ARTIKEL DIPELAJAR 20
Nama Reti Bup Pemandang ba Bala Munsuh Petara?
‘Sida ngempuruka bala raja nya ba siti endur ti dikumbai Armagedon dalam Hebrew.’—PEM. 16:16.
LAGU 150 Giga meh Petara Ngambika Ulih Selamat
DALAM ARTIKEL TU a
1. Nama utai ke dipadahka bup Pemandang pasal nembiak Petara?
BUP Pemandang nunjukka Perintah Petara udah ditumbuhka ba serega. Lalu Sitan udah dibuai ari serega. (Pem. 12:1-9) Pengudah utai nya nyadi, semua sida ba serega lantang ati. Tang tu meri penusah ke kitai. Nama kebuah? Laban Sitan balat ringat. Lalu iya nyerang orang ke tetap ati nyembah Jehovah.—Pem. 12:12, 15, 17.
2. Nama ulih nulung kitai mengkang tetap ati ngagai Jehovah?
2 Taja pan Sitan nyerang kitai, tang baka ni kitai ulih mengkang tetap ati nyembah Jehovah? (Pem. 13:10) Siti utai ke ulih nulung kitai iya nya, enti kitai nemu utai ke deka nyadi jemah ila. Ambika chunto ba bup Pemandang, rasul John madahka sekeda berekat ke deka diulih kitai enda lama da agi. Siti ari berekat nya, Petara deka ngemunaska bala munsuh. Diatu, aram kitai beratika baka ni bup Pemandang nerangka pasal bala munsuh Petara lalu nama deka nyadi ngagai sida.
BALA MUNSUH PETARA DITERANGKA “NGENA TANDA”
3. Nama sekeda tanda ke dikena ba bup Pemandang?
3 Ayat keterubah ba Bup Pemandang madahka, penerang ke deka dibacha kitai diberi “ngena tanda.” (Pem. 1:1, NWT) Kitai deka macha pasal sekeda jelu ke ngambarka bala munsuh Petara. Ambika chunto, bisi “siku jelu pansut ari tasik.” Iya bisi “sepuluh iti tanduk enggau tujuh igi pala.” (Pem. 13:1) Udah nya, bisi “siku agi jelu pansut ari dalam tanah.” Jelu nya bejaku munyi naga lalu iya ngasuh “api nurun ari langit.” (Pem. 13:11-13) Udah nya, bisi agi jelu ke bukai, iya nya “jelu ti mirah-redam.” Bisi seiku indu sundal duduk ba atas jelu nya. Tiga iku jelu tu ngambarka bala munsuh ke ngelaban Jehovah enggau Perintah Iya. Nya alai, kitai enda tau enda nemu sapa bala munsuh Petara tu.—Pem. 17:1, 3.
EMPAT IKU JELU
Sida “pansut ari tasik.” (Dan. 7:1-8, 15-17) Sida ngambarka kuasa dunya ke kala meri kesan ngagai nembiak Petara kenyau ari jeman Daniel (Peda genteran 4, 7)
4-5. Baka ni penerang ba bup Daniel 7:15-17 nulung kitai meretika agi reti tiap iti tanda nya?
4 Enti deka ngelala sapa munsuh Petara tu, kitai patut nemu reti simbolik tauka utai ke digambarka ngena tiap iku jelu enggau indu sundal ke disebut tadi. Bup Kudus ulih nulung kitai meretika tu. Kebendar iya, mayuh tanda ke dikena ba bup Pemandang mega udah diterangka ba bup bukai dalam Bup Kudus. Ambika chunto, nabi Daniel kala bemimpi pasal ‘empat iku jelu ti besai pansut ari tasik.’ (Dan. 7:1-3) Daniel madahka kitai reti tiap iku jelu tu. Bala jelu nya ngambarka empat iku “raja,” tauka perintah. (Bacha Daniel 7:15-17.) Nya alai, penerang ba bup Daniel ulih nulung kitai meretika reti jelu ke disebut ba bup Pemandang. Semua jelu nya ngambarka perintah mensia.
5 Diatu aram kitai beratika sekeda tanda ke bisi ba bup Pemandang. Kitai ulih meda baka ni Bup Kudus ulih nulung kitai meretika tiap iti tanda nya. Kitai deka berengkah enggau belajarka tiap iku jelu nya. Keterubah, kitai deka nemu nama reti tiap iku jelu nya. Udah nya, kitai deka belajar nama deka nyadi ngagai sida. Lalu ke penudi, kitai deka berandauka nama kaul semua utai ke nyadi tu enggau kitai.
MUNSUH PETARA UDAH DITEMU
JELU KE BISI TUJUH IGI PALA
Iya “pansut ari tasik.” Iya bisi sepuluh iti tanduk, enggau tujuh igi pala. Iya mega bisi sepuluh iti makota ba tanduk iya. (Pem. 13:1-4) Iya ngambarka semua perintah mensia ke bekuasa ari jeman kelia nyentukka diatu. Tujuh igi pala ngambarka tujuh kuasa dunya ke kala meri kesan ngagai nembiak Petara (Peda genteran 6-8)
6. Nama reti jelu ke bisi tuju igi pala ke dipadah ba Pemandang 13:1-4?
6 Nama reti jelu ke bisi tujuh igi pala? (Bacha Pemandang 13:1-4.) Jelu tu baka engkuli. Kaki iya baka kaki beruang lalu nyawa iya baka nyawa singa. Iya mega bisi sepuluh iti tanduk. Kebendar iya, empat iku jelu ke dipadah ba Daniel bagi 7 mega bisi ciri ti sama. Tang ba bup Pemandang kitai macha, semua ciri-ciri nya begabung nyadi seiku jelu. Nya alai, jelu tu ukai semina ngambarka siti perintah tauka siti kuasa dunya. John madahka jelu nya bekuasa “atas semua raban bansa, menua, jaku enggau bansa.” Ari tu kitai nemu, kuasa iya ukai semina ba siti menua aja. (Pem. 13:7) Nyadi, jelu ke bisi tujuh igi pala nya ngambarka semua perintah ke kala merintah mensia kenyau ari suba nyentukka diatu. b—P-jar. 8:9.
7. Nama reti tujuh igi pala ba jelu nya?
7 Nama reti tujuh igi pala ba jelu nya? Saut iya bisi ba Pemandang 17, laban bagi 17 tu bisi nerangka gamal jelu ke dipadah ba Pemandang 13. Ba Pemandang 17:10, bisi madahka: “Sida nya mega tujuh iku raja. Lima ari sida nya udah alah, siku agi merintah, lalu siku ti bukai apin datai, lalu lebuh iya datai ila, iya enda tau enda merintah enda lama.” Ari semua perintah ke kala dikena Sitan, tujuh ari perintah nya disemaka baka “pala” laban sida bisi mayuh kuasa. Nya alai, tu meh semua kuasa dunya ke kala meri kesan ti chukup besai ngagai nembiak Petara. Lebuh rasul John agi idup, lima ari kuasa dunya nya kala merintah, iya nya Ejip, Asiria, Babilon, Media-Persia sereta Gerika. Kuasa dunya keenam, iya nya Rome benung merintah lebuh John nerima genera nya. Lalu, nama perintah ke deka nyadi pala ketujuh tauka kuasa dunya ke penudi?
8. Sapa ke nyadi pala ketujuh ba jelu ti keterubah?
8 Kitai deka meda jaku benabi ba bup Daniel ke deka nulung kitai nemu sapa ke nyadi pala ketujuh ba jelu nya ke merintah lalu nyadi kuasa dunya ti penudi. Nama kuasa dunya ke merintah ba pengujung dunya tu, iya nya maya ‘Hari Tuan’? (Pem. 1:10) Kuasa dunya tu dikumbai, Kuasa Dunya Anglo-Amerika. Kuasa dunya tu nyadi lebuh dua iti perintah ti bekuasa begempung enggau pangan diri, iya nya perintah Britain enggau Amerika Serikat. Nya alai, kitai udah nemu Kuasa Dunya Anglo-Amerika meh ke nyadi pala ketujuh ba jelu keterubah ke dipadahka Pemandang 13:1-4.
JELU KE BISI DUA ITI TANDUK BAKA ANAK DOMBA
Iya pansut “ari dalam tanah” lalu iya bejaku “munyi naga.” Iya “ngasuh api nurun ari langit” sereta ngereja kereja ajih baka “nabi ti pelesu.” (Pem. 13:11-15; 16:13; 19:20) Jelu ke bisi dua iti tanduk nya ngambarka Kuasa Dunya Anglo-Amerika. Iya dikumbai nabi ti pelesu laban iya nipu orang ba dunya. Iya ngasuh sida ngaga “anak patung” ari “jelu” ke bisi tujuh igi pala enggau sepuluh iti tanduk (Peda genteran 9)
9. Jelu ke bisi “dua iti tanduk baka anak domba” ngambarka nama?
9 Bup Pemandang bagi 13 madahka pala ketujuh tu iya nya Kuasa Dunya Anglo-Amerika mega nyadi jelu ke bisi “dua iti tanduk baka anak domba, lalu iya bejaku munyi naga.” Jelu tu “ngereja kereja ajih, nyengkaum ngasuh api nurun ari langit ngagai dunya, dipeda semua orang mayuh.” (Pem. 13:11-15) Pemandang bagi 16 enggau 19 madahka jelu tu “nabi ti pelesu.” (Pem. 16:13; 19:20) Daniel mega madahka utai ti sama, iya nya Kuasa Dunya Anglo-Amerika deka “balat ngerusak utai.” (Dan. 8:19, 23, 24) Tu meh utai ke nyadi ba Perang Dunya Kedua. Saintis British enggau Amerika sama besaup ngaga dua igi bom atom. Ketegal tu meh Perang Dunya Kedua badu. Ketegal sida ngaga dua igi bom atom nya, Kuasa Dunya Anglo-Amerika baka ke “ngasuh api nurun ari langit ngagai dunya.”
JELU TI MIRAH-REDAM
Seiku indu sundal, iya nya Babilon ti Besai duduk ba atas jelu tu. Jelu tu ngambarka raja kelapan. (Pem. 17:3-6, 8, 11) Terubah iya, indu sundal nya nguasa jelu tu. Tang udah nya, iya dirusak jelu tu. Indu sundal nya ngambarka gerempung pengarap pelesu serata dunya. Jelu tu ngambarka Pertubuhan Bangsa-Bangsa Bersatu (PBB). Gerempung nya nyukung gerempung politik ba serata dunya (Peda genteran 10, 14-17)
10. Nama reti “siku anak patung”? (Pemandang 13:14, 15; 17:3, 8, 11)
10 Kitai deka berandauka seiku agi jelu ti bukai. Ciri-ciri jelu tu nyauka sama enggau jelu ke bisi tujuh igi pala nya. Tang jelu tu bechura mirah-redam. Jelu tu disebut “anak patung jelu” sereta dikumbai “raja ti kelapan.” c (Bacha Pemandang 13:14, 15; 17:3, 8, 11.) “Raja” tu kala bisi, tang udah nya iya lenyau enda lama. Taja pia, iya deka bisi baru. Semua penerang tu ngambarka gerempung Pertubuhan Bangsa-Bangsa Bersatu (PBB). Tuju gerempung tu deka nyukung sistem politik serata dunya! Suba, gerempung tu dikumbai Liga Bangsa-Bangsa. Tang iya lenyau maya Perang Dunya Kedua. Taja pia, iya bisi baru ba jeman kitai diatu.
11. Nama deka digaga bala jelu nya, lalu nama kebuah kitai enda ibuh takutka sida?
11 Ketegal jaku bula sida, jelu tu tauka bala perintah, meransang orang ngelaban Jehovah sereta nembiak Iya. Ketegal tu John madah, sida baka ke ngempuruka “bala raja nya” ba perang Armagedon, iya nya ‘Hari Besai Petara ti Pemadu Bekuasa.’ (Pem. 16:13, 14, 16) Taja pia kitai nadai kebuah berasai takut. Jehovah deka nyelamatka semua orang ke nyukung Perintah Iya enggau jampat.—Esk. 38:21-23.
12. Nama deka nyadi ngagai semua jelu nya?
12 Nama deka nyadi ngagai semua jelu nya? Pemandang 19:20 madahka: “Jelu nya lalu ditangkap, sama enggau nabi ti pelesu nya, ti udah ngereja kereja ajih di mua jelu nya kena iya nipu orang ke bisi kelai jelu nya, enggau orang ke udah nyembah anak patung jelu nya. Jelu nya enggau nabi ti pelesu nya lalu dibuai idup-idup ngagai danau api ti mau laban merirang.” Taja pan sida agi merintah diatu, tang semua sida ke nyadi munsuh Petara tu deka dipunaska belama iya.
13. Nama penusah ke ditapi semua orang Kristian ketegal perintah mensia?
13 Nama reti tu ba kitai? Ketegal kitai orang Kristian, kitai patut tetap ati ngagai Petara sereta Perintah Iya. (Jhn. 18:36) Kena ngereja nya, kitai patut mengkang neutral lalu enda nyukung pengawa politik. Tang, enda senang deka mengkang neutral. Tu ketegal perintah mensia deka kitai nyukung sida nengah jaku enggau utai ke digaga kitai. Sida ke alah ditekan deka nerima tanda ari jelu nya. (Pem. 13:16, 17) Lalu sida ke nerima tanda nya enda diterima Petara sereta deka lenyau peluang pengidup ti meruan belama iya. (Pem. 14:9, 10; 20:4) Nya alai, kitai enda tau enda tetap neutral enda ngira ni pemalat kitai kena tekan!
PENGUJUNG TI BALAT NGEMALUKA INDU SUNDAL NYA
14. Nitihka Pemandang 17:3-5, nama utai ti ngenyitka ati ke dipeda rasul John?
14 Nama utai ke ngasuh rasul John “balat alit ati” enggau utai ke dipeda iya? John meda seiku indu duduk ba atas seiku jelu. (Pem. 17:1, 2, 6) Indu nya dikumbai “indu sundal” lalu nama iya “Babilon ti Besai.” Iya “udah bambai enggau bala raja dunya.”—Bacha Pemandang 17:3-5.
15-16. Sapa “Babilon ti Besai,” lalu baka ni kitai nemu nya?
15 Sapa “Babilon ti Besai”? Indu tu ukai gerempung politik. Tu ketegal, bup Pemandang madahka iya ngereja ulah ti kamah enggau tuai politik dunya. (Pem. 18:9) Iya nepan ba atas jelu nya nunjukka iya nguji nguasa semua pemerintah tu. Iya mega enda ngambarka pengawa dagang ba dunya Sitan tu. Bala pedagang tu disebut ba ayat bukai ba bup Pemandang sereta dikumbai “bala sedagar dunya.”—Pem. 18:11, 15, 16.
16 Dalam Bup Kudus, leka jaku “indu sundal” nunjuk ngagai sida ke ngumbai diri nyembah Petara. Tang kebendar iya ba maya ti sama, sida mega nyembah petara ti pelesu. Tu nunjukka, sida bepangan enggau dunya. (1 Ban. 5:25; Jas. 4:4) Bup Kudus madah, sida ke tetap ati nyembah Petara dikumbai “tuchi” tauka “dara bungas.” (2 Kor. 11:2; Pem. 14:4) Kelia menya, nengeri Babilon endur alai sembah ti pelesu. Nya alai, Babilon ti Besai ngambarka semua pengarap ti pelesu. Nya alai, Babilon ti Besai mai reti gerempung pengarap pelesu serata dunya.—Pem. 17:5, 18; peda artikel ba jw.org ke betajuk “Apakah Itu Babilon Besar?” dalam jaku Melayu.
17. Nama deka nyadi ngagai Babilon ti Besai?
17 Nama deka nyadi ngagai Babilon ti Besai? Pemandang 17:16, 17 bisi saut iya: ‘Sepuluh iti tanduk ti dipeda nuan nya, enggau jelu nya, deka begedika indu sundal nya. Sida deka ngerampas semua utai iya, lalu nelanjaika iya, lalu makai isi iya, lalu nunu iya, laban Petara udah ngasuh sida raja nya seati ngereja juluk ati Iya.’ Ari ayat tu, kitai nemu Jehovah deka ngasuh semua bansa ngena jelu bechura mirah-redam, iya nya, Pertubuhan Bangsa-Bangsa Bersatu, nyerang sereta ngerusak abis lengis gerempung pengarap pelesu serata dunya.—Pem. 18:21-24.
18. Baka ni kitai ulih nentuka diri enda nyukung Babilon ti Besai?
18 Nama reti tu ba kitai? Kitai patut ngetanka ‘pengarap ti tuchi, ti bendar di mua Petara.’ (Jas. 1:27) Kitai enda patut nejuka diri dibai nitihka ajar ti pelesu, pengerami ti enda sejalai enggau Bup Kudus, standard moral dunya ke majak jai, sereta pengawa ke bekaul enggau roh ti jai ari Babilon ti Besai! Lalu kitai deka mai orang “pansut ari iya,” ngambika Petara enda ngumbai sida sama bedosa enggau Babilon ti Besai.—Pem. 18:4.
PETARA DEKA NGUKUM MUNSUH IYA TI PEMADU BESAI
NAGA TI BESAI TI BECHURA MIRAH
Sitan meri kuasa ngagai jelu ke bukai. (Pem. 12:3, 9, 13; 13:4; 20:2, 10) Sitan nya munsuh Jehovah ti pemadu besai. Iya deka dibuai ngagai lubang ti amat dalam pengelama 1,000 taun. Pengudah nya, Sitan deka dibuai ngagai “danau api enggau merirang” (Peda genteran 19-20)
19. Sapa “naga ti besai ti bechura mirah”?
19 Bup Pemandang mega bisi nyebut pasal “naga ti besai ti bechura mirah.” (Pem. 12:3) Naga tu ngelaban Jesus enggau bala melikat iya. (Pem. 12:7-9) Naga nya mega nyerang nembiak Petara, lalu meri kuasa ngagai semua perintah mensia. (Pem. 12:17; 13:4) Sapa naga tu? “Iya nya ular ti tuai, ti dikumbai Antu tauka Sitan.” (Pem. 12:9; 20:2) Iya nguasa semua munsuh Jehovah ke bukai.
20. Nama deka nyadi ngagai naga nya?
20 Nama deka nyadi ngagai naga nya? Pemandang 20:1-3 madahka, seiku melikat deka muai Sitan ngagai lubang ti amat dalam. Tu ngambarka Sitan dijil. Lebuh maya nya, Sitan “enda agi nipu mensia, datai ke pengujung seribu taun nya.” Pengujung iya, Sitan enggau bala melikat ti jai deka dipunaska. Bup Kudus nyemaka sida tu baka ke dibuai ngagai “danau api enggau merirang.” (Pem. 20:10) Naka meh pemanah iya jemah ila lebuh Sitan enggau bala melikat ti jai nadai agi ba dunya tu!
21. Nama kebuah kitai ulih gaga ati enggau utai ke dibacha kitai ba bup Pemandang?
21 Kitai amat berasai diperansang lebuh kitai udah meretika tanda ke dipadahka ba bup Pemandang! Kitai udah belajar sapa bala munsuh Jehovah sereta utai ke deka nyadi ngagai sida jemah ila. Nya alai, ‘beberekat meh orang ke macha jaku ti benabi tu ngena nyawa ti inggar, lalu beberekat meh orang ke ninga utai ti ditulis dalam bup tu’! (Pem. 1:3) Tang pengudah semua munsuh Petara dipunaska, nama berekat ke deka diulih sida ke tetap ati ngagai Jehovah? Tu meh utai ke deka dikerandauka kitai ba artikel pengudah tu.
LAGU 23 Jehovah Ngepunka Perintah Iya
a Bup Pemandang ngena mayuh tanda kena nulung kitai nemu pasal bala munsuh Petara. Bup Daniel nulung kitai nemu reti tiap iti tanda. Ba artikel tu, kitai deka mandingka sekeda jaku ti benabi ba bup Daniel ke sama enggau jaku benabi ba bup Pemandang. Enggau chara tu, kitai ulih nemu bala munsuh Petara. Udah nya, kitai deka berandauka nama deka nyadi ngagai bala munsuh nya.
b Bisi mayuh agi bukti ke nunjukka jelu ke bisi tujuh igi pala nya ngambarka semua kuasa politik. Iya bisi “sepuluh iti tanduk.” Lumur sepuluh suah dikena Bup Kudus kena nunjukka utai ti penuh.
c Anak patung tu enda sama enggau jelu ti keterubah laban nadai makota ba tanduk iya. (Pem. 13:1) Tu ketegal, “iya nya siku ari sida ke tujuh iku nya.” Reti nya, anak patung tu bulih kuasa ari pemerintah ke bukai.—Peda artikel ba jw.org ke betajuk, “Apakah yang Dilambangkan oleh Binatang Buas yang Berwarna Merah Marak yang Disebut di Wahyu Bab 17?” dalam jaku melayu.
