MAYUH orang nemu orang Ejip kelia menya ngena papairus nyadika keretas kena sida nulis. Orang Gerika enggau orang Rome mega sama. Sida ngena papairus kena nulis. * Taja pia mayuh orang enda nemu papairus mega ulih dikena ngaga perau.

Lebih ari 2,500 taun kelia, nabi Isaiah nulis pasal orang ke diau “ngilah mayuh bengkah sungai di menua Etiopia. . . Ari menua nya datai bala pengari bansa. Sida . . ngena perau ti digaga ari papairus.”—Isa. 18:1, 2.

Bup Kudus endang bepun ari Petara. Nya alai, pemelajar Bup Kudus enda tekenyit lebuh pakar arkeologi tetemuka bukti ti nunjukka papairus dikena ngaga perau maya jeman Bup Kudus. (2 Tim. 3:16) Nama utai ke udah ditemu sida? Aram meh kitai mansik bukti pasal baka ni chara papairus dikena ngaga perau di Ejip.

Ba pendam orang Ejip bisi lukis enggau ukir ba dinding ti nunjukka baka ni orang ngumpul papairus lalu ngena papairus nya ngaga perau. Sida netak batang papairus, lalu batang nya diberekas. Udah nya berekas papairus ditanchang. Batang papairus nya segitiga. Nya alai lebuh ditanchang begulai enggau rat, berekas papairus deka kering. Nitihka siti bup pasal sejarah orang Ejip ke madahka, pemanjai perau ke digaga ngena papairus ulih 17 meter pemanjai iya, lalu ulih nyimpan 10 tauka 12 batang sengayuh ba tiap iti tisi iya.

Ba menua Ejip, mayuh papairus tumbuh ba tisi Sungai Nil. Nambahka nya, perau senang digaga ngena papairus. Indah lebuh orang berengkah ngena kayu ngaga kapal ti besai, orang ke berikan enggau orang ke ngasu agi ngena perau ti mit sereta rakit ke digaga ari papairus.

Betaun-taun, orang agi ngena perau ke digaga ari papairus. Seiku penulis Gerika benama Plutarch, ke idup maya jeman bala rasul madahka, sekeda orang agi ngena perau ke digaga ari papairus ba jeman nya.