1. Nama patut digaga orang sebedau berengkah nirika rumah?

UJI gambarka, seiku orang mutus deka nirika rumah. Iya nemu bansa rumah ti deka didirika iya. Kati iya tekala nya ngagai kedai, meli sekeda perengka lalu berengkah nirika rumah? Enda. Sebedau berengkah, bisi utai ke patut digaga iya dulu. Iya patut ngira ungkus kena nirika rumah iya. Nama kebuah? Laban iya patut nemu sekalika duit iya chukup tauka enda kena nembuka rumah nya. Enti iya ngira ungkus nya dulu, iya engka ulih nembuka rumah iya.

2. Nitihka Luke 14:28-30, nama patut diperundingka nuan enggau dalam sebedau mutuska deka dibaptisa?

² Kati pengerindu ke Jehovah enggau asai beterima kasih ke utai ti udah digaga Iya ke nuan meransang nuan berunding pasal deka dibaptisa? Enti pia, nuan baka seiku orang ke deka nirika rumah. Nama kebuah kitai ulih ngumbai munyi nya? Peratika jaku Jesus ba Luke 14:28-30. (Bacha.) Ba ayat nya, Jesus madahka reti nyadi murid iya. Enti deka nyadi murid iya, kitai enda tau enda sanggup natka sekeda penanggul lalu ngelengkaka sekeda utai. (Luk. 9:23-26; 12:51-53) Nya alai, sebedau dibaptisa, nuan patut berunding enggau dalam pasal utai ti deka ditapi nuan enti nyadi murid iya. Enggau nya, nuan deka besedia terus nyembah Petara enggau tetap ati pengudah dibaptisa.

3. Nama deka dikerandauka kitai ba artikel tu?

³ Kati nyadi nembiak Kristus ti udah dibaptisa ngasuh nuan rugi ketegal nuan napi penanggul sereta udah ngelengkaka sekeda utai? Enda. Baptisa muka peluang bulih mayuh berekat diatu enggau dudi hari ila. Aram kitai berandauka sekeda tanya ti beguna bendar bekaul enggau baptisa. Enggau nya,  nuan deka nemu saut ke tanya tu, “Kati aku udah sedia deka dibaptisa?”

4. (a) Nama reti nyerahka diri ngagai Jehovah? (b) Baka ke dipadah ba Matthew 16:24, nama reti “badu agi berundingka diri empu”?

⁴ Nama reti nyerahka diri ngagai Jehovah? Sebedau dibaptisa, nuan enda tau enda nyerahka diri ngagai Jehovah. Lebuh ngereja nya, nuan besampi ngagai Iya ari ati lalu madahka deka ngena pengidup diri nyembah Iya belama. Reti nya, nuan “badu agi berundingka diri empu” pengudah nyerahka diri ngagai Jehovah. (Bacha Matthew 16:24 ari nota kaki.) * Diatu nuan enggi Jehovah. Nya endang peluang ti besai. (Rom. 14:8) Pengawa nyerahka diri ngagai Jehovah nya siti semaya ke digaga nuan enggau Iya. Jehovah enda mejal kitai ngereja nya. Tang pengudah kitai ngaga semaya nya, Iya ngarapka kitai ngamatka semaya diri.—Mas. 116:12, 14.

5. Nama kaul entara pengawa nyerahka diri ngagai Jehovah enggau baptisa?

⁵ Nama kaul entara pengawa nyerahka diri ngagai Jehovah enggau baptisa? Pengawa nyerahka diri ngagai Jehovah enda ibuh dipadah ngagai orang. Pengawa nya entara nuan enggau Jehovah. Baptisa nya pengawa ke digaga nuan ba mua orang mayuh. Kesuah agi iya digaga ba gempuru besai tauka konvensyen. Lebuh dibaptisa, nuan nunjukka ngagai sida nuan udah nyerahka diri ngagai Jehovah. * Enggau chara nya nuan nunjukka ngagai sida, nuan rinduka Jehovah enggau pengabis ati, runding sereta pengering lalu nuan keran deka nyembah Iya belama.—Mrk. 12:30.

6-7. Nitihka 1 Peter 3:18-22, nama dua iti kebuah kitai patut dibaptisa?

⁶ Kati kitai patut dibaptisa? Peratika ayat ke bisi ba 1 Peter 3:18-22. (Bacha.) Bandung nunjukka ngagai orang, Noah bisi pengarap ngagai Petara. Pia mega, baptisa nuan nunjukka ngagai orang nuan udah nyerahka diri ngagai Jehovah. Kati kitai patut dibaptisa? Au. Peter bisi madahka kebuah nya. Keterubah, baptisa nya nyelamatka kitai. Baptisa ulih nyelamatka kitai enti kitai nunjukka diri arapka Jesus sereta pechaya iya nyerahka nyawa diri ke kitai, pechaya iya udah diangkatka idup baru sereta niki ke serega, lalu diatu iya ‘duduk muak ari kanan Petara.’

⁷ Kedua, enti dibaptisa kitai deka bulih “ati ti beresi.” Pengudah nyerahka diri ngagai Petara lalu dibaptisa, kitai deka ngembuan kaul ti badas enggau Iya. Ketegal kitai nesal ati ke dosa diri sereta arapka genselan tebus Jesus, Petara ngampun dosa kitai. Nya alai, kitai ulih ngembuan ati ti beresi ba mua Petara.

8. Nama ke patut meransang nuan deka dibaptisa?

⁸ Nama ke patut meransang nuan deka dibaptisa? Ketegal bebendar belajarka Bup Kudus, nuan udah nemu mayuh utai pasal Jehovah, sapa Iya ke bendar sereta chara Iya ngereja utai. Utai ke dipelajar nuan tentu udah negu ati nuan lalu meransang nuan rindu agi ke Iya. Pengerindu ngagai Jehovah ke patut meransang nuan deka dibaptisa.

9. Baka ke dipadah ba Matthew 28:19, 20, nama reti dibaptisa dalam nama Apai, Anak enggau roh kudus?

⁹ Kebuah bukai ke meransang nuan deka dibaptisa nya nuan udah nemu utai ke diajar Bup Kudus lalu diatu nuan arapka ajar nya. Peratika utai ke dipadah Jesus lebuh iya meri pesan pasal ngaga orang nyadi murid iya. (Bacha Matthew 28:19, 20.) Nitih ku  Jesus, orang ke dibaptisa enda tau enda dibaptisa ‘dalam nama Apai, Anak enggau roh kudus.’ Nama reti ku iya nya? Nuan enda tau enda enggau pengabis ati arapka pemendar pasal Jehovah; Anak Iya, Jesus; sereta roh kudus. Semua pemendar nya amat ulih negu ati nuan. (Heb. 4:12) Aram kitai berandauka sekeda pemendar nya.

10-11. Nama pemendar pasal Apai kitai, Jehovah, ke udah dipelajar sereta diterima nuan?

¹⁰ Pikirka pemendar ke udah dipelajarka nuan pasal Apai: Nama Iya Jehovah. Iya “ti Pemadu Tinggi ke serata dunya,” sereta Petara ti bendar. (Mas. 83:18 *; Isa. 37:16) Iya ke nempa kitai lalu pengelepas endang enggi Iya. (Mas. 3:8; 36:9) Iya udah ngaga atur kena ngelepaska kitai ari dosa enggau pemati, lalu udah meri kitai pengadang idup meruan belama iya. (Jhn. 17:3) Pengawa nyerahka diri ngagai Jehovah lalu dibaptisa deka nunjukka nuan nya seiku ari Saksi-Saksi Jehovah. (Isa. 43:10-12) Nuan deka nyadi sebagi ari ruang bilik bala menyadi Kristian di serata dunya ti temegah ati dikangau ngena nama Petara, lalu madahka nama Iya ngagai orang.—Mas. 86:12.

¹¹ Endang basa ti besai ulih nemu utai ke diajar Bup Kudus pasal Apai kitai, Jehovah! Lebuh nuan arapka pemendar ti berega nya, nuan tentu diperansang deka nyerahka diri ngagai Iya lalu dibaptisa.

12-13. Nama pemendar pasal Anak ke udah dipelajar sereta diterima nuan?

¹² Nama asai nuan pengudah belajarka pemendar pasal Anak? Jesus nya ti kedua bekuasa ba dunya raya. Iya sanggup nyerahka nyawa diri nyadika tebus ke kitai. Lebuh kitai ngayanka pengarap ba Jesus nengah ulah kitai, dosa kitai ulih diampun. Kitai mega ulih nyadi pangan Jehovah sereta bulih pengidup ti meruan belama iya. (Jhn. 3:16) Jesus nya Imam Besai kitai. Iya deka nulung kitai bulih penguntung ari tebus iya lalu ngembuan kaul ti rapat enggau Jehovah. (Heb. 4:15; 7:24, 25) Ketegal Jesus nyadi Raja ba Perintah Petara, Jehovah deka ngena Jesus ngemuliaka nama Iya, muai penyai lalu mai Paradais endur kitai ulih idup belama. (Mat. 6:9, 10; Pem. 11:15) Jesus nya teladan ke patut dititihka kitai. (1 Pet. 2:21) Iya ngena pengidup diri ngereja peneka Petara.—Jhn. 4:34.

¹³ Pengudah nuan nerima utai ke diajar Bup Kudus pasal Jesus, nuan ngemansangka pengerindu ngagai Jesus. Pengerindu nya meransang nuan ngena pengidup diri ngereja peneka Petara baka ke digaga Jesus. Ketegal nya nuan berasai diperansang deka nyerahka diri ngagai Jehovah lalu dibaptisa.

14-15. Nama pemendar pasal roh kudus ke udah dipelajar sereta diterima nuan?

¹⁴ Nama runding nuan pengudah belajarka pemendar pasal roh kudus? Roh kudus ukai orang, tang kuasa Petara Jehovah. Iya ngena roh kudus ngiring orang nulis Bup Kudus, lalu roh kudus nulung kitai meretika sereta nitihka utai ke dibacha ba Bup Kudus. (Jhn. 14:26; 2 Pet. 1:21) Nengah roh kudus, Jehovah meri kitai “kuasa ti besai.” (2 Kor. 4:7) Roh kudus meri kitai pengering kena nusui berita manah ari Bup Kudus, ngelaban pengingin ti salah, mutarka asai ati ti asa sereta tan natka penanggul. Roh kudus nulung kitai ngayanka kualiti ke bisi ba ‘buah roh kudus.’ (Gal. 5:22) Petara enggau gerah jari meri roh kudus Iya ngagai orang ke arapka Iya sereta ke minta roh kudus ari Iya.—Luk. 11:13.

¹⁵ Kitai gaga ati lebuh nemu diri ulih bepanggai ba roh kudus Petara kena nulung kitai nyembah Iya. Lebuh nuan nerima  pemendar ke udah dipelajarka nuan pasal roh kudus, nuan tentu diperansang deka nyerahka diri empu ngagai Petara lalu dibaptisa.

16. Naka ke diatu, nama udah dipelajarka kitai?

¹⁶ Pemutus nuan ke deka nyerahka diri ngagai Petara lalu dibaptisa nya pemutus ti berat. Baka ke udah dipelajar, nuan enda tau enda sanggup natka sekeda penanggul lalu ngelengkaka sekeda utai. Tang berekat ke deka diulih nuan besai agi ari utai ke udah dilengkaka nuan. Baptisa ulih nyelamatka nuan sereta bulih ati ti beresi di mua Petara. Kebuah nuan deka dibaptisa nya ketegal pengerindu nuan ke Jehovah. Nuan mega patut enggau pengabis ati pechayaka pemendar pasal Apai, Anak enggau roh kudus. Pengudah berandauka semua nya, baka ni nuan deka nyaut tanya, “Kati aku udah sedia deka dibaptisa?”

17. Nama sekeda utai ke patut digaga nuan sebedau dibaptisa?

¹⁷ Enti nuan ngasaika diri udah sedia deka dibaptisa, nuan tentu udah ngereja sekeda utai kena ngemansangka kaul ti badas enggau Jehovah. * Ketegal belajarka Bup Kudus enggau tetap, nuan udah nemu mayuh pasal Jehovah enggau Jesus. Nuan udah ngemansangka pengarap. (Heb. 11:6) Nuan arap bendar ke semaya Jehovah ti bisi dipadah dalam Bup Kudus. Nuan mega arapka genselan tebus Jesus ulih ngelepaska nuan ari dosa enggau pemati. Nuan udah nesal ati ke dosa diri, reti nya nuan berasai balat besalah ke penyalah ti udah digaga nuan lalu minta Jehovah ngampunka nuan. Nuan udah ngubah chara pengidup nuan, reti nya nuan bebendar nulak chara pengidup ti enda manah lalu berengkah idup enggau chara ti ngelantangka ati Petara. (SKR. 3:19) Nuan keran deka madahka utai ke dipechaya nuan ngagai orang. Nuan udah layak nyadi penginjil ti bedau dibaptisa lalu berengkah nginjil enggau bala menyadi Kristian. (Mat. 24:14) Jehovah temegahka nuan ketegal nuan udah ngereja sekeda utai tu. Nuan tentu udah ngagaka ati Iya.—J-lam. 27:11.

18. Nama utai bukai ke patut digaga sebedau nuan ulih dibaptisa?

¹⁸ Sebedau dibaptisa, bisi sekeda utai bukai ke patut digaga nuan. Baka ke udah dipelajar, nuan enda tau enda nyerahka diri ngagai Petara nengah sampi ari ati, lalu besemaya deka ngena pengidup diri ngereja peneka Iya. (1 Pet. 4:2) Udah nya, padah ngagai tuai ti ngatur raban tuai gempuru pasal nuan ti deka dibaptisa. Iya deka ngasuh beberapa iku tuai gempuru betemu enggau nuan. Anang irau lebuh betemu enggau sida. Kingatka meh, sida udah ngelala sereta rinduka nuan. Sida deka ngelansa batang ajar ba Bup Kudus ke udah dipelajarka nuan. Sida deka nentuka nuan meretika ajar Bup Kudus nya lalu nuan empu nemu pengawa nyerahka diri ngagai Jehovah  enggau baptisa nya beguna bendar. Enti sida beratika nuan udah sedia deka dibaptisa, sida deka madahka nuan ulih dibaptisa ba gempuru besai tauka konvensyen ti deka datai.

19-20. Nama patut digaga nuan pengudah dibaptisa? Lalu baka ni nuan ulih ngereja nya?

¹⁹ Pengudah dibaptisa, nama patut digaga nuan? * Kingatka meh, pengawa nyerahka diri ngagai Jehovah nya siti semaya lalu Iya ngarapka nuan ngamatka semaya nya. Nya alai pengudah dibaptisa, nuan patut idup sejalai enggau semaya ti udah digaga nuan. Baka ni nuan ulih ngereja nya?

²⁰ Mengkang semak enggau bala menyadi Kristian nuan. Pengudah nyadi orang Kristian ti dibaptisa, nuan diatu nyadi sebagi ari bala menyadi ‘ke saum pengarap enggau nuan.’ (1 Pet. 1:22) Bala menyadi Kristian ba eklisia nya baka ruang bilik nuan empu. Lebuh nuan datai begempuru enggau tetap, nya ulih negapka kaul nuan enggau sida. Bacha meh Bup Kudus lalu belematika iya ninting hari. (Jos. 1:8) Pengudah macha sekeda ayat ari Bup Kudus, giga awak kena berunding pasal utai ke udah dibacha nuan. Enggau nya, utai ke dibacha ulih negu ati nuan. “Seruran besampi.” (1 Tes. 5:17) Sampi ari ati deka mai nuan semak agi ngagai Jehovah. Anang ngetu ngiga dulu Perintah Petara. (Mat. 6:33) Nuan ulih ngereja nya enggau chara ngenuluka pengawa nginjil ba pengidup nuan. Lebuh nuan seruran enggau pengawa nginjil, pengarap nuan deka mengkang tegap lalu nuan ulih nulung orang bulih peluang idup belama iya.—1 Tim. 4:16.

21. Nama berekat ke deka diulih enti nuan dibaptisa?

²¹ Pengawa nyerahka diri ngagai Jehovah lalu dibaptisa nya pemutus ti berat ke digaga nuan. Endang amat, ketegal deka dibaptisa kitai engka patut natka sekeda penanggul lalu ngelengkaka sekeda utai. Kati nya ngasuh kitai rugi? Tentu enda! Sebarang penusah ke engka ditapi nuan kemayaharitu nya “mit sereta enda lama.” (2 Kor. 4:17) Tang, baptisa nuan nya deka muka jalai ngagai pengidup ti badas agi diatu sereta bulih “pengidup ti bendar” jemah ila. (1 Tim. 6:19) Nya alai, perundingka enggau bejimat lalu besampi pasal saut nuan ngagai tanya tu, “Kati aku udah sedia deka dibaptisa?”