1. Nama ditemu kitai pasal bala menyadi Kristian lelaki ke biak?

BALA menyadi lelaki ke biak, kita bisi mayuh pengawa ke ulih dikereja ba eklisia. Mayuh ari kita bisi pengering. (J-lam. 20:29) Kita amat berega ba eklisia. Engka nuan bisi juluk ati deka nyadi penulung gempuru. Taja pia, nuan engka ngasaika bisi orang ngumbai nuan kelalu biak tauka bedau besedia nerima pengawa ti beguna. Taja pan nuan agi biak, nuan ulih ngereja sekeda utai ngambika bala menyadi ba eklisia ulih arapka sereta bebasaka nuan.

2. Nama deka dikerandauka kitai ba artikel tu?

² Ba artikel tu, kitai deka berandauka pasal pengidup Raja David. Kitai mega deka ngelansa sekeda utai ke nyadi ba pengidup Asa enggau Jehosapat—dua iku raja ari Judah. Kitai mega deka bejuraika penanggul ke ditapi tiga iku lelaki tu, chara sida mutarka nya, lalu nama utai ke ulih dipelajar bala menyadi lelaki ke biak ari teladan sida.

3. Baka ni menyadi ke biak ulih nulung menyadi ke tuai ba eklisia?

³ Lebuh David agi biak, iya bisi kaul ti rapat enggau Jehovah. Iya belajar enggau ngemansangka pengelandik ti ulih mai penguntung ngagai orang bukai. Ambika chunto, iya landik ba musik, lalu ngena pengelandik nya nulung Saul, raja ke dipilih Petara. (1 Sam. 16:16, 23) Bala menyadi lelaki  ke biak, kati kita bisi pengelandik ke ulih mai penguntung ngagai bala menyadi Kristian? Nuan tentu bisi! Ambika chunto, nuan engka nemu sekeda menyadi ke tuai ke beterima kasih lebuh menyadi lelaki ke biak nulung sida ngena perengka elektronik ngambika sida ulih belajarka Bup Kudus kediri empu sereta begempuru. Penemu nuan pasal perengka elektronik ulih mai penguntung ngagai menyadi Kristian ke tuai.

4. Baka David, nama kualiti ke patut dikemansangka bala menyadi lelaki ke biak? (Peda gambar ba mua majalah.)

⁴ Ba pengidup iya besehari-hari, David nunjukka iya orang ti ulih megai tanggung pengawa sereta tau dikearapka. Ambika chunto, lebuh iya agi biak, iya enggau ransing nyaga bedus apai iya, taja pan pengawa tu tau nganu nyawa. David nerangka ngagai Raja Saul: “Tuan Raja, aku endang selalu ngibun bedus apai aku. Genap kali jelu singa tauka beruang nabanka anak domba, aku nitihka iya, lalu munuh iya, lalu ngelepaska anak domba nya.” (1 Sam. 17:34, 35) David nemu iya patut nyaga bedus apai iya. Nya alai, iya berani ngelaban jelu siga nya. Menyadi lelaki ke biak mega ulih nunda David lebuh sida enggau ransing ngereja semua pengawa ke diberi ngagai sida.

5. Nitihka Masmur 25:14, nama utai ti pemadu beguna ke ulih digaga bala menyadi lelaki ke biak?

⁵ Taja pan David biak, iya ngembuan kaul ti rapat enggau Jehovah. Kaul nya beguna agi ari pemerani tauka pengelandik David bemain belikan. Jehovah nya Petara David sereta Pangan rapat iya. (Bacha Masmur 25:14.) Bala menyadi lelaki ke biak, utai ti pemadu beguna ke ulih digaga nuan diatu iya nya negapka kaul nuan enggau Jehovah. Lalu tu ulih nulung nuan nerima pengawa ba eklisia.

6. Nama runding ti enda manah ke dikembuan sekeda orang pasal David?

⁶ Siti penanggul ke ditapi David iya nya sekeda orang ngumbai iya agi biak tauka enda ulih dikearapka. Ambika chunto, lebuh David deka ngelaban Goliat, Raja Saul nguji nagang iya lalu madah: “Nuan agi biak.” (1 Sam. 17:31-33) Sebedau nya, menyadi David ke tuai nuduh iya enda ulih dikearapka. (1 Sam. 17:26-30) Taja pia, Jehovah enda ngumbai David kelalu biak tauka enda  ulih dikearapka. Iya ngelala David enggau manah. Lalu ketegal iya bepanggai ba Pangan iya Jehovah, David ulih munuh Goliat.—1 Sam. 17:45, 48-51.

7. Nama ulih dipelajarka nuan ari utai ke nyadi ba David?

⁷ Nama ulih dipelajarka nuan ari utai ke nyadi ba David? Kitai belajar kitai patut sabar. Orang ke ngelala nuan ari mit engka tusah deka ngumbai nuan udah besai. Taja pia, nuan ulih andal Jehovah ukai semina meda gamal nuan. Iya nemu sapa nuan ke bendar lalu nama ulih digaga nuan. (1 Sam. 16:7) Tegapka kaul nuan enggau Petara. David ngereja tu lebuh iya belematika utai ke ditempa Jehovah. Ari tu, David ulih belajar pasal kualiti Jehovah. (Mas. 8:3, 4; 139:14; Rom. 1:20) Siti agi utai ke ulih digaga nuan iya nya bepanggai ba Jehovah kena ngulihka pengering. Ambika chunto, kati bisi orang ba sekula ke ngeleseka nuan ketegal nuan seiku ari Saksi-Saksi Jehovah? Enti pia, besampi meh ngagai Jehovah kena nulung nuan mutarka penanggul tu. Lalu titihka jaku lalau ke ditemu nuan ba Bup Kudus, litaricha kitai sereta video. Ninting kali nuan meda Jehovah nulung nuan napi penanggul, nuan ulih majak arapka Iya. Lalu lebuh orang meda nuan bepanggai ba Jehovah, sida ulih arapka nuan.

8-9. Nama nulung David nganti enggau liat ati sebedau iya nyadi raja, lalu nama ulih dipelajar menyadi lelaki ke biak ari teladan David?

⁸ Peratika siti agi penanggul ke ditapi David. Pengudah iya dipilih nyadi raja, David patut nganti betaun-taun sebedau iya ulih merintah menua Judah. (1 Sam. 16:13; 2 Sam. 2:3, 4) Nama nulung iya nganti enggau liat ati ba timpuh nya? Ari ke berasai asa ati, David ngereja utai ke ulih digaga iya. Ambika chunto, lebuh iya nyadi orang kampar ba menua Pilistin, David ngena peluang nya ngelaban munsuh orang Israel. Enggau nya, iya ulih nyaga adan menua Judah.—1 Sam. 27:1-12.

⁹ Nama ulih dipelajar menyadi lelaki ke biak ari teladan David? Kereja meh utai ke ulih digaga nuan ke bala menyadi Kristian. Peratika peneleba seiku menyadi lelaki ke benama Ricardo. * Iya udah lama deka nyadi pengerintis biasa. Tang bala tuai gempuru madah iya bedau besedia. Ari ke berasai asa tauka ringat, Ricardo ngena mayuh agi awak ba pengawa nginjil. Ku iya: “Lebuh aku ngenang baru, aku sedar aku patut ngaga sekeda ubah sereta pemansang. Aku nentuka diri pulai ngagai orang ke ngayanka minat sereta nyediaka diri sebedau datai ngabas. Aku indah bisi seiku pemelajar Bup Kudus. Suah agi aku nginjil, kurang agi aku takut.” Ricardo diatu seiku pengerintis biasa sereta penulung gempuru.

10. Bisi sekali, nama digaga David sebedau iya ngaga pemutus ti besai?

¹⁰ Perundingka siti agi utai ke nyadi ba pengidup David. Lebuh iya ngerarika diri ari Saul ba menua Pilistin, David enggau bala soldadu iya patut ninggalka diri sebilik lalu mupuk belaban. Lebuh sida beperang, sekeda munsuh datai nyerang rumah sida lalu nangkap bala sida sebilik. David engka ulih berunding, ketegal iya bisi peneleba nyadi soldadu, iya ulih ngaga pelan ti manah kena nyelamatka ruang bilik sida. Tang David ngiga iring Jehovah. Enggau bantu ari imam Abiatar, David nanya Jehovah: “Kati tau aku ngagai bala perumpak nya?” Jehovah ngemendarka David ngereja nya lalu madahka iya deka mujur. (1 Sam. 30:7-10) Nama ulih dipelajarka nuan ari utai ke nyadi tu?

11. Nama patut digaga nuan sebedau ngaga pemutus?

 ¹¹ Sebedau nuan ngaga pemutus, pinta meh jaku lalau ari apai indai nuan. Nuan mega ulih nanya penemu bala tuai gempuru ti bepeneleba. Jehovah arapka sida, lalu nuan mega ulih arapka sida. Jehovah ngumbai tuai gempuru nya “pemeri” ngagai eklisia. (Eps. 4:8) Nuan tau bulih penguntung enti nuan nunda pengarap sida sereta nitihka jaku lalau ke diberi sida ngagai nuan. Diatu, aram kitai beratika utai ke ulih dipelajar ari Raja Asa.

12. Nama kualiti ti dikembuan Raja Asa lebuh iya berengkah merintah?

¹² Lebuh iya agi biak, Raja Asa orang ti baruh ati sereta berani. Ambika chunto, lebuh apai iya Abijah udah nadai, Asa nyadi raja lalu berengkah muai engkeramba ari menua nya. Iya mega ‘ngasuh orang Judah ngereja utai ti dikedekaka Jehovah Petara aki ini sida, lalu ngasika ajar enggau pesan Iya.’ (2 Ban. 14:1-7) Lalu lebuh Serah, orang Etiopia enggau 1,000,000 iku soldadu iya nyerang menua Judah, Asa minta tulung ari Jehovah lalu madah: ‘O Jehovah, Nuan ulih nyaup bala soldadu ti lemi baka Nuan ke nyaup bala soldadu ti kering. Tulung kami diatu, O Jehovah Petara kami, laban kami manggaika diri ba Nuan.’ Jaku Asa nunjukka iya arapka Jehovah ulih nyelamatka iya enggau rayat iya. Asa bepanggai ba Jehovah lalu ‘Jehovah ngalahka bala soldadu orang Etiopia.’—2 Ban. 14:8-12.

13. Nama nyadi ngagai Asa pengudah nya, lalu nama kebuah?

¹³ Asa tentu berasai takut lebuh 1,000,000 iku soldadu datai deka nyerang iya. Ketegal iya bepanggai ba Jehovah, Asa ulih mujur. Tang sayau amat, lebuh Asa napi penanggul ke bukai, iya enda bepanggai ba Jehovah. Lebuh Raja Baasa ari menua Israel deka nyerang, Asa minta tulung ari raja Siria. Pemutus nya ngujungka penusah! Nengah nabi Hanani, Jehovah madah ngagai Asa: ‘Laban nuan ngarapka Raja menua Siria, lalu enda ngarapka Jehovah Petara nuan, bala soldadu raja menua [“Siria,” NWT] udah ulih ngerarika diri ari nuan.’ Kenyau ari nya, Asa seruran  beperang. (2 Ban. 16:7, 9; 1 Raj. 15:32) Nama ulih dipelajarka kitai?

14. Baka ni nuan ulih bepanggai ba Jehovah, lalu nitihka 1 Timoti 4:12, nama asil iya enti nuan ngereja nya?

¹⁴ Terus meh ngayanka pemaruh ati sereta bepanggai ba Jehovah. Lebuh nuan dibaptisa, nuan mandangka pengarap sereta pengandal ngagai Jehovah. Lalu Jehovah enggau gaga ati ngelaluka nuan ngagai ruang bilik Iya. Tang nuan patut terus bepanggai ba Jehovah. Nuan engka senang bepanggai ba Jehovah lebuh ngaga pemutus ti besai ba pengidup. Tang baka ni lebuh ngaga pemutus ti bekaul enggau pemerindang, kereja sereta juluk ati? Anang meh bepanggai ba penemu-dalam diri empu! Tang giga meh prinsip Bup Kudus ke ngena ba pengidup nuan, lalu titihka iring nya. (J-lam. 3:5, 6) Enti nuan ngereja nya, nuan deka ngasuh Jehovah gaga ati, lalu bala menyadi ba eklisia mega deka bebasaka nuan.—Bacha 1 Timoti 4:12.

15. Baka ke dipadah ba 2 Bansa Israel 18:1-3; 19:2, nama penyalah ke digaga Raja Jehosapat?

¹⁵ Endang amat, semua kitai enda sempurna, lalu kekadang nuan mega engka ngereja penyalah. Taja pia, anang ngelakka tu nagang nuan ari gawa ke Jehovah enggau naka ulih. Peratika teladan Raja Jehosapat. Iya bisi mayuh kualiti ti manah. Lebuh iya agi biak, ‘iya betuaika Petara ti disembah apai iya, ngasika pesan Petara.’ Pia mega, iya nganjung bala pemesai ngagai nengeri di menua Judah kena ngajar orang pasal Jehovah. (2 Ban. 17:4, 7) Tang kekadang, Jehosapat mega bisi ngaga pemutus ti enda manah. Ketegal siti ari pemutus nya, Jehosapat nerima jaku lalau ari pengari Jehovah. (Bacha 2 Bansa Israel 18:1-3; 19:2.) Nama ulih dipelajarka kitai ari cherita tu?

16. Nama ulih dipelajarka nuan ari peneleba Rajeev?

¹⁶ Terima meh sereta titihka jaku lalau ti diberi. Baka nembiak lelaki ke bukai, nuan engka tusah deka ngenuluka Jehovah ba pengidup. Tang anang asa ati! Peratika utai ti nyadi ngagai seiku menyadi lelaki ke biak benama Rajeev. Lebuh iya ngenangka pengidup diri ke agi nembiak, iya madah: “Kekadang aku enda nemu nama deka digaga enggau pengidup aku. Baka nembiak ke bukai, aku rindu  agi besukan sereta ngelantangka ati diri ari ke datai begempuru tauka pansut nginjil.” Nama utai ke nulung Rajeev? Seiku tuai gempuru meri iya jaku lalau. Ku Rajeev madah: “Iya nulung aku belematika jaku lalau ba 1 Timoti 4:8.” Rajeev enggau baruh ati nitihka jaku lalau nya, lalu berundingka utai ti pemadu beguna ba pengidup iya. Ku iya: “Aku mutuska, deka nyembah Jehovah nya utai ti pemadu beguna ba pengidup.” Nama asil iya? Ku iya nampung baru: “Beberapa taun pengudah nerima jaku lalau nya, aku ulih nyadi seiku penulung gempuru.”

17. Nama asai ati bala menyadi Kristian pasal menyadi lelaki ke biak ti nyembah Jehovah?

¹⁷ Bala menyadi lelaki ke biak, kita amat berega ba bala menyadi Kristian. Sida gaga ati ulih sama begulai nyembah Jehovah enggau kita. (Sep. 3:9) Sida rinduka pengeransing nuan lebuh nuan nembuka pengawa ke diberi. Nuan bisi nama ti manah ba mata sida.—1 Jhn. 2:14.

18. Nitihka Jaku Dalam 27:11, nama asai ati Jehovah pasal nembiak lelaki ke nyembah Iya?

¹⁸ Bala menyadi lelaki ke biak, kingatka Jehovah rindu sereta pechayaka nuan. Iya udah madah, ba hari ti penudi, deka bisi seraban nembiak lelaki ke sanggup nyerahka diri ngagai Iya. (Mas. 110:1-3) Jehovah nemu nuan rinduka Iya, lalu deka enggau pengabis ati gawa ke Iya. Nya alai, sabar meh enggau orang bukai sereta enggau diri empu. Lebuh nuan ngaga penyalah, terima meh latih sereta disiplin lalu ngumbai nya datai ari Jehovah. (Heb. 12:6) Enggau bebendar ngereja pengawa ke diberi ngagai nuan. Lalu kelebih agi, ba semua pekara ke digaga nuan, asuh meh Apai ti di serega temegah ati ke nuan.—Bacha Jaku Dalam 27:11.