Bup Kudus nadai madahka kebuah iya. Tang iya bisi madah ngagai kitai sekeda penerang ti ngalitka ati ke engka nerangka kebuah sida milih enda pulai ngagai Nasaret maya nya.

Siku melikat madah ngagai Maria pasal Maria ke deka ngandung lalu beranak. Lebuh melikat nya ngenataika pesan nya, Maria enggau Josep benung diau ba Nasaret, kampung Josep ba Galili. (Luk. 1:26-31; 2:4) Udah nya, lebuh sida pulai baru ari Ejip, sida terus ngagai Nasaret. Jesus besai dia lalu iya nyadi orang Nasaret. (Mat. 2:19-23) Nya kebuah kitai berunding pasal Nasaret lebuh kitai nyebut nama Jesus, Josep, sereta Maria.

Maria bisi siku kaban belayan ke benama Elisabet. Elisabet diau ba Judah. Iya bini imam Sekariah lalu iya mega nyadi indai John Pemaptisa. (Luk. 1:5, 9, 13, 36) Maria bisi ngabas Elisabet lalu diau enggau iya pengelama tiga bulan di Judah. Udah nya Maria pulai baru ngagai Nasaret. (Luk. 1:39, 40, 56) Nya kebuah Maria nemu pasal menua Judah.

Udah nya, Josep ninggalka Nasaret lalu mupuk ngagai Betlehem laban orang Rome minta semua orang “mansang ngagai nengeri diri empu, lalu ngerejista nama diri.” Betlehem mega endur Messiah deka ada nitihka jaku benabi. (Luk. 2:3, 4; 1 Sam. 17:15; 20:6; Mik. 5:2) Pengudah Maria ngadaka Jesus dia, Josep enda ngasuh Maria mai anak ke baru ada nya lalu bejalai jauh pulai baru ngagai Nasaret. Sida diau ba Betlehem, iya nya kira-kira semilan kilometer ari Jerusalem. Ketegal nya, sida senang deka mai anak ke baru ada nya ngagai Rumah Sembiang lalu meri pemeri ke patut diberi nitihka Adat.—Lew. 12:2, 6-8; Luk. 2:22-24.

Melikat Petara bisi madah ngagai Maria pasal anak lelaki Maria ke deka nerima “kerusi diraja aki iya David” lalu “deka nyadi Raja.” Josep enggau Maria engka ngumbai nya penting enti Jesus ada ba nengeri David. (Luk. 1:32, 33; 2:11, 17) Sida engka ngumbai nya manah agi enti sida terus diau dia lalu nganti nyentukka sida nemu utai ti dikedekaka Petara kereja sida pengudah nya.

Kitai enda nemu berapa lama sida ba Betlehem lebuh orang ke nemu nujum nengah bintang datai. Taja pia, maya nya, ruang bilik nya diau ba siti rumah, lalu anak lelaki sida dikumbai “anak mit,” ukai anak ke baru ada. (Mat. 2:11) Ari tu kitai nemu, sida engka enda pulai baru ngagai Nasaret, tang diau ba Betlehem dalam siti timpuh ti panjai, lalu bisi rumah ba dia.

Herod ngasuh “orang munuh semua anak lelaki ke beumur dua taun ke baruh, ba Betlehem.” (Mat. 2:16) Siku melikat nangkan Josep pasal utai nya. Nya kebuah, Josep enggau Maria mai Jesus rari ngagai Ejip. Sida diau dia nyentuk ngagai Herod mati. Udah nya, Josep mai sida sebilik ngagai Nasaret. Nama kebuah sida enda pulai baru ngagai Betlehem? Laban maya nya, anak lelaki Herod, Arkelaus, merintah Judea. Iya siku raja ti amat jai. Pia mega, siku melikat sekali agi nangkan Josep pasal utai ti bahaya ke ulih nyadi enti sida kin. Nasaret nya endur ti selamat alai ngemesaika Jesus.—Mat. 2:19-22; 13:55; Luk. 2:39, 52.

Pemati Jesus muka jalai ngambika orang ulih niki ke serega. Tang Josep dulu agi mati sebedau Jesus mati. Ketegal nya, Josep deka diangkatka idup baru ba dunya. Mayuh orang deka bisi peluang betemu enggau Josep lalu belajar mayuh agi ari iya pasal kebuah iya enggau Maria mengkang ba Betlehem pengudah Jesus ada.