Sekeda orang ke semina macha cherita tu engka bisi berundingka tanya tu. Tang ba cherita tu, bisi dua iku orang ke benama Mepiboset. Lalu kitai ulih belajar ari utai ke nyadi ba cherita tu.

Raja Saul bisi tujuh iku anak lelaki sereta dua iku anak indu. Anak Raja Saul ke pemadu tuai benama Jonatan. Udah nya, Raja Saul bisi seiku agi anak lelaki, iya nya Mepiboset. Mepiboset nya anak Saul enggau indu simpan iya ke benama Rispah. Tang udah nya, Jonatan mega bisi seiku anak lelaki ke benama Mepiboset. Nya alai, Raja Saul bisi seiku anak lelaki enggau uchu ti ngembuan nama ti sama, iya nya Mepiboset.

Taja pia, Raja Saul berengkah begedika orang Gibeon lalu nguji deka munuh sida. Kebendar iya, sekeda sida udah dibunuh. Tang utai ke digaga Saul salah. Nama kebuah? Laban maya jeman Josua, bala tuai orang Israel udah ngaga sempekat pemaik enggau orang Gibeon.—Jos. 9:3-27.

Sempekat nya agi patut dititihka maya jeman Raja Saul. Tang Saul ngelanggar sempekat nya lalu iya nguji deka munuh semua orang Gibeon. Ketegal nya, “Saul enggau sida sebilik udah salah bebunuhka orang.” (2 Sam. 21:1) Pengujung iya, lebuh David nyadi raja, orang Gibeon ke selamat madah ngagai iya pasal penyai Saul. David nanya baka ni ulih nebus penyalah Saul ngagai sida ngambika Jehovah merekatka baru menua Israel. Ari ke minta duit, orang Gibeon minta tujuh iku anak lelaki Saul diserah ngagai sida ngambika diukum bunuh. Tu ketegal, tujuh iku anak lelaki Saul tu sama ngaga pelan deka munuh orang Gibeon. (P-pau. 35:30, 31) David lalu nitihka peminta sida.—2 Sam. 21:2-6.

Maya nya, Saul enggau Jonatan udah mati ba perang. Tang Mepiboset anak Jonatan, agi idup. Mepiboset timpang kaki laban iya kala bebadi lebuh agi mit. Nya alai, iya tentu enda enggau Saul nyerang orang Gibeon. Kelimpah ari nya, David udah ngaga siti sempekat enggau Jonatan. Iya besemaya deka rinduka Jonatan sereta peturun iya, tu nyengkaum anak lelaki Jonatan iya nya Mepiboset. (1 Sam. 18:1; 20:42) Nya alai Bup Kudus madahka: “Ketegal semaya ti kudus ti udah digaga iya enggau Jonatan, David enda nyerahka Mepiboset.”—2 Sam. 21:7.

Taja pia, David agi nitihka peminta orang Gibeon. Iya nyerahka dua iku anak lelaki Saul, lalu seiku ari sida benama Mepiboset. David mega nyerahka lima iku uchu Saul ngagai orang Gibeon. (2 Sam. 21:8, 9) Pengudah David ngereja utai tu, menua Israel enda agi berutang darah.

Jehovah tentu enda ngelakka dua iku anak lelaki enggau lima iku uchu Saul diukum bunuh enti sida enda ngereja penyalah. Tu ketegal Adat Petara madahka: ‘Anak enda tau dibunuh ketegal penyalah apai indai sida. Orang semina tau dibunuh ketegal penyalah sida empu.’ (U-dat. 24:16) Au, tujuh iku orang ke diukum bunuh tu tentu udah nyukung Saul munuh orang Gibeon. Nya alai, sida diukum bunuh kena malas penyai ke digaga sida.

Ari cherita tu kitai belajar, kitai enda ulih ngiga tegal kena ngelepaska diri ari penyalah diri empu. Tiap iku orang patut betanggungjawap ke pengawa diri empu. Bup Jaku Dalam madahka: “Perambu enggau silik utai ti deka dikereja nuan, nya baru utai ti dikereja nuan deka mujur. Seliahka penyai, lalu bejalai lurus nuju ke mua. Anang sekali-kali limpang ari jalai ti ngena.”—J-lam. 4:24-27; Eps. 5:15.