ARTIKEL DIPELAJAR 19
Sapa ke Nyadi “Raja Utara” ba Pengujung Dunya?
“Ba pengujung dunya, iya [raja utara] enggau raja selatan deka belaban enggau pangan diri.”—DAN. 11:40, NWT.
LAGU 150 Giga meh Petara Ngambika Ulih Selamat
DALAM ARTIKEL TU *
1. Nama ulih ditemu kitai ari jaku ti benabi ba Bup Kudus?
NAMA deka nyadi ngagai nembiak Jehovah enda lama agi? Kitai ulih nemu saut iya ari jaku ti benabi tauka utai ke dipadah ba Bup Kudus. Jaku ti benabi nulung kitai nemu pekara besai ke deka nyadi ngagai semua kitai jemah ila. Siti ari jaku ti benabi nya bekaul enggau utai ti deka digaga sekeda perintah mensia. Nya bisi ditulis ba Daniel bagi 11. * Dia bisi madahka dua iku raja ti bekuasa ba dunya, iya nya raja utara enggau raja selatan. Seduai iya belaban enggau pangan diri. Mayuh utai ke dipadah ba Daniel bagi 11 udah dikeamatka. Nya alai kitai pechaya, utai bukai ke dipadah ba Daniel bagi 11 pasal dua iku raja nya mega deka dikeamatka.
2. Nitihka Pemungkal 3:15 sereta Pemandang 11:7 enggau 12:17, nama pekara ke patut dikingatka kitai lebuh belajarka Daniel bagi 11?
2 Enti deka meretika utai ke dipadah ba Daniel bagi 11, kitai patut ingatka pekara tu. Daniel bagi 11 semina berandau pasal bala perintah ke nyerang tauka merinsaka nembiak Jehovah. Penyampau nembiak Jehovah ba dunya mimit aja. Tang nama kebuah bala perintah nyerang sida? Nya ketegal Sitan enggau orang ke nyukung iya deka ngemunaska sida ke ngasika Jehovah seduai Jesus. (Bacha Pemungkal 3:15 enggau Pemandang 11:7; 12:17) Kelimpah ari nya, utai ke ditulis Daniel patut sejalai enggau jaku ti benabi ke bukai ba Bup Kudus. Nya alai, kitai patut meresa ayat Bup Kudus ke bukai ngambika ulih meretika Daniel bagi 11.
3. Nama deka dikerandauka kitai ba artikel tu enggau artikel pengudah tu?
3 Diatu, kitai deka berandau pasal Daniel 11:25-39. Kitai deka ngelala sapa ke nyadi raja utara enggau raja selatan berengkah ari taun 1870 ngagai 1991. Kitai mega deka beratika kebuah kitai patut ngaduka baru penemu kitai bekaul enggau jaku ti benabi nya. Ba artikel pengudah tu, kitai deka berandauka Daniel 11:40–12:1. Kitai mega deka ngaduka baru penemu kitai pasal utai ke nyadi berengkah ari taun 1991 nyentuk ngagai perang Armagedon. Lebuh belajarka dua iti artikel tu, peda meh charta “Dua Iku Raja ke Belaban ba Pengujung Dunya.” Tang keterubah, kitai patut ngelala sapa dua iku raja ke disebut ba Daniel bagi 11.
BAKA NI KITAI ULIH NGELALA SAPA DUA IKU RAJA NYA?
4. Nama tiga iti pekara ke patut diperatika kitai enti deka ngelala sapa dua iku raja nya?
4 Suba, gelar “raja utara” dituju ngagai perintah bukai ba utara menua Israel, lalu gelar “raja selatan” dituju ngagai perintah bukai ba selatan menua Israel. Nama kebuah kitai nyebut munyi nya? Peratika utai ke dipadah seiku melikat ngagai Daniel. Ku melikat nya: “Aku udah datai ditu laban aku deka ngasuh nuan meretika utai ti deka nyadi ba bala nembiak nuan [nembiak Petara] jemah ila.” (Dan. 10:14) Bansa Israel menya agi nyadi nembiak Jehovah nyentuk ngagai Pentikos 33 M. Tang pengudah nya, Jehovah milih bala murid Jesus ke tetap ati nyadika nembiak Iya. Nya alai mayuh ari utai ke disebut ba Daniel bagi 11 nya pasal murid Jesus, ukai pasal bansa Israel. (SKR. 2:1-4; Rom. 9:6-8; Gal. 6:15, 16) Lalu perintah ke nyadi raja utara enggau raja selatan deka suah berubah. Taja pia, bisi utai ke sama ba seduai iya. Kesatu, seduai iya bela nyerang tauka merinsaka nembiak Jehovah. Kedua, utai ke digaga seduai iya ngagai nembiak Jehovah nunjukka seduai iya begedika Petara Jehovah. Lalu ketiga, seduai iya besemekih enggau pangan diri ketegal deka bekuasa.
5. Kati bisi raja tauka perintah ke tau dikumbai raja utara enggau raja selatan entara abad ke-2 Masihi ngagai abad ke-19 Masihi? Terangka.
5 Enda lama pengudah abad ke-2 Masihi, majak mayuh orang Kristian ti pelesu ke mai ajar ti bula tama ngagai eklisia Kristian ti bendar. Sida mai ajar ti bula lalu tu ngasuh pemendar ari Bup Kudus enda ditemu orang. Kenyau ari jeman nya nyentuk ngagai ujung abad ke-19, nadai gerempung Petara ba dunya. Baka rumput ke tumbuh ba umai, Kristian ti pelesu majak mayuh, lalu tu ngasuh Kristian ti bendar tusah deka dikelala. (Mat. 13:36-43) Nama kebuah kitai patut nemu pekara tu? Laban nya nunjukka nadai raja tauka perintah ke tau dikumbai raja utara enggau raja selatan entara abad ke-2 Masihi ngagai abad ke-19 Masihi. Lalu maya nya nadai nembiak Petara ke udah diatur nyadi siti gerempung ke tau diserang sida. * Taja pia kitai pechaya, raja utara enggau raja selatan deka pegari enda lama pengudah taun 1870. Baka ni kitai nemu?
6. Kemaya nembiak Jehovah nyau ulih dikelala baru? Terangka.
6 Kenyau ari taun 1870, nembiak Petara belabuh nyadi siti raban. Ba taun nya mega, Charles T. Russell enggau bala bakih iya numbuhka kelas belajarka Bup Kudus. Sida nyadi seruan ke “nyendiaka jalai” sebedau Perintah Messiah ditumbuhka. (Mal. 3:1) Sekali agi, nembiak Jehovah nyau ulih dikelala baru! Kati maya nya bisi perintah ke nyerang sida? Aram kitai beratika sekeda pekara tu.
SAPA KE NYADI RAJA SELATAN?
7. Sapa ke nyadi raja selatan nyentuk ngagai Perang Dunya I?
7 Kira-kira ba taun 1870, perintah Britain megai mayuh endur enti dibanding enggau menua bukai, lalu iya ngembuan raban soldadu ti pemadu kering. Perintah Britain digambarka baka siti tanduk ti mit ke ngalahka tiga iti tanduk ti bukai, iya nya menua Perancis, Sepanyol, enggau Belanda. (Dan. 7:7, 8) Lalu Britain nyadi raja selatan nyentuk ngagai Perang Dunya I. Maya nya mega, Amerika Serikat nyadi menua ti pemadu kaya ba dunya lalu berengkah begempung enggau Britain.
8. Sepemanjai hari ti penudi, sapa ke nyadi raja selatan?
8 Maya Perang Dunya I, Britain enggau Amerika Serikat begempung ba perang lalu nyadi raban soldadu ti kering. Maya nya mega, seduai iya nyadi Kuasa Dunya Anglo-Amerika. Baka ke dipadah Daniel, raja tu ngempuruka “bala soldadu ti mayuh sereta kering.” (Dan. 11:25) Sepemanjai hari ti penudi, Britain enggau Amerika Serikat nyadi raja selatan. * Tang, sapa ke nyadi raja utara?
SAPA KE NYADI RAJA UTARA?
9. Kemaya raja utara pegari, lalu baka ni Daniel 11:25 dikeamatka?
9 Ba taun 1871, raja utara pegari. Tu nyadi setaun pengudah Russell enggau bala bakih iya numbuhka raban ke belajarka Bup Kudus. Taun nya, Otto von Bismarck nyerakup beberapa buah endur lalu numbuhka perintah Jerman. Raja Prussia Wilhelm I nyadi raja sida ti keterubah, lalu iya milih Bismarck nyadi ketuai * ba perintah Jerman. Bepuluh taun udah nya, Jerman nguasa sekeda menua ba Afrika enggau ba Tasik Pasifik, lalu nguji deka bekuasa agi ari Britain. (Bacha Daniel 11:25 ari nota kaki.) * Raban soldadu Jerman besai lalu nyauka sama kering enggau enggi Britain. Ba Perang Dunya I, Jerman ngena raban soldadu iya ngelaban munsuh.
10. Baka ni Daniel 11:25b, 26 dikeamatka?
10 Udah nya, Daniel madah pasal utai ke deka ninggang perintah Jerman enggau raban soldadu iya. Daniel madahka raja utara “enda ulih mujur.” Nama kebuah? Laban iya “deka kena tipu.” Sapa ke nipu iya? “Bala penyanding penemu ti nyempil enggau iya, deka ngerusak iya.” (Dan. 11:25b, 26a) Maya jeman Daniel, “bala penyanding penemu ti nyempil enggau iya” nyengkaum bala pemesai ke gawa ba istana. Nya alai, rambai jaku nya dituju ngagai bala pegawai ke tinggi pangkat ba perintah Jerman, nyengkaum bala jeneral, enggau bala pegawai soldadu ke bekereja enggau raja. Ketegal utai ke digaga sida, raja lenyau kuasa, lalu perintah ti baru ditumbuhka ba Jerman. * Daniel mega madah pasal utai ke nyadi ba raja utara ketegal beperang ngelaban raja selatan. Ku Daniel madah: “Bala soldadu iya deka lus dibunuh.” (Dan. 11:26b) Utai ke dipadah Daniel nya amat nyadi. Ba Perang Dunya I, soldadu Jerman dialahka lalu penyampau orang ke mati ba perang nya mayuh agi ari penyampau orang ke mati ba perang bukai sebedau nya.
11. Nama digaga raja utara enggau raja selatan?
11 Daniel 11:27, 28 nerangka utai ke nyadi sebedau Perang Dunya I. Raja utara enggau raja selatan deka ‘duduk begulai ba siti mija’ lalu “ngemulaka pangan diri.” Pia mega, raja utara deka ngumpul mayuh reta. Nya meh utai ke nyadi ba perintah Jerman enggau Britain. Seduai iya madahka deka bebaik tang nya bula. Ba taun 1914, seduai iya nyau beperang enggau pangan diri. Lalu ba taun 1914, Jerman nyadi menua ti kedua kaya ba dunya. Pia mega, utai ke dipadah ba Daniel 11:29 enggau begian keterubah ayat 30 dikeamatka lebuh Jerman alah beperang ngelaban raja selatan.
DUA IKU RAJA NYA NYERANG NEMBIAK PETARA
12. Maya Perang Dunya I, nama digaga raja utara enggau raja selatan ngagai nembiak Jehovah?
12 Kenyau ari taun 1914, dua iku raja nya majak charut enggau pangan diri sereta balat nyerang nembiak Petara Jehovah. Ambika chunto, ba Perang Dunya I, perintah Jerman enggau perintah Britain merinsaka nembiak Petara ke enggai nyadi soldadu. Lalu perintah Amerika Serikat ngejil sida ke ngiring pengawa nginjil. Pengawa merinsaka nembiak Petara ngamatka jaku ke dipadah ba Pemandang 11:7-10.
13. Kenyau ari taun 1933 sereta maya Perang Dunya II, nama digaga raja utara ngagai nembiak Petara?
13 Udah nya, kenyau ari taun 1933 lalu kelebih agi maya Perang Dunya II, raja utara nyerang nembiak Petara enggau naka pemalat. Lebuh sida Nazi megai Jerman, Hitler enggau sida ke nyukung iya nagang pengawa nembiak Petara. Sida munuh kira-kira 1,500 iku nembiak Petara lalu nganjung beribu iku sida ngagai kem alai ngetanka orang tangkap. Pekara tu bisi dipadah Daniel. Ku Daniel nulis: “Bala soldadu iya deka ngamahka Rumah Sembiang. Sida deka madamka pengawa ti beberika piring tiap hari.” (Dan. 11:30b, 31a) Sida Nazi tauka raja utara ngamahka “Rumah Sembiang,” lebuh sida balat merinsaka nembiak Jehovah ke dipilih ke serega sereta bala bakih sida. Ketegal nya, “pengawa ti beberika piring tiap hari” enda ulih dipejalaika nembiak Petara. Reti nya pengawa nginjil sida nyau deka teketu. Hitler, ke nyadi ketuai menua Jerman indah besemaya deka ngemunaska nembiak Petara ba menua nya.
RAJA UTARA TI BARU
14. Sapa ke nyadi raja utara pengudah Perang Dunya II? Terangka.
14 Pengudah Perang Dunya II, perintah Komunis Soviet Union nyadi raja utara. Iya berengkah nguasa mayuh endur ke dipegai Jerman. Soviet Union mega jai sereta kasar baka perintah Nazi. Sida merinsaka semua orang ke ngenuluka sembah ngagai Petara Jehovah ari ke taluk ngagai perintah menua.
15. Nama digaga raja utara pengudah Perang Dunya II abis?
15 Enda lama pengudah Perang Dunya II abis, raja utara ke baru, iya nya Soviet Union enggau menua ke nyukung iya merambu deka nyerang nembiak Petara. Sejalai enggau utai ke dipadah ba Pemandang 12:15-17, raja nya nagang pengawa nginjil kitai lalu beribu iku nembiak Jehovah dibuai ngagai Siberia. Nya endur ti tusah alai diau. Nya alai, kenyau hari ti penudi berengkah, raja utara majak merinsaka nembiak Petara, tang iya enda ulih ngetuka pengawa nembiak Petara. *
16. Baka ni Soviet Union ngamatka jaku ba Daniel 11:37-39?
16 Bacha Daniel 11:37-39. Kena ngamatka jaku nya, raja utara enggai “ibuhka petara ti udah dipetuaika bala aki ini iya.” Baka ni iya nunjukka nya? Soviet Union deka muai semua jalai pengarap. Nya alai sida nguji deka ngerampas kuasa ke dikembuan jalai pengarap. Kena nyapai tuju sida, berengkah ari taun 1918, Soviet Union udah ngaga atur ngambika topik pasal Petara enda diajar ba sekula. Baka ni raja utara “ngemesaika petara ti nyaga kuta”? Perintah Soviet Union ngena mayuh duit negapka raban soldadu iya lalu ngasilka beribu iti senyata nuklear ngambika iya bekuasa agi. Nyau kelama, raja utara enggau raja selatan bisi chukup senyata kena munuh bebiliun iku orang!
DUA IKU RAJA NYA BEGEMPUNG ENGGAU PANGAN DIRI
17. Nama “Utai Ti Balat Jai ke mai pengerusak” ti ditumbuhka dua iku raja nya?
17 Raja utara begempung enggau raja selatan ba siti pekara ti besai iya nya, “nirika Utai Ti Balat Jai ke mai pengerusak.” (Dan. 11:31, NWT) “Utai Ti Balat Jai” nya Pertubuhan Bangsa-Bangsa Bersatu.
18. Nama kebuah Pertubuhan Bangsa-Bangsa Bersatu dikumbai “Utai Ti Balat Jai”?
18 Pertubuhan Bangsa-Bangsa Bersatu dikumbai “Utai Ti Balat Jai” laban iya madahka ulih mai pemaik ba dunya ke semina ulih dibai Perintah Petara. Lalu Daniel madahka utai ti balat jai nya “mai pengerusak” laban Pertubuhan Bangsa-Bangsa Bersatu deka nyerang lalu muai semua pengarap pelesu.—Peda charta “Dua Iku Raja ke Belaban ba Pengujung Dunya.”
NAMA KEBUAH KITAI PATUT NEMU PASAL RAJA UTARA ENGGAU RAJA SELATAN?
19-20. (a) Nama kebuah kitai patut nemu pasal raja utara enggau raja selatan? (b) Nama tanya ke deka disaut ba artikel pengudah tu?
19 Kitai patut nemu pasal raja utara enggau raja selatan laban nya nunjukka utai ke dipadah Daniel amat nyadi kenyau ari taun 1870 nyentuk ngagai taun 1991. Nya alai, kitai ulih arapka utai bukai ke dipadah Daniel pasal dua iku raja nya deka dikeamatka.
20 Ba taun 1991, Soviet Union dialahka. Nya alai, sapa ke deka nyadi raja utara kemayaharitu? Artikel pengudah tu deka nyaut tanya nya.
LAGU 128 Betan Dataika Ujung
^ per. 5 Utai ke dipadah nabi Daniel pasal “raja utara” enggau “raja selatan” majak dikeamatka. Baka ni kitai nemu? Nama kebuah kitai patut meretika utai ke dipadah Daniel pasal dua iku raja nya?
^ per. 1 Ngambika sejalai enggau leka jaku asal ke dikena nulis Bup Kudus, leka jaku “raja Siria” diganti ngena “raja utara” lalu leka jaku “raja Ejip” diganti ngena “raja selatan,” ke diambi ari Daniel bagi 11. Nya alai ba artikel tu enggau artikel pengudah tu, kitai deka suah ngena leka jaku “raja utara” enggau “raja selatan.”
^ per. 5 Nya alai, kitai enda agi ngumbai Raja Besai Aurelian ari menua Rome (270-275 M.) nya “raja utara” tauka Kuin Zenobia (267-272 M.) nya “raja selatan.” Penemu baru tu dikena ngaduka penemu lama ba pelajar 13 enggau 14 dalam bup Perhatikanlah Nubuat Daniel! dalam jaku Indonesia.
^ per. 8 Peda kutak “ Kuasa Dunya Britain enggau Amerika Serikat ba Jaku ti Benabi dalam Bup Kudus.”
^ per. 9 Ba taun 1890, Raja Besai Wilhelm II muai Bismarck ari nyadi ketuai perintah Jerman.
^ per. 9 Daniel 11:25, NWT: “Enggau ati ti berani iya deka ngempuruka mayuh bala soldadu kena iya nyerang raja selatan ke sedia deka ngelaban iya ngena bala soldadu ti mayuh sereta kering. Tang raja utara deka kena tipu, lalu iya enda ulih mujur.”
^ per. 10 Mayuh utai digaga bala pegawai ke ngasuh perintah Jerman jampat dialahka. Ambika chunto, sida badu nyaup raja, madahka resia ke tau ngasuh sida alah ba perang ngagai munsuh, lalu ngansak raja badu merintah.
^ per. 15 Nitihka Daniel 11:34, raja utara ngetu merinsaka nembiak Petara enda lama. Tu nyadi pengudah Soviet Union dialahka ba taun 1991.
