1-2. Baka ni prinsip Bup Kudus mai reti ti besai agi lebuh situasi kitai berubah? Terangka.

 BA HARI seiku lelaki enggau indu kawin, seduai iya mendingka cheramah Bup Kudus pasal tikah. Prinsip Bup Kudus ke dikerandauka ba cheramah nya ukai utai ti baru didinga seduai iya. Tang berengkah ari hari seduai iya jadi nyentukka jemah ila, prinsip Bup Kudus nya besai agi reti ba seduai iya. Nama kebuah? Laban seduai iya deka nitihka semua prinsip nya ba tikah seduai iya.

² Utai tu ulih nyadi lebuh sepasang laki bini nyadi apai indai. Pengelama betaun-taun, seduai iya mayuh kali ningaka cheramah pasal chara ngemesaika bala anak. Tang diatu, jaku lalau ke didinga seduai iya nyadi besai agi reti. Sida deka bisi anak lalu deka ngemesaika anak nya. Tanggungjawap nya amat besai! Nya alai, lebuh situasi kitai berubah, sekeda prinsip Bup Kudus ke kala didinga kitai nyau bisi besai agi reti ba kitai. Lalu tu meh siti kebuah Jehovah ngasuh bala nembiak Iya macha Bup Kudus. Tu sebaka enggau utai ke diasuh Jehovah kereja bala raja Israel, iya nya berunding enggau dalam pasal ayat Bup Kudus “seumur idup” sida.—U-dat. 17:19.

3. Nama deka dikerandauka kitai ba artikel tu?

³ Apai indai, kita bisi basa ti besai. Kita patut ngajar bala anak kita pasal Jehovah. Lalu nuan mega deka ngajar anak pasal pekara ti dalam agi bekaul enggau Petara. Nuan deka nulung anak nuan rinduka Jehovah enggau pengabis ati.  Nama ulih digaga nuan kena ngajar anak nuan rinduka Jehovah? Ba artikel tu, kitai deka berandauka empat iti prinsip Bup Kudus ke ulih nulung nuan ke nyadi apai indai. (2 Tim. 3:16) Kitai deka nemu baka ni sekeda apai indai Kristian bulih penguntung ari nitihka jaku lalau Bup Kudus.

4. Nama siti ari prinsip Bup Kudus ke ulih nulung apai indai ngajar anak rinduka Jehovah ari ati sida? (James 1:5)

⁴ Prinsip 1: Minta iring ari Jehovah. Pinta meh penemu-dalam ari Jehovah ngambika ulih nulung nuan ngajar anak ngemansangka pengerindu ngagai Jehovah. (Bacha James 1:5.) Jehovah meh ke pemadu layak meri jaku lalau. Nama kebuah? Perundingka dua iti pekara tu. (1) Jehovah bisi peneleba ti pemadu mayuh nyadi apai indai. (Mas. 36:9) Lalu (2) jaku lalau Iya selalu mai penguntung.—Isa. 48:17.

5. (a) Nama tulung ti disediaka gerempung Jehovah ke apai indai? (b) Nitihka video pasal sepasang laki bini ke benama Abilio enggau Ulla Amorim, nama ulih dipelajarka nuan ari chara seduai iya ngemesaika bala anak?

⁵ Jehovah nyediaka mayuh litaricha kena nulung apai indai ngajar anak rinduka Jehovah. Iya ngereja tu nengah Bup Kudus sereta gerempung Iya. (Mat. 24:45) Ambika chunto, nuan ulih tetemuka mayuh jaku lalau ari siri artikel “Tulung ke Diri Sebilik.” Siri artikel tu bisi dikeluarka ba majalah Peratika! pengelama beberapa taun. Diatu, semua siri artikel tu bisi ba laman web kitai. Pia mega, mayuh interbiu sereta video ba jw.org ke ulih nulung apai indai nitihka jaku lalau Jehovah lebuh sida ngemesaika anak sida. b—J-lam. 2:4-6.

6. Nama asai ati seiku apai pasal iring ke diterima seduai iya melaki-bini ari gerempung Jehovah?

⁶ Mayuh apai indai beterima kasih ke bantu ke diberi Jehovah nengah gerempung Iya. Seiku apai ke benama Joe madah: “Ngemesaika tiga iku anak dalam pemendar ukai pengawa ti senang. Aku enggau bini aku selalu besampi minta tulung ari Jehovah. Lalu kami seruran ngasaika artikel tauka video suah dikeluarka ba maya ti ngena nitihka penanggul ke ditapi kami. Kami seruran bepanggai ba jaku lalau ari Jehovah ba pengidup kami.”  Joe enggau bini iya nemu, tulung ke baka tu nulung bala anak sida semak agi ngagai Jehovah.

7. Nama kebuah apai indai enda tau enda nyadi teladan ti manah ngagai anak sida? (Rome 2:21)

⁷ Prinsip 2: Ajar nengah teladan. Bala anak beratika sereta nitihka utai ke dikereja apai indai sida. Nadai seiku pan apai tauka indai ti sempurna. (Rom. 3:23) Taja pia, apai indai bebendar nyadi teladan ti manah ke anak sida. (Bacha Rome 2:21.) Bekaul enggau bala anak, seiku apai madahka: “Bala anak baka span ke senang nginsap ai. Enti sema sida meda ulah kitai enda sejalai enggau utai ke diajar kitai, sida tentu madahka nya ngagai kitai.” Nya alai, enti kitai dekaka anak kitai rinduka Jehovah, pengerindu kitai ngagai Iya patut tegap sereta ulih dipeda ari teladan kitai.

8-9. Nama ulih dipelajarka nuan ari utai ke dipadah Andrew enggau Emma?

⁸ Bisi mayuh chara apai indai ulih ngajar anak sida rinduka Jehovah. Tu meh utai ke dipadah Andrew ke beumur 17 taun: “Apai indai selalu ngajar aku kebuah patut besampi. Tiap malam, apai deka besampi enggau aku, taja pan aku empu udah besampi. Apai indai aku suah ngingatka kami: ‘Nuan ulih besampi ngagai Jehovah sebarang maya enda ngira ni penyuah nuan deka ngereja nya.’ Ketegal nya, sampi nyadi utai ti pemadu penting ba aku. Diatu aku senang agi deka besampi. Lalu aku udah ngumbai Jehovah nya baka Apai aku ti bisi pengerindu.” Apai indai, ingat meh pengerindu nuan ngagai Jehovah ulih nulung anak nuan rinduka Jehovah.

⁹ Perundingka mega teladan Emma. Apai iya udah ninggalka sida sebilik. Ketegal apai iya bisi mayuh utang, indai iya patut mayar semua utang ke ditinggalka apai iya. Ku Emma: “Indai aku suah bisi penanggul ba duit. Tang iya selalu bejaku pasal chara Jehovah ibuhka sereta nyediaka utai ti diguna nembiak Iya. Ari chara pengidup indai aku, aku nemu iya amat arapka Jehovah. Indai ngereja utai ke diajar iya ngagai aku.” Nama ulih dipelajarka kitai? Indah ba maya ti tusah pan, apai indai tetap ulih ngajar anak nengah teladan.—Gal. 6:9.

10. Ni maya apai indai orang Israel berandau enggau anak sida pasal Jehovah? (Ulang Adat 6:6, 7)

¹⁰ Prinsip 3: Suah berandau enggau bala anak. Jehovah ngasuh orang Israel kelia seruran ngajar anak sida pasal Iya. (Bacha Ulang Adat 6:6, 7.) Sida bisi mayuh peluang sepemanjai hari berandau enggau anak sida. Sida mega ngajar anak sida rinduka Jehovah ari ati. Ambika chunto, seiku nembiak lelaki Israel engka ngena mayuh jam nulung apai iya betanam tauka ngambi asil ari utai ke ditanam. Menyadi indu iya engka ngena sepemanjai hari nulung indai iya bejait, nenun sereta ngereja pengawa bukai ba rumah. Lebuh apai indai sama bekereja enggau anak, sida ulih berandauka mayuh macham utai. Ambika chunto, sida ulih berandauka pemanah Jehovah enggau berundingka chara Iya nulung sida sebilik.

11. Kemayaharitu, ni maya apai indai bisi peluang berandau enggau bala anak?

¹¹ Kemayaharitu pengidup kitai udah berubah. Ba mayuh menua, apai indai enggau bala anak nadai mayuh jam begulai enggau pangan diri. Apai indai engka bekereja, lalu anak engka ba sekula. Nya alai, apai indai patut ngiga awak ngambika ulih berandau enggau anak sida. (Eps. 5:15, 16; Plp. 1:10) Peluang tu bisi lebuh pengawa Belajarka Bup Kudus enggau Diri Sebilik. Seiku menyadi ke biak ke benama Alexander madahka:  “Apai aku selalu ngaga atur kena Belajarka Bup Kudus enggau Diri Sebilik. Iya enda nejuka nama-nama utai ngachau kami belajar maya nya. Pengudah belajar, kami begulai sereta berandau enggau pangan diri.”

12. Nama patut dikingatka tuai bilik lebuh Belajarka Bup Kudus enggau Diri Sebilik?

¹² Enti nuan tuai bilik, nama ulih digaga nuan ngambika pengawa Belajarka Bup Kudus enggau Diri Sebilik nya ngerinduka ati bala anak nuan? Uji meh ngena bup Idup Enggau Lantang Belama Iya! kena belajar enggau bala anak nuan. Belajarka bup tu ulih meri peluang ngagai apai indai enggau bala anak berandau enggau pangan diri. Maya nya, nuan deka bala anak nuan mansutka semua asai ati sereta pengirau sida. Anang meh ngena awak maya nya kena nganu anak nuan. Enti anak nuan nyebut utai ke enda sejalai enggau Bup Kudus, anang jampat ringat. Kebendar iya, nuan patut gaga ati laban sida madahka semua asai ati sida ngagai nuan. Nuan patut meransang sida enda nangi madahka asai ati diri. Enti nuan nemu asai ati anak nuan, nya baru nuan ulih nulung sida.

13. Ni maya bukai apai indai ulih nulung anak sida semak ngagai Jehovah?

¹³ Apai indai, giga meh peluang sepemanjai hari kena nulung anak nuan semak ngagai Jehovah. Nuan enda ibuh nganti maya belajarka Bup Kudus aja kena ngajar anak nuan pasal Petara. Peratika utai ke dipadah seiku indai ke benama Lisa: “Kami ngena utai ke ngelingi kami kena ngajar bala anak pasal Jehovah. Ambika chunto, lebuh utai ke digaga ukui kami ngasuh bala anak kami ketawa, kami madahka, tu nunjukka Jehovah nya Petara ti gaga ati. Ketegal tu, kitai ulih gaga ati sereta rindu meda utai ti ngasuh kitai ketawa.”

14. Nama kebuah apai indai enda tau enda nulung anak sida milih kaban enggau manah? (Jaku-Dalam 13:20)

¹⁴ Prinsip 4: Tulung anak nuan milih kaban ti manah. Bup Kudus madahka enggau terang, kaban ke dipilih kitai ulih nulung tauka ngachau kitai. (Bacha Jaku-Dalam 13:20.) Kati nuan nemu sapa kaban anak nuan? Kala nuan betemu enggau sida lalu meri awak begulai enggau sida? Nama ulih digaga nuan ngambika ulih nulung bala anak bebakih enggau sida  ke rinduka Jehovah? (1 Kor. 15:33) Nuan ulih ngereja nya enggau mai menyadi ke tegap ba pengarap begulai enggau ruang bilik nuan.—Mas. 119:63.

15. Nama ulih digaga apai indai kena nulung anak ngemansangka kaul ti manah enggau sida ke rinduka Jehovah?

¹⁵ Peratika pengalaman seiku apai ke benama Tony. Iya enggau bini iya udah nulung bala anak sida ngemansangka kaul ti manah enggau sida ke rinduka Jehovah. Ku iya: “Pengelama betaun-taun, kami duai bini aku mai bala menyadi ke enda sama umur ngagai rumah kami. Kami makai begulai sereta mai sida Belajarka Bup Kudus enggau Diri Sebilik. Tu siti chara ti manah kena ngelala sida ke rindu sereta nyembah Jehovah enggau gaga ati. Bala tuai ti ngabas, pengerintis seberai tasik sereta bala menyadi ke bukai kala diau ba rumah kami. Anak kami mayuh belajar ari pengalaman, pengeransing sereta pengawa sida ti bebendar ngagai Jehovah. Tu udah nulung bala anak kami majak semak ngagai Jehovah.” Apai indai, uji meh enggau naka ulih nulung anak nuan bisi bala kaban ti manah.

16. Baka ni enti anak nuan madahka diri enggai nyembah Jehovah?

¹⁶ Baka ni enti seiku ari anak nuan madahka diri enggai nyembah Jehovah, taja pan nuan udah bebendar ngajar iya? Enti pia, anang meh ngumbai diri enda mujur nyadi apai indai. Jehovah udah meri semua kitai, nyengkaum anak nuan peluang bibas milih sekalika deka nyembah Iya tauka enda. Enti anak nuan mutuska deka ninggalka Jehovah, anang ngetu ngarapka iya deka pulai baru ngagai Jehovah ila. Kingatka meh pasal sempama anak ti tesat. (Luk. 15:11-19, 22-24) Anak nya udah ngereja mayuh pengawa ti jai. Tang pengujung iya, anak nya pulai baru. Taja pia, sekeda orang engka madah: “Tu cherita aja. Kati anak aku amat ulih pulai baru ngagai Jehovah?” Au, ulih! Kebendar iya, tu meh utai ke nyadi ngagai seiku lelaki ke biak ke benama Elie.

17. Baka ni pengalaman Elie meransang nuan?

¹⁷ Peratika utai ke dipadah Elie pasal apai indai iya: “Sida bebendar nulung aku rinduka Jehovah enggau Bup Kudus. Lebuh aku beumur  kira-kira 15 taun, aku berengkah ngelaban apai indai.” Elie berengkah ngereja utai ti enda manah ba belakang apai indai iya sereta bala menyadi Kristian. Apai indai iya nguji nulung iya semak ngagai Jehovah, tang iya enggai ningaka sida. Pengudah iya ninggalka rumah, iya ngereja mayuh pengawa ti enda menuku. Tang, kekadang iya bisi berandau pasal Bup Kudus enggau seiku ari kaban iya. Ku Elie: “Majak aku bejaku pasal Jehovah enggau kaban aku, majak agi aku berundingka pasal Jehovah. Benih pemendar Bup Kudus ke kala ditanam apai indai aku suba, berengkah tumbuh baru.” Nyau kelama, Elie pulai baru ngagai pemendar. c Gambarka meh pengaga ati apai indai iya laban seduai iya udah bebendar ngajar Elie rinduka Jehovah kenyau ari mit!—2 Tim. 3:14, 15.

18. Nama asai ati nuan pasal apai indai ti bebendar ngajar anak sida rinduka Jehovah?

¹⁸ Apai indai, Jehovah udah meri nuan pengawa ti amat manah. Pengawa nya ngemesaika rebak ti baru nyembah Jehovah. (Mas. 78:4-6) Pengawa tu enda senang. Tang kami deka muji semua apai indai ke udah bebendar nulung bala anak! Enti nuan terus bebendar nulung bala anak nuan rinduka Jehovah, ngemesaika sida enggau disiplin sereta ajar Jehovah, pechaya meh, Jehovah tentu deka lantang ati enggau nuan.—Eps. 6:4.