1. Nama nulung bala nembiak Jehovah terus nyembah Iya taja pan napi mayuh penanggul?

 BUP KUDUS madahka, kitai benung idup ba “maya ti balat jai sereta balat tusah.” (2 Tim. 3:1) Kelimpah ari napi penanggul ke ninggang semua orang ba dunya Sitan, nembiak Jehovah mega napi sakal sereta diperinsa. Nama udah nulung kitai terus nyembah Jehovah taja pan napi semua penanggul tu? Siti kebuah utama iya nya, kitai udah ngasaika tulung ari Jehovah, lalu nemu Iya endang ‘Petara ti idup.’—Jer. 10:10; 2 Tim. 1:12.

2. Nama utai ke ditemu kitai pasal Jehovah ke ulih ngeringka kitai?

² Jehovah nemu semua cabaran ke ditapi kitai, lalu Iya seruran ngiga peluang deka nulung kitai. (2 Ban. 16:9; Mas. 23:4) Lebuh kitai ingatka pekara tu pasal Jehovah, kitai deka bisi pengering tan natka sebarang penguji. Tu meh utai ke nyadi ngagai Raja David.

3. Nama reti ku David lebuh iya nyebut ‘Jehovah endang idup’?

³ David ngelala Jehovah sereta bepanggai ba Iya. Lebuh Raja Saul enggau orang bukai nguji deka munuh David, David besampi minta tulung ari Jehovah. (Mas. 18:6) Pengudah Petara nyaut sampi iya lalu nyelamatka iya, David madahka: ‘Jehovah endang idup!’ (Mas. 18:46) Nama reti utai ku David? Siti bup pansik madahka, David benung madahka pengandal iya ba Jehovah. David madahka, Jehovah nya Petara ti bendar,  ke seruran deka nulung bala nembiak Iya. Ari pengalaman iya, David nemu, Petara endang idup. Petara nemu utai ke benung nyadi ba David lalu seruran sedia deka nulung iya. Nya meransang David terus muji sereta nyembah Jehovah.—Mas. 18:​28, 29, 49.

4. Nama penguntung iya enti kitai andal Jehovah nya Petara ti idup?

⁴ Lebuh kitai andal Jehovah nya Petara ti idup, nya deka nulung kitai nyembah Iya enggau ransing. Kitai deka bulih pengering ngambika tan napi penguji sereta diperansang ngambika bebendar gawa ke Jehovah. Kitai mega deka bulih pengeran ngambika majak semak ngagai Jehovah.

PETARA TI IDUP DEKA NEGAPKA NUAN

5. Nama kebuah kitai enda takut lebuh kitai napi penguji? (Pilipi 4:13)

⁵ Kitai ulih napi sebarang penguji, enda ngira mit tauka besai, enti kitai ingat Jehovah seruran deka nulung kitai. Ba Jehovah, nadai penanggul ti kelalu tusah diputarka Iya. Iya Petara ti Pemadu Bekuasa, lalu Iya ulih meri kitai kuasa kena betan. (Bacha Pilipi 4:13.) Nya alai, kitai enda ibuh takut lebuh napi penguji. Lebuh kitai meda Jehovah nulung kitai napi penguji ti mit, nya deka nulung kitai andal agi, Iya deka nulung kitai lebuh kitai napi penguji ti besai.

6. Nama utai ke nyadi lebuh David agi biak ke ngasuh iya andal agi ngagai Jehovah?

⁶ Peratika dua iti utai ti nyadi ba David ke ngasuh iya majak andalka Jehovah. Lebuh iya agi nembiak, iya ngibun bedus apai iya. Maya nya, siku beruang nabanka siku bedus ke dijaga iya. Lalu ba maya ke bukai, siku singa mega datai lalu nabanka siku bedus. Ba dua iti situasi nya, David enggau berani begagaika beruang enggau singa nya, lalu nyelamatka bedus apai iya. Tang David enda kala ngumbai iya ulih ngereja nya ketegal pengering diri empu. Iya nemu Jehovah meh ke udah meri iya kuasa kena ngereja nya. (1 Sam. 17:​34-37) David seruran ingatka utai ke udah nyadi nya. Lebuh iya belematika pengalaman iya, nya nulung iya andal agi, Petara ti idup deka ngeringka iya jemah ila.

7. David betumpu ba nama? Lalu, baka ni nya nulung iya ngelaban Goliat?

⁷ Udah nya, lebuh David agi nembiak, iya ngabas kem soldadu bala orang Israel. Maya nya, bisi siku soldadu orang Pilistin ke besai tubuh sereta tinggi, ke benama Goliat, mencabar “barisan soldadu Israel.” (1 Sam. 17:​10, 11) Bala soldadu orang Israel amat takut laban sida betumpu ba pemesai tubuh Goliat, sereta utai ti dipadah Goliat ngagai sida. (1 Sam. 17:​24, 25) Tang David betumpu ba utai bukai. David nemu, lebuh Goliat benung ngeleseka raban soldadu orang Israel, iya kebendar iya benung ngelese “barisan soldadu Petara ti idup.” (1 Sam. 17:26) Maya nya, David benung berunding pasal Jehovah. David andal, Petara ke kala nulung iya lebuh iya siku pengibun bedus suba, deka nulung iya baru ba situasi tu. Ketegal nya, iya belaban enggau Goliat lalu menang!—1 Sam. 17:​45-51.

8. Baka ni kitai ulih terus berundingka Jehovah lebuh napi penguji? (Peda mega gambar.)

⁸ Kitai mega ulih mujur napi penguji enti kitai ingat Petara ti idup sedia deka nulung kitai. (Mas. 118:6) Kitai ulih negapka pengarap kitai ngagai Jehovah enggau beratika utai ke kala digaga Iya kelia. Bacha meh cherita Bup Kudus ke ngingatka nuan pasal chara Jehovah udah nyelamatka bala nembiak Iya. (Isa. 37:​17, 33-37) Pia mega, bacha tauka peda riput ba laman web jw.org, ke ngayanka  chara Jehovah udah nyukung bala menyadi Kristian kitai kemayaharitu. Nuan mega ulih ngenang baru chara Jehovah udah nulung nuan. Engka nuan ngasaika Jehovah bedau kala nulung nuan enggau chara ti ngalitka ati, baka nyelamatka nuan ari singa tauka beruang. Tang kebendar iya, Jehovah udah ngereja mayuh utai ke nuan! Iya udah mai nuan nyadi kaban Iya. (Jhn. 6:44) Indah diatu, ketegal tulung ari Jehovah, nuan agi ulih nyembah Iya. Nyadi, minta meh Jehovah nulung nuan ingat baru ngagai maya Iya kala nyaut sampi nuan, meri nuan utai ke diguna nuan ba maya ti chun, tauka nulung nuan lebuh nuan napi utai ti tusah. Lebuh nuan belematika semua utai nya, nuan deka andal agi, Jehovah deka terus nyaga nuan.

9. Nama patut dikingatka kitai lebuh kitai napi penguji? (Jaku-Dalam 27:11)

⁹ Lebuh kitai napi penguji, kitai patut betumpu ba utai ti pemadu penting. Sitan madahka, lebuh kitai napi penanggul, kitai deka ninggalka Jehovah. Nyadi, reaksi kitai lebuh ditinggang penanggul mai kesan ngagai asai ati Jehovah. (Jop 1:​10, 11; bacha Jaku-Dalam 27:11.) Lebuh kitai mengkang tetap ati ngagai Jehovah taja pan napi penanggul, kitai nunjukka diri rinduka Jehovah, lalu kitai ulih nunjukka Sitan nya pemula. Kati nuan benung napi sakal ari perintah, napi penanggul ba ekonomi, orang ba endur alai nuan nginjil enda ngayanka minat ngagai pesan ke dibai nuan, tauka nuan benung napi penanggul ke bukai? Enti pia, ingat meh, nuan bisi peluang ngena situasi nuan ngagaka ati Jehovah. Kingatka mega, Jehovah enda sekali-kali nejuka nuan napi penguji ke enda ulih ditatka nuan. (1 Kor. 10:13) Iya tentu deka meri nuan pengering kena betan.

PETARA TI IDUP DEKA MERI NUAN UPAH

10. Nama deka digaga Petara ti idup ke bala penyembah Iya?

¹⁰ Jehovah seruran meri upah ngagai sida ke nyembah Iya. (Heb. 11:6) Iya meri kitai pengelantang sereta ati ti puas diatu, lalu Iya  mega deka meri kitai pengidup ti meruan belama iya jemah ila. Kitai ulih arapka Jehovah lalu andal, Iya bisi pengeran sereta kuasa kena ngupah kitai. Ketegal nya, kitai meri utai ti pemadu manah ba sembah kitai ngagai Iya, baka ke digaga bala nembiak Iya kelia. Nya meh utai ke digaga Timoti ba abad keterubah.—Heb. 6:​10-12.

11. Nama kebuah Timoti bebendar gawa ke raban gempuru? (1 Timoti 4:10)

¹¹ Bacha 1 Timoti 4:10. Timoti amat pechaya Petara deka ngupah iya. Nya kebuah iya bebendar gawa ke Jehovah enggau ke orang bukai. Nama utai ke digaga iya? Rasul Paul meransang iya nyadi pengajar ti landik agi ba pengawa nginjil sereta ba raban gempuru. Paul mega ngasuh iya nyadi teladan ti manah ke bala menyadi, enda ngira ngagai sida ke biak tauka sida ke tuai. Lalu iya mega diberi sekeda pengawa ti tusah, baka meri jaku lalau ti tegas tang bepengerindu ngagai sida ke begunaka jaku lalau nya. (1 Tim. 4:​11-16; 2 Tim. 4:​1-5) Kekadang, pengawa ke digaga Timoti nya enda ulih dipeda orang tauka enda dihargai. Tang iya andal, Jehovah tentu deka ngupah iya.—Rom. 2:​6, 7.

12. Nama kebuah bala tuai gempuru bebendar gawa ke raban gempuru? (Peda mega gambar.)

¹² Kemayaharitu, bala tuai gempuru mega ulih andal, Jehovah meda sereta menghargai pengawa sida ti bagas. Kelimpah ari ngabas bala menyadi, ngajar, sereta nginjil, mayuh tuai gempuru mega nyukung ba pengawa nirika bengunan sereta lebuh penusah nyadi. Bisi mega nulung ba Raban Ngabas Orang Sakit tauka Komiti Besilih Penemu Sepital. Bala tuai gempuru nemu raban gempuru enggi Jehovah, ukai enggi mensia. Ketegal nya, sida bebendar gawa ke raban gempuru. Lalu sida pechaya, Petara deka ngupah sida ketegal utai ti digaga sida.—Kol. 3:​23, 24.

13. Nama asai ati Jehovah pasal utai ke digaga kitai ke Iya?

¹³ Ukai semua menyadi ulih nyadi tuai  gempuru. Taja pia, semua kitai bisi utai ke ulih diberi ngagai Jehovah. Iya amat gaga ati lebuh kitai bebendar gawa ke Iya. Iya beratika duit pemeri ke diberi kitai kena nyukung pengawa serata dunya, taja pan penyampau nya mimit aja. Iya gaga ati lebuh kitai ngangkatka jari meri komen ba gempuru, taja pan kitai orang ti malu. Lalu Iya mega gaga ati lebuh kitai ngampun orang ke ngemediska ati kitai. Taja pan nuan ngasaika utai ke dikereja nuan ke Jehovah enda mayuh, tang andal meh, Jehovah beterima kasihka utai ti ulih dikereja nuan. Iya rinduka nuan sereta deka ngupah nuan.—Luk. 21:​1-4.

MENGKANG SEMAK ENGGAU PETARA TI IDUP

14. Baka ni mengkang semak enggau Jehovah nulung kitai tetap ati ngagai Iya? (Peda mega gambar.)

¹⁴ Enti kitai ngembuan kaul ti rapat enggau Jehovah, kitai deka senang agi mengkang tetap ati ngagai Iya. Utai tu amat nyadi ba Josep. Iya enggai ngereja ulah seks ti kamah. Iya nemu utai ke digaga iya bisi kesan ngagai asai ati Jehovah. Iya enggai ngemediska ati Jehovah. (P-kal. 39:9) Ngambika kitai ngembuan kaul ti rapat enggau Jehovah, kitai patut meri awak besampi, sereta belajarka Bup Kudus. Enggau nya, kaul kitai enggau Iya deka majak rapat. Baka Josep, enti kitai bisi kaul ti rapat enggau Jehovah, kitai tentu enggai ngereja utai ti ulih ngemediska ati Iya.—Jas. 4:8.

15. Nama ulih dipelajarka kitai ari utai ti nyadi ngagai orang Israel ba menua puang? (Hebrew 3:12)

¹⁵ Sida ke enda ingat Jehovah nya Petara ti idup sereta badu agi arapka Iya, deka senang agi ninggalka Iya. Peratika utai ke nyadi ngagai orang Israel lebuh sida ba menua puang. Sida nemu Jehovah endang bisi, tang sida belabuh kakang ati sekalika Jehovah deka nyediaka utai ke diguna sida tauka enda. Sida indah nanya: “Jehovah bisi enggau kitai tauka enda?” (P-sut. 17:​2, 7) Ketegal nya, sida angkat ngelaban Petara. Kitai tentu deka nyeliahka diri ari nitihka chunto sida ti enda manah.—Bacha Hebrew 3:12.

16. Nama utai ke ulih nguji pengarap kitai?

 ¹⁶ Dunya tu ngasuh kitai tusah deka mengkang semak ngagai Jehovah. Mayuh orang enggai pechaya Petara bisi. Kesuah iya, sida ke enggai ngereja utai ti dikedekaka Petara bisi pengidup ti manah agi. Lebuh kitai meda utai tu, pengarap kitai ulih diuji. Taja pan kitai nemu Petara endang bisi, tang kitai engka belabuh kakang ati sekalika Petara deka nulung kitai tauka enda. Penulis Masmur 73 mega kala ngasaika utai tu. Iya meda orang ke ngelingi iya enda nitihka Adat Petara tang agi idup lantang. Ketegal nya, iya belabuh kakang ati sekalika iya patut nyembah Petara tauka enda.—Mas. 73:​11-13.

17. Nama deka nulung kitai mengkang semak ngagai Jehovah?

¹⁷ Nama nulung pemasmur nya ngemetulka runding iya? Iya belematika utai ke deka nyadi ngagai sida ke enda agi arapka Jehovah. (Mas. 73:​18, 19, 27) Iya mega beratika berekat ke diulih ari nyembah Petara. (Mas. 73:24) Kitai mega ulih belematika berekat ke udah diberi Jehovah ngagai kitai. Gambarka enti sema kitai enda nyembah Jehovah. Baka ni gaya pengidup kitai? Belematika saut ngagai tanya tu deka nulung kitai terus nyembah Jehovah sereta mengkang tetap ati ngagai Iya. Lalu baka pemasmur nya, kitai ulih madahka: ‘Tang aku empu, naka meh pengelantang aku diau semak Petara.’—Mas. 73:28.

18. Nama kebuah kitai enda takut ke jemah ila?

¹⁸ Kitai ulih napi sebarang cabaran ba hari ti penudi tu laban kitai “ulun Petara ti bendar sereta idup.” (1 Tes. 1:9) Petara kitai ibuhka kitai sereta seruran deka nulung kitai. Iya udah enggau bala nembiak Iya kelia menya. Nyadi, Iya tentu deka enggau kitai kemayaharitu. Enda lama da agi kitai deka napi penusah ti pemadu besai ke kala nyadi ba dunya. Tang kitai enda napi nya kediri laban Jehovah bisi enggau kitai. (Isa. 41:10) Arapka semua kitai enggau berani madahka: “Jehovah nya penulung aku, aku enda takut.”—Heb. 13:​5, 6.