1. Nama utai ke patut dikereja kitai ngambika ulih selamat maya hari Jehovah datai?

 LEBUH Bup Kudus nyebut pasal ‘hari Jehovah,’ nya dituju ngagai maya lebuh Jehovah ngemunaska bala munsuh Iya, sereta mai pengelepas ngagai bala nembiak Iya. Suba, Jehovah bisi ngukum sekeda bansa. (Isa. 13:1, 6; Esk. 13:5; Sep. 1:8) Ba jeman kitai, ‘hari Jehovah’ deka berengkah lebuh bala tuai politik ngerusak Babilon ti Besai. Tu deka ngepunka perang Armagedon. Ngambika ulih selamat maya “hari” nya datai, kitai patut besedia diatu. Jesus ngajar kitai “patut sedia” ke “Penusah ti Besai,” reti iya pengawa tu enda nemu ngetu.—Mat. 24:21; Luk. 12:40.

2. Nama kebuah kitai tau bulih penguntung ari 1 Tesalonika?

² Ba surat rasul Paul ti keterubah ke ditulis ngagai orang ba Tesalonika, iya ngena beberapa iti sempama kena nulung orang Kristian mengkang besedia ke hari lebuh Jehovah deka ngakim. Paul nemu hari Jehovah enda datai ba maya nya. (2 Tes. 2:1-3) Taja pia, iya meransang bala menyadi ba dia ngambika besedia ke hari nya, baka ke hari nya deka datai pagila. Kitai mega ulih nitihka jaku lalau iya. Aram beratika chara iya nerangka utai tu: (1) baka ni hari Jehovah deka datai, (2) sapa ke enda selamat ba hari nya, sereta (3) baka ni kitai nyediaka diri ngambika ulih selamat.

3. Nama kebuah Bup Kudus madahka hari Jehovah deka datai baka penchuri maya malam hari? (Peda mega gambar.)

³ “Baka penchuri maya malam hari.” (1 Tes. 5:2) Tu sempama ti keterubah ari tiga iti sempama ke dikena ngambarka penatai hari Jehovah. Kesuah iya penchuri ngenchuri utai enggau jampat,  lalu sida ngereja nya maya malam hari lebuh orang enda nyangka. Hari Jehovah mega deka datai enggau enda dijangka. Mayuh orang deka tekenyit. Indah orang Kristian ti bendar mega engka tekenyit enggau penyampat utai ti nyadi. Tang enda baka orang ti jai, kitai enda dipunaska.

4. Nama kebuah Bup Kudus madahka hari Jehovah nya baka pemedis ke diasaika indu ke deka beranak?

⁴ “Baka pemedis ke diasaika indu ke deka beranak.” (1 Tes. 5:3) Siku indai ti nyauka beranak enda nemu enggau nyemetak kemaya iya deka beranak. Tang iya nemu utai nya tentu deka nyadi. Lebuh iya deka beranak, utai nya tentu deka nyadi enggau ngenyit, pedis, sereta enda ulih diketuka. Baka nya mega, kitai enda nemu hari sereta jam maya hari Jehovah deka berengkah. Taja pia, kitai nemu hari Jehovah tentu deka datai lalu pengawa Petara ngakim orang ke jai deka nyadi enggau ngenyit lalu sida enda ulih ngelepaska diri.

5. Nama kebuah Penusah ti Besai disemaka baka hari ti baru deka berengkah?

⁵ Baka hari ti baru deka berengkah. Sempama Paul ti ketiga sekali agi nyebut pasal penchuri ke ngenchuri maya malam hari. Tang kali tu Paul mandingka hari Petara baka hari ti baru deka berengkah. (1 Tes. 5:4) Penchuri ke datai maya malam hari engka enda nemu jam benung belalu. Penampak ti datai ari hari ke nyauka siang engka ngasuh sida tekenyit lalu pengawa sida deka ditemu orang. Baka nya mega Penusah ti Besai deka mandangka semua orang ke baka penchuri, ke belalai dalam pemetang lalu terus ngereja utai ti dipegedika Petara. Enda baka sida, kitai ulih nyediaka diri lebuh kitai nulak pengawa tauka ulah ti dipegedika Jehovah lalu terus ngereja “semua utai ti manah, lurus, sereta bendar.” (Eps. 5:8-12) Udah nya, Paul ngena dua iti sempama kena ngambarka orang ke enda ulih selamat maya hari Jehovah datai.

6. Nama reti iya lebuh Bup Kudus madah mayuh orang benung tinduk? (1 Tesalonika 5:6, 7)

⁶ “Sida ke tinduk.” (Bacha 1 Tesalonika 5:6, 7.) Paul mandingka sida ke enda ulih selamat maya hari Jehovah datai nya baka orang ke benung tinduk. Sida enda sedar enggau utai ke benung nyadi ngelingi sida tauka pasal jam ke benung belalu. Nyadi, sida enda nemu lebuh utai ti penting nyadi tauka ngereja utai ti sejalai enggau nya. Mayuh orang kemayaharitu baka orang ke benung tinduk secara rohani. (Rom. 11:8) Sida enda pechayaka bukti ke nunjukka kitai benung idup ba “hari ti penudi” tauka pasal Penusah ti Besai ke deka datai. Lebuh bisi ubah ti besai ba dunya tu sekeda orang engka beminat enggau pesan kitai pasal Perintah Petara. Tang mayuh ari sida tinduk baru ari ke terus dani. Indah sida ke pechayaka hari pechara pan ngumbai hari nya agi lama endur iya deka datai. (2 Pet. 3:3, 4) Tang kitai nemu, ninting hari kitai patut bebendar agi mengkang bejaga.

7. Nama kebuah orang ke deka dirusakka Petara nya baka orang ke mabuk?

⁷ “Sida ke mabuk.” Rasul Paul mandingka orang ke deka dirusakka Petara nya baka orang ke mabuk. Orang ke mabuk lubah deka faham pasal utai ke benung nyadi ngelingi sida, lalu sida mega ngaga pemutus ti enda manah. Baka nya mega, orang ti jai enda ningaka jaku tangkan ari Petara. Sida milih jalai pengidup ke ngujungka sida dirusakka. Tang orang Kristian diasuh ngambika mengkang dani sereta mengkang bejaga. (1 Tes. 5:6) Siku pakar Bup Kudus madahka orang ke mengkang dani tauka mengkang bejaga deka “mengkang tenang sereta enda panik. Iya ulih berunding enggau manah sereta ngaga pemutus ti betul.” Nama kebuah kitai patut mengkang tenang sereta enda panik? Ngambika kitai enda masuk champur dalam politik tauka pekara sosial. Seraya hari Jehovah majak semak kitai deka majak agi ditekan ngambika milih sapa ke deka disukung kitai. Tang, kitai enda ibuh irau pasal utai ke deka dikereja kitai. Kuasa kudus Petara deka nulung kitai mengkang tenang sereta enda jampat panik. Tu deka nulung kitai ngaga pemutus ti manah.—Luk. 12:11, 12.

8. Baka ni 1 Tesalonika 5:8 ngambarka sifat ke deka nulung kitai mengkang bejaga sereta mengkang dani? (Peda mega gambar.)

⁸ “Ngerasukka terabai dada . . . sereta . . . tupi besi.” Paul mandingka kitai baka soldadu ke mengkang bejaga sereta udah ngerasukka semua kereban perang. (Bacha 1 Tesalonika 5:8.) Orang ngarapka siku soldadu besedia deka beperang ba sebarang maya lebuh bisi perang. Baka nya mega enggau kitai. Kitai mengkang besedia ke hari Jehovah lebuh kitai ngerasukka terabai dada pengarap enggau pengerindu sereta ngerasukka tupi besi harapan kitai. Semua sifat tu deka nulung kitai.

9. Baka ni pengarap kitai nyaga kitai?

⁹ Terabai dada ngelindung jantung soldadu. Baka nya mega pengarap enggau pengerindu ngelindung ati kitai. Sifat tu deka nulung kitai terus nyembah Petara sereta nitihka Jesus. Pengarap ngasuh kitai yakin Jehovah deka ngupah kitai lebuh kitai ngiga Iya enggau pengabis ati. (Heb. 11:6) Sifat tu deka nulung kitai mengkang tetap ati ngagai Tuai kitai, Jesus, indah enti kitai patut napi penusah. Kitai ulih negapka pengarap kitai ngambika ulih tan napi penusah. Kitai ulih ngereja tu lebuh kitai belajar ari teladan orang kemayaharitu ke mengkang tetap ati taja pan napi perinsa tauka penusah ba ekonomi. Lalu kitai ulih nyeliahka diri ari kelalu rinduka duit sereta reta tengkira enti kitai neladan orang ke idup enggau pengumbas iya ngambika ulih ngenuluka Perintah Petara. b

10. Baka ni pengerindu ke Petara sereta ke orang bukai nulung kitai tan ba pengawa nginjil?

 ¹⁰ Pengerindu mega penting kena mengkang dani sereta mengkang bejaga. (Mat. 22:37-39) Pengerindu ke Petara nulung kitai tan ba pengawa nginjil enda ngira nama penusah ke engka nyadi ba kitai lebuh kitai nginjil. (2 Tim. 1:7, 8) Kitai mega ngayanka pengerindu ngagai orang ke enda nyembah Jehovah. Nya kebuah kitai terus nginjil ba kandang endur kitai, indah nginjil ngena telefon tauka ngena surat. Kitai enda putus asa, tang kitai ngarapka sida deka berubah dudi hari lalu berengkah ngereja utai ti betul.—Esk. 18:27, 28.

11. Baka ni pengerindu ke bala menyadi Kristian nulung kitai? (1 Tesalonika 5:11)

¹¹ Kitai mega rinduka bala menyadi Kristian kitai. Kitai ngayanka pengerindu ke baka nya lebuh kitai “meransang sereta negapka pangan diri.” (Bacha 1 Tesalonika 5:11.) Baka bala soldadu ke belaban ngimbai pangan diri, kitai mega meransang pangan diri. Endang amat, siku soldadu engka enda sengaja ngemediska soldadu ke sama enggau iya lebuh beperang. Tang iya tentu enda sengaja ngereja nya. Baka nya mega, kitai engka enda sengaja deka ngemediska bala menyadi Kristian kitai tauka malas penyai sida. (1 Tes. 5:13, 15) Kitai mega ngayanka pengerindu kitai lebuh kitai bebasaka bala menyadi ke ngiring ba raban gempuru. (1 Tes. 5:12) Lebuh Paul nulis surat tu, raban gempuru Tesalonika baru aja ditumbuhka kurang ari setaun. Bala menyadi lelaki ke dipilih engka kurang bepengalaman lalu engka bisi ngereja penyalah. Taja pia, sida endang patut dipebasa. Seraya Penusah ti Besai majak semak, kitai patut lebih agi bepanggai ngagai bala tuai gempuru ba endur kitai ngambika ulih nerima iring. Kitai engka enda ulih nerima iring ari bala menyadi ba indu opis tauka ba pampang opis. Nyadi, amat penting kitai belajar rindu sereta bebasaka bala tuai gempuru kitai diatu. Enda ngira nama utai ke nyadi, aram meh kitai mengkang bejaga. Anang betumpu ba pengelemi sida, tang kingatka meh nengah Jesus, Jehovah benung ngiring bala menyadi lelaki ti tetap ati tu.

12. Baka ni harapan nyaga runding kitai?

¹² Baka tupi besi ke ngelindung pala soldadu, harapan kitai ke nganti deka diselamatka deka  nyaga runding kitai sereta nulung kitai berunding enggau betul. Enti kitai bisi harapan ti tegap, kitai nemu utai ke ulih diberi dunya tu nadai reti magang. (Plp. 3:8) Harapan kitai nulung kitai mengkang tenang sereta enda panik. Tu meh utai ke diasaika Wallace enggau Laurinda, ke gawa ba Betel di Afrika. Dalam timpuh tiga minggu, indai Laurinda nadai, lalu apai Wallace mega nadai. Ketegal pandemik COVID-19, seduai iya enda ulih pulai lalu begulai enggau diri sebilik. Wallace madahka: “Harapan pengangkat ari mati nulung aku ngambarka hari keterubah sida diangkatka idup baru ba dunya paradais, ukai hari ti penudi sida ba dunya tu. Harapan tu ngelantangka ati aku lebuh aku tusah ati tauka berasai puang.”

13. Nama ulih dikereja kitai ngambika ulih nerima kuasa kudus Petara?

¹³ “Anang madamka api kuasa kudus.” (1 Tes. 5:19) Paul mandingka kuasa kudus Petara baka api ke bisi dalam kitai. Lebuh kitai bisi kuasa kudus Petara, kitai deka nyadi ransing sereta keran deka ngereja utai ti betul lalu ditegapka ngambika ulih gawa ke Jehovah. (Rom. 12:11) Nama ulih dikereja kitai ngambika ulih nerima kuasa kudus Petara? Kitai ulih besampi minta kuasa kudus ari Petara, belajarka Bup Kudus, sereta begulai enggau gerempung ke diiring kuasa kudus Petara. Lebuh kitai ngereja nya, utai tu deka nulung kitai ngemansangka “buah kuasa kudus nya.”—Gal. 5:22 enggau nota kaki, 23.

14. Nama patut diseliahka kitai enti kitai deka terus nerima kuasa kudus Petara? (Peda mega gambar.)

¹⁴ Pengudah Petara meri kitai kuasa kudus Iya, kitai mesti bejimat ngambika enda “madamka api kuasa kudus.” Petara semina meri kuasa kudus Iya ngagai orang ke ngembuan runding sereta ulah ti beresi. Iya enda meri kitai kuasa kudus Iya enti kitai terus berunding pasal ulah ti enda beresi tauka ngereja ulah ti enda beresi nya. (1 Tes. 4:7, 8) Ngambika ulih terus nerima kuasa kudus Petara, kitai mega “anang enda bebasaka jaku benabi.” (1 Tes. 5:20) Dalam ayat tu “jaku benabi” mai reti pesan ke diberi Jehovah ngagai kitai nengah kuasa kudus Iya, lalu tu nyengkaum hari Jehovah sereta timpuh alai kitai ke benung diau diatu. Kitai enda  ngumbai hari Jehovah tauka Armagedon enda nyadi ba timpuh kitai ke benung diau. Tang kitai nunjukka diri ngarapka hari nya deka datai enda lama da agi. Baka ni? Enggau ngereja ‘pengawa ke nunjukka kitai enda bebagi ati nyembah Petara’ ninting hari sereta terus nentuka ulah kitai beresi.—2 Pet. 3:11, 12.

15. Baka ni kitai ulih nyeliahka diri ari ditipu penerang ti pelesu sereta berita ti dikerembaika melikat ti jai? (1 Tesalonika 5:21)

¹⁵ Enda lama da agi, bala penyakal Petara deka madahka: “Diatu, kitai bisi pengelantang enggau pengelikun!” (1 Tes. 5:3) Berita ti dikerembaika melikat ti jai deka ngemenuhka dunya, lalu ngelimpangka mayuh orang. (Pem. 16:13, 14) Baka ni enggau kitai? Kitai enda ulih ditipu enti kitai ‘meresa semua utai.’ (Bacha 1 Tesalonika 5:21.) Leka jaku Gerika “peresa” dikena ngambarka chara orang meresa utai ti berega baka emas tauka pirak kena nentuka sekalika utai nya tulin tauka enda. Nyadi, kitai patut meresa utai ke didinga tauka dibacha kitai kena nentuka nya betul tauka enda. Utai nya penting ke orang ba Tesalonika, lalu utai nya penting agi ba kitai seraya Penusah ti Besai majak semak. Ari ke pechayaka semua utai ti dipadah orang, kitai ngena penau kitai ti ulih berunding kena mandingka utai ti dibacha tauka didinga kitai enggau utai ti dipadah Bup Kudus sereta gerempung Jehovah. Lebuh kitai ngereja nya, kitai enda dikemulaka sebarang berita ti dikerembaika bala melikat ti jai.—J-lam. 14:15; 1 Tim. 4:1.

16. Nama harapan ti deka dikeamatka, lalu nama utai ti keran deka dikereja kitai?

¹⁶ Kitai nemu, nembiak Jehovah deka selamat pansut ari Penusah ti Besai. Tang tiap iku kitai enda nemu nama deka nyadi pagila. (Jas. 4:14) Taja pia, enda ngira sekalika kitai deka selamat pansut ari Penusah ti Besai tauka mati sebedau nya, kitai deka nerima pengidup ti meruan belama iya enti kitai mengkang tetap ati. Orang ke diiri kuasa kudus Petara deka enggau Jesus ba serega. Raban bedus ti bukai deka diau ba dunya paradais. Arapka semua kitai betumpu ba harapan kitai ti manah lalu terus besedia ke hari Jehovah!