PENGELANCHAM pinsil ke baka gamal kapal ba jari Jordan baka ke enda berega. Tang, nya siti ari utai ti berega ba iya. Ku Jordan: “Russell, aki ke ari sepiak indai meri pengelancham pinsil nya lebuh aku agi mit.” Pengudah Russell mati, Jordan nemu, Russell nya orang ti beguna bendar ba pengidup aki Jordan ke ari sepiak apai sereta ba apai indai iya. Russell ngelantangka ati sida ba maya ti tusah. Ku Jordan: “Diatu aku udah nemu mayuh utai pasal Russell, lalu pemeri ti mit tu berega agi ba aku ari ke udah.”

Ari peneleba Jordan, kitai nemu siti-siti pemeri engka enda entu berega tauka nadai rega ba sekeda orang. Tang ba orang ke beterima kasih, pemeri nya berega amat. Pia mega, Petara meri kitai pemeri ti berega amat, lalu Bup Kudus nyebut pasal pemeri nya ba ayat ti tebilang tu: ‘Petara balat rinduka dunya, nya alai Iya meri Anak Tunggal Iya, ngambika genap iku orang ke arapka iya enda mati tang bulih pengidup ti meruan belama iya.’​​—John 3:​16.

Pemeri tu ulih ngenataika pengidup ti meruan belama iya ngagai orang ke nerima iya! Kati bisi pemeri bukai ke berega agi ari pemeri nya? Sekeda orang engka enda nemu pemeri nya berega, tang orang Kristian ke bendar ngumbai iya “berega.” (Masmur 49:8; 1 Peter 1:​18, 19) Tang nama kebuah Petara meri pengidup Anak Iya nyadika pemeri ke mensia?

Rasul Paul nerangka kebuah iya: “Baka dosa ti datai ngagai dunya nengah orang siku, lalu pemati datai laban dosa, nya alai pemati ngelekai ngagai semua mensia.” (Rome 5:​12) Adam, mensia ti  keterubah, sengaja enda ngasika Petara, lalu ketegal nya iya mati. Nengah Adam, pemati ngelekai ngagai semua peturun iya​​—semua mensia ba dunya.

‘Upah dosa nya pemati, tang pemeri ti diberi Petara pechuma nya pengidup ti meruan belama iya dalam Jesus Kristus Tuan kitai.’ (Rome 6:​23) Kena ngelepaska mensia ari pemati, Petara ngirumka Anak Iya, Jesus Kristus, ke dunya ngambika meri nyawa iya ti sempurna ke mensia. Nengah “tebus,” semua orang ke arapka Jesus tau bulih pengidup ti meruan belama iya.​​—Rome 3:​24.

Bekaul enggau semua berekat ke diberi Jehovah ngagai bala penyembah nengah Jesus Kristus, ku Paul madahka: ‘Beri terima kasih ngagai Petara ketegal pemeri Iya ti enda ulih ditelah!’ (2 Korint 9:​15) Tebus nya amat badas nyentukka kitai enda ulih nelah iya. Tang ari semua pemeri ti diberi Petara enggau gerah jari ngagai mensia, nama kebuah tebus nya berega amat? Baka ni iya enda sebaka enggau pemeri Petara ke bukai? * Lalu baka ni kitai patut beterima kasih ke pemeri nya? Kami mai nuan macha saut ngagai tanya nya ba dua iti artikel pengudah tu.