1-2. Nama kebuah kitai patut nemu utai ke bisi ba bup Pemandang?

 KALA nuan dibai meda gambar ba album ke diempu orang bukai? Lebuh nuan meda gambar ba album nya, bisi mayuh orang ke enda entu dikelala nuan. Tang bisi siti gambar ke narit ati nuan. Nama kebuah? Laban nuan bisi ba gambar nya. Lebuh nuan meda, nuan nguji ngingatka baru kemaya gambar nya diambi lalu dini endur nya. Nuan mega deka nemu sapa orang bukai ba gambar nya. Nya alai, gambar nya amat besai reti ba nuan.

² Nama kebuah bup Pemandang baka gambar ba album? Bisi dua kebuah. Keterubah, bup nya ditulis endang ke kitai. Ba ayat keterubah, kitai macha: ‘Tu pemandang ari Jesus Kristus, ti diberi Petara ngagai iya, ngambika iya ngayanka ngagai bala nembiak Petara utai ti enda tau enda nyadi enda lama da agi.’ (Pem. 1:1) Nyadi, utai ke ditulis dalam bup nya ukai ngagai sebarang orang. Tang, endang ditulis ke kitai laban kitai nyembah Jehovah. Nya alai, kitai enda tekenyit laban nemu kitai bisi begian ba utai ke nyadi dalam bup Pemandang. Kebendar iya lebuh kitai macha bup Pemandang,  kitai macha utai ke bekaul enggau diri empu.

3-4. Nitihka Bup Pemandang, kemaya jaku benabi deka dikeamatka lalu nya meransang kitai ngereja nama?

³ Kebuah kedua kitai deka nemu jaku benabi ba bup Pemandang laban nya bisi kaul enggau kemaya jaku nya deka dikeamatka. Rasul John bisi madah kemaya jaku benabi nya deka dikeamatka. Ku iya: ‘Roh kudus bekuasa ba aku lebuh Hari Tuan.’ (Pem. 1:10) Lebuh John nulis jaku nya ba taun 96 Masihi, ‘Hari Tuan’ bedau datai maya nya. (Mat. 25:14, 19; Luk. 19:12) Tang nitihka jaku benabi ba Bup Kudus, ‘Hari Tuan’ nya berengkah ba taun 1914 lebuh Jesus dipilih nyadi Raja ba serega. Nya alai, semua jaku benabi ba bup Pemandang ke bisi kaul enggau nembiak Jehovah berengkah dikeamatka kenyau ari taun 1914. Endang amat, kitai diatu benung idup ba ‘Hari Tuan’!

⁴ Laban kitai idup ba maya ti ngagitka ati, kitai patut beratika jaku lalau ba bup Pemandang 1:3 ke madah: “Beberekat meh orang ke macha jaku ti benabi tu ngena nyawa ti inggar, lalu beberekat meh orang ke ninga sereta ngasika utai ti ditulis dalam bup tu, laban maya nyau semak.” Nya alai, kitai patut ‘macha ngena nyawa ti inggar,’ ngambika ulih “ninga” sereta “ngasika” jaku benabi nya. Nama sekeda pekara ke patut dititihka kitai?

5. Baka ni bup Pemandang nunjukka kebuah kitai patut nentuka sembah kitai diterima Jehovah?

⁵ Ari bagi keterubah ba bup Pemandang, kitai belajar Jesus nemu semua utai ke nyadi ba eklisia Kristian. (Pem. 1:12-16, 20; 2:1) Jesus nunjukka diri nemu utai ke nyadi ba tiap iti eklisia Kristian lebuh iya meri pesan ngagai tujuh buah eklisia di Asia Minor. Jesus meri pesan enggau terus terang ngagai orang Kristian ba abad keterubah ngambika sembah sida diterima Jehovah. Pesan Jesus nya ulih dititihka nembiak Petara kemayaharitu. Nama ulih dipelajarka kitai? Jesus ke nyadi Kepala kitai amat nemu sekalika kitai bisi kaul ti manah enggau Jehovah tauka enda. Ketegal Jesus ngiring sereta nyaga kitai, iya ulih meda semua utai ke nyadi. Nya alai, Jesus nemu utai ke patut digaga kitai ngambika diterima Jehovah. Nyadi, nama atur ke diberi Jesus ti patut dititihka kitai kemayaharitu?

6. (a) Nitihka Pemandang 2:3, 4, nama penanggul ke ditapi orang Kristian ba eklisia Epesus? (b) Nama ulih dipelajarka kitai ari nya?

⁶ Bacha Pemandang 2:3, 4. Anang ngelengkaka pengerindu kitai ti keterubah ngagai Jehovah. Pesan Jesus ngagai orang Kristian ba eklisia Epesus nunjukka sida liat ati natka pemerinsa sereta enda kala mantul nyembah Jehovah taja pan sida napi mayuh penanggul. Taja pia, sida udah ngelengkaka pengerindu sida ti keterubah ngagai Jehovah. Sida enda tau enda ngambi pengerindu nya baru ngambika sembah sida ulih diterima Jehovah. Sama mega kemayaharitu, kitai ukai semina deka liat ati ngenatka pemerinsa aja, tang kitai deka terus tan ketegal bisi kebuah ti betul. Tu ketegal, Jehovah ukai semina deka nemu nama utai ke deka digaga kitai, tang mega nama kebuah kitai ngereja nya. Jehovah amat ngemeratka tuju ati kitai laban Iya dekaka sembah kitai bepelasarka pengerindu ti dalam sereta asai ati ti beterima kasih ngagai Iya.—J-lam. 16:2; Mrk. 12:29, 30.

7. (a) Nitihka Pemandang 3:1-3, nama penanggul ke ditapi orang Kristian ba eklisia Sardis? (b) Nama patut digaga kitai?

⁷ Bacha Pemandang 3:1-3. Kitai patut  terus bejaga. Orang Kristian ba eklisia Sardis bisi penanggul ke bukai. Taja pan suba sida amat ransing nyembah Jehovah, tang nyau kelama pengeransing sida majak kurang. Nya alai, Jesus ngasuh sida “dani.” Nama utai ke dipelajarka kitai ari jaku tangkan tu? Kitai nemu, Jehovah selalu ingatka utai ke kala digaga kitai. (Heb. 6:10) Tang kitai enda ulih ngumbai ketegal kitai suba ransing nyembah Jehovah, nya ukai reti iya, kitai enda ibuh ransing agi nyembah Jehovah diatu. Taja pan kitai enda ulih ngaga mayuh baka ke suba, tang kitai deka terus ransing ‘gawa ke Tuan,’ lalu terus bejaga nyentukka ujung.—1 Kor. 15:58; Mat. 24:13; Mrk. 13:33.

8. Nitihka Pemandang 3:15-17, nama ulih dipelajarka kitai ari pesan Jesus ngagai orang Kristian ba Laudisia?

⁸ Bacha Pemandang 3:15-17. Kitai patut ransing sereta nyembah Jehovah enggau pengabis ati. Pesan Jesus ngagai orang Kristian ba Laudisia nunjukka sida mega bisi penanggul ke bukai. Sida “nyilu kuku” nyembah Jehovah. Laban sida lembau, Jesus madah sida ‘merinsa sereta tusah.’ Nyadi, sida patut ngayanka pengeransing nyembah Jehovah. (Pem. 3:19) Nama ulih dipelajarka kitai? Enti kitai nemu diri enda ransing baka suba, kitai patut ngenalamka agi asai beterima kasih ngagai semua utai ke manah ke digaga Jehovah, sereta utai ke disediaka gerempung Iya ke kitai. (Pem. 3:18) Kitai enda patut nejuka pengingin deka bisi pengidup ti nyamai agi ngachau kitai nyentukka sembah kitai ngagai Jehovah nyadi lumur dua ba pengidup.

9. Nitihka pesan Jesus ngagai orang Kristian ba Pergamum enggau Tiatira, kitai patut nulak nama?

⁹ Kitai patut nulak ajar orang ke limpang ari pengarap. Jesus ngerara sekeda orang Kristian ba Pergamum laban meransang ulah ti enda beserakup sereta nitihka ajar orang ke limpang ari pengarap. (Pem. 2:14-16) Tang Jesus muji sida ba Tiatira ke udah nulak “resia ti dalam ti datai ari Sitan.” Lalu, Jesus mega meransang sida “bepegai teguh” ba pemendar. (Pem. 2:24-26) Sida ke nitihka ajar ti pelesu patut nesal ati ke dosa sida. Baka ni enggau kitai kemayaharitu? Kitai patut nulak sebarang ajar ke enda sejalai enggau runding Jehovah. Orang ke limpang ari pengarap “baka ke bepegai ba agama, tang sida besangkalka kuasa agama nya.” (2 Tim. 3:5) Kitai senang agi nemu sereta nulak ajar ti pelesu enti kitai bagas belajarka Bup Kudus.—2 Tim. 3:14-17; Jud. 3, 4.

10. Nama utai bukai ke ulih dipelajarka kitai ari pesan Jesus ngagai eklisia ba Pergamum enggau Tiatira?

 ¹⁰ Kitai patut nulak semua bengkah ulah ti kamah, sereta enda ngereja tauka setuju enggau nya. Eklisia ba Pergamum enggau Tiatira agi bisi penanggul ke bukai. Jesus ngerara sekeda orang ba eklisia ke enda nulak ulah ti kamah. (Pem. 2:14, 20) Nama ulih dipelajarka kitai? Kitai enda ulih ngarapka Jehovah nerima kitai enti kitai nerima tauka ngereja ulah ti kamah. Lalu tu enda ngira sekalika kitai udah lama nyembah Jehovah tauka bisi mayuh tanggung pengawa ba gerempung Iya. (1 Sam. 15:22; 1 Pet. 2:16) Jehovah deka kitai terus ngetanka standard moral Iya ti tinggi taja pan standard moral dunya majak jai.—Eps. 6:11-13.

11. Nama udah dipelajarka kitai naka ke diatu? (Peda mega kutak “ Utai ke Dipelajarka Kitai Kemayaharitu.”)

¹¹ Nama udah dipelajarka kitai naka ke diatu? Kitai udah belajar kebuah kitai patut nentuka sembah kitai diterima Jehovah. Enti kitai nemu diri benung ngereja utai ti ngasuh sembah kitai enda diterima Jehovah, kitai patut jampat ngaga ubah. (Pem. 2:5, 16; 3:3, 16) Tang, Jesus mega bisi madahka pesan bukai ngagai tujuh iti eklisia nya. Nama utai nya?

12. Nama ulih dipelajarka kitai ari pesan Jesus ngagai orang Kristian ba Smirna enggau Piladelpia? (Pemandang 2:10)

¹² Diatu, aram kitai beratika pesan Jesus ngagai eklisia ba Smirna enggau Piladelpia. Jesus madah sida enda ibuh takutka pemerinsa laban Jehovah deka ngupah penetap ati sida. (Bacha Pemandang 2:10; 3:10) Nama ulih dipelajarka kitai kemayaharitu? Kitai patut ngadang pemerinsa tentu deka nyadi, lalu kitai sanggup ngenatka pemerinsa nya. (Mat. 24:9, 13; 2 Kor. 12:10) Nama kebuah pengingat tu amat penting?

13-14. Nama utai ke nyadi ngagai nembiak Petara pengudah utai ke nyadi ba Pemandang bagi 12 dikeamatka?

¹³ Bup Pemandang madah nembiak Petara deka diperinsa maya ‘Hari Tuan,’ iya nya maya kitai diatu. Pemandang bagi 12 madah pasal perang ke nyadi ba serega enda lama pengudah Jesus nyadi Raja. Mikael, iya nya Jesus pengudah iya pulai ke serega, enggau bala melikat iya beperang ngelaban Sitan enggau bala melikat ti jai. (Pem. 12:7, 8) Pengujung iya, bala munsuh Petara dialahka lalu dibuai ngagai dunya. Sida ke jai tu mai mayuh penusah ngagai mensia. (Pem. 12:9, 12) Tang nama nyadi ngagai nembiak Petara pengudah utai nya nyadi?

¹⁴ Bup Pemandang nunjukka asai ati Sitan pengudah perang nya nyadi. Iya enda ulih pulai baru ngagai serega. Nya alai Sitan nyerang  nembiak Petara ba dunya, iya nya bala menyadi ti dipilih ke serega. Sida tu pengari Perintah Petara ke “besaksika Jesus.” (Pem. 12:17; 2 Kor. 5:20; Eps. 6:19, 20) Baka ni jaku ti benabi tu dikeamatka?

15. Sapa “dua iku saksi” ke disebut ba Pemandang bagi 11, lalu nama nyadi ngagai “dua iku saksi” nya?

¹⁵ Sitan nyerang bala menyadi ti dipilih ke serega, ti ngiring pengawa nginjil pasal Perintah Petara. Bala menyadi tu meh ke dikumbai “dua iku saksi” ba bup Pemandang. Lalu, bup Pemandang madahka “dua iku saksi” tu dibunuh. b (Pem. 11:3, 7-11) Tu ketegal ba taun 1918, lapan iku bala menyadi ke ngiring ba gerempung dituduh ngereja penyalah sereta dijil ba timpuh ti lama. Ba runding orang, pengawa ke dikereja sida ti dipilih ke serega baka ke udah ngetu.

16. Nama utai ke enda disangka nyadi ba taun 1919, tang kenyau ari nya nama terus digaga Sitan?

¹⁶ Jaku benabi ba Pemandang bagi 11 mega madahka “dua iku saksi” tu diangkatka idup baru. Jaku benabi tu dikeamatka enggau chara ke enda disadang. Tu ketegal, bisi utai ke nyadi enda lama pengudah sida kena jil. Ba bulan tiga taun 1919, bala menyadi ti dipilih ke serega tu dilepaska ari jil. Lalu, jaku tuduh ke diberi ngagai sida ditarit baru. Nya alai, bala menyadi tu enggau jampat ngiring baru pengawa nginjil sereta ngajar pasal Perintah Petara. Tang tu enda nagang Sitan terus nyerang nembiak Petara. Kenyau ari nya, pemerinsa ke dikenataika Sitan ngagai nembiak Petara baka “ai bah.” (Pem. 12:15) Nyadi, tiap iku kitai “begunaka ati ti tan enggau pengarap” ngambika ulih tan ngenatka pemerinsa.—Pem. 13:10.

17. Taja pan nembiak Petara diserang Sitan, nama tulung ke datai ti enda disangka sida?

¹⁷ Bup Pemandang bagi 12 madahka nembiak Petara deka nerima tulung ke enda dijangka. Tu disemaka enggau “tanah” ti nelan “ai.” Ba ayat tu, ai nya ngambarka pemerinsa ke ninggang nembiak Petara. (Pem. 12:16) Lalu tu meh utai ke udah nyadi. Kekadang utai ke bisi ba dunya Sitan, baka sistem undang-undang mensia, ngaga pemutus ti manah ke nulung nembiak Petara. Kesuah iya, nembiak Petara menang kes ba kot. Nyadi, tu meri sida peluang ulih bibas nyembah Petara.  Baka ni nembiak Petara ngena peluang tu? Sida ngereja pengawa ke diberi Jehovah enggau pengabis ati. (1 Kor. 16:9) Nama utai ke disengkaum enggau pengawa tu?

18. Nama pengawa kitai ke amat penting ba hari ti penudi tu?

¹⁸ Jesus madahka nembiak iya deka ngerembaika “Berita Manah pasal Perintah Petara” di serata dunya sebedau pengujung datai. (Mat. 24:14) Lebuh sida nginjil, sida nerima tulung ari seiku melikat tauka ari seraban melikat. Bup Kudus madah bala melikat bisi enggau mai “Berita Manah ti meruan belama iya ti deka ditusui ngagai orang ke diau di dunya, ngagai semua bansa, raban bansa, jaku enggau menua.”—Pem. 14:6.

19. Nama pesan ke bukai ke patut ditusui sida ti rinduka Jehovah?

¹⁹ Nembiak Petara ukai semina nusui Berita Manah pasal Perintah Petara aja. Sida mega patut nyukung pengawa bala melikat baka ke dipadah ba Pemandang bagi 8 nyentuk ngagai bagi 10. Bala melikat madahka penusah ti deka nyadi ngagai sida ke nulak Perintah Petara. Saksi-Saksi Jehovah deka madahka berita pasal Petara ti deka ngakim dunya Sitan. Bup Kudus madahka, pesan tu baka “ujan batu enggau api.” (Pem. 8:7, 13) Orang patut nemu pengujung majak semak ngambika sida ulih ngubah chara pengidup sereta ulih selamat lebuh hari pengeringat Jehovah datai. (Sep. 2:2, 3) Tang orang enda entu nemu pesan tu. Kitai patut berani madahka pesan tu. Maya penusah ti besai, pesan nya deka ngasuh orang balat agi ringat.—Pem. 16:21.

20. Nama deka dikerandauka kitai ba dua iti artikel pengudah tu?

²⁰ Kitai patut beratika “jaku ti benabi tu” laban kitai bisi begian enggau utai ke nyadi ba bup Pemandang. (Pem. 1:3) Tang baka ni kitai ulih tan ngenatka pemerinsa lalu terus nginjil enggau berani? Kitai deka dikeringka nengah dua iti pekara tu: (1) utai ke dipadah ba bup Pemandang pasal munsuh Petara. Lalu (2) berekat ke deka diulih kitai enti kitai mengkang tetap ati. Kitai deka belajar dua iti pekara tu ba dua iti artikel pengudah tu.