1-2. Enti nuan bedau agi besedia deka dibaptisa, nama kebuah nuan enda patut berasai asa? (Peda gambar ba mua majalah.)

 ENTI nuan bisi minat deka dibaptisa, nuan udah bisi juluk ati ti manah. Kati nuan udah besedia deka dibaptisa diatu? Enti nuan yakin nuan udah besedia lalu bala tuai gempuru besetuju, anang kakang ati deka dibaptisa ba maya ti deka datai. Enti nuan ngereja nya, nuan deka bisi pengidup ti manah lebuh nuan ngereja pengawa ke Jehovah.

² Tang kati enti bisi orang madah, nuan patut ngaga mayuh agi pemansang sebedau dibaptisa? Tauka nuan empu nemu diri patut ngaga pemansang? Enti pia, anang berasai asa ati. Nuan ulih ngaga pemansang sereta nyapai juluk ati ti penting nya enda ngira nuan nya biak tauka tuai.

3. Nama ditanya pegawai tinggi Etiopia ngagai Philip, lalu nama tanya ke patut diperundingka iya? (Surat Kereja Rasul 8:36, 38)

³ Bacha Surat Kereja Rasul 8:36, 38. Siku pegawai tinggi Etiopia nanya siku penginjil ke benama Philip: “Nama agi utai ke ulih nagang aku ari dibaptisa?” Lelaki Etiopia nya bisi pengingin deka dibaptisa, tang kati iya amat udah besedia deka dibaptisa?

4. Baka ni lelaki Etiopia nya nunjukka diri keran deka terus belajar?

⁴ Lelaki Etiopia nya “udah ngagai Jerusalem ngambika nyembah Petara.” (SKR. 8:27) Nyadi, iya tentu udah nerima pengarap orang Judah. Iya tentu udah belajar pasal Jehovah ari Bup Kudus Begian Sempekat Lama. Tang iya keran deka belajar mayuh  agi. Kebendar iya, lebuh Philip betemu enggau pegawai nya ba rantau jalai, nama utai ke benung digaga pegawai nya? Iya benung macha gulung surat ke ditulis nabi Isaiah. (SKR. 8:28) Gulung surat nya ngundan pemendar Bup Kudus ti dalam. Pegawai nya enda puas ati enggau ajar Bup Kudus ti asas ke ditemu iya. Iya deka terus belajar.

5. Nama utai ti dikereja lelaki Etiopia nya pasal utai ti udah dipelajarka iya?

⁵ Lelaki Etiopia nya siku pegawai ti penting ke gawa di baruh Kuin Kandas iya nya, kuin orang Etiopia. Pegawai nya “bisi tanggung pengawa ngemataka semua reta kuin nya.” (SKR. 8:27) Nyadi, iya tentu lelaki ti amat kisuk lalu bisi mayuh tanggung pengawa. Taja pia, iya magi awak kena nyembah Jehovah. Iya enda puas ati semina belajarka pemendar. Iya ngereja utai ti dipelajarka iya. Nya alai, iya bejalai jauh ari Etiopia ngambika ulih nyembah Jehovah ba Rumah Sembiang di Jerusalem. Pejalai nya tentu begunaka mayuh awak sereta ungkus. Tang enda ngira utai ke ditapi iya, lelaki nya keran deka nyembah Jehovah.

6-7. Nama ngasuh pengerindu lelaki Etiopia nya ngagai Jehovah majak dalam?

⁶ Lelaki Etiopia nya udah belajarka sekeda pemendar ti baru sereta penting ari Philip. Siti ari pemendar nya, pasal Jesus ke nyadi Messiah. (SKR. 8:34, 35) Pegawai tinggi tu tentu berasai gaga ati lebuh nemu utai ti udah dikereja Jesus ke iya. Nama digaga iya pengudah iya nemu semua utai nya? Iya ulih terus nyadi siku orang ke nerima pengarap Judah ti dipebasa. Tang ketegal pengerindu iya ke Jehovah enggau Jesus majak dalam, iya diperansang ngaga pemutus ti penting lalu dibaptisa nyadi murid Jesus Kristus. Lebuh Philip meda lelaki nya udah besedia, iya maptisa lelaki nya.

⁷ Enti nuan nitihka chunto lelaki Etiopia nya, nuan ulih nyediaka diri deka dibaptisa. Nuan mega ulih nyebut enggau andal, “Nama agi utai ke ulih nagang aku ari dibaptisa?” Aram kitai berandauka baka ni nuan ulih ngereja utai ti sama baka ke dikereja lelaki Etiopia nya. Iya terus belajar, iya ngereja utai ti dipelajarka iya, lalu iya terus ngenalamka pengerindu iya ngagai Jehovah.

8. Nitihka John 17:3, nama patut dikereja nuan?

⁸ Bacha John 17:3 enggau nota kaki. Kati jaku Jesus tu nulung nuan deka belajarka Bup Kudus? Mayuh ari kitai ngasaika nya. Tang kati jaku nya mega ngasuh kitai terus belajarka Bup Kudus? Au. Kitai enda nemu abis “bulih penemu pasal . . . siku aja Petara ti bendar.” (P-jar. 3:11) Kitai deka terus belajar belama iya. Mayuh agi kitai belajar, semak agi kitai ngagai Jehovah.—Mas. 73:28.

9. Nama patut digaga kitai pengudah kitai belajarka ajar Bup Kudus ti asas?

 ⁹ Lebuh kitai berengkah belajar pasal Jehovah, kitai semina belajarka ajar Bup Kudus ti asas. Dalam surat rasul Paul ngagai orang Hebrew, iya ngumbai ajar tu “pekara asas.” Iya nadai madahka pekara asas tu utai ti enda penting. Tang iya mandingka nya baka ai tusu ti manah ke anak mit. (Heb. 5:12; 6:1) Lalu iya mega meransang semua orang Kristian terus belajar lebih agi ari ajar ti asas sereta mansik pemendar Bup Kudus ti dalam. Kati nuan udah ngemansangka pengeran deka belajarka ajar ti dalam ari Bup Kudus? Kati nuan deka terus mansang agi sereta terus belajar pasal Jehovah enggau tuju Iya?

10. Nama kebuah sekeda orang tusah deka belajar?

¹⁰ Sekeda ari kitai engka ngasaika tusah deka belajar. Baka ni enggau nuan? Ba sekula, kati nuan bisi belajar macha sereta chara belajar enggau manah? Kati nuan rindu belajar lalu ngasaika nuan udah belajarka mayuh utai? Tauka, kati nuan ngasaika diri tusah deka belajar ngena bup? Enti pia, nuan enda kediri. Jehovah ulih nulung nuan. Iya sempurna lalu Iya Pengajar ti pemadu manah.

11. Baka ni Jehovah nunjukka Diri “Pengajar ti Pemadu Besai”?

¹¹ Jehovah madahka Diri “Pengajar ti Pemadu Besai.” (Isa. 30:20, 21, NWT) Iya Pengajar ti sabar, manah ati, sereta nemu asai ati kitai. Iya ngiga utai ti manah ba bala nembiak Iya. (Mas. 130:3) Lalu Iya enda kala minta utai lebih ari utai ke ulih digaga kitai. Kingatka, Iya ke udah ngaga untak nuan, siti pemeri ti pemadu manah. (Mas. 139:14) Kitai endang ditempa enggau pengingin deka belajar. Penempa kitai dekaka kitai terus belajar belama iya lalu gaga ati lebuh belajar. Nya alai endang manah enti kitai ngemansangka “pengingin” ke pemendar Bup Kudus diatu. (1 Pet. 2:2) Tetapka juluk ati ti ulih dijapai nuan, lalu enggau tetap macha sereta belajarka Bup Kudus. (Jos. 1:8) Enggau tulung ari Jehovah, nuan deka belajar rindu macha sereta belajar pasal Iya enggau mayuh agi.

12. Nama kebuah kitai patut belajar pasal pengidup Jesus enggau pengawa nginjil iya?

¹² Seruran ngena awak belematika pengidup Jesus enggau pengawa nginjil iya. Enti kitai deka nyembah Jehovah, kitai patut nitihka singkang Jesus, kelebih agi ba maya ti tusah tu. (1 Pet. 2:21) Jesus madah ngagai bala murid iya, sida deka napi penanggul. (Luk. 14:27, 28) Tang iya andal, bala murid iya ti bendar ulih mengkang tetap ati ngagai Petara, baka iya. (Jhn. 16:33) Belajar meh mayuh agi pasal pengidup Jesus lalu tetapka juluk ati ti deka neladan iya ba pengidup nuan besehari-sehari.

13. Nama utai ke patut terus dipinta nuan ngagai Jehovah, lalu nama kebuah?

¹³ Penemu aja enda chukup. Nuan begunaka penemu ngambika nuan ulih belajar mayuh agi pasal Jehovah sereta ngemansangka sifat baka rinduka Iya sereta arapka Iya. (1 Kor. 8:1-3) Seraya nuan belajar, terus meh besampi minta Jehovah nulung nuan nambahka agi pengarap nuan. (Luk. 17:5) Iya deka nyaut sampi ke baka nya. Pengarap ti bendar ke bepelasarka penemu ti betul pasal Petara kitai deka nulung nuan ngaga pemansang.—Jas. 2:26.

14. Baka ni rasul Peter madahka kebuah nya penting ngereja utai ti udah dipelajarka kitai? (Peda meda gambar.)

¹⁴ Rasul Peter madahka kebuah nya penting bala murid Kristus terus ngereja utai ti udah dipelajarka sida. Iya bisi nyebut cherita pasal Noah ari Bup Kudus. Jehovah madah ngagai Noah, Iya deka ngemunaska orang ke jai ba jeman nya nengah bah. Semina nemu bah nya deka datai enda chukup kena nyelamatka  Noah enggau sida sebilik. Peratika, Peter benung bejaku pasal timpuh sebedau Bah Besai sereta “maya bandung benung digaga.” (1 Pet. 3:20) Amat, Noah enggau sida sebilik ngereja utai ti udah dipelajarka sida ari Petara. Sida ngaga siti bandung ti besai. (Heb. 11:7) Udah nya, Peter mandingka utai ti digaga Noah enggau pengawa baptisa. Ku iya: “Utai ke nyadi nya ngambarka baptisa ke nyelamatka kita diatu.” (1 Pet. 3:21) Nya alai, pengawa nuan ke nyediaka diri ti deka dibaptisa ulih dibanding enggau pengawa Noah sereta sida sebilik ke ngaga bandung pengelama betaun-taun. Ngambika ulih dibaptisa, nama patut digaga nuan?

15. Baka ni kitai nunjukka diri amat udah nesal ati?

¹⁵ Siti ari utai ti keterubah ke patut digaga kitai, iya nya bebendar nesal ati ke dosa diri. (SKR. 2:37, 38) Lebuh kitai amat nesal ati, kitai bebendar deka ngaga ubah. Kati nuan udah badu ngereja utai ti dipegedika Jehovah baka ngereja ulah ti kamah, nginsap, tauka ngena bansa jaku ti kamah? (1 Kor. 6:9, 10; 2 Kor. 7:1; Eps. 4:29) Enti nuan bedau agi ngereja nya, terus meh nguji ngaga ubah. Pinta meh tulung sereta iring ari pengajar Bup Kudus nuan tauka bala tuai gempuru ba raban gempuru. Enti nuan agi nembiak lalu agi diau enggau apai indai, pinta meh tulung ari apai indai nuan kena muai sebarang ulah ti enda manah ke ulih nagang nuan ari dibaptisa.

16. Nama patut digaga kitai enti kitai deka seruran nyembah Jehovah?

¹⁶ Endang amat penting enti kitai deka seruran nyembah Jehovah. Nya nyengkaum datai sereta ngambi begian ba gempuru Kristian. (Heb. 10:24, 25) Lalu lebuh nuan udah layak nginjil, terus meh ngereja nya enggau tetap. Suah agi nuan nginjil, rindu agi nuan ke pengawa tu. (2 Tim. 4:5) Enti nuan agi nembiak lalu agi diau enggau apai indai, tanya diri empu: ‘Kati apai indai aku patut ngingatka aku, nya baru aku deka ngagai gempuru tauka nurun nginjil? Tauka kati aku ngereja nya kediri empu?’ Lebuh nuan ngereja tu kediri empu, nuan nunjukka diri bisi pengarap, rinduka Petara Jehovah, sereta beterima kasihka utai ti udah diberi Iya ke nuan. Pengawa ke dikereja nuan nunjukka nuan “enda bebagi ati nyembah Petara.” Nya pemeri nuan ke Jehovah. (2 Pet. 3:11; Heb. 13:15) Jehovah amat lantang  ati lebuh kitai meri semua pemeri tu enggau ati ti deka. (Banding 2 Korint 9:7.) Kitai ngereja nya laban nya ngasuh kitai gaga ati lebuh kitai meri Jehovah utai ti pemadu manah.

17-18. Nama sifat ti penting ke deka nulung nuan ngaga pemansang ngambika ulih dibaptisa, lalu baka ni nya deka nulung nuan? (Jaku Dalam 3:3-6)

¹⁷ Seraya nuan terus ngaga pemansang nyentuk ngagai baptisa, nuan deka napi mayuh penanggul. Sekeda orang engka ngeleseka nuan ketegal pengarap nuan ti baru. Sida indah nyakal tauka merinsaka nuan. (2 Tim. 3:12) Nuan engka bebendar deka ngetu ngereja siti-siti tebiat ti enda manah, tang kekadang nuan engka alah laban penguji nya. Tauka nuan enda ulih sabar agi sereta asa ati laban juluk ati nuan nya baka ke tusah dijapai. Nama deka nulung nuan tan ngambika ulih terus ngaga pemansang? Siti sifat ti penting iya nya pengerindu ke Jehovah.

¹⁸ Pengerindu nuan ke Jehovah nya siti sifat ti amat manah. Sifat tu sifat ke pemadu penting ke tau dikembuan nuan. (Bacha Jaku Dalam 3:3-6.) Pengerindu tu deka meruan bisi. Lalu enti nuan bisi sifat tu nuan deka terus nyembah Jehovah, taja pan napi penanggul. Bup Kudus suah nyebut pasal pengerindu Jehovah ti tetap ati ngagai nembiak Iya. Pengerindu ti tetap ati tu mai reti, Iya enda kala ninggalka nembiak Iya, tauka ngetu rinduka sida. (Mas. 100:5) Nuan digaga neladan gamal Petara. (P-kal. 1:26) Baka ni nuan ulih ngayanka pengerindu ti baka nya?

19. Baka ni nuan ulih ngenalamka asai ati ti beterima kasihka semua utai ti udah digaga Jehovah ke nuan? (Galatia 2:20)

¹⁹ Berengkah enggau asai ati ti beterima kasih. (1 Tes. 5:18) Tiap hari tanya diri empu, ‘Baka ni Jehovah udah ngayanka pengerindu ngagai aku?’ Udah nya, beri terima kasih ngagai Jehovah nengah sampi nuan. Padahka utai ti udah digaga Iya ke nuan enggau nyemetak. Nuan patut faham, Jehovah ngereja utai manah ke nuan laban Iya sayauka nuan. Rasul Paul mega sedar pasal utai tu bekaul enggau Jehovah. (Bacha Galatia 2:20.) Tanya diri empu, ‘Kati aku deka malas pengerindu ke udah diayanka Jehovah ngagai aku?’ Pengerindu ngagai Jehovah deka nulung nuan terus ngelaban penguji sereta mujur lebuh napi penanggul. Tu deka meransang nuan terus nyembah Jehovah enggau tetap, sereta terus nunjukka pengerindu nuan ngagai Jehovah ninting hari.

20. Nama patut digaga nuan kena nyerahka pengidup diri ngagai Jehovah, lalu nama kebuah pemutus tu penting?

 ²⁰ Nyau kelama, pengerindu nuan ngagai Jehovah deka meransang nuan meri siti sampi ti istimewa. Nuan deka nyerahka pengidup diri ngagai Petara. Kingatka, lebuh nuan nyerahka pengidup diri ngagai Jehovah, nuan deka bisi harapan ti manah: Nuan enggi Jehovah belama iya. Lebuh nuan nyerahka pengidup diri ngagai Jehovah, nuan besemaya deka nyembah Iya ba maya ti senang sereta tusah. Nuan enda ibuh ngaga semaya nya baru. Amat, pemutus kitai ke deka nyerahka diri ngagai Jehovah nya pemutus ti amat penting. Tang, perundingka tu: Nuan deka ngaga mayuh pemutus ba pengidup nuan. Sekeda ari pemutus ke digaga nuan endang manah, tang pemutus nuan ke deka nyerahka pengidup diri ngagai Jehovah nya manah agi. (Mas. 50:14) Sitan deka nguji ngelemika pengerindu nuan ngagai Jehovah, iya enggai nuan mengkang tetap ati ngagai Jehovah. Anang nejuka Sitan menang! (Jop 27:5) Pengerindu nuan ti dalam ngagai Jehovah deka nulung nuan terus ngamatka semaya nuan ti deka nyembah Jehovah belama iya sereta majak semak ngagai Iya.

21. Nama kebuah kitai ulih madahka baptisa nya pun ukai pengujung?

²¹ Pengudah nuan nyerahka pengidup diri ngagai Jehovah, bejaku meh enggau bala tuai gempuru ba raban gempuru nuan pasal pemutus ti penting ke deka digaga nuan. Kingatka meh, baptisa nya pun ukai pengujung. Lebuh nuan dibaptisa, nuan ngepunka jalai pengidup ti deka nyembah Jehovah belama iya. Nya alai, kenalamka meh pengerindu nuan ngagai Jehovah diatu. Tetapka juluk ati ninting hari ngambika pengerindu nuan deka majak dalam-sedalam. Tu deka meransang nuan ngambika dibaptisa. Nya deka nyadi hari ti amat ngagaka ati. Tang tu semina pun iya aja. Arapka pengerindu nuan ngagai Jehovah sereta ngagai Anak Iya majak dalam belama iya!