1. Nama kebuah sekeda orang lembau deka belajarka Bup Kudus?

KEMAYAHARITU, mayuh orang bebendar gawa ngulihka belanja kena beridup. Mayuh bala menyadi Kristian kitai ngena mayuh awak gawa nyediaka pemakai, gari, sereta endur diau ke diri sebilik. Bisi nya ngena mayuh awak berundang ngagai endur kereja. Lalu sekeda kereja berat tauka kereja kunterik kena ngulihka belanja ke diri sebilik. Ketegal nya sida berasai lelak amat nyentukka sida lembau deka belajarka Bup Kudus.

2. Kemaya nuan ngiga jam kena belajarka Bup Kudus?

² Endang amat, kitai enda tau enda ngiga jam kena bebendar belajarka Bup Kudus enggau litaricha kitai. Tu amat beguna enti kitai deka bulih kaul ti manah enggau Jehovah sereta bulih pengidup ti meruan belama iya! (1 Tim. 4:15) Sekeda dani tumu pagi laban maya nya sunyi lalu runding sida agi cheregas. Bisi sekeda nya ngena mimit awak lebuh lemai hari maya nadai utai ngachau. Sida ngena awak tu belajar sereta belematika Bup Kudus enggau litaricha kitai ke bukai.

3-4. Nama sekeda ubah ke udah digaga bekaul enggau pemayuh penerang ke patut dibacha sereta dipeda kitai? Nama kebuah ubah ke baka nya digaga?

³ Nuan tentu ngumbai kitai patut ngiga awak kena belajar. Tang nama patut dipelajar kitai? Nuan engka madah, “Utai ke dibacha kelalu mayuh. Tusah deka macha semua nya.” Sekeda ulih macha semua litaricha kitai sereta meda semua video  ti bepelasarka Bup Kudus ke diterima kitai. Tang ba sekeda bala menyadi, tu tusah amat. Raban ti Ngiring nemu semua tu. Nya alai, sida mutuska deka ngurangka penyampau penerang ke diterima kitai, enda ngira ke dichelak tauka ba internet.

⁴ Ambika chunto, kitai nadai agi ngeluarka bup ninting taun Saksi-Saksi Jehovah laban bisi mayuh cherita ti meransang ati ba jw.org^® enggau program ba Berita JW ninting bulan. Majalah Menara Jaga ke orang mayuh sereta Sedarlah! diatu dikeluarka tiga kali setaun. Ubah tu digaga ukai reti nya kitai ulih ngena mayuh agi awak ngereja pengawa bukai. Ubah nya digaga kena nulung kitai betatika “utai ti pemadu badas.” (Plp. 1:10) Nya alai, aram kitai berandauka baka ni nuan ulih nentuka ni bagi utai ke beguna agi sereta baka ni nuan tau bulih penguntung ari belajarka Bup Kudus.

5-6. Ni bagi litaricha ke patut dipelajarka kitai?

⁵ Nama utai ke patut dipelajarka kitai dulu? Kitai patut ngena awak belajarka Bup Kudus ninting hari. Penyampau ayat ba Bup Kudus ke patut dibacha ninting minggu udah dikurangka ngambika kitai bisi mayuh agi awak belematika utai ti dibacha sereta ngaga mayuh agi pansik. Juluk ati kitai ukai semina deka macha ayat Bup Kudus ke patut dibacha minggu nya, tang kitai deka ngawakka pesan ari Bup Kudus negu ati kitai sereta nulung kitai semak agi enggau Jehovah.—Mas. 19:14.

⁶ Nama utai bukai ke patut dipelajarka kitai? Endang amat kitai patut nyediaka saut ke majalah Menara Jaga ti dikena belajar, Gempuru Belajarka Bup Kudus, sereta utai bukai ke dikena ba gempuru tengan minggu. Kitai mega patut macha semua Menara Jaga ke orang mayuh enggau Sedarlah! ke udah dikeluarka.

7. Kati patut kitai berasai irau enti enda ulih macha sereta meda semua utai ke bisi ba laman web kitai tauka ba Berita JW?

⁷ Nuan engka madah, ‘Au meh, tang baka ni enggau semua utai bukai ke bisi ba laman web jw.org, pia mega utai ba Berita JW? Mayuh amat, enda alah bacha!’ Uji gambarka siti chunto: Mayuh bengkah pemakai ke nyamai disediaka ba restauran. Orang ke datai makai enda ulih nguji semua pemakai nya. Nya alai sida semina nguji beberapa iti pemakai aja. Pia mega, enti nuan enda ulih macha semua utai ke bisi ba laman web kitai, anang irau. Bacha tauka peda ni ke ulih nuan. Aram kitai berandauka utai ke patut digaga ngambika tau bulih mayuh agi penguntung lebuh belajar.

8. Nama sekeda chara ke ulih dikena nuan lebuh belajarka Menara Jaga? Baka ni chara nya ulih meri penguntung ngagai nuan?

⁸ Lebuh belajar, nuan beratika utai ke dibacha ngambika nuan ulih belajarka utai ti beguna. Belajar ukai reti nya macha enggau ngelansa sereta nandaka saut aja. Ambika chunto, maya nyediaka saut ke Menara Jaga dikena belajar, terubah-rubah, bacha lansa ke bisi ba pun artikel. Udah nya, bacha lalu perundingka tajuk artikel, anak tajuk, sereta tanya ba begian ulang kaji. Udah nya, belubah-lubah macha artikel nya. Peratika topik randau ba tiap iti genteran. Kesuah agi topik nya disebut ba pun tiap genteran. Topik nya deka madahka batang pekara ke deka dipejuraika ba genteran nya. Seraya nuan macha artikel nya, perundingka baka ni tiap iti  genteran nya nyukung tajuk mit enggau tema artikel nya. Tandaka leka jaku ke enda ditemu nuan sereta poin ke deka dipansik nuan enggau mayuh agi.

9. (a) Nama kebuah lalu baka ni kitai patut beratika ayat Bup Kudus lebuh kitai belajarka Menara Jaga? (b) Nitihka Josua 1:8, nama utai bukai ke patut digaga kitai lebuh macha ayat Bup Kudus?

⁹ Belajarka Menara Jaga ulih nulung kitai meretika Bup Kudus. Nya alai, peratika ayat Bup Kudus, kelebih agi ayat ti deka dibacha lebuh berandauka artikel nya ba gempuru. Peratika baka ni leka jaku kunchi tauka rambai jaku ba ayat nya nyukung poin ke dikerandau ba genteran. Pia mega, perundingka enggau dalam ayat ke dibacha nuan, sereta chara nuan ngena ayat nya ba pengidup.—Bacha Josua 1:8.

10. Nitihka Hebrew 5:14, nama kebuah apai indai patut ngajar anak chara belajar enggau ngaga pansik lebuh belajarka Bup Kudus ba diri sebilik?

¹⁰ Apai indai endang dekaka pengawa Belajarka Bup Kudus ba Diri Sebilik ninting minggu nya ngerinduka ati, kelebih agi ngagai bala anak. Tang, taja pan apai indai patut seruran merambu dulu pasal utai ke deka dikerandau ba tiap iti pengawa belajar nya, sida enda ibuh nyediaka utai ti spesial tauka ngalitka ati tiap kali belajar. Pengawa Belajarka Bup Kudus ba Diri Sebilik ulih dikena meda program ba Berita JW, tauka ngaga projek spesial baka ngaga bandung Noah. Taja pia, anak mega patut diajar chara belajar. Sida patut nemu chara nyediaka utai ti diguna ba gempuru. Ambika chunto, baka ni ngaga pansik bekaul enggau pekara ke ditapi sida ba sekula. (Bacha Hebrew 5:14.) Enti sida ngena awak belajarka subjek Bup Kudus ba rumah, sida deka senang agi meretika utai ti dikerandau ba gempuru ninting minggu, gempuru besai sehari, sereta konvensyen ke engka bisi begian ti nadai video. Sigi amat, pengelama belajar bepanggai ba umur enggau pendiau anak.

11. Nama kebuah nya beguna ngajar pemelajar Bup Kudus kitai chara belajar kediri empu?

¹¹ Pemelajar Bup Kudus kitai mega patut nemu chara belajar. Lebuh sida agi baru, kitai gaga ati meda sida semina nandaka saut lebuh nyediaka utai ke dikena sida belajarka Bup Kudus tauka ba gempuru. Tang kitai patut ngajar sida chara ngaga pansik sereta chara belajar kediri empu. Enggau chara nya,  sida nemu ngaga pansik kediri empu lebuh bisi napi penanggul, ari ke nanya bala menyadi Kristian ke bukai pasal utai ke patut digaga sida.

12. Nama sekeda juluk ati ke tau dikembuan kitai lebuh belajar?

¹² Enti nuan nya ukai orang ke rindu belajar, tentu nuan ngumbai diri enda ulih belajar. Tang kebendar iya nuan ulih. Nuan ulih berengkah belajar enda lama dulu, lalu udah nya belubah-lubah nambahka pengelama awak nuan belajar. Tetapka juluk ati lebuh belajar. Amat, juluk ati kitai iya nya deka semak agi ngagai Jehovah. Juluk ati ke ulih ditetapka kitai dulu iya nya nyaut tanya ari orang tauka ngaga pansik pasal penanggul ke ditapi kitai.

13. (a) Terangka chara bala nembiak ulih nerangka pengarap sida ba sekula. (b) Baka ni nuan ulih ngena jaku lalau ba Kolosi 4:6?

¹³ Ambika chunto, kati nuan agi besekula? Semua sida ke sekelas enggau nuan engka ngintu hari pengada. Nuan tentu deka ngena Bup Kudus nerangka kebuah nuan enda enggau sida ngintu hari pengada, tang nuan engka ngasaika diri enda ulih ngereja nya. Nya alai nuan patut belajar! Dua iti juluk ati nuan iya nya: (1) ngasuh nuan andal agi hari pengada nya pengerami ke enda ngelantangka ati Petara, lalu (2) ngemanahka agi chara nuan nerangka pemendar ari Bup Kudus. (Mat. 14:6-11; 1 Pet. 3:15) Uji perundingka kebuah sida ngintu hari pengada. Udah nya, ngaga pansik ari litaricha kitai. Ngetanka pengarap engka enda tusah baka ke disadang nuan. Mayuh orang ngintu hari pengada ketegal sida ngumbai semua orang ngintu nya. Enti nuan bisi tetemuka siti tauka dua iti poin lebuh ngaga pansik, nuan ulih nulung sida ke amat deka nemu pasal pemendar.—Bacha Kolosi 4:6.

14-16. (a) Baka ni nuan ulih nemu mayuh agi pasal bup mit ba Bup Kudus ke enda tentu dikelala nuan? (b) Terangka baka ni ayat ke dikena ulih nulung nuan meretika bup Amos enggau mayuh agi. (Peda mega kutak “ Nemu Mayuh Agi Pasal Orang ba Bup Kudus!”)

¹⁴ Ambika chunto, ba gempuru ke deka datai, nuan deka belajar pasal siti ari bup mit ke pandak ba Bup Kudus (Bup Hosia ngagai Malaki) ke ngembuan jaku ti benabi. Sida nabi ke nulis bup nya engka enda tentu dikelala nuan. Utai ke dulu digaga nuan iya nya nambahka pengingin deka nemu mayuh agi pasal utai ke ditulis sida. Baka ni nuan ulih ngereja nya?

¹⁵ Keterubah, tanya diri empu: ‘Nama ditemu aku pasal penulis bup tu? Sapa iya, dini iya diau, nama kereja iya?’ Lebuh kitai belajar mayuh agi pasal penulis nya, kitai engka mereti agi kebuah iya ngena siti-siti leka jaku tauka sempama. Lebuh nuan belajarka Bup Kudus, peratika rambai jaku ke nulung nuan ngelala sapa penulis nya kebendar iya.

¹⁶ Manah mega enti nuan ulih nemu kemaya bup nya ditulis. Nuan ulih mansik nya enggau meda video jaku pemuka ke bup ba Bup Kudus. * Nambahka nya, nuan ulih meda Ripih Kar ke bisi ba begian belakang Bup Kudus Baru. Ripih nya ngembuan 8 iti kar pasal jeman Bup Kudus. Enti bup mit ba Bup Kudus ke dipelajar nuan nya pasal jaku ti benabi, nuan tentu deka nemu pasal utai ke benung nyadi lebuh bup nya ditulis. Nama ulah tauka pengawa ti jai ke digaga orang ke ngujungka  nabi nya dikirum kia ngambika nulung sida nyeliahka ulah nya? Sapa ke serambau enggau iya? Kena meretika tu, nuan engka patut mansik bup mit ke bukai. Ambika chunto, kena nemu utai ke nyadi maya jeman nabi Amos, nuan ulih macha ayat ba bup 2 Raja 14:23-29 enggau 2 Bansa Israel 26:1-23. * Nuan mega ulih ngelansa utai ke ditulis Hosea ke engka serambau enggau Amos. Semua tu deka nulung nuan meretika pengidup orang maya jeman Amos.—Hos. 1:1-11; Amo. 1:1.

17-18. Kena chunto ba genteran tauka chunto ari nuan empu kena nunjukka penerang ti mit ulih nulung nuan bisi pengingin deka belajarka Bup Kudus.

¹⁷ Lebuh macha Bup Kudus, endang manah enti kitai bisi pengingin deka belajar mayuh agi. Ambika chunto, nuan benung macha Luke bagi 11 ke nyebut pasal “tanda nabi Jonah.” (Luk. 11:29, 30) Ari ke semina ngelansa aja, ngetu lalu tanya diri empu: ‘Nama reti “tanda nabi Jonah”? Kati bisi chara bukai tau bulih mayuh agi penerang?’ Nuan ulih ngaga pansik. Peda ba Watchtower Librari Online lalu taip “tanda nabi Jonah” ba begian giga. Nya deka mai nuan ngagai Matthew 12:39, 40. Nuan tentu deka nemu mayuh agi! Nuan beratika, Jesus empu madahka diri deka mati lalu ba hari ti ketiga iya deka diangkatka idup baru. Endang ngalitka ati laban Jesus meri tanda ke madahka pengelama iya deka dalam pendam.

¹⁸ Peratika siti agi chunto. Ba Luke bagi 1, kitai macha pasal melikat Gabriel ti nemuai ngagai Maria lalu madah pasal anak ti deka diadaka iya: ‘Iya deka nyadi orang ke tinggi pangkat, lalu iya deka dikumbai Anak Petara  ti Pemadu Tinggi, lalu Petara Jehovah deka meri iya kerusi diraja aki iya David. Iya deka merintah peturun Jakop belama iya.’ (Luk. 1:32, 33) Kesuah agi kitai semina beratika utai ke disebut Gabriel ke madahka Jesus deka dikumbai ‘Anak Petara ti Pemadu Tinggi.’ Tang Gabriel mega madahka, Jesus deka “merintah” nyadi Raja. Nya alai kitai nanya diri empu, nama reti jaku tu ba Maria. Kati Maria ngumbai Jesus deka nyadi pemerintah ba menua Israel nganti Raja Herod tauka seiku ari peturun Herod? Enti Jesus amat nyadi raja, Maria tentu nyadi indai raja, lalu sida Maria sebilik tentu deka diau ba istana. Tang Bup Kudus nadai madahka Maria nyebut nya ngagai Gabriel. Kitai mega nadai kala macha pasal Maria minta pangkat nya ba Perintah Petara, baka ke digaga dua iku murid Jesus. (Mat. 20:20-23) Penerang tu nulung kitai nemu Maria amat baruh ati!

 19-20. Nitihka James 1:22-25 enggau 4:8, nama juluk ati kitai lebuh belajar?

¹⁹ Kitai patut seruran ingat, tuju kitai belajarka Bup Kudus sereta litaricha kitai ke bukai laban kitai deka semak agi ngagai Jehovah. Kitai mega deka meratika diri empu lalu nentuka chara kitai ulih ngaga ubah kena ngelantangka ati Petara. (Bacha James 1:22-25; 4:8.) Tiap kali berengkah belajar, kitai patut minta bantu ari roh kudus Petara. Kitai patut minta Petara nulung kitai bulih mayuh agi penguntung ari utai ke dibacha sereta nulung kitai meda sapa kitai kebendar iya ngambika ulih ngaga ubah ba pengidup.

²⁰ Arapka semua kitai baka nembiak Petara ke tetap ati ti disebut pemasmur: ‘Gaga ati ke Adat Jehovah, lalu belematika Adat nya siang malam. . . . Iya mujur dalam semua utai ti dikereja iya.’—Mas. 1:2, 3.