1. Nama ke ngasuh Kain ngaga pemutus ti salah, lalu nama nyadi?

 KAIN bisi pemutus ti besai ke patut digaga. Iya ulih milih sekalika deka nagang asai ati iya ti bedosa ke ulih pulaika pemanah ngagai iya, tauka ngelakka asai ati iya bekuasa atas ulah iya ke ulih ngujungka utai ti enda manah. Bup Kudus madahka Kain ngaga pemutus ti salah. Pemutus ke digaga Kain ngujungka pemati menyadi iya, Abel, lalu ngerusak kaul iya enggau Penempa iya.​​—P-kal. 4:​3-​16.

 2. Nama kebuah nya beguna ngaga pemutus ti manah?

² Semua kitai mega patut milih sereta ngaga pemutus ba pengidup. Sekeda pemutus nya besai, lalu sekeda nya enda. Tang, mayuh ari pemutus ke digaga kitai ulih meri empas ti besai ba pengidup kitai. Enti kitai ngaga pemutus ti manah, pengidup kitai deka lantang, lalu kurang agi penanggul. Tang enti kitai ngaga pemutus ti enda manah, pengidup kitai deka penuh enggau penanggul sereta asai ati ti lebu.​​—J-lam. 14:⁠8.

 3. (a) Kena ngaga pemutus ti manah, kitai patut arapka nama? (b) Nama tanya ke deka dikerandauka kitai?

³ Nama deka nulung kitai ngaga pemutus ti manah? Kitai patut arapka Petara, iya nya pechaya Iya deka nulung sereta meri kitai pe nemu-dalam ti diguna kitai kena ngaga pemutus ti manah. Kitai mega patut arapka Jaku Iya, iya nya pechayaka jaku ajar ari Iya. (Bacha James 1:​5-8.) Seraya kitai semak ngagai Jehovah sereta majak rinduka Jaku Iya, tu nulung kitai pechaya Iya nemu utai ti pemadu manah ke kitai. Udah nya, kitai deka ngiga iring ari Jaku Iya sebedau kitai ngaga pemutus. Tang baka ni kitai ulih ngemansangka pengelandik ngaga pemutus ti manah? Lalu patut kitai ngubah pemutus ke udah digaga kitai?

 4. Nama pemutus ti digaga Adam, lalu nama nyadi?

⁴ Orang patut ngaga pemutus ti besai kenyau ari sejarah mensia berengkah. Mensia ti keterubah, Adam, patut mutus sekalika iya deka mendingka Penempa iya, Jehovah, tauka mendingka bini iya, Hawa. Adam milih deka mendingka Hawa, ke ngasuh iya ngaga pemutus ti amat enda manah. Ketegal nya, Jehovah muru Adam ari Kebun Eden, lalu nyau kelama iya mati. Kemaya hari tu, kitai mega merinsa ketegal pemutus enda manah ke digaga Adam.

 5. Nama runding kitai pasal tanggung pengawa ngaga pemutus?

⁵ Sekeda orang engka ngumbai pengidup deka senang agi enti sida enda ibuh ngaga pemutus. Nuan engka ngasaika utai ti sama. Tang kitai anang enda ingat, Jehovah enda nempa mensia baka robot, ke enda ulih berunding tauka milih. Jehovah udah meri kitai Jaku Iya, ke ngajar kitai chara ngaga pemutus ti manah. Jehovah deka kitai ngaga pemutus, lalu tanggung pengawa tu ulih nulung kitai. Pikirka sekeda chunto.

6, 7. Nama pemutus ke patut digaga orang Israel, lalu nama kebuah sida tusah ngaga pemutus nya? (Peda gambar ba pun artikel.)

⁶ Lebuh orang Israel diau ba Menua ti Udah Disemaya, sida patut milih sekalika deka nyembah Jehovah tauka petara bukai. (Bacha Josua 24:15.) Ngaga pemutus ba pekara tu baka ke senang. Taja pia, pemutus ke digaga nentuka sida idup tauka mati. Maya jeman Pengulu, orang Israel majak ngaga pilih ti enda manah. Sida badu nyembah Jehovah, lalu berengkah nyembah petara pelesu. (P-ulu. 2:​3, 11-​23) Udah nya, maya jeman nabi Elijah, nembiak Petara patut mutus sekalika sida deka nyembah Jehovah tauka petara pelesu Baal. (1 Raj. 18:21) Ngaga pemutus ba pekara tu baka ke senang laban nyembah Jehovah nya seruran badas. Orang ke nemu berunding enggai nyembah petara ke enda idup. Tang orang Israel enda ulih ngaga pemutus. Bup Kudus madahka, orang Israel agi bebagi ati “deka ngaga pemutus.” Nya kebuah, Elijah meransang sida nyembah Petara ti bendar, Jehovah.

⁷ Nama kebuah orang Israel tusah ngaga pemutus ti manah? Kesatu, sida enda arapka Jehovah, lalu sida enggai mendingka Iya. Sida enda pechayaka Jehovah, lalu enda ngena awak belajar pasal Iya tauka penemu-dalam Iya. Enti sida belajar pasal Jehovah, utai ti dipelajar tentu ulih nulung sida ngaga pemutus ti manah. (Mas. 25:12) Kedua, orang Israel dikuingka orang ari bansa bukai. Sida nguingka runding orang Israel, lalu indah ngaga pemutus ke sida. Ketegal tu, orang Israel berengkah nitihka orang bansa bukai nya, lalu nyembah petara sida ti pelesu. Jehovah udah lama nangkan orang Israel pasal pekara tu.​​—P-sut. 23:⁠2.

 8. Nama utai ti beguna ke dipelajarka kitai ari orang Israel?

⁸ Chunto orang Israel ngajar kitai siti utai ti manah. Enti kitai deka ngaga pemutus ti manah, kitai patut ngena Jaku Petara. Gala tia 6:5 ngingatka kitai, tiap iku orang betanggungjawap ke pemutus ti digaga diri empu. Amat, kitai enda patut meri orang bukai tanggung pengawa ngaga pemutus ke kitai. Tang, tiap iku kitai patut belajarka utai ti dikumbai Petara ngena lalu ngereja utai nya.

 9. Nama kebuah ngelakka orang bukai ngaga pemutus ke kitai ulih ngenusahka?

⁹ Baka ni kitai engka ngelakka orang bukai ngaga pemutus ke kitai? Enti kitai ngelakka sida ngansak kitai ngaga pemutus ti enda manah. (J-lam. 1:​10, 15) Tu ulih ngenusahka. Endang tanggung pengawa kitai nitihka pengasai ati ti dilatih ngena Bup Kudus. Enti kitai ngelakka orang bukai ngaga pemutus ke kitai, tu reti iya kitai mutus deka nitihka sida. Pemutus nya ulih ngujungka penusah.

10. Nama jaku tangkan ke diberi Paul ngagai orang ba Galatia?

¹⁰ Rasul Paul nangkan orang Galatia ngambika enda ngelakka orang bukai ngaga pemutus ke sida. (Bacha Galatia 4:​17.) Sekeda bala menyadi Kristian lelaki ba Galatia nguji ngaga pemutus ke orang bukai ba eklisia. Nama tuju sida? Sida ke lelaki ti berundingka diri empu nya deka bala menyadi Kristian lelaki nitihka sida, ukai nitihka bala rasul. Sida enda baruh ati, lalu sida enda bebasaka hak bala menyadi Kristian lelaki ke patut ngaga pemutus ke diri empu.

11. Baka ni kitai ulih nulung orang bukai lebuh sida patut ngaga pemutus?

¹¹ Semua kitai ulih belajar ari teladan manah rasul Paul. Iya nemu, bala menyadi Kristian lelaki bisi hak ngaga pemutus ke diri empu, lalu iya bebasaka hak nya. (Bacha 2 Korint 1:​24.) Kemaya hari tu, bala tuai gempuru ulih nitihka teladan tu lebuh sida meri jaku lalau pasal pekara ke bekaul enggau utai ke dipilih diri empu. Sida gaga ati bekunsika penerang ti bepelasarka Jaku Petara enggau bala menyadi Kristian. Tang, bala tuai gempuru bejimat lebuh ngelakka tiap iku menyadi Kristian ngaga pemutus ke diri empu laban tiap iku sida deka betanggungjawap ke pemutus ti udah digaga diri empu. Utai ke ulih dipelajarka: Kitai ulih nulung orang bukai meretika jaku lalau Bup Kudus ke ulih mutarka penanggul sida. Tang, bala menyadi Kristian kitai bisi hak sereta tanggung pengawa ngaga pemutus ke diri empu. Enti sida ngaga pemutus ti manah ke diri empu, sida deka bulih penguntung. Amat, kitai enda patut ngumbai diri bisi kuasa mutuska bagi utai ti patut digaga bala menyadi Kristian ke bukai.

12, 13. Nama kebuah ngaga pemutus lebuh kitai benung pedis ati tauka lemi semengat ulih ngenusahka?

¹² Kemaya hari tu, mayuh orang ngaga pemutus nitihka ati diri empu. Tang tu ulih ngenusahka. Bup Kudus nangkan kitai ngambika enda ngaga pemutus nitihka ati tauka asai ati kitai ti enda sempurna. (J-lam. 28:26) Kitai enda tau arapka ati kitai laban “nadai utai ti nemu agi ngakal ari ati mensia. Iya kelalu balat sakit lalu enda ulih digeraika.” (Jer. 17:⁠9) Bisi mayuh chunto ba Bup Kudus ke nunjukka pengujung ti enda manah ketegal bepanggai ba ati ti enda sempurna. (1 Raj. 11:9; Jer. 3:​17; 13:10) Nya alai, nama ulih nyadi enti kitai nitihka ati lebuh ngaga pemutus?

¹³ Jehovah udah ngasuh kitai rinduka Iya enggau pengabis ati sereta rinduka orang bukai baka kitai ke rinduka diri empu. (Mat. 22:​37-​39) Tang kitai patut bejimat. Ayat Bup Kudus ba genteran sebedau tu madahka, kitai deka napi penusah enti ngelakka asai ati kitai bekuasa atas runding sereta ulah kitai. Ngambika chunto, orang ke pedis ati tusah ngaga pemutus ti manah. (J-lam.  14:17; 29:22) Orang ke lemi semengat mega tusah deka milih enggau manah. (P-pau. 32:​6-​12; J-lam. 24:10) Kitai patut ngawakka adat Petara ngiring runding kitai. (Rom. 7:​25) Lebuh kitai ngaga pemutus ti besai, kitai enda patut ngelakka asai ati kitai bekuasa atas utai ti digaga kitai.

14. Baka ni kitai nemu enda salah ngubah sekeda pemutus ke udah digaga?

¹⁴ Kitai patut ngaga pemutus ti manah. Tang orang ti pintar nemu, kekadang iya patut mikirka baru pemutus ke udah digaga lalu engka ngubah pemutus nya. Petara Jehovah netapka teladan ti pemadu manah ke kitai. Peratika utai ti digaga Iya ke orang Nineweh maya jeman Jonah: ‘Petara meda utai ti dikereja sida. Iya meda sida udah ngelengkaka ulah sida ke jai. Nya alai Iya ngubah runding Diri, lalu enda nyadi ngukum sida.’ (Jon. 3:​10) Lebuh Jehovah meda orang Nineweh udah berubah sereta badu ngereja utai ti jai, Iya ngubah pemutus ke udah digaga Iya. Tu nunjukka Jehovah nya nemu berunding, baruh ati sereta kasih. Enda baka mensia, Jehovah enda ngaga pemutus enggau enda berunding, indah lebuh Iya pedis ati.

15. Nama kebuah kitai engka patut ngubah siti-siti pemutus ke udah digaga?

¹⁵ Bisi maya iya kitai patut mikirka baru pemutus ke udah digaga kitai, ngambika chunto lebuh gaya siti-siti utai udah berubah. Kingatka, kekadang Jehovah ngubah pemutus ke udah digaga Iya. (1 Raj. 21:​20, 21, 27-​29; 2 Raj. 20:​1-5) Kelimpah ari nya, kitai mega engka deka ngubah pemutus ti udah digaga lebuh kitai nerima penerang ke baru. Pikirka chunto Raja David. Iya ngaga pemutus pasal uchu lelaki Saul ke benama Mepiboset bepelasarka penerang ti salah ke diberi ngagai iya. Udah nya, lebuh David nerima penerang ti betul, iya ngubah pemutus ke udah digaga iya. (2 Sam. 19:​24-​29) Kekadang, endang manah enti kitai ulih baka nya.

16. (a) Nama chara ke ulih nulung lebuh ngaga pemutus? (b) Nama kebuah kitai patut mikirka baru pemutus ke udah digaga, lalu baka ni kitai ulih ngereja nya?

 ¹⁶ Bup Kudus madahka, kitai enda patut beguai lebuh ngaga pemutus ti besai. (J-lam. 21:⁠5) Kitai patut ngiga awak berundingka semua fakta enggau manah ngambika ulih ngaga pemutus ti manah. (1 Tes. 5:​21) Sebedau mutuska bagi utai ti deka digaga, tuai bilik patut ngiga awak mansik Bup Kudus sereta litaricha Kristian. Endang manah mega mendingka runding tauka penemu diri sebilik ke bukai. Kingatka, Petara ngasuh Abraham mendingka bini iya. (P-kal. 21:​9-​12) Bala tuai gempuru mega patut ngiga awak mansik. Lebuh bala tuai gempuru tetemuka mayuh agi penerang ba litaricha, sida enda takut ngubah pemutus ti udah digaga tauka takut enda dibasa orang bukai. Bala tuai gempuru ke nemu berunding sereta baruh ati patut sedia ngubah runding sereta pemutus sida lebuh sida patut ngereja nya. Lalu endang manah enti semua kitai nitihka chunto sida. Tu ulih nulung eklisia bisi pemaik sereta mengkang beserakup.​​—SKR. 6:​1-4.

17. Nama ulih nulung kitai mujur ngaga pemutus?

¹⁷ Sekeda pemutus deka besai agi ari ke bukai. Ngambika chunto, mutus sekalika deka kawin tauka sapa ke deka enggau kawin nya pemutus ti besai. Siti agi pemutus ti besai, iya nya kemaya deka berengkah gawa penuh jam ke Jehovah. Sebedau ngaga pemutus ti besai, kitai patut berundingka pekara nya enggau manah sereta besampi minta tulung ari Jehovah. Tu begunaka awak. Tang enti kitai deka ngaga pemutus ti manah, kitai enda tau enda arapka Jehovah, mendingka atur ari Iya, sereta nitihka iring ari Iya. (J-lam. 1:⁠5) Jehovah udah meri kitai jaku ajar ti pemadu manah ba Bup Kudus. Nya alai, endang manah enti kitai ngaga pansik sereta besampi minta iring ari Jehovah. Iya ulih meri kitai kualiti ke diguna kitai kena ngaga pemutus ti sejalai enggau peneka Iya. Sebedau ngaga pemutus ti besai, kitai patut seruran nanya diri empu: ‘Kati pemutus tu nunjukka aku rinduka Jehovah? Kati pemutus nya mai pengelantang sereta pemaik ngagai ruang bilik aku? Lalu kati pemutus nya nunjukka aku sabar sereta manah ati?’

18. Nama kebuah Jehovah ngarapka kitai ngaga pemutus ke diri empu?

¹⁸ Jehovah enda mejal kitai rindu sereta nyembah Iya. Tang, Iya udah meri kitai pengelepas kena milih. Iya masa tanggung pengawa sereta hak kitai milih sekalika deka nyembah Iya tauka enggai. (Jos. 24:15; P-jar. 5:⁠4) Tang Iya ngarapka kitai ngereja utai ti udah diputuska kitai bepelasarka Jaku Iya. Lebuh kitai arapka iring ari Jehovah sereta nitihka prinsip ke udah diberi Iya ngagai kitai, kitai ulih ngaga pemutus ti manah. Lalu kitai deka nunjukka diri tegap dalam semua pekara.​​—Jam. 1:​5-8; 4:⁠8.