri enda chukup manah nyadi pengerintis seberai tasik. Nambahka nya, aku takut enggaika kami dianjung ngagai menua ba Afrika ti bisi penyakit enggau perang. Aku gaga ati ba Kanada.

Ba taun 1992, Saksi-Saksi Jehovah ulih nginjil baru ba sekeda menua ke kala nyadi sebagi ari Soviet Union. Nya alai, bala menyadi nanya kami sekalika kami deka pindah ngagai Estonia lalu nyadi pengerintis seberai tasik ba dia. Kami amat tekenyit, tang kami besampi pasal utai nya. Sekali agi kami berunding, ‘Enti Jehovah mai kitai ngereja sesiti utai, kitai patut nguji ngereja utai nya.’ Kami nerima tanggung pengawa nya, lalu aku berasai lantang ati laban kami enda ngagai Afrika.

Kami jejampat belajarka bansa jaku Estonia. Pengudah dua bulan ba menua nya, kami diasuh ngereja pengawa pelilih. Kami ngabas kira-kira 46 raban gempuru sereta sekeda raban ba Estonia, Latvia, enggau Lithuania, pia mega ba Kaliningrad, Rusia. Reti iya, kami patut nguji belajar sekeda bansa jaku Latvia, Lithuania, enggau Rusia. Utai nya enda senang. Tang bala menyadi Kristian gaga ati lebuh kami nguji belajar pasal jaku sida lalu sida mega nulung kami. Ba taun 1999, siti pampang opis ditumbuhka ba Estonia lalu aku dipilih gawa nyadi siku Komiti Pampang Opis sama enggau Toomas Edur, Lembit Reile, enggau Tommi Kauko.

Kami mayuh betemu enggau bala Saksi ke kala dianjung ngagai Siberia sebedau tu. Taja pan sida diintu enggau enda manah dalam rumah jil sereta diseraraka ari ruang bilik, tang sida enda ringat sereta bedendam. Sida mengkang gaga ati sereta ransing ba pengawa nginjil. Teladan sida ngajar kami pasal kami ulih tan sereta gaga ati taja pan napi situasi ti tusah.

Betaun-taun kami gawa bebendar lalu enda chukup awak kena belelak. Lesli mega berengkah berasai senang lelak. Maya nya kami enda nemu nama kebuah iya berasai baka nya. Kebendar iya, Lesli bisi penyakit ke ngasuh iya senang lelak ti dikumbai fibromyalgia. Ketegal nya kami berunding deka pulai baru ngagai Kanada. Lebuh kami dikangau ngagai Sekula ke Raban Komiti Pampang Opis enggau Bini Sida ba Patterson, New York, Amerika Serikat, aku berunding kami enda ulih enggau. Taja pia, pengudah bebendar besampi, kami nerima kangau nya. Jehovah merekatka pemutus nya. Maya ba sekula nya Lesli pengujung iya nerima rawatan berubat ke ulih nulung iya. Asil iya, kami ulih neruska pengawa kami baka ke selama.

Bisi sekali maya lemai hari ba taun 2008, maya kami agi ba Estonia, indu opis bisi telefon ngagai aku lalu nanya sekalika kami ulih nerima tanggung pengawa ba Congo. Aku amat tekenyit, kelebih agi laban aku patut meri saut ngagai indu opis ba ari siti. Terubah iya, aku enggai nyebut pasal utai nya ngagai Lesli laban aku nemu iya tentu enda ulih tinduk malam nya. Tang, aku ke enda ulih tinduk, laban aku besampi ngagai Jehovah pasal utai ti dikirauka aku bekaul enggau mindah ngagai Afrika.

Ba hari siti lebuh aku madahka utai nya ngagai Lesli, kami madahka: “Jehovah mai kami ngagai Afrika. Enti kami nadai nguji, baka ni kami nemu kami enda ulih ngereja nya tauka enda ulih gaga ati?” Nyadi pengudah 16 taun ba Estonia, kami mupuk ngagai Kinshasa, Congo. Pampang opis dia bisi taman ti amat manah sereta ngelantangka ati. Siti ari utai ti keterubah ti diengkah Lesli ba bilik kami, iya nya siti kad ke disimpan iya kenyau ari kami ninggalka Kanada. Ba kad nya bisi rambai jaku “Gaga ati enda  ngira dini alai nuan.” Pengudah betemu enggau bala menyadi, ngiring pengawa belajarka Bup Kudus, sereta ngasaika pengaga ati gawa nyadi pengerintis seberai tasik, pengaga ati kami ba sembah ngagai Jehovah majak nambah. Nyau kelama, kami bisi peluang ngelawa pampang opis ba 13 iti menua bukai ba Afrika. Kami ulih belajar pasal bemacham bansa orang. Aku enda agi irau pasal diau ba Afrika, lalu kami beterima kasih ngagai Jehovah laban nganjung kami gawa ba Afrika.

Ba Congo, kami diberi mayuh macham pemakai, baka indu utai. Aku ngumbai kami enda ulih nerima pemakai nya. Tang lebuh aku meda bala menyadi rindu makai pemakai nya, kami pan nguji lalu kami rinduka pemakai nya.

Kami mupuk ngagai timur menua nya kena meransang bala menyadi sereta mai utai ti diguna sida. Ba endur nya bisi beberapa iti raban ke ngachau sereta nyerang kampung orang. Sida ngemediska bala indu enggau bala anak. Mayuh ari bala menyadi bisi mimit aja utai ti dikemisi. Tang, sida amat arapka semaya pengangkat ari mati, amat rinduka Jehovah, sereta taluk ngagai gerempung Iya. Nya amat meransang kami. Teladan sida ngasuh kami berunding pasal kebuah kami nyembah Jehovah sereta negapka pengarap kami ba Iya. Rumah sekeda bala menyadi rusak lalu pemakai ke ditanam sida mega rusak. Tu ngingatka aku, kitai ulih lenyau utai ti dikemisi enggau jampat, tang ukai kaul kitai enggau Jehovah. Taja pan napi penusah ti balat, bala menyadi enda mutap. Ulah sida meransang kami ngambika berani napi penusah, nyengkaum penanggul ba pengerai.

Udah nya siti agi utai ti enda dijangka nyadi. Kami diasuh pindah ngagai pampang opis ba Hong Kong. Kami enda kala ngambarka diri diau ba Asia! Tang pengudah ngasaika pengerindu Jehovah ba semua pengawa ke bukai, kami pan setuju nerima kangau nya. Ba taun 2013, kami nyabak lebuh ninggalka bala kaban ti dikerinduka kami sereta menua Afrika ti manah. Kami enda nemu nama utai ke nganti kami.

Mayuh orang ari serata dunya diau ba Hong Kong. Lebuh pindah kia kami patut ngaga ubah ti besai. Kami tusah deka belajarka bansa jaku Kantonis. Taja pia, bala menyadi amat ngelaluka kami, lalu kami amat rindu enggau pemakai ba dia. Pengawa ke digaga ba pampang opis majak mayuh, tang ba maya ti  sama rega tanah enggau bengunan niki enggau jampat. Nya alai, Raban ti Ngiring ngaga pemutus deka nyual mayuh ari tanah enggau bengunan pampang opis. Enda lama udah nya, ba taun 2015, kami pindah ngagai Korea Selatan. Dia kami terus gawa ke Jehovah. Kami patut belajar siti agi bansa jaku ti tusah. Taja pan kami bedau agi ulih bejaku enggau lanchar, tang bala menyadi Kristian meransang kami. Sida madahka diri bisi beratika pemansang kami ngena jaku Korea.

Enda senang deka ngiga kaban ti baru, tang kami nemu enti kami dulu agi ngayanka pengerah jari ngagai orang bukai, kami ulih ngelala orang enggau jampat agi. Kebendar iya bisi mayuh agi utai ti sama ba bala menyadi Kristian. Lalu Jehovah udah nempa kitai ngambika kitai senang ngayanka pengerindu sereta nerima mayuh orang nyadi kaban.—2 Kor. 6:11.

Kami ulih beratika nama kebuah kami patut nerima orang bukai, baka Jehovah ke udah nerima sida. Kami mega ngasaika amat penting kami meda bukti Jehovah rinduka kami sereta ngiring kami. Tiap kali kami berasai asa, tauka berunding sekalika bala menyadi rinduka kami tauka enda, kami deka macha baru kad tauka surat ti meransang kami ari bala kaban kami. Kami ngasaika Jehovah endang udah nyaut sampi kami, ngasuh kami yakin agi ke pengerindu Iya, sereta meri kami pengering.

Pengelama betaun-taun, aku enggau Lesli belajarka kebuah nya penting ngiga awak ke pangan diri, taja pan kami duai balat kisuk. Kami mega faham kebuah nya penting kami ulih ketawa lebuh kami ngaga penyalah, kelebih agi lebuh kami nguji belajarka bansa jaku baru. Lalu tiap malam, kami nguji berundingka utai ti dikerinduka kami ngambika kami ulih meri terima kasih ngagai Jehovah.

Terus terang aku madah, aku enda kala ngumbai diri ulih nyadi pengerintis seberai tasik tauka diau ba menua bukai. Tang, aku udah ngasaika pengaga lebuh nemu baka ni semua utai ulih magang enti bisi sukung ari Jehovah. Aku ngenang baru utai ti dipadah nabi Jeremiah: ‘Jehovah, Nuan udah nipu aku.’ (Jer. 20:7) Amat, Iya udah meri kami mayuh utai manah ti enda dijangka, sereta berekat ke enda kala diperundingka kami, indah ngamatka pengingin aku ti deka raun ngena bilun. Maya aku agi mit, aku berunding deka nepan bilun ngagai endur bukai. Tang diatu kami udah nepan bilun ngagai mayuh endur, lalu kami udah ngelawa pampang opis ba lima iti benua. Aku mega amat beterima kasihka Lesli laban iya sanggup nyukung aku ba semua tanggung pengawa ti bebida.

Kami seruran ngingatka diri, kami ngereja semua utai ketegal kami rinduka Jehovah. Kemayaharitu kami ngasaika mayuh utai ti manah. Tu nunjukka jemah ila, lebuh kami ulih idup belama iya, kami deka ngasaika utai ti jauh manah agi, laban maya nya Jehovah deka meri “chukup utai datai ke semua utai ti idup nadai suntuk utai.”—Mas. 145:16.