Tanya ari Pemacha
Nama kebuah sekeda orang engka madahka, Masmur 12:7 enggau 8 nya ditujuka ngagai ‘semaya Jehovah’ (ba ayat 6), tang Bup Kudus Salin Dunya Baru merujuk ngagai “orang ke kena perinsa” (ba ayat 5)?
Konteks nya nunjukka ayat tu merujuk ngagai orang.
Ba Masmur 12:1-4, David terubah iya madahka, “orang ke lurus nadai agi ditemu.” Lalu udah nya, ba Masmur 12:5-8, iya madahka:
‘“Tang diatu Aku deka datai,” ku Jehovah bejaku,
“Laban orang ke suntuk ditekanka orang,
Lalu orang ke kena perinsa, bedemuh natka diri pedis.
Aku deka meri sida pengelikun ti dikedekaka sida.”
Semaya Jehovah endang tau dikarapka.
Semaya Iya baka pirak ti tulin, ti dituchi tujuh kali dalam serumbung api.
Orang ke jai bisi di semua endur, lalu semua orang bela muji utai ti jai.
Ibun kami likun, O Jehovah, lalu jaga kami ari orang ke baka nya.’
Ayat 5 madahka utai ti deka dikereja Jehovah ngagai “orang ke kena perinsa.” Iya deka nyelamatka sida.
Ayat 6 madahka, ‘semaya Jehovah endang tau dikarapka,’ lalu semaya Iya “baka pirak ti tulin.” Tu mega nunjukka asai ati kitai pasal utai ti dipadah Jehovah.—Mas. 18:30; 119:140.
Diatu, peratika dua iti ayat ke nangkanka nya, Masmur 12:7 enggau 8: ‘Orang ke jai bisi di semua endur, lalu semua orang bela muji utai ti jai. Ibun kami likun, O Jehovah, lalu jaga kami ari orang ke baka nya.’ Nama reti dua iti ayat tu?
Ketegal ayat 7 enggau 8 nya pengudah ayat 6 ke bejaku pasal ‘semaya Jehovah,’ sekeda orang engka ngumbai Jehovah deka ‘ngibun,’ tauka nyaga semaya Iya. Lalu kitai nemu, Petara udah nyaga Bup Kudus taja pan bala penyakal nguji deka nagang tauka ngerusakka Bup Kudus.—Isa. 40:8; 1 Pet. 1:25.
Taja pia, utai ti dipadah ba ayat 5 mega betul. Jehovah deka nyaga sida ke dipadah ba ayat 5. Jehovah udah sereta deka terus nulung enggau nyelamatka “orang ke kena perinsa” sereta ‘orang ke ditekan.’—Jop 36:15; Mas. 6:4; 31:1, 2; 54:7; 145:20.
Nyadi, ayat 7 enggau 8 merujuk ngagai nama?
Utai ke bisi ba masmur tu nunjukka ayat nya merujuk ngagai orang.
Ba Masmur 12:1 enggau 2, David bejaku pasal bala nembiak Jehovah ti tetap ati ke udah dikemulaka orang ti jai. Ayat ke nangkanka nya madahka, Jehovah deka ngambi tindakan ngagai sida ke nyebut utai ti jai nya. Masmur nya ngasuh kitai yakin, kitai ulih arapka Petara, ke deka betindak ngarika nembiak Iya laban semaya Iya endang tau dikearapka.
Nyadi, ayat 7 enggau 8 madahka, Jehovah deka ngibun sereta nyaga sida, iya nya sida ke diperinsa orang ti jai.
Salin Bup Kudus kitai nitihka teks Hebrew Masoretic. Leka jaku “kami” dikena dua kali ba ayat 7 enggau 8, ba Septuagint Gerika. Nya alai, tu tentu nunjukka ayat nya merujuk ngagai bala nembiak ti tetap ati ke diperinsa sereta ditekan. Lalu, pengujung ayat 7 enggau 8 madahka, tiap iku orang ke tetap ati deka dijaga ari “orang ke baka nya,” iya nya orang ke muji utai ti jai. (Mas. 12:7, 8) Ba Bup Kudus Begian Jaku Hebrew ke disalin ngagai jaku Aram, begian keterubah ayat 7 ngena leka jaku “sida.” Ayat nya madahka: “Nuan, O TUAN, deka nyaga sida ke lurus, Nuan deka ngelindung sida ari bansa ti jai tu belama iya.” Tu mega nyadika bukti ke nunjukka Masmur 12:7 enggau 8, ukai merujuk ngagai semaya Petara.
Nya alai, ayat tu meri harapan ngagai “orang ke lurus,” iya nya Jehovah deka betindak ngarika sida.
