1, 2. (a) Nama pemar ke ditapi sekeda ari bala menyadi Kristian kitai? (b) Nama tanya ke bekaul enggau utai tu?

“LEBUH perang entara raban bansa berengkah di Burundi, kami sebilik benung ba gempuru besai,” ku seiku menyadi Kristian lelaki ke benama Lije. “Kami meda orang rari, nimbak. Apai indai aku enggau kami menyadi 11 iku semina mai mimit aja utai lebuh rari nyelamatka diri. Pengudah bejalai penyauh lebih 1,600 kilometer (1,000 batu), sekeda ari kami sebilik datai ba kem pelari di Malawi. Sekeda da agi pambar ngagai endur bukai.”

² Di serata dunya, bisi lebih ari 65 juta iku bala pelari ninggalka rumah diri ketegal perang tauka diperinsa. Tu penyampau ti pemadu mayuh ke kala dirikut. * (Peda nota kaki.) Beribu iku ari sida nya Saksi-Saksi Jehovah. Mayuh ari sida udah lenyau orang ti dikesayauka sereta nyauka  semua utai dikemisi sida. Nama pemar bukai ke ditapi sida? Baka ni kitai ulih nulung bala menyadi Kristian kitai nyembah Jehovah sereta ngetanka pengaga ati lebuh sida merinsa ketegal penusah ke baka nya? (Mas. 100:2) Lalu nama chara ti pemadu manah ngambika ulih nginjil ngagai bala pelari ti bedau agi ngelala Jehovah?

3. Baka ni Jesus enggau mayuh ari bala murid iya nyadi bala pelari?

³ Jesus enggau apai indai iya nyadi pelari di menua Ejip pengudah seiku melikat Jehovah nangkan Josep pasal Raja Herod ke deka munuh Jesus. Sida diau dia nyentuk ngagai Herod mati. (Mat. 2:13, 14, 19-21) Betaun udah nya, bala murid Jesus “pambar ngagai serata menua Judea enggau Samaria” ketegal diperinsa. (SKR. 8:1) Jesus nemu, mayuh ari bala murid iya deka ninggalka rumah sida. Ku Jesus madahka: “Lebuh sida merinsaka kita ba nengeri siti, rari ngagai nengeri siti.” (Mat. 10:23) Ngerarika diri ketegal bisi utai nyadi nya ukai utai ti senang.

4, 5. Nama sekeda penusah ke ditapi bala pelari lebuh (a) ngerarika diri? (b) diau ba kem?

⁴ Lebuh bala pelari ninggalka rumah sida tauka diau ba kem pelari, sida napi mayuh macham penusah. Ku Gad, menyadi lelaki Lije ke biak agi madahka, “Beminggu kami bejalai, mansa beratus bangkai orang. Aku beumur 12 taun. Kaki aku balat kembai, nya alai aku ngasuh kami sebilik mupuk aja, lalu enda ibuh mai aku. Tang apai enggai ninggalka aku ditangkap raban ke ngelaban, lalu iya nulung aku. Kami semina irauka utai ti diguna sehari-hari, besampi ngagai Jehovah sereta bepanggai ba Iya, lalu kekadang kami semina bepakaika buah mangga ke dipansa kami ba rantau jalai.”—Plp. 4:12, 13.

⁵ Mayuh ari sida Lije sebilik betaun diau ba kem pelari ke disediaka Pertubuhan Bangsa-Bangsa Bersatu. Tang dia mega bisi penusah. Lije, ke nyadi tuai ti ngabas diatu, madahka: “Mayuh orang nadai kereja. Sida bejakuka orang, ngirup ai bisa, bejudi, ngenchuri, sereta ngereja ulah ti kamah.” Kena nyaga diri ari pengawa ti jai nya, bala Saksi patut mengkang kisuk ba eklisia. (Heb. 6:11, 12; 10:24, 25) Sida ngena jam enggau manah ngambika ulih mengkang kering dalam pemendar, lalu mayuh ari sida berengkah nyadi pengerintis. Sida nemu, sida enda semampai diau ba kem pelari, sama baka orang Israel ke enda agi diau di menua puang pengudah timpuh nya abis. Tu nulung sida ngembuan runding ti manah.—2 Kor. 4:18.

6, 7. (a) Baka ni pengerindu ngagai Petara meransang kitai nulung bala menyadi Kristian? (b) Beri siti chunto.

⁶ Pengerindu ngagai Petara meransang kitai ngayanka pengerindu ngagai bala menyadi Kristian kitai, kelebih agi lebuh sida napi penusah. (Bacha 1 John 3:17, 18.) Ngambika chunto, lebuh orang Kristian ba abad keterubah di Judea begunaka pemakai ketegal lapar pungkang, bala menyadi Kristian ke sama pengarap ngatur pengawa nulung sida. (SKR. 11:28, 29) Rasul Paul enggau Peter mega meransang orang Kristian nyambut pangan  diri ngagai rumah sida. (Rom. 12:13; 1 Pet. 4:9) Ketegal orang Kristian diperansang ngayanka pemanah ati ngagai bala menyadi Kristian ke nemuai ari endur bukai, kitai patut ngayanka pemanah ati ngagai bala menyadi Kristian kitai ke bisi penusah tauka ngagai sida ke udah diperinsa ketegal pengarap! * (Peda nota kaki.)—Bacha Jaku Dalam 3:27.

⁷ Apin lama ti udah, beribu iku Saksi-Saksi Jehovah ninggalka rumah sida ketegal perang sereta diperinsa di timur Ukraine. Tang, sekeda ari sida kena bunuh. Bala menyadi Kristian ba endur bukai di Ukraine sereta di Rusia ngelaluka mayuh bala menyadi Kristian ke ngerarika diri ngagai rumah sida. Di kedua-dua menua nya, bala menyadi Kristian mengkang neutral, “ukai enggi dunya,” lalu mengkang ransing nusui “Berita Manah.”—Jhn. 15:19; SKR. 8:4.

8, 9. (a) Nama pemar ke ditapi bala pelari di menua ti baru? (b) Nama kebuah kitai patut sabar nulung sida?

⁸ Sekeda bala pelari diau ba begian bukai di menua sida empu. Taja pia, mayuh sida ke bukai enda tau enda ngagai menua ti baru ke enda dikelala sida. Amat, bala perintah bisi meri sida pemakai, gari sereta endur alai diau, tang agi bisi pemar ke bukai. Ngambika chunto, pemakai engka enda sebaka enggau iya ke suah diempa sida. Sekeda ari sida ke datai ari menua ti angat engka enda nemu chara begari ba menua ti chelap. Sekeda da agi baru terubah iya belajarka chara ngena perengka moden.

⁹ Sekeda bala perintah bisi program ke nulung sida nelebaka diri enggau pengidup di menua ti baru. Tang kesuah agi sida diasuh ngintu diri empu pengudah beberapa bulan. Tu engka enda senang. Uji gambarka utai ke patut dipelajarka sida: jaku ti baru, adat ti baru, sereta undang-undang ti baru pasal sekeda utai baka mayar bil enggau chukai, penatai ke sekula, sereta chara disiplin anak! Ulih nuan sabar sereta bebasa lebuh nulung bala menyadi Kristian kitai ke napi pemar ke baka nya?—Plp. 2:3, 4.

10. Baka ni kitai ulih ngeringka pengarap bala pelari lebuh sida datai? (Peda gambar ba pun artikel.)

¹⁰ Kekadang bala menyadi Kristian kitai ke nyadi pelari tusah deka ngiga eklisia di menua nya ketegal piak ti bekuasa. Sekeda gerempung perintah ngemba enggai agi nulung bala menyadi Kristian kitai. Sida engka madahka diri enda ngemendarka bala menyadi Kristian diau di menua nya enti bala menyadi Kristian enggai nerima kereja ke nagang sida datai begempuru. Ketegal takut sereta berasai nadai daya, sekeda ari sida nerima kereja nya. Nya alai, endang beguna betemu enggau bala menyadi Kristian kitai nya enggau lengkas pengudah sida datai. Sida patut nemu kitai ibuhka sida. Pengibuh sereta bantu ke baka tu ulih ngeringka pengarap sida.—J-lam. 12:25; 17:17.

11. (a) Nama utai ti dulu diguna bala pelari? (b) Baka ni sida ulih ngayanka terima kasih?

¹¹ Kitai patut dulu meri bala menyadi  Kristian kitai pemakai, gari, tauka utai bukai ti diguna besehari-hari. * (Peda nota kaki.) Indah pemeri ti mit, baka siti nektai ngagai seiku menyadi Kristian lelaki, besai reti ba iya. Endang amat, bala pelari enda patut kelalu bepinta ke utai. Tang sida patut ngayanka terima kasih ke utai ti dikereja orang bukai ke sida. Tu deka ngagaka ati bala menyadi Kristian ke meri. Tang ke beguna agi, sida patut nyediaka utai ti diguna diri. Tu deka nulung sida nyaga nama diri sereta ngembuan kaul ti manah enggau bala menyadi Kristian sida. (2 Tes. 3:7-10) Tang, sida agi begunaka bantu ari kitai.

12, 13. (a) Baka ni kitai ulih mantu bala pelari? (b) Beri siti chunto.

¹² Kitai enda begunaka mayuh duit kena nulung bala pelari nya. Utai ke pemadu diguna sida, iya nya awak enggau pengerindu ari kitai. Ngambika chunto, nuan ulih ngajar sida chara ngena perengka pengangkut ke mensia mayuh, chara ngiga kereja tauka endur diau, chara meli pemakai ti manah ke pengerai tang enda mar, bagi institusi ke patut digiga lebuh bisi penanggul, tauka chara bulih perengka kena ngulihka duit lebih. Keberat agi, nuan ulih nulung sida nyadi  sebegian ari eklisia sida ti baru. Enti ulih, nyediaka perengka pengangkut ke sida kena datai begempuru. Nuan mega ulih nerangka chara ti pemadu manah nginjil ngagai orang ba kandang endur nya, lalu nuan ulih sama gawa enggau sida ba pengawa nginjil.

¹³ Lebuh empat iku bala pelari ke biak datai ba siti eklisia, beberapa iku tuai gempuru meri bantu ngagai sida. Bala tuai gempuru nya ngajar sida chara deriba kerita, naip surat, minta kereja, sereta ngajar chara magi jam ngambika sida ulih ngenuluka pengawa ke Jehovah. (Gal. 6:10) Enda lama udah nya, sida empat nyadi pengerintis. Ketegal bantu ari bala tuai gempuru sereta sida empu ke bebendar netapka juluk ati ba pengawa ke Jehovah, sida ngaga pemansang nyadi orang Kristian sereta nyeliahka diri nyadi begian ari dunya Sitan.

14. (a) Nama pengingin ke patut diseliahka bala pelari? (b) Beri siti chunto.

¹⁴ Sama baka bala menyadi Kristian ke bukai, bala pelari patut ngelaban pengingin sereta tekan ke deka ngenuluka reta lebih agi ari kaul sida enggau Jehovah. * (Peda nota kaki.) Lije, ke disebut ba pun tadi, sereta bala menyadi iya ingatka ajar ti beguna pasal arapka Jehovah ke diajar apai sida lebuh sida ngerarika diri. Ku sida madahka: “Iya muai siti-siti, sekeda utai ke enda entu beguna ke bisi dibai sida. Udah nya, iya ngangkatka beg ti kusung lalu enggau tuchum iya nyebut: ‘Peda! Tu aja ke diguna kita.’”—Bacha 1 Timoti 6:8.

15, 16. (a) Baka ni kitai ulih ngeringka pengarap bala menyadi Kristian? (b) Baka ni kitai ulih nulung sida ari segi emosi?

¹⁵ Bala pelari ukai semina begunaka pemakai enggau gari. Sida begunaka sukung ari segi emosi sereta jaku peransang ari Bup Kudus. (Mat. 4:4) Bala tuai gempuru ulih nulung enggau ngiga litaricha dalam jaku ke dikena sida sereta nulung sida ngiga bala menyadi Kristian ke bejaku ngena jaku sida. Tu beguna bendar laban mayuh ari sida udah ninggalka semua utai ke teleba digaga sida. Sida lelengauka diri sebilik, komuniti, sereta eklisia sida. Sida patut ngasaika pengerindu sereta pengasih Jehovah ba bala menyadi Kristian sida. Enti enda, sida engka ngiga bantu ari orang bukai ke sama menua tang ke enda nyembah Jehovah. (1 Kor. 15:33) Enti kitai ulih nulung sida ngasaika diri sebegian ari eklisia, kitai bekerejasama enggau Jehovah nyaga “orang kampar.”—Mas. 146:9.

¹⁶ Jesus enggau apai indai iya enda ulih pulai ke menua diri seagi-agi orang ke merinsaka sida agi merintah. Pia mega, bala pelari kemaya hari tu engka enda ulih pulai ngagai menua diri. Taja pia, sida ke bukai engka enggai pulai agi. Lije madahka, mayuh apai indai ke meda diri sebilik dipasung sereta dibunuh di menua sida, enggai mai anak sida pulai kin. Kena nulung bala menyadi Kristian, kitai patut “siruka pangan diri, rinduka pangan diri, nelap enggau pangan diri, sereta baruh ati.” (1 Pet. 3:8) Ketegal kala diperinsa, sekeda ari sida enggai begulai enggau orang bukai, lalu sida berasai  malu deka bejaku pasal pemerinsa diri, kelebih agi enti bala anak sida bisi dia. Tanya diri empu, ‘Enti aku ngasaika pemerinsa ti sama, baka ni aku deka orang bukai begulai enggau aku?’—Mat. 7:12.

17. Baka ni pengawa nginjil kitai ulih ngelantangka ati bala pelari?

¹⁷ Mayuh bala pelari kemaya hari tu datai ari menua ke alai pengawa nginjil kitai disekat. Terima kasih ngagai bala Saksi ke ransing laban udah nulung beribu iku bala pelari ningaka ‘pesan pasal Perintah Petara’ ke terubah iya. (Mat. 13:19, 23) Mayuh ari sida ke “lelak ngema utai ti berat” tetemuka pengelantang ati ba gempuru kitai lalu madahka: ‘Petara amat bisi enggau kita.’—Mat. 11:28-30; 1 Kor. 14:25.

18, 19. Baka ni kitai nunjukka diri nemu berunding lebuh nginjil ngagai bala pelari?

¹⁸ Kitai patut nemu berunding sereta “pintar” lebuh nginjil ngagai bala pelari. (Mat. 10:16; J-lam. 22:3) Sabar lebuh nuan mendingka sida bejaku, tang anang berandau pasal politik. Kitai patut nitihka iring ke diterima kitai ari pampang opis nyengkaum piak ti bekuasa di menua kitai ngambika enda ngenusahka diri empu tauka orang bukai. Ketegal sida datai ari jalai pengarap sereta adat ti enda sebaka, kitai patut nemu sereta bebasaka asai ati enggau runding sida. Ngambika chunto, orang ari sekeda menua bisi runding kediri empu pasal chara orang ke indu patut begari. Nya alai, lebuh kitai nginjil ngagai sida, endang manah enti begari enggau chara ti ngenyamaika ati sida.

¹⁹ Kitai deka nulung orang ke merinsa, nyengkaum orang ke enda nyembah Jehovah. Lebuh kitai ngereja nya, kitai nunda chunto manah seiku orang Samaria ba sempama Jesus. (Luk. 10:33-37) Chara ti pemadu manah kena nulung orang, iya nya ngajar sida pasal berita manah. Seiku tuai gempuru ke udah nulung mayuh bala pelari madahka, endang beguna kitai madahka diri Saksi-Saksi Jehovah. Awakka sida nemu, tuju kitai datai laban deka nulung sida nemu pengadang ti ngerinduka ati ke bisi dalam Bup Kudus, ukai deka nyediaka bantu ba keresa.

20, 21. (a) Nama pemanah enti ngayanka pengerindu ti bendar ngagai bala pelari? (b) Nama deka dipelajarka kitai pengudah artikel tu?

²⁰ Enti kitai ngayanka pengerindu ti bendar ngagai “orang kampar,” nya deka ngenataika asil ti manah. Seiku menyadi Kristian indu madahka, iya enggau sida sebilik ngerarika diri ketegal balat diperinsa di Eritrea. Empat iku ari bala anak iya bejalai pengelama lapan hari nengah menua puang. Pengudah lelak bejalai jauh, sida datai di Sudan. Ku iya madahka: “Bala menyadi Kristian dia ngintu kami baka kaban belayan ti nyempil, nyediaka pemakai, gari, endur diau, sereta perengka pengangkut. Sapa ke deka ngelaluka orang ti enda dikelala ngagai rumah sida ketegal sida nyembah Petara ti sama? Semina Saksi-Saksi Jehovah aja!”—Bacha John 13:35.

²¹ Baka ni enggau bala anak ke datai enggau apai indai sida? Pengudah artikel tu, kitai deka belajarka baka ni semua kitai ulih nulung sida nyembah Jehovah enggau ati ti gaga.