1. Baka ni Masmur 15:​1-5 ulih nulung kitai?

 BA ARTIKEL ke sebedau tu, kitai udah belajar, sida ke nyerahka diri ngagai Jehovah sereta ngembuan kaul ti rapat enggau Iya, ulih nyadi temuai ba langkau kain Iya. Tang, nama patut digaga kitai enti kitai deka nyadi temuai Iya? Saut iya bisi ba Masmur 15. (Bacha Masmur 15:​1-5.) Masmur tu madahka utai ke patut digaga kitai ngambika ulih nyadi kaban rapat Petara.

2. Nama utai ke engka diperundingka David lebuh iya nyebut pasal langkau kain Jehovah?

² Jaku pemuka ke Masmur 15 madahka: ‘Jehovah, sapa tau tama ngagai Rumah Sembiang [tauka, langkau kain] Nuan? Sapa tau nyembah Nuan di Sion, bukit Nuan ti kudus?’ (Mas. 15:1) Lebuh David nyebut pasal “langkau kain” Jehovah, iya engka berunding pasal Langkau Sembiang ke bisi ba Gibeon pengelama siti timpuh. Tauka, lebuh David nyebut pasal ‘bukit Petara ti kudus,’ iya engka berunding pasal langkau kain ke bisi ba Gunung Sion di Jerusalem. Ba dia, beberapa kilometer tunga ke selatan Gibeon, David nirika siti langkau kain kena nyimpan peti lampang batu Adat, nyentukka Rumah Sembiang didirika.—2 Sam. 6:17.

3. Nama kebuah kitai deka meretika Masmur 15? (Peda mega gambar.)

³ Endang amat, mayuh ari orang Israel enda kala gawa ba Langkau Sembiang. Lalu, semina mimit aja orang ke ulih tama ngagai langkau kain alai peti lampang batu Adat disimpan. Taja pia, semua nembiak Jehovah ti tetap ati ulih nyadi temuai ba langkau kain Iya, enti sida mengkang nyadi kaban Iya. Nya meh utai ke dikinginka semua kitai. Masmur 15 madahka sekeda sifat ke patut dikemansangka kitai sereta utai  ke patut digaga kitai ngambika ulih mengkang nyadi kaban Jehovah.

NGASIKA PETARA SERETA NGEREJA UTAI TI NGENA

4. Baka ni kitai nemu Jehovah ukai semina dekaka kitai dibaptisa aja? (Isaiah 48:1)

⁴ Masmur 15:2 madahka, kaban Petara nya ‘orang ke ngasika Petara dalam semua utai lalu seruran ngereja utai ti ngena.’ Tu meh utai ke patut terus dikereja kitai. Tang kati kitai amat ulih ‘ngasika Petara dalam semua utai’? Ulih! Taja pan nadai siku pan mensia ti sempurna, tang enti kitai enggau naka ulih ‘ngasika Petara dalam semua utai,’ Iya ngumbai kitai nadai bepenyalah. Lebuh kitai nyerahka diri ngagai Petara sereta dibaptisa, nya semina pun aja. Ambika chunto, ba jeman Bup Kudus, taja pan sesiku orang nya orang Israel, tang tu ukai mai reti iya layak nyadi temuai Jehovah. Sekeda ari sida besampi ngagai Iya, tang enda ngereja nya “dalam pemendar enggau pengelurus.” (Bacha Isaiah 48:​1, ari nota kaki.) a Kena nunjukka sida amat deka nyadi temuai Jehovah, orang Israel patut belajar pasal pesan Jehovah sereta ngasika pesan nya. Baka nya mega, enti kitai deka ngembuan kaul ti rapat enggau Jehovah, enda chukup enti kitai semina dibaptisa sereta dikumbai Saksi-Saksi Jehovah aja. Kitai mesti “seruran ngereja utai ti ngena.” Baka ni kitai ulih ngereja nya?

5. Nama reti ngasika Jehovah dalam semua utai?

⁵ Ba Jehovah, ‘ngasika Petara dalam semua utai’ sereta “seruran ngereja utai ti ngena” ukai aja mai reti datai begempuru enggau tetap ba Palan Gempuru. (1 Sam. 15:22) Kitai mesti enggau naka ulih ngasika Petara dalam semua pekara ba pengidup kitai, indah lebuh  kitai kediri aja. (J-lam. 3:6; P-jar. 12:​13, 14) Kitai mega ngasika Petara ba pekara ti mit. Lebuh kitai ngereja nya, kitai nunjukka diri amat rinduka Iya, lalu nya ulih ngasuh Iya majak rinduka kitai.—Jhn. 14:23; 1 Jhn. 5:3.

6. Nitihka Hebrew 6:​10-12, nama utai ti penting agi ari semua pengawa ti manah ke kala digaga kitai suba?

⁶ Jehovah amat gaga ati enggau semua pengawa ke udah digaga kitai ke Iya suba. Taja pan kitai udah kala ngereja mayuh pengawa ti manah, tang tu ukai reti iya kitai deka mengkang nyadi temuai ba langkau kain Jehovah. Tu diterangka ba Hebrew 6:​10-12. (Bacha.) Jehovah deka seruran ingatka pengawa manah ke udah digaga kitai. Tang Iya dekaka kitai terus nyembah Iya enggau pengabis ati “nyentuk ke ujung.” Iya deka nyadi kaban kitai belama iya “enti kitai enda putus asa.”—Gal. 6:​9, nota kaki.

NYEBUT UTAI TI AMAT SERETA TAU DIKEARAPKA

7. Nama reti nyebut utai ti amat sereta tau dikearapka?

⁷ Enti sesiku orang deka nyadi temuai ba langkau kain Jehovah, iya mesti “nyebut utai ti amat sereta tau dikarapka.” (Mas. 15:2) Tu ukai semina mai reti enda bejaku bula. Jehovah dekaka kitai jujur dalam semua utai, enda ngira ba jaku tauka ulah kitai. (Heb. 13:18) Tu amat penting, ‘laban Jehovah begedika orang ke ngereja penyai [tauka, licik], tang Iya ngaga orang ke lurus nyadika pangan Iya.’—J-lam. 3:32.

8. Nama ulah ke patut diseliahka kitai?

⁸ Orang ke “nyebut utai ti amat sereta tau dikarapka” enda pepura ngasika Petara lebuh ba mua orang mayuh, tang udah nya ngereja utai ti jai lebuh sida kediri. (Isa. 29:13) Sida nyeliah ari ulah ti licik. Orang ti licik engka ngumbai adat Jehovah enda seruran ngena. (Jas. 1:​5-8) Iya engka enggai ngasika Jehovah ba pekara ke dikumbai iya enda penting. Udah nya, lebuh iya meda nadai kesan buruk ari ulah iya ti enda ngasi, tu engka ngasuh iya majak agi ngereja utai ti jai. Taja pan iya ngumbai diri benung nyembah Petara, tang Jehovah enggai nerima sembah iya. (P-jar. 8:11) Taja pia, kitai deka jujur dalam semua utai.

9. Nama nyadi maya Jesus terubah kali betemu enggau Natanel, lalu nama ulih dipelajarka kitai ari utai nya? (Peda mega gambar.)

 ⁹ Kati nya penting nyadi orang ke nyebut utai ti amat sereta tau dikearapka? Peratika utai ke nyadi lebuh Philip mai kaban iya, Natanel, betemu enggau Jesus. Taja pan Jesus bedau kala betemu enggau Natanel, tang iya madah: “Peda, iya tu orang Israel ti bendar. Iya nadai nemu ngelakar.” (Jhn. 1:47) Jesus nemu bala murid iya ke bukai endang jujur. Tang Jesus ulih beratika, Natanel nya orang ti amat jujur. Baka kitai, Natanel mega enda sempurna. Taja pia iya enda kala pepura, tang iya jujur dalam semua utai. Jesus rinduka sifat nya, lalu muji Natanel. Semua kitai tentu dekaka Jesus ngembuan runding ti sama pasal kitai.

10. Nama kebuah kitai patut bejimat enggau utai ti disebut kitai? (James 1:26)

¹⁰ Mayuh ari utai ke disebut ba Masmur 15 bisi kaul enggau chara kitai ngelayan orang bukai. Masmur 15:3 madahka temuai ba langkau kain Jehovah “enda betenahka orang. Sida nadai ngereja penyalah ngagai pangan diri lalu sida enda mega nusui berita ngapa pasal pangan diri.” Enti kitai betenahka orang bukai, nya ulih ngemediska sida sereta ngujungka kitai enda agi diterima nyadi temuai ba langkau kain Jehovah.—Bacha James 1:26.

11. Nama reti betenahka orang, lalu nama deka nyadi ngagai orang ke betenahka orang bukai lalu enggai nesal ati?

¹¹ Pemasmur enggau nyemetak nyebut pasal betenahka orang. Nama reti betenahka orang? Reti iya, nyebut utai ti bula pasal orang bukai ke ulih ngenyaika reputasi orang nya. Enti sesiku orang suah betenahka orang bukai, lalu enggai nesal ati, iya deka dibuai ari gerempung Jehovah.—Jer. 17:10.

12-13. Nama sekeda situasi ke ulih ngujungka kitai betenahka bala menyadi enggau enda sengaja? (Peda mega gambar.)

¹² Masmur 15:3 mega ngingatka kitai, bala temuai Jehovah nadai ngereja penyalah  ngagai pangan diri, lalu sida mega enda nusui berita ngapa pasal pangan diri. Nama situasi ke engka ngasuh kitai enda sengaja betenahka bala menyadi?

¹³ Kitai engka enda sengaja betenahka sesiku orang lebuh kitai nusui penerang ti enda betul pasal iya. Peratika sekeda situasi tu: (1) siku menyadi indu badu ngerintis, (2) sepasang laki bini nadai agi gawa ba Bethel, tauka (3) siku menyadi lelaki ukai agi tuai gempuru tauka penulung gempuru. Kati nya manah enti kitai madah ngagai orang bukai bala menyadi tu udah ngaga penyalah, lalu nya kebuah situasi sida berubah? Tentu enda, laban engka bisi mayuh kebuah ke enda ditemu kitai. Kingatka meh, temuai ba langkau kain Jehovah “nadai ngereja penyalah ngagai pangan diri lalu sida enda mega nusui berita ngapa pasal pangan diri.”

BEBASAKA ORANG KE NANGIKA JEHOVAH

14. Nama reti ‘begedika orang ke ditulak Petara’?

¹⁴ Masmur 15:4 madahka, kaban Jehovah ‘begedika orang ke ditulak Petara’ tauka begedika orang ke keji. Baka ni kitai nemu enti sesiku orang ditulak Petara? Kitai enda ulih bepanggai ba penemu diri empu kena nentuka enti sesiku orang ditulak Petara tauka enda. Nama kebuah? Ketegal kitai enda sempurna, kitai engka rinduka sekeda orang laban sida nyamai enggau begulai. Tang, kitai engka enda rindu enggau orang ke suah ngasuh kitai geram. Nyadi, kitai semina patut begedika orang ke dikumbai Jehovah keji. (1 Kor. 5:11) Tu nyengkaum sida ke enggai nesal ati sereta terus ngereja utai ti jai, ke enda bebasaka utai ti dipechayaka kitai, sereta ke nguji deka ngelemika kaul kitai enggau Jehovah.—J-lam. 13:20.

15. Nama siti chara kitai bebasaka ‘orang ke nangika Jehovah’?

¹⁵ Masmur 15:4 mega madahka, kitai mesti bebasaka ‘orang ke nangika Jehovah.’ Nyadi, kitai ngiga chara kena ngayanka pemanah enggau basa ngagai bala kaban Jehovah. (Rom. 12:10) Baka ni? Siti chara nya disebut ba Masmur 15:​4, ke madahka, temuai ba langkau kain Jehovah “seruran ngamatka semaya sida, enda ngira pemesai ungkus nya.” Enti kitai enda ngamatka semaya kitai, nya tentu ngemediska ati orang bukai. (Mat. 5:37) Ambika chunto, Jehovah dekaka laki bini ngamatka semaya ke digaga seduai iya lebuh seduai iya jadi. Iya mega gaga ati lebuh apai indai enggau bebendar ngamatka semaya ke digaga sida ngagai anak sida. Ketegal kitai rinduka Petara enggau orang bukai, kitai enggau naka ulih ngamatka semaya kitai.

16. Nama siti agi chara kitai bebasaka bala kaban Jehovah?

¹⁶ Siti agi chara kitai bebasaka bala kaban Petara, iya nya ngelalu sereta ngintu sida, enggau ngayanka pengerah jari. (Rom. 12:13) Lebuh kitai meri awak begulai enggau bala menyadi, ukai aja ba gempuru tauka ba pengawa nginjil, kitai deka majak semak enggau sida sereta enggau Jehovah. Nambahka nya, lebuh kitai ngelaluka orang sereta ngintu sida, kitai kebendar iya neladan Jehovah.

BIBAS ARI PENGERINDU KE DUIT

17. Nama kebuah Masmur 15 bejaku pasal duit?

¹⁷ Ba Masmur 15:5 kitai macha, temuai Jehovah “nyali orang duit, lalu enda minta anak duit nya, lalu sida enda ulih diumpan makai suap nyadika saksi ngelaban orang ke nadai penyalah.” Nama kebuah masmur tu nyebut pasal duit? Laban enti kitai rinduka duit, kitai engka deka ngemeratka duit lebih agi ari  orang bukai sereta kaul kitai enggau Petara. (1 Tim. 6:10) Ba jeman Bup Kudus, sekeda orang ngambi ulih ari orang miskin ke minjau duit ari sida. Sida minta anak duit ti lebih ari penyampau ke dipinjau orang nya. Bisi mega sekeda hakim ke makai suap, sereta ngakim orang ke nadai penyalah enggau enda adil. Jehovah amat begedika ulah ke baka tu.—Esk. 22:12.

18. Nama tanya ke ulih nulung kitai meresa runding kitai pasal duit? (Hebrew 13:5)

¹⁸ Endang manah enti kitai ulih meresa runding diri pasal duit. Tanya meh diri empu: ‘Kati aku selalu berunding pasal duit sereta utai ke ulih dibeli aku enggau duit nya? Enti aku minjau duit, kati aku lubah-lubah deka mayar utang nya laban aku ngumbai orang ke nyali duit ngagai aku enda begunaka duit nya? Kati aku ngumbai diri manah agi ari orang bukai ketegal aku bisi duit? Kati aku tusah deka ngayanka pengerah jari ngagai orang bukai? Kati aku ngumbai bala menyadi ke bisi mayuh duit rinduka duit lebih agi ari sida rinduka Jehovah? Kati aku semina bekaban enggau sida ke kaya, lalu enggai bekaban enggau sida ke miskin?’ Semua kitai udah nerima peluang ti spesial nyadi temuai Jehovah. Ngambika kitai ulih mengkang nyadi temuai Jehovah, kitai patut nentuka diri bibas ari pengerindu ke duit. Enggau nya, Jehovah enda sekali-kali ninggalka kitai!—Bacha Hebrew 13:5.

JEHOVAH RINDUKA BALA KABAN IYA

19. Nama kebuah Jehovah dekaka kitai ngereja semua utai ke disebut ba Masmur 15?

¹⁹ Ba ujung Masmur 15, bisi siti semaya: “Barang sapa ngereja utai tu, deka diau likun berari.” (Mas. 15:5) Pemasmur nerangka kebuah Jehovah dekaka kitai ngereja semua utai ke disebut ba masmur tu. Tu ketegal Jehovah dekaka kitai gaga ati. Lebuh kitai ngereja utai ke diasuh Petara, pengidup kitai deka nyadi manah agi lalu Iya deka nyaga kitai.—Isa. 48:17.

20. Nama utai ke dianti bala temuai Jehovah?

²⁰ Bala temuai Jehovah nganti harapan ti manah ke jemah ila. Sida ke dipilih merintah enggau Kristus deka diau ba serega, alai Jesus udah nyediaka “mayuh endur diau” ke sida. (Jhn. 14:2) Lalu sida ke bisi harapan ba dunya, nganti semaya ba Pemandang 21:3 dikeamatka. Endang basa ti besai laban Jehovah mai kitai nyadi temuai ba langkau kain Iya belama iya!