Nama kebuah lelaki ke dikumbai “unggal” nya madahka anak iya enda ulih bempu tanah nya ila enti iya kawin enggau Rut? (Rut 4:1, 6)

Ba jeman Bup Kudus, enti siku lelaki ke udah kawin mati tang nadai ngembuan anak, nama deka nyadi ngagai tanah ke diempu iya? Kati nama ruang bilik iya deka lenyau belama iya? Adat Moses deka nulung nyaut tanya tu.

Nama nyadi ngagai tanah ke diempu siku lelaki ke udah mati, tauka enti iya nyadi seranta lalu patut nyual tanah nya? Siku menyadi tauka kaban belayan ti rapat ulih nebus tauka meli baru tanah nya. Enggau chara tu, tanah nya deka terus diempu ruang bilik lelaki nya.—Lew. 25:23-28; P-pau. 27:8-11.

Baka ni tu ulih nentuka nama ruang bilik lelaki ke udah mati nya enda lenyau? Siku ari menyadi tauka kaban belayan lelaki ke mati nya deka jadi enggau balu iya. Tu meh utai ke nyadi ba Rut. Tuju iya ngambika balu menyadi iya tau bulih siku anak, tang anak nya deka ngembuan nama menyadi iya ke udah mati lalu anak nya deka nerima pesaka lelaki ke udah mati nya. Atur tu mega deka nyaga balu lelaki nya. —U-dat. 25:5-7; Mat. 22:23-28.

Peratika situasi Naomi. Iya jadi enggau siku lelaki ke benama Elimelek. Lebuh laki iya enggau dua iku anak lelaki iya mati, nadai lelaki bukai dalam ruang bilik iya ke ulih ngintu iya. (Rut 1:1-5) Lebuh Naomi enggau menantu iya, Rut, pulai ngagai Judah, iya ngasuh Rut nanya Boas ngambika ulih nebus tanah sida. Boas nya kaban belayan Elimelek ti semak. (Rut 2:1, 19, 20; 3:1-4) Tang Boas nemu bisi siku agi kaban belayan ke semak agi ngagai Elimelek. Bup Kudus ngangauka iya “unggal.” Nya alai, lelaki nya ke patut dulu nentuka sekalika iya deka nyadi orang ke nebus tauka enda.—Rut 3:9, 12, 13.

Terubah iya, lelaki ke dikumbai “unggal” tu sanggup deka nulung. (Rut 4:1-4) Iya nemu iya patut ngena duit kena meli tanah nya, tang iya mega nemu Naomi udah kelalu tuai kena bulih anak ke deka nyadi waris ke pesaka ari Elimelek. Nyadi, lelaki ke dikumbai “unggal” nya deka bulih tanah nya nyadika pesaka iya. Atur tu baka ke manah ba lelaki nya.

Tang lelaki nya ngubah runding iya lebuh iya nemu iya patut jadi enggau Rut. Iya madah: “Aku enda nyadi meli tanah nya, laban anak aku empu enda ulih bempu tanah nya ila.” (Rut 4:5, 6) Nama kebuah iya ngubah runding iya?

Enti lelaki ke dikumbai “unggal” nya tauka lelaki bukai jadi enggau Rut, lalu Rut ngadaka anak lelaki, anak nya deka nyadi waris ke tanah Elimelek. Baka ni tu deka ngachau pesaka lelaki ke dikumbai “unggal” nya? Bup Kudus enda nyebut, tang tu engka sekeda chara iya.

• Keterubah, iya deka lenyau duit ke dikena iya meli tanah Elimelek laban tanah nya enda ulih diempu iya. Tanah nya deka diempu anak lelaki Rut.

• Kedua, iya deka bisi tanggungjawap nyaga sereta ngintu Naomi enggau Rut.

• Ketiga, enti Rut enggau lelaki ke dikumbai “unggal” nya bisi anak bukai, anak nya deka bekunsika pesaka enggau anak ke bukai ari lelaki ke dikumbai “unggal” nya.

• Keempat, enti lelaki ke dikumbai “unggal” nya nadai anak, anak lelaki ke diadaka Rut deka bulih hak nerima tanah ari Elimelek enggau tanah ari iya. Nya alai, lebuh iya mati tanah iya deka diempu anak ke bisi nama Elimelek, ukai nama iya. Lelaki tu enggai lenyau pesaka iya ketegal nulung Naomi. Iya sanggup nejuka Boas ngambi tanggungjawap tu. Boas ngereja utai nya “ngambika pesaka tu mengkang diempu ruang bilik orang ke udah mati.”—Rut 4:10.

Lelaki ke dikumbai “unggal” nya keran agi deka ngetanka nama diri empu sereta pesaka ke diempu iya. Iya berundingka diri empu aja. Taja pan iya bebendar deka nyaga nama iya, tang nama iya lenyau sereta enda ditemu kitai kemayaharitu. Iya mega enda nerima peluang ti istimewa ke diterima Boas. Boas nyadi siku ari peturun ke nuju ngagai Messiah, iya nya Jesus Kristus. Sayau amat utai ke nyadi ngagai lelaki ke dikumbai “unggal” nya! Iya berundingka diri empu sereta enda sanggup nulung orang bukai.—Mat. 1:5; Luk. 3:23, 32.