1. Nama ditemu kitai ari utai ke dipadah ba Pengajar 3:1, 7?

SEKEDA ari kitai rindu bejaku. Sekeda nya enda bemunyi. Baka ke dipadah ba ayat tema artikel tu, bisi maya kitai bejaku enggau maya kitai enda patut bejaku. (Bacha Pengajar 3:1 *, 7 * ari nota kaki.) Tang, kitai engka deka sekeda bala menyadi suah agi bejaku, lalu deka sekeda nya kurang agi bejaku.

2. Sapa ke ulih nentuka standard bekaul enggau maya sereta chara kitai patut bejaku?

² Jehovah meri kitai siti pemeri, iya nya penau ulih bejaku. (P-sut. 4:10, 11; Pem. 4:11) Dalam Bup Kudus, Jehovah nulung kitai chara ngena pemeri nya enggau manah. Ba artikel tu, kitai deka berandauka teladan nembiak Jehovah ba Bup Kudus ke ulih nulung kitai nemu maya patut bejaku enggau maya enda patut bejaku. Kitai mega deka nemu nama runding Jehovah bekaul enggau utai ke disebut kitai ngagai orang. Terubah-rubah, aram kitai berandau pasal maya kitai patut bejaku.

3. Sejalai enggau Rome 10:14, ni maya kitai patut sedia bejaku pasal Jehovah enggau Perintah Iya?

³ Kitai patut seruran sedia bejaku pasal Jehovah enggau Perintah Iya, enda ngira maya. (Mat. 24:14; bacha Rome 10:14.) Lebuh kitai ngereja nya, kitai neladan Jesus. Siti ari kebuah Jesus datai ke dunya iya nya, deka madahka pemendar pasal Apai iya ngagai orang. (Jhn. 18:37) Tang anang enda ingat, chara kitai bejaku mega beguna. Nya alai, lebuh bejaku pasal Jehovah, kitai enda tau enda ngereja nya enggau “ati ti nelap” sereta bebasa. Kitai mega patut nunjukka diri ibuhka asai ati  orang sereta utai ke dipechaya sida. (1 Pet. 3:15, 16) Enggau nya, kitai ukai semina bejaku enggau orang tang kitai mega ngajar sida, lalu nya engka ulih negu ati sida.

4. Nitihka Jaku Dalam 9:9, baka ni chara tuai gempuru bejaku ulih nulung orang?

⁴ Tuai gempuru enda patut kakang ati deka meri jaku lalau enti nemu menyadi Kristian begunaka nya. Endang amat, sida patut milih maya ti ngena alai bejaku ngambika sida enda ngemaluka menyadi nya. Sida deka bejaku kediri enggau iya. Tuai gempuru enggau naka ulih bejimat bejaku ngambika menyadi nya berasai dipebasa. Ba maya ti sama, sida mega enda nagang diri ari bekunsika prinsip Bup Kudus ke ulih nulung iya ngaga ubah. (Bacha Jaku Dalam 9:9.) Nama kebuah kitai patut berani lebuh bejaku? Perundingka dua iti chunto tu. Kesatu, seiku lelaki patut ngerara anak lelaki iya. Kedua, seiku indu patut betemu enggau seiku lelaki ke deka nyadi raja dudi hari lalu madahka pemutus ke digaga lelaki nya salah.

5. Ni maya Imam Besai Eli patut bejaku?

⁵ Imam Besai Eli bisi dua iku anak lelaki ti amat dikesayauka iya. Taja pia, seduai iya enda bebasaka Jehovah. Seduai iya megai tanggung pengawa ti besai nyadi imam ti gawa ba Langkau Sembiang. Tang seduai iya salah nguna kuasa, enda bebasaka pemeri ngagai Jehovah sereta ngereja ulah seks ti kamah. (1 Sam. 2:12-17, 22) Nitihka Adat Moses, seduai iya patut mati. Tang Eli enda bebendar ngerara lalu ngelakka seduai iya terus gawa ba Langkau Sembiang. (U-dat. 21:18-21) Nama runding Jehovah pasal chara Eli mutarka pekara tu? Ku Jehovah madah ngagai Eli: “Nama kebuah nuan, Eli, lebih agi bebasaka anak lelaki nuan ari nuan ke bebasaka Aku?” Ketegal nya, Jehovah ngukum mati seduai iya.—1 Sam. 2:29, 34.

6. Nama dipelajar kitai ari Eli?

⁶ Kitai belajar siti utai ti beguna ari Eli. Enti kitai nemu bakih tauka kaban belayan kitai udah ngelanggar adat Petara, kitai enda tau enda bejaku lalu ngingatka iya pasal standard Jehovah. Udah nya kitai patut nentuka iya bulih bantu ari tuai gempuru. (Jas. 5:14) Kitai enggai sekali-kali baka Eli ke bebasaka bakih tauka kaban belayan lebih agi ari Jehovah. Endang begunaka pemerani deka bejaku enggau orang ke patut dirara. Enti kitai ngereja  nya, nya ulih mai asil ti manah. Peratika bida entara chunto Eli enggau seiku indu orang Israel ke benama Abigail.

7. Nama kebuah Abigail bejaku enggau David?

⁷ Abigail nya bini Nabal. Nabal nya orang ti kaya ke bisi tanah. Lebuh David enggau bala ke nitihka iya rari ari raja Saul, sida begulai enggau pengibun bedus Nabal sereta nyaga bedus enggau kambin Nabal ari bala penchuri. Kati Nabal beterima kasihka tulung ari sida? Enda. Lebuh David minta Nabal meri iya enggau bala iya mimit pemakai enggau ai, Nabal ringat lalu ngeleseka sida. (1 Sam. 25:5-8, 10-12, 14) Ketegal nya, David deka munuh semua lelaki ke bisi ba ruang bilik Nabal. (1 Sam. 25:13, 22) Baka ni utai ke enda manah nya ulih diseliahka? Abigail nemu nya maya ti ngena alai bejaku. Nya alai, iya meranika diri betemu enggau 400 iku bala David ke lapar, ringat sereta bebaika senyata. Iya mega meranika diri bejaku enggau David.

8. Nama dipelajar kitai ari Abigail?

⁸ Lebuh Abigail betemu enggau David, iya bejaku enggau berani sereta bebasa. Nya ngasuh David deka ngereja utai ke dipadah iya. Taja pan ukai Abigail ke ngereja penyalah, tang iya minta ampun ngagai David. Iya nyebut pasal pemanah ke bisi ba David lalu bepanggai ba tulung ari Jehovah. (1 Sam. 25:24, 26, 28, 33, 34) Baka Abigail, kitai patut berani bejaku enti kitai beratika bisi menyadi Kristian ke ngereja utai ti tau ngujungka iya ngereja penyalah ti besai. (Mas. 141:5) Kitai patut bebasa lebuh bejaku enggau sida. Ba maya ti sama, kitai mega patut beterus-terang enggau sida. Enti kitai meri jaku lalau ngagai sida, kitai nunjukka diri bakih ti bendar.—Heb. 10:24.

9-10. Nama patut dikingatka tuai gempuru lebuh meri jaku lalau ngagai menyadi Kristian?

⁹ Kelebih agi sida ke tuai gempuru. Sida patut berani bejaku enggau menyadi Kristian ke  bisi ngereja penyalah. (Gal. 6:1) Tuai gempuru nemu diri enda sempurna lalu sida mega engka begunaka jaku lalau dudi hari. Tang sida enda ngelakka tu nagang sida ari meri disiplin ngagai menyadi Kristian. (2 Tim. 4:2; Tit. 1:9) Lebuh meri jaku lalau, tuai gempuru nguji ngena penau ulih bejaku ke dikembuan sida kena ngajar menyadi nya. Sida patut ngereja nya enggau sabar sereta nemu chara meri jaku lalau. Sida sayauka menyadi nya lalu pengerindu meransang sida deka nulung iya. (J-lam. 13:24) Tang utai ke dikemeratka sida iya nya ngemuliaka Jehovah. Sida ngereja nya enggau nyukung standard Iya sereta ngelindung eklisia ari utai ke tau ngemediska bala menyadi Kristian.—SKR. 20:28.

¹⁰ Naka ke diatu, kitai udah berandau pasal maya kitai patut bejaku. Taja pia, bisi maya nya endang manah agi enti kitai enda ibuh nyebut nama-nama utai. Tang, nama pekara ke ngasuh kitai tusah deka nagang diri ari enda bejaku?

11. Nama sempama ke dikena James, lalu nama kebuah nya bisi kaul enggau jaku kitai?

¹¹ Kadang-kadang kitai tusah deka nagang diri ari bejaku. Penulis Bup Kudus ke benama James ngena siti sempama ngambarka nya. Ku iya madah: “Orang ke nadai kala nyebut utai ti salah lebuh iya bejaku, iya nya orang ke pemadu badas, ke ulih nagang semua tubuh diri.” (Jas. 3:2, 3) Repik besi diengkah ba pala sereta ba nyawa kuda. Enggau narit tali ke disambung ngagai repik besi nya, orang ke nepan kuda ulih ngasuh kuda ngasika iya tauka ngasuh kuda ngetu bejalai tauka belanda. Enti iya enda megai tali nya rat, kuda nya deka belanda sengapa lalu ngujungka kuda nya enggau iya bulih pemedis. Pia mega, enti kitai enda ulih nagang diri ari bejaku, nya ulih mai  mayuh penusah. Aram kitai beratika ni maya kitai patut nagang diri ari bejaku.

12. Ni maya kitai patut nagang diri ari bejaku?

¹² Nama deka digaga nuan enti sema bisi menyadi Kristian ngembuan penerang ke enda patut dipadah ngagai orang? Ambika chunto, enti sema nuan betemu enggau menyadi Kristian ke diau ba menua alai pengawa sida ditagang, kati nuan keran deka ngasuh iya madahka baka ni pengawa sida dipejalaika? Endang amat, nuan nanya ukai ketegal nuan deka ngemediska sida. Kitai sayauka sida lalu ibuhka utai ke nyadi ba sida. Kitai mega deka besampi enggau nyemetak pasal sida. Taja pia, nya meh maya kitai patut nagang diri ari bejaku. Enti kitai ngansak menyadi Kristian madahka utai ke enda patut dipadah iya, kitai enda ngayanka pengerindu ngagai iya tauka ngagai bala menyadi ke arapka iya enda madahka pasal pengawa sida. Kitai tentu enggai nambahka penusah sida. Pia mega, enti kitai gawa ke Jehovah ba menua nya, kitai tentu enggai madahka pekara bekaul enggau chara bala Saksi bejalaika pengawa nginjil tauka utai bukai ti bekaul enggau sembah ngagai Jehovah.

13. Nitihka Jaku Dalam 11:13, nama patut digaga tuai gempuru, lalu nama kebuah?

¹³ Kelebih agi tuai gempuru. Sida enda tau enda nitihka prinsip ba Jaku Dalam 11:13, ke ngasuh sida “nyimpan resia.” (Bacha.) Tu ulih nyadi penanggul kelebih agi enti tuai gempuru udah bisi bini. Laki bini negapka kaul lebuh sida suah berandau enggau pangan diri sereta madahka utai ke bisi ba runding, asai ati sereta pengirau. Taja pia, tuai gempuru nemu iya enda tau madah pasal “resia” ke bisi kaul enggau menyadi Kristian ba eklisia ngagai bini iya. Enti iya madah, nya ulih ngasuh orang enda arapka iya lalu iya ngenyaika nama diri. Tuai gempuru ke dikearap nyimpan resia bekaul enggau bala menyadi Kristian patut lurus. (1 Tim. 3:8) Reti nya iya enda nipu tauka bejakuka orang. Enti iya amat sayauka bini, iya enda madahka pekara ke patut dipelalai laban nya ulih ngenusahka bini iya.

14. Baka ni bini ulih nulung laki iya ke nyadi tuai gempuru ngetanka nama ti manah?

¹⁴ Bini ulih nulung laki iya ngetanka nama ti manah enti iya enda ngansak laki iya madahka pekara ti patut dipelalai. Lebuh bini ngereja nya, iya ukai semina nyukung laki iya tang mega nunjukka basa ngagai orang ke ngasuh laki iya nyimpan resia. Lalu keberat agi, iya ngagaka ati Jehovah laban iya ngetanka pemaik sereta penyerakup dalam eklisia.—Rom. 14:19.

15. Nama runding Jehovah pasal tiga iku bakih Jop, lalu nama kebuah?

¹⁵ Kitai ulih belajar mayuh ari bup Jop dalam Bup Kudus pasal baka ni sereta ni maya bejaku. Pengudah Jop merinsa ketegal beberapa iti penusah ti ngenyit, empat iku lelaki datai ngelantangka ati iya sereta meri jaku lalau. Sida lama amat enda bemunyi. Tang udah nya ari utai ke disebut tiga iku ari sida, iya nya Elipas, Bildad enggau Sopar, sida nunjukka diri enda berundingka chara sida ulih nulung Jop. Sida berundingka chara baka ni deka nunjukka Jop amat udah ngereja penyalah. Sida nyebut mayuh utai, tang utai ke disebut sida pasal Jop enggau Jehovah enda betul tauka nadai ngayanka penyiru. Sida nuduh Jop orang ke jai. (Jop 32:1-3) Nama asai ati Jehovah? Iya balat ringat ngagai sida tiga. Iya ngumbai sida beli lalu ngasuh sida minta Jop besampika sida.—Jop 42:7-9.

16. Nama pekara ke ulih dipelajar kitai ari Elipas, Bildad enggau Sopar?

 ¹⁶ Bisi beberapa iti pekara ke ulih dipelajar kitai ari Elipas, Bildad enggau Sopar. Kesatu, kitai enda patut ngakim bala menyadi Kristian kitai. (Mat. 7:1-5) Kitai patut ningaka sida enggau bejimat sebedau kitai bejaku. Enggau nya, kitai ulih meretika utai ke nyadi ba sida. (1 Pet. 3:8) Kedua, lebuh kitai bejaku, kitai enda tau enda nentuka jaku kitai nya siru sereta enda bula. (Eps. 4:25) Lalu ketiga, Jehovah meratika utai ke disebut kitai ngagai bala menyadi Kristian.

17. Nama ulih dipelajar kitai ari Elihu?

¹⁷ Seiku agi orang ke enggau sida tiga ngelawa Jop nya Elihu. Iya kaban belayan Abraham. Iya bejimat mendingka randau Jop enggau sida tiga nya. Ketegal nya, iya ulih meri jaku lalau ti ulih ngemetulka runding Jop. (Jop 33:1, 6, 17) Utai ke pemadu dikemeratka Elihu nya ngemuliaka Jehovah, ukai ngemuliaka diri empu tauka orang bukai. (Jop 32:21, 22; 37:23, 24) Ari teladan Elihu kitai belajar, bisi maya nya kitai mending dulu sebedau bejaku. (Jas. 1:19) Kitai mega belajar, lebuh meri jaku lalau, utai ke pemadu dikemeratka kitai iya nya deka ngemuliaka Jehovah, ukai ngemuliaka diri empu.

18. Baka ni kitai ulih ngayanka terima kasih ngagai Jehovah ke meri kitai penau ulih bejaku?

¹⁸ Kitai ulih ngayanka terima kasih ngagai Jehovah ke meri kitai penau ulih bejaku lebuh nitihka jaku ajar ari Bup Kudus pasal maya sereta chara kitai patut bejaku. Raja Solomon bisi nulis: “Penemu ti terang disebut sebaka enggau emas ti disangkumka enggau pirak.” (J-lam. 25:11) Lebuh kitai mending enggau bejimat utai ke disebut orang lalu kitai berunding dulu sebedau bejaku, jaku kitai ulih disemaka baka emas ti disangkumka enggau pirak. Dua iti utai tu berega sereta manah dipeda. Sekalika utai ke disebut kitai mayuh tauka mimit, jaku kitai ulih meransang pangan diri lalu kitai deka Jehovah temegahka kitai. (J-lam. 23:15; Eps. 4:29) Tu meh chara ti pemadu manah kena ngayanka terima kasih ngagai Jehovah ketegal pemeri Iya ngagai kitai!