Ngambika ulih ngelantangka ati Jehovah, kitai mesti bisi pengarap. Taja pia, Bup Kudus madahka, “ukai semua orang arap.” (2 Tes. 3:2) Lebuh Rasul Paul nyebut utai tu, iya merujuk ngagai “orang ti balat jai” ke benung merinsa iya. Tang, utai ti disebut iya pasal pengarap mega bisi kaul enggau orang bukai. Sekeda orang enggai nerima bukti ke nunjukka bisi Petara ke ngaga semua utai. (Rom. 1:20) Ke bukai engka madahka, sida arapka utai tauka orang bukai ke bekuasa agi ari sida. Taja pia, tu ukai pengarap ti bendar.

Kitai mesti yakin, Jehovah nya amat bisi, lalu Iya deka “meri upah” ngagai sida ke bisi pengarap ti tegap ngagai Iya. (Heb. 11:6) Ngambika ulih ngembuan pengarap ke baka tu, kitai begunaka kuasa kudus Petara. Lalu kena bulih kuasa kudus nya, kitai patut besampi minta nya ari Jehovah. (Luk. 11:​9, 10, 13) Siti agi chara ti penting kitai tau bulih kuasa kudus, iya nya macha Bup Kudus, laban bala penulis Bup Kudus diiring kuasa kudus Jehovah. Udah nya, kitai ulih belematika utai ti dibacha, lalu nguji nitihka utai ti dipelajarka kitai. Nya baru kuasa kudus Jehovah ulih nulung kitai idup enggau chara ke nunjukka kitai ngembuan pengarap ti ngelantangka ati Jehovah.