Utai ke nyadi nya ngubah pengidup aku. Maya nya aku berengkah deka ngiga Penempa. Tang sebedau aku nusui utai ke nyadi maya malam nya, aku deka madahka utai ti nyadi maya aku agi mit ti ngasuh aku deka belajar mayuh agi pasal Petara.

Aku ada ba taun 1937 ba Guesnain, siti bandar ba utara Perancis. Bandar tu bisi mayuh lumbung arang. Apai aku, gawa ba lumbung arang, lalu iya ngajar aku kebuah nya beguna bebendar gawa. Apai aku mega ngajar aku begedika ulah ti enda lurus. Iya meda mayuh pekereja ba lumbung arang enda diintu enggau manah lalu endur gawa sida ulih nganu nyawa sida. Ketegal nya, Apai aku deka nulung sida. Ngambika ulih ngereja nya, iya enggau gerempung ke ngetanka hak pekereja lumbung arang. Iya mega ringat enggau ulah bala paderi. Mayuh ari sida idup enggau senang, tang sida agi minta pekereja lumbung ke seranta meri sida pemakai sereta duit. Ulah tu ngasuh apai aku amat ringat nyentukka iya enda ngajar aku pasal  jalai pengarap. Kami nadai kala bejaku pasal Petara.

Lebuh aku mansang besai, aku mega begedika ulah ti enda lurus. Siti utai ke dikumbai aku enda lurus, iya nya mayuh orang ngelingi aku enda rindu orang ke datai ari menua bukai ke diau di Perancis. Aku rindu bemain bul enggau anak orang ari menua bukai, lalu rindu begulai enggau sida. Pia mega, indai aku rayat Poland, ukai orang Perancis. Nya alai, aku deka orang ari bemacham bansa diau begulai enggau pemaik sereta enda bechiping.

Aku dikangau enggau pengawa soldadu ba taun 1957. Lalu aku dianjung ngagai bukit ba menua Algeria baka ke disebut ba pun cherita tu. Pengudah aku nyabak minta tulung ngagai Petara, aku nyau nemu bunyi tapa kaki ke didinga aku nya ukai ari soldadu munsuh, tang ari seiku keledai! Aku enda berasai kesal agi! Tang, utai ke nyadi sereta perang ngasuh aku berunding enggau dalam agi pasal reti pengidup. Nama kebuah kitai ba ditu? Kati Petara ibuhka kitai? Kati kitai tau bulih pemaik?

Bisi sekali, lebuh aku bechuti ngabas apai indai, aku betemu enggau seiku ari Saksi-Saksi Jehovah. Iya meri aku Bup Kudus, lalu aku berengkah macha Bup Kudus pengudah aku pulai ngagai Algeria. Siti ayat ke negu ati aku iya nya ba Pemandang 21:3, 4. Ayat tu madahka: ‘Diatu Petara deka diau enggau nembiak Iya! . . . Iya deka ngendas semua ai mata ari mata sida, lalu pemati nadai agi, nadai agi ngulit, nadai agi nyabak, nadai agi pedis.’ Aku tekenyit macha ayat tu lalu berunding, ‘Kati jaku tu amat?’ Maya nya aku enda nemu nama-nama utai pasal Petara tauka Bup Kudus.

Pengudah aku tembu pengawa soldadu ba taun 1959, aku betemu enggau seiku Saksi ke benama François. Iya ngajar aku mayuh pemendar Bup Kudus. Ambika chunto, iya nunjuk ari Bup Kudus Petara bisi nama iya nya, Jehovah. (Mas. 83:18) François mega nerangka Jehovah deka mai pengelurus ngagai dunya, ngubah dunya tu nyadi paradais, lalu ngamatka jaku ba Pemandang 21:3, 4.

Ajar tu senang diterima, lalu negu ati aku. Tang aku nyadi balat ringat ngagai bala paderi lalu deka nganu sida laban enda ngajar nitihka Bup Kudus! Aku agi bisi ngembuan runding baka apai aku, lalu deka ngelaban ulah ti enda lurus. Aku enda sabar lalu deka mutarka pekara tu enggau jampat!

François enggau menyadi Kristian ke bukai nulung aku enda majak ringat. Sida nerangka pengawa orang Kristian ukai ngakim orang, tang patut nulung sida nemu Berita Manah pasal Perintah Petara. Nya meh pengawa ke digaga Jesus lalu diberi iya ngagai murid iya. (Mat. 24:14; Luk. 4:43) Aku mega patut belajar bejaku enggau orang ngena chara ti nelap sereta berundingka asai ati orang, taja pan aku enda setuju enggau penemu sida. Bup Kudus madah: “Ulun Tuhan enda tau belaya, tang patut nelap enggau semua orang.”—2 Tim. 2:24.

Aku berengkah ngaga ubah, lalu ba taun 1959  aku dibaptisa ba siti gempuru besai. Ba gempuru besai nya aku betemu enggau seiku menyadi indu ke benama Angèle, lalu aku bisi ati ke iya. Aku berengkah ngabas eklisia iya, lalu kami jadi ba taun 1960. Iya endang indu ti badas, bini ti manah, lalu pemeri ti berega ari Jehovah.—J-lam. 19:14.

Aku belajar mayuh utai ti beguna ari menyadi lelaki ke bepenemu-dalam sereta bepeneleba. Siti utai ti beguna nya, kitai ulih mujur ngereja sebarang pengawa enti kitai baruh ati sereta nitihka lalau ba Jaku Dalam 15:22, ke madahka: “Enggau naka ulih giga semua jaku lalau, nya baru nuan deka mujur.”

Ba taun 1964, aku sedar aku patut nitihka jaku lalau tu. Maya nya, aku berengkah nyadi tuai ti ngabas, lalu pengawa aku iya nya ngabas eklisia sereta meransang bala menyadi ngambika sida ulih majak semak ngagai Jehovah. Maya nya, aku beumur 27 taun lalu nadai mayuh peneleba. Nya alai aku bisi ngaga penyalah. Tang aku nguji belajar ari nya. Kelebih agi, aku belajar mayuh utai ti beguna ari menyadi lelaki ke bepeneleba.

Aku ingat baru utai ke nyadi lebuh aku baru nyadi tuai ti ngabas. Pengudah aku ngabas siti eklisia di Paris, seiku menyadi lelaki nanya aku enti iya ulih berandau kediri enggau aku. Aku nyaut, “Au.”

Iya nanya, “Louis, enti lutur datai ngagai rumah, sapa ke deka ditemu iya?”

Aku nyaut, “Orang ke sakit.”

Iya madah: “Amat. Tang aku beratika, nuan semina begulai enggau orang ke tegap ba pengarap, baka tuai ti ngatur tuai gempuru. Ba eklisia kitai bisi mayuh menyadi Kristian ke asa ati, baru, tauka malu. Sida tentu berasai diperansang enti nuan meri awak begulai enggau sida, baka makai enggau sida ba rumah.”

Aku berasai amat beterima kasih enggau jaku lalau ke diberi menyadi lelaki tu. Pengerindu iya ke bedus Jehovah negu ati aku. Taja pan tusah deka ngaku diri udah ngereja penyalah, aku enggau jampat nitihka jaku lalau iya. Aku amat beterima kasih ngagai Jehovah laban bisi menyadi lelaki ke baka tu.

Ba taun 1969 enggau 1973, aku dipilih nyadi tuai ngemataka Begian Nyediaka Pemakai ba dua iti konvensyen entarabansa di Colombes,  Paris. Ba konvensyen taun 1973, kami patut nyediaka pemakai ke 60,000 iku orang pengelama lima hari! Aku berasai irau sekalika kami ulih ngereja nya tauka enda. Tang sekali agi, Jaku Dalam 15:22 nulung kami. Aku minta jaku lalau ari menyadi lelaki ke bepeneleba ba begian nyediaka pemakai. Sida nyengkaum orang ke nyual dagin, nanam sayur, tukang manduk sereta bebelika barang. Lebuh kami begulai gawa, kami ulih nembuka pengawa ti mar tu.

Kena taun 1973, aku enggau Angèle dibai gawa ba Betel Perancis. Pengawa aku ti terubah amat tusah. Aku patut nganjung litaricha ngagai menyadi Kristian di Cameroon, siti menua di Afrika. Ba Cameroon, pengawa kitai enda dikemendarka entara taun 1970 ngagai 1993. Sekali agi, aku berasai irau sekalika aku ulih ngereja pengawa tu. Tuai ti ngemataka pampang opis Perancis engka ulih beratika asai ati aku. Kena meransang aku, iya madah: “Bala menyadi kitai di Cameroon amat begunaka litaricha. Kitai patut nyaga sida!” Lalu nya meh utai ke dikereja kami.

Aku bejalai beberapa kali ngagai menua ke dampih Cameroon ngambika ulih betemu enggau tuai gempuru ari Cameroon. Bala menyadi lelaki tu berani sereta bepenemu-dalam. Sida nulung aku ngiga chara kena nganjung litaricha ngagai bala menyadi ba Cameroon. Jehovah merekatka pengawa kami. Pengelama 20 taun, nembiak Jehovah ba Cameroon seruran nerima majalah Menara Jaga sereta litaricha ke dikeluarka ninting bulan iya nya Our Kingdom Service.

Ari pun kami duai berengkah bekelala, aku ulih beratika Angèle bisi kaul ti rapat enggau Jehovah. Lalu tu majak nyata pengudah kami duai jadi. Ambika chunto, ba hari kami duai jadi, iya ngasuh aku besampi ngagai Jehovah  madahka pengingin kami duai deka gawa ke Iya. Jehovah nyaut sampi nya.

Angèle mega nulung aku bepanggai agi ba Jehovah. Ambika chunto, lebuh kami duai dikangau gawa ba Betel kena taun 1973, aku bisi berasai kakang ati laban aku rindu pengawa ba pelilih. Tang Angèle ngingatka aku, kami udah nyerahka diri ngagai Jehovah. Endaka tu reti iya kami mega patut ngereja nama-nama utai ke dipinta gerempung Iya? (Heb. 13:17) Aku setuju enggau iya! Ketegal nya, kami duai nerima pengawa ba Betel. Bini aku indu ti bepenemu-dalam, nemu berunding sereta rinduka Jehovah. Kualiti tu udah nulung negapka kaul kami duai lalu nulung kami ngaga pemutus ti manah pengelama kami duai begulai.

Diatu kami duai mansang tuai. Taja pia, Angèle agi bini ti manah sereta seruran nyukung aku. Ambika chunto, mayuh sekula teokratik dipejalaika ngena jaku English. Ngambika kami duai ulih enggau sekula teokratik, Angèle enggau aku bebendar ngemanahka pengelandik kami duai dalam jaku English. Tu nyengkaum enggau eklisia jaku English taja pan maya nya kami duai beumur 70 lebih. Ketegal aku seiku ari Komiti Pampang Opis Perancis, aku tusah ngiga awak deka belajarka bansa jaku bukai. Tang Angèle enggau aku nulung pangan diri. Diatu umur kami duai udah manggai 80 taun. Kami agi nyediaka gempuru ngena bansa jaku English enggau Perancis. Kami duai bebendar begempuru sereta nginjil enggau eklisia kami. Jehovah udah merekatka pengawa kami belajarka jaku English.

Siti berekat ti ngagitka ati lebuh kami duai Angèle dikangau enggau Sekula ke Raban Komiti Pampang Opis enggau Bini Sida kena taun 2017. Sekula nya dipejalaika ba Watchtower Educational Center di Patterson, New York.

Jehovah endang Petara ti rindu ngajar. (Isa. 30:20) Nya alai, semua kitai tuai enggau biak tau nerima ajar ti pemadu manah! (U-dat. 4:5-8) Endang amat, aku udah beratika mayuh orang ke biak ke mendingka Jehovah sereta bala menyadi Kristian ti bepeneleba ulih ngaga pemutus ti manah ba pengidup lalu nyembah Jehovah enggau tetap ati. Jaku Dalam 9:9 ngingatka kitai: “Enti nuan ngajar orang ke bepenemu-dalam, iya deka lebih agi bepenemu-dalam. Enti nuan ngajar orang ke lurus, penemu iya deka nambah.”

Kekadang, aku ngenang baru utai ke nyadi 60 taun ti udah. Utai ke nyadi malam nya amat ngenakutka aku. Aku enda nyangka pengudah nya aku tau ngembuan pengidup ti lantang. Aku udah belajar mayuh ari menyadi bukai! Jehovah udah merekatka aku sereta Angèle enggau pengidup ti lantang sereta ngemuaska ati. Nya alai, kami duai keran deka terus belajar ari Apai kitai di serega sereta ningaka jaku lalau ari menyadi Kristian ti bepenemu-dalam.