1. Nama ulih dipeda orang lebuh sida terubah kali datai ngagai gempuru kitai? (Peda mega gambar.)

 GAMBARKA sepasang laki bini ti keterubah kali datai ngagai Palan Gempuru Saksi-Saksi Jehovah. Seduai iya amat rindu ati lebuh meda bala menyadi Kristian ngelaluka penatai seduai iya enggau manah. Lalu seduai iya mega beratika pengerindu ti diayanka bala menyadi Kristian enggau pangan diri. Lebuh seduai iya pulai ari gempuru, bini iya madah ngagai laki iya, ‘Sida tu enda sama enggau orang bukai ke kala ditemu tua, lalu aku amat rindu begulai enggau sida.’

2. Nama kebuah sekeda orang udah ngetu nyembah Jehovah?

² Pengerindu ke bisi entara nembiak Jehovah amat istimewa. Endang amat, Saksi-Saksi Jehovah enda sempurna. (1 Jhn. 1:8) Nya alai, lebuh kitai ngelala bala menyadi Kristian ba raban gempuru enggau manah agi, kitai deka senang agi meda pengelemi sida. (Rom. 3:23) Sayau amat, sekeda orang udah nejuka pengelemi orang bukai ngasuh sida ngetu nyembah Jehovah.

3. Baka ni orang ulih nemu sapa orang Kristian ti bendar? (John 13:34, 35)

³ Peratika baru ayat tema ke artikel tu. (Bacha John 13:34, 35.) Baka ni orang ulih nemu sapa orang Kristian ti bendar? Ari pengerindu ke diayanka sida ngagai pangan diri. Bup Kudus nadai madahka sida deka nyadi sempurna. Peratika mega, Jesus nadai nyebut: ‘Nuan deka nemu kita meh murid aku.’ Tang, iya nyebut: “Semua orang deka nemu kita meh murid aku.” Enggau tu, Jesus nunjukka orang bukai ke ukai ari raban  gempuru Kristian ulih nemu sapa murid iya ti bendar, iya nya ari pengerindu ti diayanka sida ngagai pangan diri. Utai tu ukai semina ulih dipeda bala murid Jesus aja.

4. Nama utai ti engka deka ditemu sekeda orang pasal orang Kristian ti bendar?

⁴ Orang ke ukai Saksi-Saksi Jehovah engka berunding: ‘Baka ni pengerindu nulung kitai nemu sapa murid Jesus ti bendar? Baka ni Jesus ngayanka pengerindu ngagai bala rasul iya? Baka ni kitai ulih neladan Jesus kemayaharitu?’ Bala Saksi Jehovah patut belematika saut ngagai tanya nya. Lebuh kitai ngereja tu, tu deka nulung kitai ngayanka pengerindu enggau manah agi, kelebih agi lebuh kitai meda pengelemi pangan diri.—Eps. 5:2.

5. Terangka jaku Jesus ke bisi ba John 15:12, 13.

⁵ Jesus nerangka bala murid iya deka rinduka pangan diri enggau chara ti istimewa. (Bacha John 15:12, 13.) Peratika pesan Jesus ke diberi ngagai sida: “Kita patut rinduka pangan diri, baka aku ke udah rinduka kita.” Nama reti nya? Baka ke diterangka Jesus, pengerindu tu reti iya kitai rinduka orang bukai lebih agi ari rinduka diri empu. Pengerindu tu mega reti iya kitai sanggup mati ke bala menyadi Kristian. b

6. Baka ni Jaku Petara nunjukka pemesai reti pengerindu?

⁶ Jaku Petara ngajar kitai pengerindu nya amat penting. Ambika chunto, tu meh sekeda ayat ke dikerinduka mayuh orang: “Petara nya pengerindu.” (1 Jhn. 4:8) “Nuan patut rinduka orang bukai baka nuan ke rinduka diri empu.” (Mat. 22:39) “Pengerindu ulih nutup mayuh dosa.” (1 Pet. 4:8) “Pengerindu enda nemu abis.” (1 Kor. 13:8) Sekeda ayat tu enggau ayat bukai enggau terang nunjukka kebuah nya penting ngayanka sifat ti manah tu.

7. Nama kebuah Sitan enda ulih ngajar orang rinduka pangan diri sereta beserakup?

⁷ Mayuh orang nanya: ‘Baka ni aku ulih  nemu ni bagi pengarap ti bendar? Semua pengarap ngumbai diri ngajar utai ti bendar, tang tiap iti pengarap nya ngajar utai ti bebida pasal Petara.’ Sitan udah ngaga mayuh pengarap ti pelesu lalu tu udah ngasuh orang tusah deka nemu ni bagi pengarap ti bendar. Tang, iya enda ulih nyerakupka semua orang ba serata dunya ngambika sida ulih rinduka pangan diri. Kitai nemu utai tu laban pengerindu datai ari Jehovah. Semina orang ke bisi kuasa kudus Jehovah sereta berekat ari Iya ulih ngembuan pengerindu ti bendar entara pangan diri. (1 Jhn. 4:7) Nya kebuah, Jesus madahka semina murid iya aja ke deka ngembuan pengerindu ti bendar ke pangan diri.

8-9. Nama kesan ngagai mayuh orang pengudah sida meda pengerindu ti diayanka entara Saksi-Saksi Jehovah?

⁸ Baka ke dipadah Jesus, mayuh orang udah nemu sapa murid iya ti bendar, iya nya nengah pengerindu ti bendar ke diayanka sida entara pangan diri. Ambika chunto, siku menyadi lelaki ke benama Ian ngenang baru maya terubah kali iya datai ngagai konvensyen. Konvensyen nya dipejalaika ba siti stadium ke semak rumah iya. Ian udah ngagai stadium nya beberapa bulan sebedau nya laban bisi meda pertandingan sukan ba dia. Ku iya: “Ulah orang ke ba konvensyen nya amat bebida enggau ulah orang ke datai meda pertandingan sukan. Bala Saksi manah enggau pangan diri lalu gari ke dikena sida mega amat manah. Ulah bala anak sida mega amat manah.” Iya nampung: “Aku meda sida puas ati sereta lantang amat. Nya meh utai ti dikedekaka aku ba pengidup aku. Aku enda entu ingat nama-nama cheramah ke diberi ba hari nya, tang aku agi ingat ulah ke diayanka bala Saksi Jehovah.” c Endang amat, ulah ke baka nya datai ari pengerindu ti bendar ke dikembuan kitai enggau pangan diri. Ketegal kitai rinduka bala menyadi Kristian, kitai ngintu sida enggau chara ti manah sereta bebasa.

⁹ Siku menyadi lelaki ke benama John mega ngasaika utai ti sama lebuh iya berengkah datai begempuru. Ku iya: “Aku amat alit ati enggau semua orang ba dia . . . sida amat manah enggau pangan diri. Ulah sida amat manah nyentukka aku ngumbai sida nya tentu sempurna. Pengerindu sida ti bendar ngasuh aku yakin aku udah tetemuka pengarap ti bendar.” d Pengalaman tu enggau mayuh agi pengalaman ke bukai nunjukka nembiak Jehovah nya orang Kristian ti bendar.

10. Kelebih agi, ni maya kitai bisi peluang ngayanka pengerindu Kristian? (Peda mega nota kaki.)

¹⁰ Baka ke dipadah ba pun artikel tu tadi, semua bala menyadi Kristian kitai enda sempurna. Kekadang, sida nyebut tauka ngereja utai ti ngemediska ati kitai. e (Jas. 3:2) Kelebih agi ba maya ti baka nya, kitai bisi peluang ngayanka pengerindu Kristian ari utai ti disebut sereta dikereja kitai. Bekaul enggau utai nya, nama ulih dipelajarka kitai ari teladan Jesus?—Jhn. 13:15.

11. Nama ulah ti enda manah ke diayanka James enggau John? (Peda mega gambar.)

¹¹ Jesus enda ngarapka bala murid iya sempurna. Tang, iya enggau pengerindu nulung sida mutarka pengelemi sida sereta ngaga ubah ngambika sida ulih ngelantangka ati Jehovah. Bisi sekali, dua iku rasul iya, James  enggau John, ngasuh indai seduai iya minta ari Jesus ngambika meri seduai iya penuduk ti tinggi ba Perintah Petara. (Mat. 20:20, 21) Utai ke digaga James seduai John nunjukka seduai iya sumbung sereta deka ngembuan penuduk ti tinggi agi ari orang bukai.—J-lam. 16:18.

12. Kati James enggau John aja ke bisi pengelemi? Terangka.

¹² Ukai James seduai John aja ke ngayanka ulah ti enda manah maya nya. Peratika reaksi bala rasul ke bukai: “Lebuh 10 iku murid ke bukai ninga nya, sida lalu pedis ati ngagai seduai menyadi nya.” (Mat. 20:24) Kitai ulih ngambarka James seduai John enggau bala rasul ke bukai balat bekelikuh enggau pangan diri. Engka bala rasul ke bukai nyebut baka tu: ‘Kati nuan ngumbai diri manah agi ari kami? Kati nya kebuah nuan minta penuduk ti tinggi agi ari kami ba Perintah Petara? Ukai nuan aja ke bebendar gawa enggau Jesus. Kami mega sama layak baka nuan nerima penuduk ti istimewa tu!’ Enda ngira nama utai ke diperunding tauka dipadah sida, maya nya sida enda ingat sida patut ngayanka pengerindu sereta pemanah ati ngagai pangan diri.

13. Nama reaksi Jesus ngagai pengelemi bala rasul iya? (Matthew 20:25-28)

¹³ Nama utai ke digaga Jesus? Iya enda ringat. Jesus enda madah, aku deka ngiga bala rasul ti manah agi, bala lelaki ti baruh ati agi sereta ulih seruran ngayanka pengerindu ngagai pangan diri. Tang Jesus enggau sabar bejaku ngagai sida laban iya nemu sida deka  ngereja utai ti betul. (Bacha Matthew 20:25-28.) Jesus seruran ngayanka pemanah ati ngagai bala rasul iya, taja pan sida suah bekelikuh pasal sapa ke besai agi entara sida.—Mrk. 9:34; Luk. 22:24.

14. Baka ni gaya pendiau ba endur alai bala rasul Jesus dibesaika?

¹⁴ Jesus tentu bisi berunding pasal latar belakang bala rasul iya. (Jhn. 2:24, 25) Bala penulis adat orang Judah sereta orang Parisi ngajar enti nuan nadai penuduk ti tinggi, nuan ukai orang ti penting. (Mat. 23:6) Bala tuai pengarap orang Judah mega ngumbai diri manah agi ari orang bukai. f (Luk. 18:9-12) Jesus nemu runding ke baka tu ulih ngachau chara bala rasul iya berunding pasal diri empu sereta orang bukai. (J-lam. 19:11) Nya alai, Jesus enda ngarapka bala rasul iya nyadi sempurna, tang iya sabar enggau sida lebuh sida ngereja penyalah. Iya nemu sida bisi ati ti manah. Nyadi, iya enggau sabar ngajar sida ngambika nyadi baruh agi ati sereta ngayanka pengerindu ngagai orang bukai. Lalu iya mega ngajar sida ngambika enda seruran nguji nyadi ti pemadu besai.

15. Nama ulih dipelajarka kitai ari utai ti nyadi entara James, John enggau bala rasul ke bukai?

¹⁵ Kitai ulih belajar mayuh utai ari situasi ke bekaul enggau James seduai John. Seduai iya salah laban minta penuduk ti tinggi ari Jesus ba Perintah Petara. Tang bala rasul ke bukai mega salah. Sida enda nguji mengkang beserakup. Taja pia, Jesus ngayanka pemanah ati sereta pengerindu ngagai semua 12 iku rasul iya. Nama ulih dipelajarka kitai? Utai ti penting ukai semina nama utai ke dikereja orang bukai, tang mega reaksi kitai ngagai penyalah sereta pengelemi sida. Nama ulih nulung kitai? Lebuh kitai pedis ati enggau bala menyadi Kristian ke bukai, kitai ulih nanya diri empu: ‘Nama kebuah utai ke digaga iya balat ngachau aku? Kati tu nunjukka aku bisi pengelemi ke patut diputarka aku? Kati orang ke ngenusahka ati aku nya bisi penanggul ke bukai? Taja pan aku bisi kebuah pedis ati, kati aku ulih ngayanka pengerindu lalu ngampunka orang nya?’ Lebuh kitai ngayanka pengerindu ngagai pangan diri, kitai nunjukka diri murid Jesus ti bendar.

16. Nama utai bukai ke ulih dipelajarka kitai ari teladan Jesus?

¹⁶ Teladan Jesus mega ngajar kitai ngambika nguji meretika bala menyadi Kristian kitai. (J-lam. 20:5) Amat, Jesus ulih macha ati mensia. Kitai enda ulih. Tang, kitai ulih sabar enggau bala menyadi Kristian kitai lebuh sida ngemediska ati kitai. (Eps. 4:1, 2; 1 Pet. 3:8) Kitai senang agi ngereja nya enti kitai ngelala sida enggau manah agi. Peratika siti chunto.

17. Baka ni siku tuai ti ngabas bulih penguntung lebuh iya ngelala siku menyadi Kristian enggau manah agi?

¹⁷ Siku tuai ti ngabas ngenang baru pasal siku menyadi Kristian lelaki ari siti raban gempuru ke diabas iya ba Afrika Timur. Terubah iya, tuai ti ngabas nya ngumbai menyadi nya bisi personaliti ti enda manah. Nama digaga tuai ti ngabas nya? Iya madah: “Ari ke nyeliahka diri ari menyadi lelaki nya, aku ngaga pemutus deka ngelala iya enggau manah agi.” Lebuh tuai ti ngabas nya begulai enggau menyadi lelaki nya, iya belajar pasal chara menyadi lelaki nya dibesaika lalu baka ni tu bisi kesan ngagai chara menyadi lelaki nya begulai enggau orang bukai. Tuai ti ngabas nya nampung agi: “Menyadi nya keran  deka ngaga ubah ngambika ulih begulai manah enggau orang bukai, taja pan nya tusah ba iya. Lebuh aku nemu pasal tu sereta beratika ubah ke udah digaga iya, nya ngasuh aku temegahka iya. Kami duai nyadi kaban ti manah.” Amat, lebuh kitai nguji ngelala bala menyadi Kristian kitai enggau manah agi, kesuah iya kitai deka senang agi ngayanka pengerindu ngagai sida.

18. Nama tanya ke ulih ditanya kitai empu enti siku menyadi Kristian ngemediska ati kitai? (Jaku Dalam 26:20)

¹⁸ Kekadang kitai engka ngasaika diri patut bejaku enggau siku menyadi Kristian ke udah ngemediska ati kitai. Tang keterubah iya, kitai patut nanya diri empu sekeda tanya tu: ‘Kati aku nemu semua utai ke nyadi?’ (J-lam. 18:13) ‘Kati iya sengaja deka ngemediska ati aku?’ (P-jar. 7:20) ‘Kati aku kala ngereja penyalah ti sama?’ (P-jar. 7:21, 22) ‘Enti aku bejaku enggau iya pasal utai tu, kati penanggul nya deka nyadi balat agi?’ (Bacha Jaku Dalam 26:20.) Lebuh kitai ngena awak berundingka tanya tu, kitai engka sedar pengerindu ulih meransang kitai badu agi berunding pasal utai ke udah nyadi.

19. Nama utai ti keran deka digaga nuan?

¹⁹ Saksi-Saksi Jehovah nunjukka sida murid Jesus ti bendar enggau ngayanka pengerindu ngagai pangan diri. Tiap iku kitai nunjukka diri murid Jesus ti bendar lebuh kitai ngayanka pengerindu ngagai bala menyadi Kristian kitai taja pan sida bisi pengelemi. Lebuh kitai ngayanka pengerindu ti enda berundingka diri empu, orang bukai mega engka ulih ngelala pengarap ti bendar sereta enggau kitai nyembah Jehovah, Petara ti bepengerindu. Aram meh kitai keran deka terus ngayanka pengerindu ti nyadi tanda orang Kristian ti bendar.