1. Nama utai ke engka ngasuh nuan tekenyit lebuh nuan nguji bekunsika pesan Bup Kudus ngagai orang bukai?

KATI nuan agi ingat lebuh nuan tetemuka pemendar ba Bup Kudus? Ajar Bup Kudus ke dipelajarka nuan amat terang. Nuan ngumbai semua orang deka gaga ati belajarka Bup Kudus. Nuan andal pesan Bup Kudus ulih meri sida pengidup ti bisi reti diatu enggau pengadang ti manah ba jemah ila. (Mas. 119:105) Nya alai, nuan enggau ransing bekunsika pemendar ngagai bala bakih sereta kaban belayan pasal pemendar ke udah dipelajarka nuan. Tang nama nyadi? Nuan tekenyit ketegal mayuh ari sida nulak utai ke dipadahka nuan.

2-3. Ba jeman Jesus, nama runding orang pasal Jesus enggau pesan ke dibai iya?

² Semua kitai enda patut tekenyit lebuh orang nulak pesan ti dipadahka kitai. Ba jeman Jesus, mayuh orang nulak iya taja pan iya ngereja pengawa ajih ke nunjukka iya dianjung Petara. Ambika chunto, Jesus ngangkatka Lasarus ari pemati. Pengawa ajih tu enda ulih disakal orang ke ngelaban iya. Taja pia, tuai pengarap orang Judah enda nerima Jesus nya Messiah. Sida indah deka munuh Jesus enggau Lasarus!—Jhn. 11:47, 48, 53; 12:9-11.

³ Jesus nemu mayuh orang enggai ngaku iya Messiah. (Jhn. 5:39-44) Iya madah ngagai bala murid John Pemaptisa: “Lantang meh orang ti nadai pengakang ati pasal  aku!” (Mat. 11:2, 3, 6, Bup Kudus Berita Manah Ka Rebak Diatu) Nama kebuah mayuh orang nulak Jesus?

4. Nama deka dikerandauka kitai ba artikel tu?

⁴ Ba artikel tu enggau ke nangkanka tu, kitai deka berandauka beberapa iti kebuah mayuh orang ba abad keterubah enda arapka Jesus. Kitai mega deka meda nama kebuah orang kemayaharitu nulak pesan Bup Kudus ke dibai kitai. Utai ke beguna agi, kitai deka belajar kebuah kitai ulih negapka pengarap ngagai Jesus ngambika kitai terus nitihka iya.

5. Nama utai ke ngasuh orang ngumbai Jesus ukai Messiah?

⁵ Mayuh orang nulak Jesus ketegal iya dibesaika ba Nasaret. Taja pan sida nemu Jesus nya pengajar ti landik sereta ulih ngaga pengawa ajih, tang ba sida iya semina anak tukang kayu ke seranta. Nambahka nya, iya datai ari Nasaret, siti nengeri ke enda tentu tebilang. Indah Natanel ke nyadi seiku ari murid Jesus madah: “Kati utai ti badas ulih datai ari Nasaret?” (Jhn. 1:46) Natanel engka enda rinduka nengeri alai Jesus diau. Tauka iya engka berunding pasal jaku ti benabi ba Mikah 5:2 ke madahka Messiah ada ba Betlehem, ukai ba Nasaret.

6. Nama ulih nulung orang ba jeman Jesus nemu Jesus nya Messiah?

⁶ Nama dipadah Bup Kudus? Nabi Isaiah madah, munsuh Jesus enda “ibuhka pasal tusut [Messiah].” (Isa. 53:8, NWT) Bala nabi udah nulis mayuh penerang pasal Messiah. Enti orang ngena awak mansik semua fakta, sida deka nemu Jesus ada ba Betlehem, lalu iya peturun Raja David. (Luk. 2:4-7) Nya alai, endur Jesus ada nya sejalai enggau utai ke dipadah ba Mikah 5:2. Tang nama penanggul iya? Sida kelalu jampat nyimpulka pekara nya taja pan sida enda nemu semua fakta. Ketegal tu sida nulak Jesus.

7. Nama kebuah orang kemayaharitu nulak nembiak Jehovah?

⁷ Kati kitai meda penanggul ti sama kemayaharitu? Au. Mayuh ari nembiak Jehovah ukai orang ti kaya tauka tebilang. Nya alai mayuh orang ngumbai sida “ukai orang ke bepelajar, tang orang ke sengapa-dia.” (SKR. 4:13) Sekeda orang ngasaika nembiak Petara enda ulih ngajar pasal Bup Kudus ketegal sida nadai belajar ba sekula pengarap ti tebilang. Sekeda orang madah Saksi-Saksi Jehovah nya “pengarap orang Amerika.” Tang kebendar nya, mayuh Saksi-Saksi Jehovah ukai diau ba Amerika Serikat. Bisi sekeda mega madahka, Saksi-Saksi Jehovah enda pechayaka Jesus. Betaun-taun kitai dikumbai “pengarap pelesu,” “pengarap orang putih,” sereta “extremis.” Nya alai, mayuh orang enggai nyadi Saksi-Saksi Jehovah ketegal sida ninga cherita ke baka tu lalu enda nemu pemendar pasal nembiak Jehovah.

8. Nitihka Surat Kereja Rasul 17:11, nama patut digaga orang enti sida deka ngelala sapa nembiak Petara kemayaharitu?

⁸ Nama ulih nulung orang belajarka pemendar pasal nembiak Jehovah? Sida patut meresa fakta. Tu meh utai ke udah digaga penulis bup Injil, iya nya Luke. Iya bebendar belajar sereta “bejimat mansik semua utai nya kenyau ari pun.” Iya deka semua pemacha “nemu utai ti bendar pasal semua utai” ke didinga sida pasal Jesus. (Luk. 1:1-4) Orang Judah di Beria baka Luke. Lebuh sida ninga Berita Manah pasal Jesus, sida mandingka pesan nya enggau Sempekat  Lama kena nentuka utai ti didinga sida nya amat. (Bacha Surat Kereja Rasul 17:11.) Sama mega, orang kemayaharitu patut meresa fakta. Sida patut mandingka utai ke diajar nembiak Petara enggau utai ti dipadah Bup Kudus. Sida mega patut belajarka utai ke udah digaga nembiak Jehovah kemayaharitu. Enti sida ngereja nya, sida enda ngelakka salah sangka tauka jaku orang nagang sida ari belajarka pemendar.

9. Nama nyadi lebuh Jesus enggai meri siti tanda ari serega?

⁹ Sekeda orang maya jeman Jesus, enda puas ati enggau ajar iya. Sida deka iya ngayanka ngagai sida “siti tanda ari serega” ke nunjukka iya nya Messiah. (Mat. 16:1) Engka sida deka Jesus ngereja nya ketegal sida udah macha Daniel 7:13, 14. Taja pia, nya ukai maya Jehovah ngamatka jaku ti benabi nya. Utai ke diajar Jesus udah chukup ngasuh sida andal Jesus nya Messiah. Tang lebuh iya enggai meri sida tanda ke dipinta sida, sida nulak iya.—Mat. 16:4.

10. Baka ni Jesus ngamatka utai ke dipadah Isaiah pasal Messiah?

¹⁰ Nama dipadah Bup Kudus? Pasal Messiah, nabi Isaiah nulis: “Iya enda manjung tauka merakka nyawa iya tauka bejaku enggau nyawa ti inggar ba sebelah jalai raya.” (Isa. 42:1, 2) Jesus ngereja pengawa nginjil enggau baruh ati. Iya enda ngaga Rumah Sembiang ti besai, ngena gari ti spesial, tauka deka orang ngangauka iya ngena gelar ti spesial. Maya iya dipechara, Jesus enggai ngereja pengawa ajih kena ngelantangka ati Raja Herod. (Luk. 23:8-11) Jesus endang bisi ngereja pengawa ajih. Tang utai ti pemadu beguna nya madah pasal Berita Manah. Nya alai, iya madah ngagai bala murid iya: ‘Nya endang kebuah aku datai.’—Mrk. 1:38.

11. Nama runding ti salah ke dikembuan orang kemayaharitu?

¹¹ Kati kitai meda penanggul ti sama kemayaharitu? Au. Kemayaharitu, mayuh orang  alit ati meda gerija ti besai ke bisi gambar ti mar. Sida alit ati enggau tuai pengarap ke bisi gelar ti spesial sereta pengerami ke enda ditemu ari ni penatai enggau reti iya. Tang nama utai ke dipelajarka sida pasal Petara enggau tuju Iya? Orang ke enggau gempuru Kristian kitai belajar pasal peneka Jehovah sereta baka ni kitai ngereja nya sejalai enggau peneka Iya. Palan Gempuru kitai beresi sereta pengumbas iya. Orang ke ngiring ba gempuru mega enda ngena gari ti spesial sereta sida nadai gelar ti ngeninggika diri. Utai ke diajar sereta dipechayaka kitai datai ari Bup Kudus. Taja pia, mayuh orang enggai ningaka pesan ke dibai kitai. Sida ngumbai chara kitai nyembah Petara kelalu mudah sereta enda ngagitka ati, lalu utai ke diajar kitai enda sejalai enggau utai ke deka didinga sida.

12. Nitihka Hebrew 11:1, 6, pengarap kitai patut bepelasarka nama?

¹² Baka ni kitai ulih terus arapka Jesus? Rasul Paul madah ngagai orang Kristian ba Rome: “Pengarap datai ari ke ningaka pesan, lalu pesan didinga ari berita pasal Kristus.” (Rom. 10:17) Nya alai, kitai ulih ngeringka pengarap kitai nengah belajarka Bup Kudus. Kitai enda enggau pengerami ke enda sejalai enggau Bup Kudus, taja pan pengerami nya ngalitka ati. Kitai patut ngeringka pengarap bepelasarka penemu ti betul laban ‘nadai orang ulih ngerinduka ati Petara enti iya enda arapka Petara.’ (Bacha Hebrew 11:1, 6.) Nya alai, kitai enda ibuh ngiga tanda ari serega ke nunjukka kitai udah tetemuka pemendar. Enggau mansik ajar Bup Kudus ti ulih negapka pengarap kitai, udah chukup kena nunjukka kitai ngembuan pemendar sereta ulih muai asai ati ti kakang.

13. Nama utai ke ngasuh mayuh orang nulak Jesus?

¹³ Ba jeman Jesus, bala murid John Pemaptisa tekenyit ketegal bala murid Jesus enda bepasa. Jesus nerang nadai kebuah  sida bepasa enti iya agi idup. (Mat. 9:14-17) Indah orang Parisi enggau orang ke ngelaban Jesus nuduh Jesus besalah laban iya enda nitihka adat orang Judah. Sida nganu lebuh Jesus deka ngeraika orang ke sakit ba Hari Sabat. (Mrk. 3:1-6; Jhn. 9:16) Sida temegah madahka diri bebasaka adat pasal Hari Sabat, tang sida bisi ngereja pengawa bedagang ba Rumah Sembiang. Sida ringat lebuh Jesus nganu sida ngereja pengawa dagang ba Rumah Sembiang. (Mat. 21:12, 13, 15) Lalu lebuh Jesus nginjil ba balai gempuru di Nasaret, orang ba dia pedis ati lebuh Jesus mandingka sida baka orang Israel kelia ke berundingka diri empu sereta lemi ba pengarap. (Luk. 4:16, 25-30) Ketegal Jesus enda nitihka adat orang Judah, mayuh orang nulak iya.—Mat. 11:16-19.

14. Nama kebuah Jesus ngutuk adat mensia ke enda sejalai enggau Bup Kudus?

¹⁴ Nama dipadah Bup Kudus? Nengah nabi Isaiah, Jehovah madah: “Orang tu ngumbai diri nyembah Aku, tang jaku sida nadai reti, lalu ati sida jauh ari Aku. Agama sida semina atur enggau adat asal ti digaga mensia ti udah dikingatka sida dalam ati sida.” (Isa. 29:13) Jesus ngutuk adat mensia ke enda sejalai enggau Bup Kudus. Enti orang ngenuluka adat enggau atur mensia lebih ari ajar Bup Kudus, reti iya sida udah nulak Jehovah enggau Messiah.

15. Nama kebuah mayuh orang kemayaharitu enda rinduka Saksi-Saksi Jehovah?

¹⁵ Kati kitai meda penanggul ti sama kemayaharitu? Au. Mayuh orang pedis ati lebuh Saksi-Saksi Jehovah enda enggau nyambut pengerami ke enda sejalai enggau ajar Bup Kudus, baka hari pengada sereta Krismas. Bisi nya ringat lebuh Saksi-Saksi Jehovah enda enggau hari besai ke bekaul enggau menua, tauka enda nitihka adat pemati ke biasa digaga orang dunya. Sida ngelakka utai tu nagang sida nitihka Jesus laban sida ngumbai chara sembah sida diterima Petara. Tang sida enda ulih ngagaka ati Iya enti sida rindu agi ke chara dunya ari ajar ti bendar ke bisi ba Bup Kudus.—Mrk. 7:7-9.

16. Nitihka Masmur 119:97, 113, 163-165, nama utai ke patut digaga kitai, lalu nama patut diseliahka kitai?

¹⁶ Baka ni kitai ulih terus arapka Jesus? Kitai patut ngemansangka pengerindu kitai ngagai adat Jehovah enggau prinsip Iya. (Bacha Masmur 119:97, 113, 163-165.) Lebuh kitai rinduka Jehovah, kitai deka nulak sebarang adat ke enda ngelantangka ati Iya. Kitai deka rindu agi ke Jehovah ari sebarang utai.

17. Nama utai ti dikearapka orang ngagai Messiah?

¹⁷ Sekeda orang ba jeman Jesus deka perintah ti baru. Sida ditekan perintah Rome. Nya alai sida ngarapka Messiah ulih ngelepaska sida. Tang lebuh sida nguji deka ngaga Jesus nyadi raja, Jesus nulak. (Jhn. 6:14, 15) Sida ke bukai nyengkaum bala imam takut Jesus nguji deka ngubah perintah. Nya ulih ngasuh perintah Rome pedis ati lalu ngambi pulai kuasa ke udah diberi sida ngagai bala tuai pengarap. Ketegal sida irau pasal tu, mayuh orang Judah nulak Jesus.

18. Nama jaku ti benabi pasal Messiah ke enda dikeibuhka orang maya jeman Jesus?

¹⁸ Nama dipadah Bup Kudus? Taja pan mayuh jaku ti benabi madah pasal Messiah deka menang ba perang, tang sekeda jaku ti benabi nunjukka iya patut mati dulu ke dosa kitai. (Isa. 53:9, 12) Nya alai, nama kebuah orang Judah bisi runding ti salah pasal  Messiah? Mayuh orang maya jeman Jesus enda ibuhka jaku ti benabi ke nadai besemaya deka mutarka penanggul sida.—Jhn. 6:26, 27.

19. Nama runding ti salah ke ngasuh orang nulak pesan ke dibai kitai?

¹⁹ Kati kitai meda penanggul ti sama kemayaharitu? Au. Mayuh orang kemayaharitu nulak kitai ketegal kitai enggai enggau pengawa politik. Sida ka kitai enggau ngundi. Taja pia, kitai sedar enti kitai milih pemerintah mensia merintah kitai, tu nunjukka kitai nulak Jehovah. (1 Sam. 8:4-7) Orang engka ngasaika kitai patut ngaga sekula enggau sepital tauka ngereja utai ke ulih nulung orang bukai. Sida nulak pesan kitai ketegal kitai ngenuluka pengawa nginjil, ukai mutarka penanggul ba dunya.

20. Baka ke dipadah Jesus ba Matthew 7:21-23, nama utai ke patut dikenuluka kitai?

²⁰ Baka ni kitai ulih terus arapka Jesus? (Bacha Matthew 7:21-23.) Kitai ngenuluka pengawa nginjil ke diasuh Jesus kereja kitai. (Mat. 28:19, 20) Kitai enda ngelakka politik enggau utai ke nyadi ba dunya ngasuh kitai limpang. Kitai rinduka orang bukai sereta ibuhka penanggul ke ditapi sida. Tang kitai nemu chara ti pemadu manah kena nulung sida, iya nya ngajar sida pasal Perintah Petara sereta nulung sida ngemansangka kaul sida enggau Jehovah.

21. Nama utai ke keran digaga kitai?

²¹ Ba artikel tu, kitai udah berandauka empat iti pekara ke ngasuh orang ba abad keterubah nulak Jesus. Lalu kitai mega udah belajar pasal empat iti kebuah ke ngasuh orang kemayaharitu nulak Saksi-Saksi Jehovah. Kati semina empat iti kebuah nya aja ke patut diseliahka kitai? Enda. Ba artikel ke pengudah tu, kitai deka berandauka empat iti da agi utai ke ngasuh orang nulak Jesus. Aram meh kitai negapka pengarap kitai sereta nyeliahka sebarang utai ke nagang kitai ari nitihka Jesus!