1. Nama utai ke dikinginka apai indai ke bala anak sida?

 BALA apai indai, kami nemu kita deka nulung bala anak kita ngelala sereta rinduka Jehovah. Tang Petara enda ulih dipeda. Nyadi baka ni nuan ulih nulung bala anak nuan nemu Petara nya nyata? Lalu baka ni nuan ulih nulung sida datai semak ngagai Iya?—Jas. 4:8.

2. Baka ni bala apai indai ulih ngajar anak sida pasal sifat Jehovah?

² Siti chara ti penting kena nulung anak datai semak ngagai Jehovah, iya nya belajarka Bup Kudus enggau sida. (2 Tim. 3:14-17) Tang, Bup Kudus madahka siti agi chara anak ulih belajar pasal Jehovah. Ba bup Jaku Dalam, siku apai ngingatka anak iya ngambika terus beratika sifat Jehovah, ke ulih dipeda ba utai ti ditempa Iya. (J-lam. 3:19-21) Kitai deka beratika sekeda chara apai indai ulih ngena utai ti ditempa kena nulung anak sida belajar pasal personaliti Jehovah.

3. Nama tulung ke patut diberi apai indai ngagai anak sida?

³ Bup Kudus madahka, “Enti kitai beratika chara dunya udah digaga, kitai ulih meretika pemanah Petara ti enda ulih dipeda. Lebuh kitai mansik utai ke udah digaga Iya, kitai ulih nemu sapa Iya.” (Rom. 1:20) Bala apai indai, kita tentu gaga ati begulai enggau anak kita beratika alam semula jadi. Kena meh peluang nya nulung anak kita beratika kaul entara “utai ke udah digaga” enggau sifat Jehovah. Aram kitai meda utai ti ulih dipelajarka apai indai ari chara Jesus ngajar.

4. Baka ni Jesus ngena utai ti ditempa kena ngajar bala murid iya? (Luke 12:24, 27-30)

 ⁴ Peratika chara Jesus ngajar ngena utai ti ditempa. Bisi sekali, Jesus ngasuh bala murid iya beratika burung kak enggau bungai. (Bacha Luke 12:24, 27-30.) Jesus ulih bejaku pasal sebarang utai ti ditempa Petara, tang iya bejaku pasal burung enggau bungai ke suah dipeda bala murid iya. Bala murid nya engka kala meda burung kak terebai ba langit tauka bungai ke benung ngerembai ba padang. Ulih nuan ngambarka Jesus benung nunjuk ngagai utai nya lebuh iya benung bejaku? Lalu nama utai ke digaga iya pengudah nyebut pasal sekeda chunto tu? Iya ngajar bala murid iya siti utai ti penting pasal pengerah jari sereta pemanah ati Apai sida ti ba serega: Jehovah deka nyediaka pemakai sereta gari ke dikena bala nembiak Iya ti tetap ati sama baka chara Iya udah ngintu burung kak enggau bungai ba padang.

5. Baka ni apai indai ulih ngena utai ti ditempa ngajar anak sida pasal Jehovah?

⁵ Bala apai indai, baka ni kita ulih neladan Jesus lebuh ngajar bala anak? Nuan ulih bejaku enggau anak nuan pasal sekeda utai ti dikerinduka nuan ba utai ti ditempa, baka jelu tauka utai tumbuh ti dikerinduka nuan. Lebuh nuan bejaku enggau anak nuan pasal tu, nuan patut nerangka utai ti ulih dipelajarka sida pasal Jehovah ari utai ti ditempa nya. Udah nya, nuan ulih nanya anak nuan pasal jelu tauka utai tumbuh ke dikerinduka iya. Enti nuan bejaku pasal utai ti narit minat anak nuan, iya engka deka agi ningaka nuan lebuh nuan nguji deka ngajar iya pasal Jehovah.

6. Nama ulih dipelajarka kitai ari teladan indai Christopher?

⁶ Sebedau ngena utai ti ditempa kena ngajar bala anak pasal Jehovah, kati apai indai patut ngena mayuh awak mansik dulu pasal sesiku jelu tauka utai tumbuh? Enda semesti iya. Jesus enda meri penerang ti panjai pasal chara burung kak makai tauka chara bungai tumbuh. Amat. Bala anak engka rindu deka nemu enggau nyemetak pasal utai ti ditempa Jehovah, tang kekadang penerang ti pandak tauka tanya ti senang ulih nulung anak nuan meretika poin nuan. Peratika utai ti dipadah siku menyadi lelaki ke benama Christopher maya iya agi biak: “Indai aku deka nyebut sekeda penerang ti pandak kena nulung kami beterima kasih agi ke utai ti ditempa ke ngelingi kami. Ambika chunto, lebuh kami semak enggau endur ti bisi gunung, indai engka madah: ‘Peda pemesai enggau pemanah gunung tu! Endaka Jehovah amat badas?’ Tauka lebuh kami bisi semak tasik, iya engka madah: ‘Peda pemesai kuasa gelumbang nya! Endaka Petara amat bekuasa?’” Christopher madah: “Penerang ti senang sereta besai reti nya, amat ngasuh kami berunding.”

7. Baka ni nuan ulih ngelatih anak nuan belematika utai ti ditempa?

⁷ Seraya anak nuan mansang besai, nuan ulih ngelatih sida ngambika berengkah berunding pasal utai ti ditempa sereta belajar pasal personaliti Jehovah. Nuan ulih bejaku pasal siti utai ke ditempa Petara, lalu nanya sida, “Nama ulih dipelajarka nuan pasal Jehovah ari utai tu?” Nuan engka tekenyit sereta gaga ati lebuh ningaka runding anak nuan.—Mat. 21:16.

8. Nama peluang ke dikembuan bala apai indai orang Israel lebuh sida “bejalai kebukai”?

⁸ Bala apai indai orang Israel diasuh ngajar anak sida jaku Petara lebuh sida “bejalai kebukai.” (U-dat. 11:19) Jalai ba menua Israel kelia kesuah iya nengah begian luar bandar. Mayuh bansa jelu, burung, sereta bungai ulih dipeda ba rantau jalai. Lebuh ruang bilik orang  Israel bejalai nengah jalai nya, bala apai indai ulih bejaku enggau bala anak sida pasal utai ti ditempa Jehovah. Kita ke apai indai mega bisi peluang ti sama ngena utai ti ditempa kena ngajar anak kita. Peratika chara sekeda apai indai udah ngereja nya.

9. Nama ulih dipelajarka nuan ari Punitha enggau Katya?

⁹ Siku indai ke benama Punitha, diau ba siti nengeri ti besai ba India. Iya madah: “Lebuh kami sebilik ngelawa kaban belayan ba endur luar bandar, kami ngumbai nya siti peluang ngajar bala anak kami pasal utai ti ditempa Jehovah. Aku ngasaika bala anak aku ulih mereti agi pasal utai ti ditempa lebuh sida jauh ari situasi pengidup ti sibuk ba nengeri.” Apai indai, bala anak nuan tentu deka ingatka awak sida begulai enggau nuan ba endur ti manah. Katya, siku menyadi indu ari Moldova, madahka: “Pengingat ke amat dikingatka aku maya aku agi mit iya nya lebuh aku begulai enggau apai indai aku ba endur luar bandar. Aku amat beterima kasih ngagai seduai iya laban udah ngajar aku kenyau ari maya aku agi biak. Seduai iya ngajar aku ngambika ngetu lalu berundingka utai ti digaga Jehovah sereta belematika pasal sifat Jehovah nengah utai ti ditempa Iya.”

10. Nama ulih digaga bala apai indai enti sida ngasaika tusah deka bejalai jauh ari bandar? (Peda kutak “ Tulung ke Apai Indai.”)

¹⁰ Baka ni enti nuan enda ulih bejalai ngagai endur luar bandar? Amol, ke mega diau ba India, madahka: “Ba endur aku diau, jam apai indai gawa amat panjai, lalu pejalai ngagai endur luar bandar, nya amat mar. Taja pia, nuan ulih meda utai ti ditempa Jehovah sereta bejaku pasal sifat Jehovah lebuh nuan ba taman ti mit tauka ba beranda sesiti bengunan.” Enti nuan beratika enggau manah, nuan engka ulih tetemuka mayuh utai ti ditempa ke semak enggau rumah nuan, lalu nuan ulih nunjukka tu ngagai bala anak nuan. (Mas. 104:24) Nuan engka  ulih tetemuka burung, indu utai, utai tumbuh, enggau mayuh agi. Karina, ari Jerman, madahka: “Indai aku amat rinduka bungai, nyadi lebuh aku agi mit, iya deka nunjukka sekeda bungai ti manah lebuh kami duai bejalai.” Bala apai indai, kita mega ulih ngena video sereta litaricha ari gerempung kitai pasal utai ti ditempa kena ngajar bala anak kita. Amat, enda ngira dini alai nuan diau, nuan ulih nulung bala anak nuan beratika utai ti ditempa Petara. Diatu aram kitai beratika sekeda sifat Jehovah ke ulih ditunjukka nuan ngagai bala anak nuan.

11. Baka ni apai indai ulih nulung bala anak sida nemu sereta ngasaika pengerindu Jehovah?

¹¹ Kena nulung bala anak nuan ngasaika pengerindu Jehovah, nuan ulih nunjukka chara jelu nyaga sereta ngintu anak sida. (Mat. 23:37) Nuan mega ulih nyebut pasal pemayuh bansa utai ti ditempa ke dikerinduka kitai. Karina, ke disebut tadi, madahka: “Lebuh kami bejalai kebukai, indai aku deka meransang aku ngetu, lalu beratika nama utai ke ngasuh tiap iti bungai nya unik sereta manah dipeda, lalu baka ni semua utai tu ngambarka pengerindu Jehovah. Betaun udah nya, aku agi beratika bungai enggau silik. Aku beratika warna sereta chara tiap iti bungai nya digaga amat bebida enggau pangan diri. Tu terus ngingatka aku pasal pemesai pengerindu Jehovah ke kitai.”

12. Baka ni bala apai indai ulih nulung bala anak sida beratika penemu-dalam Petara? (Masmur 139:13, 14) (Peda mega gambar.)

¹² Tulung anak nuan beratika penemu-dalam Petara. Jehovah endang jauh bepenemu-dalam agi ari kitai. (Rom. 11:33) Ambika chunto, nuan ulih madah ngagai anak nuan pasal chara wap ai niki ngagai remang lalu baka ni remang tu mindah enggau mudah ari siti endur ngagai siti endur. (Jop 38:36, 37) Nuan mega ulih madah pasal pemanah chara tubuh mensia digaga. (Bacha Masmur 139:13, 14.) Peratika chara siku apai ke benama Vladimir ngereja nya. Iya madah: “Bisi sekali, anak kami labuh ari basikal lalu bisi telih. Pengudah beberapa hari, telih nya pan suman. Kami duai indai iya nerang ngagai iya, Jehovah udah nempa tubuh kitai enggau penau ke ulih suman kediri empu. Kami mega madahka utai ke digaga mensia nadai penau tu. Ambika chunto, pengudah kerita eksiden, kerita  nya enda nemu ngeripair kediri empu. Utai tu udah nulung anak kami meretika penemu-dalam Jehovah.”

13. Baka ni bala apai indai ulih nulung bala anak sida beratika kuasa Petara? (Isaiah 40:26)

¹³ Jehovah mai kitai engkadah ke langit lalu berundingka pasal pemesai kuasa Iya ke nentuka semua bintang nya ba endur sida empu. (Bacha Isaiah 40:26.) Nuan ulih meransang bala anak nuan engkadah ke langit lalu belematika utai ti dipeda sida. Siku menyadi indu ari Taiwan, ke benama Tingting, ngenang baru utai ke nyadi lebuh iya agi mit. Iya madah: “Bisi sekali, indai aku mai aku bekhemah, lalu kami ulih meda mayuh bintang ba langit laban kami ba endur luar bandar ke nadai mayuh lampu. Maya nya aku amat irau sekalika aku ulih tetap ati ngagai Jehovah tauka enda, laban orang ke sekelas enggau aku ngasuh aku tusah deka ngasika Jehovah. Indai meransang aku berunding pasal kuasa ke dikena Jehovah ngaga semua bintang, lalu ingat Iya tentu ulih ngena kuasa nya nulung aku tan napi sebarang penguji. Pengudah beratika utai ti ditempa maya bekhemah nya, aku diperansang ngelala Jehovah enggau manah agi, lalu aku mega nyadi keran agi deka nyembah Iya.”

14. Baka ni bala apai indai ulih nulung bala anak sida nemu Jehovah nya Petara ti gaga ati?

¹⁴ Utai ke ditempa Jehovah nunjukka Iya Petara ti gaga ati, lalu Iya mega dekaka kitai gaga ati. Bala saintis udah beratika mayuh jelu main enggau pangan diri, nyengkaum burung enggau ikan. (Jop 40:20) Kala anak nuan ketawa lebuh sida meda jelu bemain? Engka sida meda anak ukui nangkap iku diri empu tauka meda anak mayau bemain enggau pangan diri. Lebuh anak nuan ketawa maya meda ulah sesiku jelu, kingatka sida pasal Petara ti disembah kitai nya Petara ti gaga ati.—1 Tim. 1:11.

15. Nama ulih nulung bala apai indai nemu utai ti diperundingka bala anak sida? (Jaku Dalam 20:5) (Peda mega gambar.)

¹⁵ Kekadang, bala apai indai engka tusah deka ngasuh bala anak bejaku pasal penanggul ke ditapi sida. Enti nya situasi nuan, nuan engka patut nguji nemu utai ti diperundingka bala anak nuan. (Bacha Jaku Dalam 20:5.) Sekeda  apai indai ngasaika senang agi deka ngereja nya lebuh sida benung gaga ati beratika alam semula jadi enggau anak sida. Nama kebuah? Siti kebuah nya laban utai ti ngelimpangka bala anak sereta bala apai indai deka kurang agi. Siku apai ba Taiwan ke benama Masahiko madahka siti agi kebuah. Iya madah: “Lebuh kami duai bini aku begulai enggau bala anak ba luar rumah, baka lebuh kami niki bukit tauka bejalai ba tebing tasik, kesuah iya sida berasai lantang agi. Tu ngasuh kami senang agi meransang sida madahka asai ati diri, lalu kami mega ulih nemu utai ti diperundingka sida.” Katya, ke disebut tadi, madahka: “Indai aku suah mai aku ngagai taman ti manah pengudah sekula. Ba endur ti ngelantangka ati nya, aku senang agi bejaku pasal utai ke nyadi ba sekula tauka utai ke ngirauka aku.”

16. Baka ni ruang bilik ulih ngena utai ti ditempa Jehovah ngambika ulih rileks sereta gaga ati?

¹⁶ Utai ti ditempa Jehovah nyediaka chara ngambika ruang bilik ulih rileks sereta gaga ati. Enggau nya, sida ulih rindu agi ke pangan diri. Bup Kudus madahka, bisi “maya gaga” sereta “maya betanda.” (P-jar. 3:1, 4) Jehovah udah nempa mayuh endur ti manah ba dunya tu alai kitai ngereja utai ti dikerinduka kitai. Mayuh ruang bilik rindu begulai ngagai gua, sungai, tauka tebing tasik. Sekeda bala anak rindu belanda tauka bemain ba taman, meda jelu, tauka mandi ba sungai, tasik, tauka ai wong. Kitai bisi mayuh peluang ngelantangka ati diri enggau alam semula jadi, sereta utai bukai ke ditempa Jehovah!

17. Nama kebuah bala apai indai patut nulung anak sida rinduka utai ti ditempa Petara?

¹⁷ Ba dunya ti baru, bala apai indai enggau bala anak deka lebih agi gaga ati enggau utai ti ditempa Jehovah. Enda baka kemayaharitu, ila kitai enda ibuh takutka bala jelu, lalu bala jelu mega enda ibuh takutka kitai. (Isa. 11:6-9) Kitai deka gaga ati enggau utai ti ditempa Jehovah belama iya. (Mas. 22:26) Apai indai, ari diatu tulung meh bala anak nuan rinduka utai ti ditempa. Lebuh nuan ngena utai ti ditempa kena ngajar bala anak nuan pasal Jehovah, sida engka deka setuju enggau Raja David ke madahka: ‘O Jehovah, nadai siku ti udah ngereja utai baka ke udah dikereja Nuan.’—Mas. 86:8.