1-2. Kesuah iya, nama nyadi lebuh orang dibaptisa, lalu nama deka dikerandauka kitai dalam artikel tu?

 KALA nuan meda seraban chalun baptisa? Nuan ninga nyawa sida ti andal lebuh sida nyaut dua iti tanya sebedau sida dibaptisa. Nuan meda sida sebilik sereta kaban sida amat temegahka sida. Lebuh chalun baptisa pansut ari ai, nuan ninga orang betempik jari lalu meda pengaga ati ba mua chalun baptisa nya. Ninting minggu, kira-kira beribu iku orang nyerahka diri ngagai Jehovah lalu dibaptisa nyadi siku ari Saksi-Saksi Jehovah.

² Baka ni enggau nuan? Enti nuan berunding deka dibaptisa, nuan siku orang ke amat spesial ba dunya ti jai tu, laban nuan “ngiga Jehovah.” (Mas. 14:1, 2, NWT) Artikel tu ditulis ke nuan enda ngira nuan nya orang ti biak tauka tuai. Tang kitai ke udah dibaptisa mega deka negapka agi pengeran kitai ti deka nyembah Jehovah belama iya. Nya alai, aram kitai berandauka tiga iti ari mayuh kebuah kitai deka nyembah Jehovah.

3. Nama kebuah nembiak Jehovah rinduka pemendar sereta pengelurus? (Masmur 119:128, 163)

³ Jehovah ngasuh nembiak Iya “rinduka pemendar.” (Sek. 8:19) Jesus meransang bala murid iya ngiga pengelurus. (Mat. 5:6) Reti iya, sesiku orang patut bisi pengeran ti besai kena ngereja utai ti dipadah Petara betul sereta manah. Kati nuan rinduka pemendar sereta pengelurus? Au, nuan tentu rinduka nya. Nuan begedika pemula sereta semua utai ti salah enggau jai. (Bacha Masmur 119:128, 163.) Orang ke bula nunda Sitan, penguasa dunya tu. (Jhn. 8:44; 12:31) Siti ari tuju Sitan iya nya, betenahka nama Petara Jehovah ti kudus. Kenyau ari pengawa angkat ngelaban ba Kebun Eden, Sitan udah ngerembaika pemula pasal Petara kitai. Iya nguji ngasuh orang pechaya  Jehovah nya Pemerintah ti berundingka diri empu sereta enda lurus ke nagang utai ti manah ari mensia. (P-kal. 3:1, 4, 5) Pemula ti dikerembaika Sitan pasal Jehovah agi ngasuh orang bisi runding ti enda manah pasal Jehovah. Enti orang milih enggai “rinduka pemendar,” Sitan senang deka nyungkak sida ngereja semua macham utai ti enda lurus sereta jai.—Rom. 1:25-31.

4. Baka ni Jehovah nunjukka Diri “Petara pemendar”? (Peda mega gambar.)

⁴ Jehovah nya “Petara pemendar,” lalu Iya enggau gerah jari ngajar pemendar ngagai orang ke rinduka Iya. (Mas. 31:5, NWT) Enggau ngereja nya, Iya nulung sida ngambika enda agi ditipu pemula ari Sitan. Jehovah mega ngajar bala nembiak Iya ngambika lurus sereta enda bula. Nya nulung sida bebasa agi ke diri empu sereta ngembuan pengelantang ba ati. (J-lam. 13:5, 6) Kala utai nya nyadi ba nuan lebuh nuan belajarka Bup Kudus? Nuan udah belajar, utai ti diajar Jehovah manah ke semua mensia sereta ke nuan mega. (Mas. 18:30) Nya alai, nuan deka ngereja utai ti dipadah Petara lurus. (Mat. 6:33) Nuan dekaka pemendar ditemu orang, lalu nunjukka pemula ti dipadah Sitan pasal Petara kitai Jehovah nya enda amat. Baka ni nuan ulih ngereja nya?

5. Baka ni nuan ulih ngasuh pemendar enggau pengelurus ditemu orang?

⁵ Ari chara pengidup nuan, nuan ulih nunjukka diri ngagai semua orang, nuan nulak pemula Sitan sereta nyukung utai ti bendar. Nuan ulih nunjukka diri dekaka Jehovah nyadi Pemerintah nuan lalu mega deka ngereja utai ti dikumbai Iya lurus. Baka ni nuan ulih ngereja nya? Nuan ulih besampi ngagai Jehovah lalu besemaya deka nyembah Iya belama iya, lalu dibaptisa ba mua orang mayuh. Lebuh milih deka dibaptisa, nuan patut ngembuan motif rinduka utai ti bendar sereta lurus.

6. Nitihka Masmur 45:4, nama sekeda kebuah nuan rinduka Jesus Kristus?

⁶ Nama kebuah nuan rinduka Jesus Kristus? Nuan ulih tetemuka sekeda kebuah ti manah nya ba Masmur 45:4, NWT. (Bacha ari nota kaki.) b Jesus rinduka pemendar, pemaruh ati sereta pengelurus. Enti nuan rinduka pemendar sereta pengelurus, tu reti iya nuan mega rinduka Jesus Kristus. Perundingka baka ni  Jesus enggau berani ngetanka utai ti bendar sereta lurus. (Jhn. 18:37) Taja pia, baka ni Jesus ngajar kitai nyadi baruh ati?

7. Nama utai ti narit ati nuan pasal pemaruh ati Jesus?

⁷ Jesus ngayanka pemaruh ati ari teladan iya. Ambika chunto, iya meri semua mulia ngagai Apai iya ukai ngagai iya empu. (Mrk. 10:17, 18; Jhn. 5:19) Nama asai ati nuan lebuh meda pemaruh ati Jesus? Nya tentu meransang nuan rinduka anak Petara sereta neladan iya. Nama kebuah Jesus baruh ati? Laban iya rinduka Apai iya sereta neladan pemaruh ati Apai iya. (Mas. 18:35; Heb. 1:3) Lebuh kitai meda Jesus enggau sempurna neladan sifat Jehovah, kitai tentu diperansang deka nunda iya.

8. Nama kebuah kitai gaga ati Jesus nyadi Raja kitai?

⁸ Kitai gaga ati lebuh Jesus nyadi Raja kitai laban iya Pemerintah ti pemadu manah. Jehovah Empu ke udah ngelatih Jesus sereta milih Jesus nyadi pemerintah. (Isa. 50:4, 5) Pikirka mega pengerindu ti enda berundingka diri empu ke udah diayanka Jesus. (Jhn. 13:1) Ketegal Jesus nya Raja nuan, iya amat layak nerima pengerindu ari nuan. Jesus madahka, orang ke amat rinduka iya sereta ngayanka pengerindu sida enggau ngasika pesan iya, dikumbai kaban iya. (Jhn. 14:15; 15:14, 15) Endang basa ti besai ulih nyadi kaban Anak Jehovah!

9. Baka ni pengawa maptisa orang Kristian sama enggau pengawa maptisa Jesus?

⁹ Siti ari pesan Jesus iya nya bala murid iya patut dibaptisa. (Mat. 28:19, 20) Iya udah netapka teladan. Tang, bisi sekeda bida entara pengawa maptisa Jesus enggau pengawa maptisa bala murid iya. (Peda kutak “ Nama Bida entara Pengawa Maptisa Jesus enggau Pengawa Maptisa Bala Murid Iya?”) Taja pia, bisi mega utai ti sama. Lebuh Jesus dibaptisa, iya nyerahka diri deka ngereja peneka Apai iya. (Heb. 10:7) Baka nya mega, lebuh bala murid Jesus dibaptisa ba mua orang mayuh, tu nunjukka sida udah nyerahka pengidup diri ngagai Petara Jehovah. Diatu utai ti pemadu penting dalam pengidup sida, iya nya ngereja peneka Petara, ukai peneka diri empu. Nya alai sida nitihka teladan Tuan sida.

10. Nama kebuah rinduka Jesus patut meransang nuan deka dibaptisa?

¹⁰ Nuan pechaya Jesus nya Anak tunggal Jehovah lalu nuan gaga ati laban Petara udah milih Jesus merintah atas kitai. Nuan nemu Jesus nya baruh ati ,sereta neladan Apai iya enggau sempurna. Nuan udah belajar pasal iya ke meri pemakai ngagai sida ke lapar, ngelantangka sida ke asa ati, sereta indah ngeraika sida ke sakit. (Mat. 14:14-21) Nuan udah beratika chara iya ngiring raban gempuru kemayaharitu. (Mat. 23:10) Lalu nuan nemu ketegal Jesus nyadi Raja, Perintah Petara deka ngereja utai ti manah ke kitai ba jemah ila. Baka ni nuan ulih nunjukka diri rinduka Jesus? Enggau neladan iya. (Jhn. 14:21) Siti ari utai keterubah ke ulih dikereja nuan kena neladan iya, iya nya nyerahka pengidup diri ngagai Jehovah sereta dibaptisa.

11. Nama utai ti pemadu penting ke ngasuh nuan deka dibaptisa, lalu nama kebuah?

¹¹ Nama utai ti pemadu penting ke ngasuh nuan deka dibaptisa? Jesus bisi nyebut pesan Petara ti pemadu penting, iya nya: “Kita patut rinduka Jehovah Petara kita, enggau pengabis ati kita, enggau pengabis pengidup kita, enggau pengabis runding kita, sereta enggau pengabis pengering kita.” (Mrk. 12:30) Kati rambai jaku nya ngambarka penalam pengerindu nuan ke Petara?

12. Nama kebuah nuan rinduka Jehovah? (Peda mega gambar.)

¹² Bisi mayuh kebuah kitai rinduka Jehovah. Ambika chunto, nuan nemu Iya “pun pengidup” lalu Iya meh ke meri “tiap iti pemeri ti manah sereta sempurna.” (Mas. 36:9; Jas. 1:17)  Tiap iti utai ti manah ke diasaika nuan datai ari Petara kitai ti bepengerindu sereta gerah jari.

13. Nama kebuah genselan tebus nya siti pemeri ti berega?

¹³ Genselan tebus nya siti pemeri ti berega ke udah diberi Jehovah ngagai kitai. Nama kebuah kitai ulih nyebut baka nya? Perundingka kaul ti rapat entara Jehovah enggau Anak Iya. Jesus madahka: “Apai rinduka aku” lalu “aku rinduka Apai.” (Jhn. 10:17; 14:31) Ketegal seduai iya udah begulai bebiliun taun, kaul entara seduai iya nyadi rapat agi. (J-lam. 8:22, 23, 30) Perundingka pemalat penusah ati Petara lebuh Iya ngemendarka Anak Iya merinsa lalu mati. Jehovah amat rinduka mensia nyengkaum nuan. Nya kebuah Iya sanggup meri Anak ti dikesayauka Iya nyadi genselan tebus ngambika nuan enggau orang bukai ulih idup belama iya. (Jhn. 3:16; Gal. 2:20) Tu meh kebuah ti pemadu besai kitai rinduka Petara.

14. Nama juluk ati ti pemadu manah dalam pengidup ke ulih dipilih nuan?

¹⁴ Pengerindu nuan ke Jehovah udah majak dalam laban nuan udah belajarka mayuh utai pasal Iya. Nuan tentu deka majak semak ngagai Iya diatu sereta belama iya. Lalu nuan ulih ngereja nya. Jehovah meransang nuan ngagaka ati Iya. (J-lam. 23:15, 16) Nuan ulih ngereja nya ukai aja nengah jaku tang mega nengah pengawa. Chara nuan ngena pengidup nuan deka  nunjukka nuan amat rinduka Jehovah. (1 Jhn. 5:3) Nya meh juluk ati ti pemadu manah dalam pengidup ke ulih dipilih nuan.

15. Baka ni nuan ulih ngayanka pengerindu nuan ke Jehovah?

¹⁵ Baka ni nuan ulih ngayanka pengerindu nuan ke Jehovah? Keterubah, nuan meri sampi ti istimewa ngagai Jehovah. Dalam sampi nya, nuan madahka diri deka nyerahka pengidup nuan ngagai Petara ti bendar. (Mas. 40:8) Udah nya, lebuh nuan dibaptisa, nuan nunjukka diri udah nyerahka pengidup nuan ngagai Jehovah ba mua orang mayuh. Baka ke udah dikerandauka kitai dalam artikel tu, maya nuan dibaptisa nya maya ti ngagaka ati sereta penting ba pengidup nuan. Nuan berengkah bisi pengidup ti baru, ukai ke nuan empu, tang ke Jehovah. (Rom. 14:8; 1 Pet. 4:1, 2) Tu endang siti pemutus ti amat besai ke patut digaga. Lalu iya muka jalai ngambika nuan bulih pengidup ti pemadu manah. Baka ni?

16. Baka ke dipadah Masmur 41:12, baka ni Jehovah deka merekatka sida ke ngena pengidup diri nyembah Jehovah?

¹⁶ Jehovah nya Petara ti amat gerah jari. Enda ngira nama utai ke diberi nuan ngagai Iya, Iya seruran deka malas pemeri nuan enggau mayuh agi. (Mrk. 10:29, 30) Iya deka meri nuan pengidup ti amat ngagitka ati ti mayuh berekat sereta puas ati, indah ba dunya ti jai tu. Lalu tu semina pun aja. Pejalai pengidup nuan pengudah dibaptisa ukai naka nya aja. Nuan ulih nyembah Apai ti dikesayauka nuan belama iya. Pengerindu entara nuan enggau Apai nuan deka majak dalam. Lalu nuan deka idup belama iya laban Iya Petara ti meruan idup.—Bacha Masmur 41:12.

17. Nama utai ke ulih diberi nuan ngagai Jehovah ti bedau dikemisi Iya?

¹⁷ Lebuh nuan nyerahka pengidup diri ngagai Petara lalu dibaptisa, nuan bisi peluang meri utai ti amat berega ngagai Apai nuan. Iya udah meri nuan tiap iti utai ti manah enggau tiap iti utai ti ngagaka ati ke kala diasaika nuan. Nyadi, nuan ulih meri ngagai Petara ke ngempu serega enggau dunya utai ti bedau dikemisi Iya, iya nya penyanggup nuan ke deka nyerahka pengidup diri ngagai Iya. (Jop 1:8; 41:11; J-lam. 27:11) Tu meh chara ti pemadu manah  ngena pengidup nuan. Endang amat, pengerindu nuan ke Jehovah nya, kebuah ti pemadu manah nuan deka dibaptisa.

18. Nama sekeda tanya ke engka diperundingka nuan?

¹⁸ Nyadi, kati nuan deka dibaptisa? Semina nuan aja ulih nyaut tanya tu. Tang manah enti nuan nanya diri empu, ‘Nama kebuah aku betangguh deka dibaptisa?’ (SKR. 8:36) Kingatka tiga iti kebuah ke udah dikerandauka kitai. Kesatu, nuan rinduka pemendar sereta pengelurus. Tanya diri empu, ‘Kati aku deka meda maya semua orang nyebut utai ti bendar sereta ngereja utai ti lurus?’ Kedua, nuan rinduka Jesus Kristus. Tanya diri empu, ‘Kati aku deka Anak Petara nyadi Raja aku lalu kati aku deka neladan iya?’ Lalu ketiga, kebuah ti pemadu penting iya nya, pengerindu nuan ke Jehovah. Tanya diri empu, ‘Kati aku deka ngagaka ati Jehovah enggau chara nyembah Iya?’ Enti saut nuan ngagai semua tanya tu au, nama kebuah nuan betangguh deka dibaptisa?—SKR. 16:33.

19. Nama kebuah nuan enda patut kakang ati deka dibaptisa? Padahka siti sempama. (John 4:34)

¹⁹ Enti nuan kakang ati deka dibaptisa, peratika siti sempama ke dikena Jesus. (Bacha John 4:34.) Jesus mandingka ngereja peneka Apai iya baka pemakai. Nama kebuah? Pemakai nya manah ke kitai. Jesus nemu semua utai ti diasuh Jehovah kereja kitai nya manah ke kitai. Jehovah enggai kitai ngereja sebarang utai ke ulih ngemediska kitai. Kati Jehovah deka nuan dibaptisa? Au, Iya deka. (SKR. 2:38) Nyadi enti nuan ngasika pesan ke ngasuh nuan dibaptisa, nuan ulih yakin nuan deka bulih penguntung. Kati nuan kakang ati deka makai pemakai ti amat nyamai? Tentu enda. Enti pia, nama kebuah nuan kakang ati deka dibaptisa deh?

20. Nama deka dikerandauka kitai ba artikel ke nangkanka tu?

²⁰ Nama kebuah betangguh? Mayuh orang engka madah, “Aku bedau besedia.” Kebendar iya, pemutus deka nyerahka diri ngagai Jehovah sereta dibaptisa nya pemutus ti pemadu penting ke deka digaga nuan. Nyadi, nuan patut berunding enggau manah pasal pemutus nya. Tu begunaka awak sereta usaha kena besedia. Tang enti nuan bisi pengingin deka dibaptisa, nama ulih digaga nuan diatu kena nyediaka diri? Kitai deka nyaut tanya nya ba artikel ke nangkanka tu.