1-2. Nama dipadah seiku penulis, sereta nama utai ke deka dikerandauka kitai ba artikel tu?

BEJUTA iku orang kemayaharitu madahka diri arapka Jesus. Tang sida enda nitihka utai ke diajar iya. (2 Tim. 4:3, 4) Seiku penulis madahka: “Enti bisi seiku lelaki baka Jesus ba entara kitai kemayaharitu, ke madahka utai ti sebaka enggau utai ke disebut Jesus . . . , kati kitai deka nulak lelaki nya baka orang ke nulak Jesus dua ribu taun suba? . .  . Saut iya au.”

² Mayuh orang ba abad keterubah ninga Jesus ngajar sereta meda iya ngereja pengawa ajih, tang sida enda arapka iya. Nama kebuah? Ba artikel sebedau tu, kitai udah berandauka empat iti kebuah orang nulak utai ke disebut sereta utai ke dikereja Jesus. Aram kitai berandauka empat iti da agi kebuah orang kemayaharitu nulak murid Jesus sereta baka ni kitai ulih nyeliahka diri ngambika enda badu nyembah Jehovah.

3. Nama udah digaga Jesus ke ngasuh sekeda orang nulak iya?

³ Lebuh Jesus ba dunya, iya begulai enggau semua orang. Iya makai enggau orang ke kaya sereta bisi penuduk ti tinggi. Tang iya mega meri awak begulai enggau orang ke seranta sereta orang ke nadai daya. Nambahka nya, iya sinu enggau orang ke dikumbai orang bukai “bedosa.” Sekeda  orang ke sumbung nulak Jesus ketegal utai ke udah digaga iya. Sida nanya murid Jesus: “Nama kebuah kita makai ngirup enggau pengumpul chukai, enggau orang ke bedosa?” Jesus nyaut sida: “Orang ke gerai enda begunaka lutur, tang semina orang ke sakit. Aku datai, ukai deka ngangauka orang ke lurus, tang ngangauka orang ke bedosa ngasuh sida nesal ati.”—Luk. 5:29-32.

4. Nitihka utai ke dipadah nabi Isaiah, nama utai ke patut ditemu orang Judah pasal Messiah?

⁴ Nama dipadah Bup Kudus? Sebedau Messiah datai, nabi Isaiah udah madah Messiah enda diterima dunya. Ku iya: “Kitai udah mechat sereta nulak iya . . . Nadai orang deka malik ngagai iya, kitai enggai ibuhka iya lalu ngaga iya baka orang ke nadai guna.” (Isa. 53:3) Nya alai, orang Judah ba abad keterubah patut nemu, Jesus deka ditulak orang.

5. Nama runding orang kemayaharitu ngagai murid Jesus?

⁵ Kati kitai meda penanggul ti sama kemayaharitu? Au. Mayuh tuai pengarap gaga ati lebuh orang ti tebilang, kaya, sereta orang ke dikumbai sida bepenemu-dalam enggau gerija sida. Tuai pengarap nerima orang ke baka tu taja pan sida ngereja utai ti dipegedika Petara. Tang tuai pengarap gerija ngemaruhka Saksi-Saksi Jehovah ke ransing sereta ngetanka standard moral ti manah. Tu ketegal bala Saksi ukai orang ke tebilang ba dunya tu. Baka ke dipadah Paul, Petara milih orang ke “baruh pendiau.” (1 Kor. 1:26-29) Taja pia, Jehovah ngumbai semua nembiak Iya ti tetap ati nya berega.

6. Nitihka Matthew 11:25, 26, baka ni kitai ulih neladan Jesus?

⁶ Nama utai ke patut digaga kitai ngambika ulih terus nyembah Jehovah? (Bacha Matthew 11:25, 26.) Anang nitihka runding orang dunya pasal nembiak Petara. Kitai nemu Jehovah semina ngena orang ke baruh ati ngereja peneka Iya. (Mas. 138:6) Lalu belematika meh pemayuh utai ke udah dijapai Jehovah nengah orang ke dikumbai enda bepelajar tauka nadai pemandai ba runding dunya.

7. Nama kebuah Jesus ngumbai orang Parisi nya orang ti pura-pura ngapa, lalu nama runding sida pasal jaku Jesus?

⁷ Jesus enggau berani nganu tuai pengarap laban sida enda ngajar orang chara nyembah Jehovah enggau betul. Ambika chunto, Jesus madahka orang Parisi nya orang ti pura-pura ngapa laban sida ibuhka agi chara masu jari ari ke chara sida ibuhka apai indai. (Mat. 15:1-11) Murid Jesus engka tekenyit enggau jaku iya. Nya alai, sida nanya iya: ‘Kati nuan nemu orang Parisi pedis ati ninga utai ti disebut nuan?’ Udah nya Jesus nyaut: ‘Semua utai ti tumbuh, ti ukai ditanam Apai aku ti di serega, deka dichabut magang. Anang ibuhka sida. Sida nya malin ke buta. Lalu enti malin ke buta ngiring orang ke buta, seduai iya deka sama labuh ngagai lubang kebung.’ (Mat. 15:12-14) Taja pan tuai pengarap pedis ati enggau jaku Jesus, tang Jesus enda ngetu madahka utai ti bendar.

8. Baka ni Jesus nunjukka ukai semua pengarap diterima Petara?

⁸ Jesus mega madah pasal sekeda ajar ti salah ke dibai bala tuai pengarap. Iya madahka ukai semua ajar diterima Petara. Jesus nerangka mayuh orang deka nengah jalai ti luas ke nuju ngagai pengerusak, lalu semina mimit aja orang nengah jalai ti mar  ke nuju ngagai pengidup. (Mat. 7:13, 14) Iya enggau terang madahka, sekeda orang madahka diri nyembah Petara, tang kebendar nya sida enda nyembah Iya. Jesus nangkan: “Bejaga ari nabi ti pelesu, ke datai ngagai kita baka bedus, tang iya ti bendar sida nya ukui kampung. Kita deka ngelala sida ari buah sida.”—Mat. 7:15-20.

9. Nama sekeda ajar ti pelesu ke dipadah Jesus nya salah?

⁹ Nama dipadah Bup Kudus? Jaku ti benabi ba Bup Kudus madah, pengangkun Messiah ke rumah Jehovah deka mau baka api. (Mas. 69:9; Jhn. 2:14-17) Pengangkun nya deka meransang Jesus ngelaban ajar ti salah sereta utai ke digaga tuai pengarap. Ambika chunto, orang Parisi pechaya taja pan orang mati, tang bisi semengat agi idup. Jesus ngajar, orang ke mati baka ke tinduk lalu nadai nama-nama utai ke agi idup ba orang ke udah mati. (Jhn. 11:11) Orang Saduki enda pechaya orang ke mati ulih idup baru. Tang Jesus ngangkatka Lasarus ari pemati. (Jhn. 11:43, 44; SKR. 23:8) Orang Parisi pechaya ba nasit. Sida ngajar Petara ke nentuka semua utai ke nyadi ba kitai lalu mensia enda ulih milih kediri empu. Tang Jesus ngajar, kitai ulih milih sekalika deka nyembah Jehovah tauka enda.—Mat. 11:28.

10. Nama kebuah mayuh orang nulak ajar Saksi-Saksi Jehovah?

¹⁰ Kati kitai meda penanggul ti sama kemayaharitu? Au. Mayuh orang nulak kitai laban kitai ngena Bup Kudus nunjuk ngagai sida pasal sekeda ajar pengarap sida nya salah. Tuai pengarap ngajar, Petara ngukum orang jai ba api neraka. Enggau tu orang deka berasai takut lalu ngasika sida. Tang nembiak Jehovah nemu, Jehovah nya Petara ti bepengerindu. Nya alai, Iya tentu enda ngukum orang ba api neraka. Tuai pengarap mega ngajar, semengat enda nemu mati. Enti ajar nya betul, nadai orang deka diangkatka ari pemati. Kitai nunjukka ajar tu nadai ba Bup Kudus. Lalu mayuh jalai pengarap ngajar semua utai ke digaga kitai udah ditentuka  Petara. Tang kitai ngajar mensia bisi peluang bibas milih lalu ulih milih nyembah Petara. Nama digaga tuai pengarap lebuh kitai nunjukka ajar sida nya salah? Sida amat pedis ati!

11. Nitihka jaku Jesus ba John 8:45-47, nama utai ke diasuh Petara gaga nembiak Iya?

¹¹ Nama utai ke patut digaga kitai ngambika ulih terus nyembah Jehovah? Enti kitai rinduka pemendar, kitai patut pechaya sereta ngasika Jaku Petara. (Bacha John 8:45-47.) Enda baka Sitan, kitai enggai sekali-kali ngelengkaka pemendar. Kitai enda ngereja utai ke belaban enggau utai ke dipechayaka kitai. (Jhn. 8:44) Petara deka nembiak Iya “begedika penyai” sereta “bepegai teguh ba utai ti badas” baka ke digaga Jesus.—Rom. 12:9; Heb. 1:9.

12. Nama kebuah chara Jesus mati ngasuh orang Judah nulak iya?

¹² Nama agi utai ke ngasuh orang Judah nulak Jesus? Paul madahka: “Kami nusui pasal Kristus ke [‘dipantang ba tiang,’ NWT], pesan ti ditulak orang Judah.” (1 Kor. 1:23) Nama kebuah mayuh orang Judah nulak Jesus? Ba sida, chara Jesus diukum bunuh ba tiang nunjukka iya baka penjenayah sereta orang ke bedosa. Nya alai, sida enda arapka iya nya Messiah.—U-dat. 21:22, 23.

13. Nama utai ke enda ditemu orang ke nulak Jesus?

¹³ Orang Judah ke nulak Jesus enda sedar Jesus enda besalah. Iya mega dituduh ngereja penyalah ke enda digaga iya, sereta napi utai ti enda lurus. Sida ke ngakim Jesus enda ibuhka pengelurus. Raban Kunsil orang Judah bekumpul enggau jampat, lalu sida enda nitihka atur pechara. (Luk. 22:54; Jhn. 18:24) Raban Kunsil enda lurus lebuh sida mendingka jaku tuduh sereta bukti ke ngelaban Jesus. Lalu sida ‘nguji ngiga saksi ti bula kena ngelaban Jesus, ngambika sida ulih munuh iya.’ Tang lebuh sida enda mujur ngereja nya, imam besai nguji ngasuh Jesus madahka utai ti salah ngambika sida ulih nyalahka iya. Tu terang  nunjukka utai ti digaga sida enda nitihka atur pechara. (Mat. 26:59; Mrk. 14:55-64) Pengudah Jesus diangkatka ari pemati, sida “meri duit” ngagai soldadu Rome ke nyaga kubur Jesus ngambika sida ulih madah cherita ti bula pasal kebuah bangkai Jesus nadai ba kubur.—Mat. 28:11-15.

14. Nama dipadah Jaku Petara pasal pemati Messiah?

¹⁴ Nama dipadah Bup Kudus? Taja pan mayuh orang Judah enda pechaya Messiah patut mati, peratika jaku ti benabi ke madahka: “Iya nyerahka nyawa diri lalu natka pemerinsa sama enggau orang ke jai. Iya nanggung dosa orang mayuh, lalu besampika orang ke bedosa.” (Isa. 53:12) Nya alai, orang Judah enda patut nulak Jesus ketegal chara iya dibunuh.

15. Nama jaku tuduh ngagai Saksi-Saksi Jehovah ke ngasuh orang nulak sida?

¹⁵ Kati kitai meda penanggul ti sama kemayaharitu? Au! Jesus dituduh besalah sereta napi utai ti enda lurus. Pia mega Saksi-Saksi Jehovah kemayaharitu napi utai ti sama. Peratika sekeda chunto tu. Ba Amerika Serikat, entara taun 1930 enggau 1950, hak kitai nyembah Petara dilaban bekali-kali ba kot. Sekeda hakim enggau terang ngaga pemutus ti enda lurus ngagai kitai. Ba Quebec, Kanada, piak Gerija enggau Perintah bekerejasama nyakal pengawa kitai. Mayuh Saksi dijil ketegal nusui Berita Manah pasal Perintah Petara. Ba Jerman, perintah Nazi munuh mayuh menyadi lelaki Kristian ke biak ti tetap ati. Lalu baru-baru tu, menyadi Kristian kitai ba Rusia dituduh besalah lalu dijil ketegal sida bejaku pasal Bup Kudus. Perintah Rusia ngumbai nya “pengawa extremis.” Indah New World Translation of the Holy Scriptures dalam bansa jaku Rusia enda dikemendarka sereta dikumbai “penerang extremis” laban ngena nama Jehovah.

16. Baka ke dipadah 1 John 4:1, nama kebuah kitai enggai dilimpangka cherita ti bula pasal nembiak Jehovah?

¹⁶ Nama utai ke patut digaga kitai ngambika ulih terus nyembah Jehovah? Pansik fakta. Lebuh Jesus meri Ajar ba atas Bukit, iya nangkan peninga iya pasal sekeda orang ke deka “nyebut semua macham utai ti bula ngelaban” sida. (Mat. 5:11) Pemula tu datai ari Sitan. Iya mai orang ke ngelaban ngerembaika pemula ti ngemediska orang ke rinduka pemendar. (Pem. 12:9, 10) Kitai patut nulak semua pemula tu. Kitai enggai pemula tu ngasuh kitai takut nyembah Jehovah tauka ngelemika pengarap kitai.—Bacha 1 John 4:1.

17. Baka ni utai ke nyadi sebedau Jesus mati ngasuh orang nulak iya?

¹⁷ Sebedau Jesus mati, seiku ari 12 rasul iya nyerahka Jesus ngagai munsuh. Seiku da agi besangkalka Jesus tiga kali, lalu semua rasul iya ninggalka Jesus ba malam sebedau iya mati. (Mat. 26:14-16, 47, 56, 75) Jesus enda tekenyit, laban iya udah madah tu deka nyadi. (Jhn. 6:64; 13:21, 26, 38; 16:32) Lebuh meda utai tu nyadi, sekeda orang engka enggai agi nyadi murid iya. Sida engka berunding, ‘Enti baka tu ulah rasul Jesus, aku enggai agi nitihka sida!’

18. Nama jaku ti benabi ke deka dikeamatka sebedau Jesus mati?

¹⁸ Nama dipadah Bup Kudus? Beratus taun sebedau Jesus datai ke dunya, Jehovah udah madah Messiah deka dijual ngena 30 singkap pirak. (Sek. 11:12, 13) Orang ke nyual Jesus nya seiku ari kaban rapat Jesus. (Mas. 41:9) Nabi Sekariah mega nulis: “Bunuh  [pengibun bedus], ngambika raban bedus pambar.” (Sek. 13:7) Orang ke baruh ati enda nulak Jesus ketegal utai ti nyadi tu. Tang pengarap sida deka dikeringka lebuh meda jaku ti benabi tu dikeamatka ba Jesus.

19. Nama utai ditemu orang ke baruh ati?

¹⁹ Kati kitai meda penanggul ti sama kemayaharitu? Au. Sekeda Saksi udah ninggalka pemendar. Sida limpang ari pengarap lalu nguji ngelimpangka orang bukai. Sida ngerembaika berita ti enda manah, bebula, sereta nusui cherita ti ngasuh orang salah runding pasal Saksi-Saksi Jehovah ba surat kabar, radio, TV enggau Internet. Tang orang ke baruh ati enda dikelimpangka laban sida nemu Bup Kudus udah madah tu endang deka nyadi.—Mat. 24:24; 2 Pet. 2:18-22.

20. Baka ni kitai enda dikelimpangka orang ti ngetu nyembah Jehovah? (2 Timoti 4:4, 5)

²⁰ Nama utai ke patut digaga kitai ngambika ulih terus nyembah Jehovah? Kitai patut negapka pengarap kitai nengah belajarka Bup Kudus enggau tetap, seruran besampi, sereta mengkang kisuk ngereja pengawa ke diberi Jehovah. (Bacha 2 Timoti 4:4, 5.) Enti kitai ngembuan pengarap, kitai enda tekenyit lebuh ninga berita ti enda manah pasal Saksi-Saksi Jehovah. (Isa. 28:16) Pengerindu kitai ke Jehovah, Jaku Iya, sereta bala menyadi ulih nulung kitai enda dikelimpangka orang ti ngetu nyembah Jehovah.

21. Taja pan mayuh orang kemayaharitu nulak pesan kitai, nama ulih diandalka kitai?

²¹ Ba abad keterubah, mayuh orang nulak Jesus. Tang, mayuh mega orang nerima iya. Tu nyengkaum seiku ari raban Kunsil orang Judah sereta “mayuh amat mega sida imam.” (SKR. 6:7; Mat. 27:57-60; Mrk. 15:43) Kemayaharitu mega, bejuta iku orang mutus deka nitihka Jesus. Nama kebuah? Laban sida nemu sereta rinduka pemendar ke bisi ba Bup Kudus. Jaku Petara madah: “Orang ke rinduka adat Nuan diau likun belama; nadai utai ulih ngasuh sida tesangkut.”—Mas. 119:165.