1-2. Nama penanggul ke ditapi mayuh Saksi?

RASUL Paul meransang Timoti enggau bebendar ngereja pengawa nginjil. Jaku peransang Paul mega dituju ngagai kitai kemayaharitu. (2 Tim. 4:5) Semua kitai deka nitihka jaku lalau Paul lalu enggau naka ulih gawa ke Jehovah. Taja pia, bisi penanggul. Mayuh ari menyadi Kristian kitai begunaka pemerani ngambika ulih ngereja pengawa nginjil. (2 Tim. 4:2) Ambika chunto, bisi bala menyadi Kristian kitai diau ba menua alai pengawa kitai ditagang tauka enda dikemendarka. Sida tetap nginjil taja pan nemu diri deka dijil enti ditangkap.

² Nembiak Jehovah napi mayuh penanggul ke ulih ngasuh sida asa ati. Ambika chunto, mayuh ari sida patut bebendar gawa kena nyediaka utai ti diguna sida sebilik. Taja pan sida deka ngereja mayuh agi ba pengawa nginjil, tang lebuh ba ujung minggu sida engka udah berasai lelak. Sekeda enda ulih gawa mayuh ke Jehovah ketegal sakit raya tauka mansang tuai, indah sida engka enda ulih pansut ari rumah. Bisi mega ngasaika diri enda berega ba Jehovah. Seiku menyadi indu ke benama Mary * madahka: “Lebuh aku berasai asa, aku enggau bebendar mutarka asai ati nya. Tang tu ngasuh aku lelak ba emosi. Ketegal nya, aku berasai besalah laban nadai agi awak sereta pengering ngereja pengawa nginjil.”

3. Nama deka dipejuraika kitai ba artikel tu?

 ³ Enda ngira nama penanggul ke ditapi kitai, Jehovah ulih meri kitai pengering kena mutarka penanggul nya lalu terus nyembah Iya enggau naka ulih. Sebedau kitai bejuraika chara Jehovah ulih nulung kitai, aram kitai meresa baka ni Iya ngeringka Paul enggau Timoti ngambika ulih ngereja pengawa nginjil taja pan seduai iya napi penanggul.

4. Nama penanggul ke ditapi Paul?

⁴ Paul napi mayuh penanggul. Iya begunaka pengering, kelebih agi lebuh dipalu, dituku ngena batu, sereta dijil. (2 Kor. 11:23-25) Paul enda malu madahka diri ngelaban asai ati ti negatif. (Rom. 7:18, 19, 24) Iya mega bisi “penyakit,” lalu keran deka Petara muai nya ari iya.—2 Kor. 12:7, 8.

5. Nama utai ke ulih digaga Paul taja pan iya napi mayuh penanggul?

⁵ Jehovah meri Paul pengering ngambika iya ulih terus ngereja pengawa nginjil taja pan napi mayuh penanggul. Peratika utai ke ulih digaga Paul. Lebuh iya dijil ba rumah di Rome, iya enggau ransing ngetanka Berita Manah ba mua tuai orang Judah sereta bala pemesai. (SKR. 28:17; Plp. 4:21, 22) Iya mega nginjil ngagai orang ke nyaga istana Raja Besai, enggau orang ke datai ngabas iya. (SKR. 28:30, 31; Plp. 1:13) Ba maya ti sama, Petara mega ngena Paul nulis surat ke nulung orang Kristian ba jeman nya enggau kemayaharitu. Nambahka nya, teladan Paul mega udah ngeringka bala menyadi Kristian di Rome. Ketegal nya, sida ‘majak berani agi nusui pesan Petara.’ (Plp. 1:14) Taja pan Paul enda ulih ngereja mayuh baka ke dikedekaka iya, tang iya enggau naka ulih ngereja utai ke ulih digaga iya. Lalu tu “nulung ngerembaika Berita Manah.”—Plp. 1:12.

6. Nitihka 2 Korint 12:9, 10, nama nulung Paul nembuka pengawa nginjil?

⁶ Paul nemu iya ulih ngereja pengawa ke Jehovah ketegal pengering ari Petara, ukai pengering diri empu. Iya madah kuasa Petara “nyadi pemadu badas” lebuh iya lemi. (Bacha 2 Korint 12:9, 10.) Ari roh kudus Iya, Jehovah meri Paul kuasa kena nembuka pengawa nginjil, taja pan Paul diperinsa, dijil sereta napi penanggul ke bukai.

7. Nama penanggul ke ditapi Timoti ti ngasuh iya tusah deka nembuka pengawa nginjil?

 ⁷ Timoti mega bepanggai ba kuasa Petara kena ngereja pengawa nginjil. Timoti bisi enggau Paul bejalaika pengawa pengerintis seberai tasik. Tambah mega, Paul nganjung iya ngabas sereta meransang eklisia. (1 Kor. 4:17) Timoti engka berasai enda layak. Nya alai Paul meransang iya: “Anang nejuka orang ngemaruhka nuan ketegal nuan agi biak.” (1 Tim. 4:12) Nambahka nya, Timoti mega “selalu sakit.” (1 Tim. 5:23) Tang Timoti nemu roh kudus Jehovah deka meri iya pengering ngambika iya ulih nusui Berita Manah sereta gawa ke bala menyadi.—2 Tim. 1:7.

8. Baka ni Jehovah ngeringka nembiak Iya kemayaharitu?

⁸ Kemayaharitu, Jehovah meri nembiak Iya “kuasa ti besai” ngambika sida ulih terus nyembah Iya enggau tetap ati. (2 Kor. 4:7) Aram kitai berandauka empat iti chara Jehovah ngeringka kitai lalu nulung kitai mengkang tetap ati ngagai Iya. Chara nya besampi, Bup Kudus, bala menyadi Kristian, enggau pengawa nginjil.

9. Baka ni sampi ulih nulung kitai?

⁹ Dikeringka nengah sampi. Paul meransang kitai “besampi sebarang maya.” (Eps. 6:18, Bup Kudus Berita Manah Ka Rebak Diatu) Petara deka nyaut sampi kitai enggau ngeringka kitai. Jonnie, ke diau ba Bolivia, ngasaika baka ni Jehovah nulung iya lebuh iya bisi mayuh macham penanggul. Bini enggau apai indai iya balat sakit ba maya ti sama. Ketegal nya, Jonnie tusah deka ngereja utai ti patut kena nyaga sida. Indai iya mati, lalu bini enggau apai iya begunaka awak ti lama kena gerai. Lebuh ngenang baru, Jonnie madah, “Lebuh aku berasai amat irau, sampi nulung aku. Lalu aku ulih madahka asai ati aku ngagai Iya.” Jehovah meri Jonnie pengering kena betan. Ronald, seiku tuai gempuru ba Bolivia, nemu indai iya bisi kanser. Indai iya mati sebulan udah nya. Nama nulung Ronald ba maya ti tusah nya? Iya madah: “Lebuh aku besampi ngagai Jehovah, aku madah semua utai ke diasaika aku ngagai Iya. Aku nemu Iya ngelala aku manah agi ari orang bukai, indah ari aku empu.” Kekadang kitai tusah betan napi penanggul tauka kitai enda nemu chara kitai patut besampi. Tang Jehovah mai kitai besampi ngagai Iya, taja pan kitai tusah deka madahka utai ke dirunding sereta utai ke diasaika kitai.—Rom. 8:26, 27.

10. Nitihka Hebrew 4:12, nama kebuah macha Bup Kudus sereta belemati utai ke dibacha nya amat beguna?

¹⁰ Dikeringka nengah Bup Kudus. Baka Paul ke bepanggai ba ayat Bup Kudus kena ngulihka pengering enggau pengelantang, kitai mega begunaka utai ti sama. (Rom. 15:4) Lebuh kitai macha Jaku Petara sereta belematika nya, Jehovah ulih ngena roh kudus Iya nulung kitai meretika baka ni ayat ke dibacha ulih nulung kitai. (Bacha Hebrew 4:12.) Ronald, ke dipadah tadi madahka: “Aku gaga ati laban aku bisi tebiat macha Bup Kudus tiap malam. Aku belematika kualiti Jehovah enggau baka ni Iya nyaga nembiak Iya. Tu ngeringka aku.”

11. Baka ni Bup Kudus ngeringka seiku menyadi indu ke lenyau laki?

¹¹ Lebuh kitai belematika Jaku Petara, tu ulih nulung kitai bisi runding ti betul pasal penanggul kitai. Peratika baka ni Bup Kudus nulung seiku balu. Seiku tuai gempuru  meransang iya belajar ari bup Jop. Lebuh iya ngereja nya, keterubah iya nganu Jop ketegal bisi runding ti salah. Ba runding iya, iya nangkan Jop: “Jop, anang semina berunding pasal penanggul nuan!” Tang udah nya iya nemu, runding iya mega sama enggau Jop. Tu nulung iya nukar runding diri sereta meri iya pengering kena mutarka penanggul iya ke lenyau laki.

12. Baka ni Jehovah ngena bala menyadi Kristian ngeringka kitai?

¹² Dikeringka nengah bala menyadi Kristian. Siti agi chara Jehovah ngeringka nembiak Iya, iya nya nengah bala menyadi Kristian. Paul nulis, iya keran deka “sama diperansang” bala menyadi Kristian. (Rom. 1:11, 12) Mary ke disebut tadi, rindu begulai enggau bala menyadi Kristian. Iya madah: “Jehovah ngena bala menyadi Kristian ke enda sedar aku bisi napi penanggul. Sida nyebut utai tauka meri kad ke ulih meransang aku. Aku mega berandau enggau menyadi indu ke napi penanggul baka aku, lalu aku belajar ari teladan sida. Pia mega tuai gempuru suah ngingatka aku, aku berega ba bala menyadi Kristian.”

13. Baka ni kitai ulih ngeringka pangan diri ba gempuru?

¹³ Siti endur ke pemadu manah kena meransang pangan diri iya nya ba gempuru. Baka ni nuan ulih ngereja nya? Nuan ulih madahka, nuan rinduka sida sereta beterima kasih ke utai ti udah digaga sida. Tu meh utai ke digaga seiku tuai gempuru ke benama Peter. Sebedau gempuru berengkah, iya muji seiku menyadi indu. Laki menyadi indu nya ukai Saksi. Ku Peter madah: “Aku berasai diperansang meda nuan ba gempuru. Nuan seruran nentuka enam iku anak nuan besedia enggau manah sereta bisi saut ba gempuru.” Jaku tu amat negu ati iya lalu iya nyaut: “Aku amat begunaka jaku peransang nya seharitu.”

14. Baka ni pengawa nginjil ulih nulung kitai?

¹⁴ Dikeringka nengah pengawa nginjil. Lebuh kitai bekunsika pemendar Bup Kudus enggau orang bukai, kitai berasai lantang sereta dikeringka, enda ngira sida ninga tauka enda. (J-lam. 11:25) Seiku menyadi ke benama Stacy udah ngasaika baka ni pengawa nginjil ngeringka iya. Lebuh seiku ari sida sebilik dibuai ari gerempung, iya berasai tusah ati lalu enda ngetu nanya diri empu: ‘Kati aku udah bebendar nulung iya?’ Stacy suah berunding pasal penanggul nya. Nama nulung iya mutarka penanggul nya? Pengawa nginjil! Lebuh nginjil, iya ulih fokus ngagai orang ke begunaka tulung. Iya madah: “Maya nya, Jehovah meri aku pemelajar Bup Kudus ke mansang ba pengarap. Tu amat meransang aku. Utai ke amat nulung aku ba pengidup iya nya pengawa nginjil.”

15. Nama ulih dipelajarka nuan ari utai ke disebut Mary?

¹⁵ Sekeda ari menyadi kitai engka berasai enda ulih ngereja mayuh ba pengawa nginjil ketegal penanggul sida. Enti nuan mega ngasaika nya, kingatka, Jehovah gaga ati meda nuan enggau naka ulih meri utai ti pemadu manah. Peratika baru teladan Mary tadi. Lebuh iya pindah ngagai endur ke ngena bansa jaku menua bukai, iya berasai pengawa iya ke Jehovah enda chukup. Ku Mary: “Ba siti timpuh nya, aku semina ulih meri saut ti mudah tauka macha ayat Bup Kudus, tauka meri surat mit lebuh nginjil.” Iya ngasaika diri enda landik baka bala menyadi ke bukai. Taja pia, iya nukar runding iya. Iya berengkah nemu Jehovah ulih ngena iya  taja pan iya enda landik ba bansa jaku nya. Iya madah: “Pemendar Bup Kudus nya senang dimeretika sereta ulih ngubah pengidup orang. Ukai bepanggai ba pengelandik seseiku orang dalam bansa jaku nya.”

16. Nama ulih nulung menyadi ke enda ulih ninggalka rumah bulih pengering?

¹⁶ Jehovah nemu sekeda ari kitai deka nginjil, tang kitai enda ulih ninggalka rumah. Iya meri kitai peluang ngambika ulih nginjil ngagai orang ke nyaga kitai tauka lutur sereta bala misi. Enti kitai mandingka pengawa kitai ke diatu enggau ke suba, kitai engka berasai asa. Tang, enti kitai nemu baka ni Jehovah nulung kitai diatu, kitai deka bulih pengering kena betan enggau gaga ati.

17. Nitihka Pengajar 11:6, nama kebuah kitai patut terus nginjil taja pan kitai enda meda asil tekala nya?

¹⁷ Kitai enda nemu ni bagi benih pemendar ke ditanam kitai deka tumbuh. (Bacha Pengajar 11:6 ari nota kaki.) * Ambika chunto, Barbara, menyadi indu ke beumur 80-an, nginjil ngena telefon enggau surat. Ba siti surat iya, iya meri majalah Menara Jaga kena 1 Mac 2014, ke betajuk “What God Has Done for You.” * Iya enda nemu diri udah nganjung surat ngagai sepasang laki bini ke udah dibuai ari gerempung. Laki bini nya macha majalah nya mayuh kali. Laki nya ngasaika Jehovah bejaku ngagai iya. Sepasang laki bini tu berengkah datai gempuru. Pengudah lebih ari 27 taun, seduai iya berengkah nyadi Saksi baru. Barbara berasai amat diperansang sereta dikeringka lebuh iya meda asil ti manah ari siti surat ke dianjung iya!

18. Nama ulih digaga kitai ngambika kitai bulih pengering ari Petara?

¹⁸ Jehovah meri kitai mayuh utai kena ngeringka kitai baka sampi, Bup Kudus, bala menyadi sereta pengawa nginjil. Lebuh kitai ngena semua utai tu, kitai nunjukka diri pechayaka Jehovah ulih sereta deka nulung kitai. Aram meh kitai seruran bepanggai ba Apai kitai ti di serega ke “meri pengering ngagai orang ke taluk ngagai Iya.”—2 Ban. 16:9.